ຂ່າວຕ່າງແຂວງ

ໂຄງການກໍ່ສ້າງນໍ້າປະປາ ແລະສຸຂາພິບານ ຕົວເມືອງນ້ອຍ ເມືອງທ່າແຕງ ແຂວງເຊກອງ

ໃນ​ການ​ພັດທະນາ​ພື້ນຖານ​ໂຄງ​ລ່າງ​ເສດຖະກິດ​ແຫ່ງ​ຊາດ ຂອງ​ປະ​ເທດ​ເຮົາ​ນັ້ນ ປະກອບດ້ວຍຫລາຍດ້ານ, ການພັດທະນາ​ດ້ານ​ເຄຫາສະຖານ-ຜັງ​ເມື​ອງ ​ແລະພັດທະນາ​ຕົວ​ເມືອງ, ​ນໍ້າ​ປະປາ ​​ກໍ່ແມ່ນປັດໃຈທີ່​ສໍາຄັນ​ ແລະຈໍາເປັນ. ​ເວົ້າ​ສະ​ເພາະ​ການ​ພັດທະນາ​ລະບົບ​ນໍ້າ​ປະປາ ແມ່ນເປັນບູລິມະສິດໜຶ່ງທີ່ຂາດບໍ່ໄດ້ ເພື່ອສະໜອງນໍ້າສະອາດໃຫ້ແກ່ປະຊາຊົນບັນດາເຜົ່າໄດ້ຊົມໃຊ້ເຂົ້າໃນ​ການ​ດໍາລົງ​ຊີວິ​ດປະຈໍາວັນ ຂອງເຂົາເຈົ້າ.  ​

      ຢູ່ເມືອງທ່າແຕງ ແຂວງເຊກອງ, ຂະແໜງເຄຫາ-ຜັງເມືອງ-ສິ່ງແວດລ້ວມ ແລະນໍ້າປະປາ ທີ່ຂື້ນກັບພະແນກໂຍທາທິການ ແລະ ຂົນສົ່ງ ປະຈໍາແຂວງ ໄດ້ຕັ້ງໜ້າປະກອບສ່ວນ ໃນການສະໜອງນໍ້າສະອາດໃຫ້ແກ່ພໍ່ແມ່ປະຊາຊົນບັນດາເຜົ່າ, ໂດຍສະເພາະ ແມ່ນການສະໜອງນໍ້າປະປາ ແລະ ສຸຂາພິບານໃນຂອບເຂດ 6 ໜູ່ບ້ານ ຄື: ບ້ານກົງຕາຢຸນ, ບ້ານທ່າແຕງເໜືອ, ບ້ານທ່າແຕງໃຕ້, ບ້ານຫ້ວຍຊາຍ, ບ້ານປົ່ງເໜືອ ແລະບ້ານປົ່ງໃຕ້. ລວມມີ 2000 ກວ່າຄອບຄົວ, ແນໃສ່ໃຫ້ປະຊາຊົນຫລາຍກວ່າ 9 ພັນຄົນໃຫ້ໄດ້ ຊົມໃຊ້ນໍ້າປະປາທີ່ສະອາດ. ການກໍ່ສ້າງອ່າງເກັບນໍ້າປະປາ ທີ່ເມືອງທ່າແຕງ ແຂວງເຊກອງ ຈະສາມາດຜະລິດນໍ້າໄດ້ 2700 ແມັດ ກ້ອນຕໍ່ວັນ. ໂຄງການດັ່ງກ່າວໄດ້ຮັບທຶນຊ່ວຍເຫຼືອຈາກ ADB 90% ແລະທຶນສົມທົບຈາກລັດຖະບານ ສປປ ລາວ 10% ມູນຄ່າ ໃນການກໍ່ສ້າງ 1.771.425 ໂດລາສະຫະລັດ. ໂດຍມອບໃຫ້ບໍລິສັດ ພຸດປະເສີດກໍ່ສ້າງ-ສ້ອມແປງ ເຄຫາສະຖານ ເປັນຜູ້ຮັບເໝົາ ການກໍ່ສ້າງ. ເຊິ່ງໄດ້ເລີ່ມລົງມືການກໍ່ສ້າງໃນ ວັນທີ 13 ມີນາ 2013 ແລະຈະໃຫ້ສໍາເລັດໃນວັນທີ 13 ກັນຍາ 2014 ປະຈຸບັນ ການກໍ່ສ້າງມີຄວາມຄືບໜ້າໄປແລ້ວ 20% ຂອງໜ້າວຽກທັງໝົດ.

ນອກຈາກນີ້, ຍັງໄດ້ມີການປັບປຸງສະພາບແວດລ້ອມໃນຕົວເມືອງທ່າແຕງ, ສ້າງຮ່ອງລະບາຍນໍ້າໃນຕົວເມືອງ ປະມານ 2000 ແມັດ. ນອກນັ້ນ, ຍັງໄດ້ສ້າງທາງຍ່າງ, ຮ່ອງລະບາຍນໍ້າ, ສ້າງວິດຖ່າຍ ໃຫ້ກັບຄອບຄົວຜູ້ທຸກຍາກ ແລະຫ້ອງການບ້ານ ຈຳນວນ 6 ບ້ານ.

      ພາຍຫຼັງໂຄງການກໍ່ສ້າງສໍາເລັດ ຈະສາມາດສະໜອງນໍ້າສະອາດ ແລະສຸຂາພິບານຂອງເມືອງໃຫ້ ແກ່ປະຊາຊົນບັນດາ ເຜົ່າໄດ້ ຊົມໃຊ້, ເປັນການປະຢັດເວລາໃນການຊອກຫານໍ້າ, ເປັນຕົວເມືອງໄດ້ຮັບການພັດທະນາ, ຫລຸດຜ່ອນການເກີດພະຍາດ ແລະ ເຮັດ ໃຫ້ຊີວິດການເປັນຢູ່ຂອງປະຊາຊົນໃນເຂດດັ່ງກ່າວດີຂື້ນຕື່ມ.

ພິທີ ມອບ-ຮັບ ແລະເປີດການນໍາໃຊ້ ຂົວເຊກະໝານ II ທີ່ ແຂວງອັດຕະປື

ພາຍຫຼັງທີ່ໄດ້ດໍາເນີນການກໍ່ສ້າງ ຂົວເຊກະໜານ 2 ມາແຕ່ເດືອນ ພະຈິກ 2011 ມາເຖິງວັນທີ 26 ສິງຫາ 2013 ໄດ້ຈັດພິທີ ມອບ-ຮັບ ແລະເປີດນໍາໃຊ້ຂົວດັ່ງກ່າວ ຢ່າງເປັນທາງການ ໂດຍການ ເຂົ້າຮ່ວມຂອງ ທ່ານ ສົມສະຫວາດ ເລັ່ງສະຫວັດ, ຮອງນາຍົກລັດຖະມົນຕີ, ຜູ້ຊີ້ນໍາວຽກງານເສດຖະກິດ, ທ່ານ ດຣ ຄໍາພັນ ພົມມະທັດ, ເຈົ້າແຂວງ ແຂວງອັດຕະປື, ທ່ານ ນາງ ຈຸນໂກ ໂຍໂກຕະ (Junko YOKOTA) ເອກອັກຄະລັດຖະທູດວິສາມັນ ຜູ້ມີອໍານາດເຕັມແຫ່ງປະເທດຍີ່ປຸ່ນ ປະຈໍາລາວ, ພ້ອມດ້ວຍແຂກທີ່ຖືກຮັບເຊີນຈາກບັນດາ ແຂວງອ້ອມຂ້າງ, ບັນດາກະຊວງທີ່ກ່ຽວຂ້ອງ ແລະອໍານາດການປົກຄອງທ້ອງຖິ່ນ ພ້ອມດ້ວຍພໍ່ແມ່ປະຊາຊົນເຂົ້າຮ່ວມຢ່າງພ້ອມພຽງ.

ໃນພິທີການ ມອບ-ຮັບ ແລະເປີດການນໍາໃຊ້ຂົວເຊກະໝານ 2, ທ່ານ ສົມໄຊ ລຸນທະປັນຍາ ຫົວໜ້າບໍລິສັດຜູ້ຮັບເໝົາໂຄງການ ກໍ່ສ້າງຂົວດັ່ງກ່າວ ໄດ້ຂື້ນລາຍງານໂດຍຫຍໍ້ກ່ຽວກັບ ຜົນສໍາເລັດຂອງໂຄງ ການກໍ່ສ້າງວ່າ: ຂົວເຊຂະໝານ 2 ແມ່ນ ຕັ້ງຢູ່ລະຫວ່າງ ບ້ານສາມັກຄີໄຊ ແລະ ບ້ານເຊກະໝານ ເມືອງສາມັກຄີໄຊແຂວງ ອັດຕະປື, ມີຈຸດເລີ່ມຕົ້ນທີ່ບ້ານສາມັກຄີໄຊ ຢູ່ກິໂລແມັດທີ 1+200 ຂອງເສັ້ນ ທາງເລກທີ 18B ຕັດຜ່ານແມ່ນ້ຳ ເຊກະໝານຫາເສັ້ນທາງ 1J ທີ່ຫ່າງຈາກບ້ານເຊກະໝານ ມາທາງ ເມືອງພູວົງປະມານ 1 ກມ. ຂົວດັ່ງກ່າວ ຈະເປັນເສັ້ນທາງເຊື່ອມຕໍ່ລະຫວ່າງເສັ້ນທາງເລກທີ 18B ກັບເສັ້ນທາງ 1J ໄປຫາເມືອງພູວົງ ຫຼືໄປຫາຊາຍແດນ ກຳປູເຈັຍ. ໂຄງການດັ່ງກ່າວນີ້ແມ່ນໄດ້ຮັບທຶນການຊ່ວຍເຫຼືອລ້າຈາກ ລັດຖະບານຍີ່ປຸ່ນ ຈຳນວນ 2.6 ລ້ານໂດລາ ສະຫະລັດ ແລະ ທຶນສົມທົບພາຍໃນຂອງ ສປປລາວ 3.27 ລ້ານໂດລາສາຫະລັດ ລວມທັງໜົດ 5.87 ລ້ານໂດລາ ສະຫະລັດ, ໂດຍແມ່ນ ບໍລິສັດລັດ ວິສາຫະກິດວິສະວະກຳຄົມມະນາຄົມ (LTEC) ເປັນຜູ້ລົງມືສຳຫຼວດ-ອອກແບບ ແລະໄດ້ມອບໃຫ້ບໍລິສັດລັດວິສາຫະກິດກໍ່ສ້າງ ຂົວທາງເລກ 8 (R8CE) ເປັນຜູ້ຮັບເໝົາການກໍ່ສ້າງ ຮ່ວມກັບບໍລິສັດ ສົມໄຊຈະເລີນກໍ່ສ້າງ (SXCC). ໃນສັນຍາເບື້ອງຕົ້ນ ໄລຍະຂອງ ການກໍ່ສ້າງແມ່ນ 24 ເດືອນ, ເລີມແຕ່ວັນທີ 5 ສິງຫາ 2010 ເປັນຕົ້ນມາ. ແຕ່ເນື່ອງຈາກວ່າໃນການປະຕິບັດ ມີບາງໜ້າວຽກເພີ່ມຂຶ້ນ 15% ຂອງມູນຄ່າສັນຍາ ເບື້ອງຕົ້ນ, ໂດຍອີງຕາມບົດບັນທຶກກອງປະຊຸມໃນວັນທີ 31 ກໍລະກົດ 2012 ທີ່ພະແນກ ຍທຂ ແຂວງ ອັດຕະປື ແລະ ຂໍ້ຕົກລົງຂອງເຈົ້າແຂວງ ແຂວງອັດຕະປື ສະບັບເລກທີ 1099/ຈຂ.ອປ ວັນທີ 9 ສິງຫາ 2012. ມາໃນວັນທີ 5 ສິງຫາ 2012 ຈຶ່ງໄດ້ມີການຕໍ່ສັນຍາການກໍ່ສ້າງຕື່ມອີກ 09 ເດືອນ. ເລີ່ມແຕ່ວັນທີ 6 ສິງຫາ 2012 ຫາວັນທີ 5 ພຶດສະພາ 2013, ໄລຍະການກໍ່ສ້າງລວມທັງໜົດ 33 ເດືອນ ແລະ ໄລຍະການຄ່ຳປະກັນ 12 ເດືອນ. ຂົວດັ່ງກ່າວແມ່ນໄດ້ຮັບການອອກແບບ ຕາມມາດ ຕະຖານສາກົນ ທີ່ມີຄວາມຍາວທັງໜົດ 208 ແມັດ, ກ້ວາງທັງໜົດ 11.5 ແມັດ, ໜ້າທາງລົດແລ່ນມີ 2 ເລ່ນກວ້າງເລ່ນລະ 3.75 ແມັດທັງໜົດ 7.5 ແມັດ, ມີທາງຍ່າງສອງເບື້ອງກວ້າງເບື້ອງ ລະ 1.5 ແມັດ ເປັນຂົວປະເພດຂາງເບຕົງທີ່ອັດແຮງຮູບຕົວໄອ (I) ຊ່ວງຍາວ 33 ແມັດມີຈຳນວນທັງໜົດ 6 ຊ່ວງ. ນອກນີ້ຍັງມີທາງເຂົ້າຂົວຍາວທັງໜົດ 3.7 ກມ, ທາງກວ້າງທັງໜົດ 9 ແມັດລວມ ມີບ່າທາງເບື້ອງລະ 1 ແມັດ.

ໃນພິທີ ທີ່ມີຄວາມໝາຍອັນສໍາຄັນນີ້ ທ່ານ ນາງ ຈຸນໂກະ ໂຍໂກຕະ, ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ປະເທດ ຍີ່ປຸ່ນ ປະຈໍາລາວ ແລະ ທ່ານ ດຣ ຄໍາພັນ ພົມມະທັດ, ເຈົ້າແຂວງ ແຂວງອັດຕະປື ໄດ້ມີຄໍາເຫັນ ເຊິ່ງທ່ານໄດ້ຍົກໃຫ້ ເຫັນເຖິງຄວາມ ສໍາຄັນຂອງການເຊື່ອມໂຍງລະຫວ່າງ ອາຊຽນຍີ່ປຸ່ນ, ການພັດທະນາເຂດ 3 ຫຼ່ຽມເສດຖະກິດ ລາວ-ຫວຽດ-ກໍາປູເຈຍ ໃຫ້ເຂັ້ມແຂງ ແລະພັດທະ ນາເສດຖະກິດໃນອານຸພາກພື້ນ. ເພື່ອເຮັດໃຫ້ຊີວິດການເປັນຢູ່ຂອງປະຊາຊົນໃນເຂດ ທ້ອງຖິ່ນ ໃຫ້ມີການພັດທະນາດີ ຂື້ນພ້ອມກັນທະນຸບໍາລຸງ ແລະນໍາໃຊ້ຂົວດັ່ງກ່າວໃຫ້ມີປະສິດທິພາບ ແລະຍາວນານ. ໃນຕອນທ້າຍຂອງພິທີອັນສໍາຄັນນີ້ ຄະນະນໍາ ທັງສອງຝ່າຍກໍໄດ້ໃຫ້ກຽດຂື້ນຕັດແຖບຜ້າ ແລະເປີດປ້າຍການນໍາໃຊ້ ຂົວຂ້າມນໍ້າເຊກະໝານ 2 ຢ່າງເປັນທາງການ ໃນທ່າມກາງ ບັນຍາກາດທີ່ອົບອຸ່ນ, ສະນິດສະໜົມ ແລະຝົດຟື້ນ.

ໂຄງການກໍ່ສ້າງທາງ ໃນເທດສະບານ ເມືອງທ່າແຕງ

ໂຄງການກໍ່ສ້າງເສັ້ນທາງໃນເທດສະບານເມືອງທ່າແຕງ ແຂວງເຊກອງ ເປັນໂຄງການບຸລິມະສິດໜຶ່ງທີ່ສໍາຄັນ ໃນການເຊື່ອມຕໍ່ ລະຫວ່າງ ເມືອງຕໍ່ເມືອງ ແລະ ລະຫວ່າງບັນດາແຂວງ ພາກໃຕ້ຂອງລາວ ເພື່ອອໍານວຍຄວາມສະດວກໃນການໄປມາຫາສູ່, ການ ທ່ອງທ່ຽວ, ການຂົນສົ່ງສິນຄ້າ ໃຫ້ມີຄວາມສະດວກວ່ອງໄວ ແລະມີຄວມປອດໄພ.

      ໂຄງການກໍ່ສ້າງເສັ້ນທາງ ໃນເຂດເທດສະບານເມືອງທ່າແຕງ ມີໄລຍະທາງທັງໝົດ 17.5 ກມ. ປູຢາງ 5 ກມ, ປູດິນແດງ 12.5 ກມ ແລະສວນສາທາລະນະ 1 ຈຸດ. ທາງດັ່ງກ່າວ ເປັນທາງຊັ້ນສີ່, ໜ້າທາງກວ້າງທັງໝົດ 20 ແມັດ, ຄວາມກວ້າງຂອງໜ້າທາງ ລົດແລ່ນ 16 ແມັດ ແບ່ງອອກເປັນ 4 ເລນ, ໜ້າທາງປູດ້ວຍຢາງສອງຊັ້ນ, ບ່າທາງກວ້າງເບື້ອງລະ 2 ແມັດ (ມີດອນກາງທາງກວ້າງ 1 ແມັດ ຢູ່ໃນເຂດຊຸມຊົນ), ແບ່ງອອກເປັນ 4 ເລນ, ໜ້າທາງປູດ້ວຍຢາງສອງຊັ້ນ. ໂຄງສ້າງຊັ້ນພື້ນທາງ Basecourse ປະກອບດ້ວຍ ຊັ້ນຫີນຂົບໜາ 20 ຊມ, ຊັ້ນຮອງພື້ນທາງ Subbasecourse ໜາ 20 ຊມ. ຊັ້ນວັດສະດຸຄັດເລືອກ Subgrade ໜາ 30 ຊມ, ອອກແບບບົນພື້ນ ຖານຄວາມໄວສູງສຸດ 60 ກມ/ຊມ. ຕໍ່າສຸດ 30 ກມ/ຊມ, ລັດສະໝີ ທາງຮາບ ໃຫຍ່ສຸດ 1500 ມ ແລະ ໜ້ອຍສຸດ 60 ມ. ໂດຍແມ່ນ ບໍລິສັດທີ່ປຶກສາ ເອັດຈີ່ ເປັນຜູ້ສໍາຫຼວດອອກແບບ.

      ໂຄງການດັ່ງກ່າວນີ້ ໄດ້ເລີ່ມກໍ່ສ້າງແຕ່ວັນທີ 25 ກຸມພາ 2013 ໂດຍແມ່ນບໍລິສັດ ທອງສະຫວັດ ກໍ່ສ້າງຂົວ-ທາງ ຈໍາກັດ ເປັນຜູ້ຮັບເໝົາກໍ່ສ້າງ ໃນມູນຄ່າສັນຍາທັງໝົດ  105.000.000.000 ກີບ (ໜຶ່ງ ຮ້ອຍຫ້າຕື້ກີບ) ແລະຈະໃຫ້ສໍາເລັດພາຍໃນ 3 ປີ ຕາມກໍານົດສັນຍາ. ໂດຍພາຍໃຕ້ການຊີ້ນໍາຂອງ ທ່ານເຈົ້າແຂວງ ແຂວງເຊກອງ, ພະແນກໂຍທາທິການ ແລະຂົນສົ່ງ ປະຈໍາແຂວງ ເຊກອງ. ກໍ່ໄດ້ລົງຕິດຕາມ, ກວດກາ, ຊຸກຍູ້ການກໍ່ສ້າງຢ່າງເປັນປົກກະຕິ ເພື່ອໃຫ້ການຈັດຕັ້ງປະຕິບັດສໍາເລັດຕາມລະດັບຄາດໝາຍ ທີ່ວາງໄວ້.

ໂຄງການກໍ່ສ້າງ, ຍົກຍ້າຍ ແລະຈັດ ສັນເທດສະບານ ເມືອງ ກະລືມໃໝ່

ເມືອງກະລືມ ເປັນເມືອງໜຶ່ງໃນຈໍານວນ 4 ເມືອງ ຂອງແຂວງເຊກອງ ຊຶ່ງມີທີ່ຕັ້ງຢູ່ເຂດພູ ດອຍຫ່າງໄກສອກຫຼີກ. ຫ່າງ ຈາກເທດສະບານແຂວງປະມານ 75 ກມ ແລະມີຄວາມຫຍຸ້ງຍາກສໍາລັບ ການພັດທະນາ, ເປັນເມືອງໜຶ່ງໃນຈໍານວນ 47 ເມືອງທີ່ທຸກຍາກທີ່ສຸດໃນທົ່ວປະເທດ. ລະດັບການພັດທະ ນາຍັງຕໍ່າ ໂດຍສະເພາະການພັດທະນາດ້ານພື້ນຖານ ໂຄງລ່າງ ຍັງຂາດແຄນຊັບພະຍາກອນມະນຸດ ທີ່ມີ ຄວາມຮູ້, ຄວາມສາມາດ ການພັດທະນາດ້ານການສຶກສາ ແລະ ການຂະຫຍາຍຕາໜ່າງສາທາລະນະສຸກ ຍັງບໍ່ທັນທົ່ວເຖິງ, ການຜະລິດຍັງອາໃສທໍາມະຊາດ, ຂາດເນື້ອທີ່ ທໍາການຜະ ລິດ, ມີອາຊີບເຮັດໄຮ່ເປັນຕົ້ນ ຕໍ ແຕ່ລະປີຍັງຂາດເຂົ້າກິນ ປະຊາຊົນມີລາຍໄດ້ຕໍ່າ, ຄວາມທຸກຍາກມີອັດຕາສ່ວນສູງ ເມື່ອທຽບກັບເມືອງ ອື່ນໆ. ເມືອງກະລືມເຖິງວ່າເປັນເມືອງທີ່ທຸກຍາກທີ່ສຸດ ນອນໃນ 47 ເມືອງທົ່ວປະເທດ. ແຕ່ເມືອງກະລືມ ເປັນເມືອງທີ່ເຕັມໄປດ້ວຍຊັບພະຍາກອນທໍາມະຊາດ, ແຮ່ທາດ, ແຫຼ່ງນໍ້າທີ່ອຸດົມສົມບູນຢ່າງຫຼວງຫຼາຍ ທີ່ບົ່ມຊ້ອນຢູ່ຂົງເຂດດັ່ງກ່າວ ເຊິ່ງເປັນທ່າແຮງທາງດ້ານອຸດສາຫະກໍາເຊັ່ນ: ທ່າແຮງທາງດ້ານຜະລິດພະ ລັງງານໄຟຟ້າ ນໍ້າຕົກ (ເຂື່ອນເຊກອງ 4, ເຊກອງ 5) ແລະທ່າແຮງທາງດ້ານບໍ່ແຮ່ ເປັນຕົ້ນແມ່ນບໍ່ຖ່ານ ຫີນ, ບໍ່ເຫຼັກ, ບໍ່ທອງຄໍາ ແລະ ແຮ່ທານອື່ນໆ.

        ສາເຫດທີ່ພາໃຫ້ມີການຍົກຍ້າຍເມືອງກະລືມ. ສາເຫດທີ 1: ຍ້ອນພື້ນທີ່ຂອງເມືອງກະລືມໃນ ປັດຈຸບັນ ແມ່ນ ນອນໃນເຂດນໍ້າຖ້ວມ ອ່າງໂຕ່ງໂຄງການໄຟຟ້າເຊກອງ 4, ເຊກອງ 5 ຕາມແຜນພັດ ທະນາ ເສດຖະກິດ-ສັງຄົມ 5 ປີຄັ້ງທີ 6 ແລະຄັ້ງທີ 7 ຂອງລັດຖະບານ ແລະເປັນເຂດພື້ນທີ່ຂຸດຄົ້ນ ບໍ່ຖ່ານຫີນ ຂອງບໍລິສັດທີ່ໄດ້ຮັບການອະນຸຍາດ ສໍາປະທານ ຈາກລັດຖະບານ, ຊຶ່ງເປັນບ້ານທີ່ມີບໍລິມາດ ຖ່ານຫີນຈໍານວນຫຼວງຫຼາຍ. ສະນັ້ນລັດຖະບານຈື່ງ ໄດ້ຕົກລົງໃຫ້ຂຸດຄົ້ນໄມ້ ອອກຈາກພື້ນທີ່ດັ່ງກ່າວນີ້ ແມ່ນຈຸດເລີ້ມຕົ້ນຂອງໂຄງການ. ສາເຫດທີ 2: ມີຄວາມສ່ຽງຕໍ່ ສະພາບໄພທໍາມະຊາດ ໄດ້ເຄີຍເກີດນໍ້າ ຖ້ວມຫຼາຍຄັ້ງ. ຄັ້ງລ້າສຸດໃນທ້າຍປີ 2009 ເມືອງກະລືມ ໄດ້ຮັບຜົນກະທົບຢ່າງ ໜັກໜ່ວງ ຈາກພາຍຸ ເກດສະໜາ ເຮັດໃຫ້ສໍານັກງານຫ້ອງການຂອງລັດ, ບ້ານເຮືອງຂອງປະຊາຊົນ ແລະເຂດທໍາການ ຜະລິດ ຂອງປະຊາຊົນຖືກນໍ້າປ່າໄຫຼຊຸ ທັງເຮັດໃຫ້ໄດ້ຮັບຄວາມເສຍຫາຍ ເປັນມູນຄ່າມະຫາສານ ໂດຍສະເພາະ ແມ່ນເຂດເທດສະບານ ທີ່ເປັນຈຸດສໍາຄັນຂອງເມືອງ ແມ່ນໄດ້ຮັບຜົນກະທົບຫຼາຍກວ່າບ່ອນອື່ນ. ສາເຫດທີ 3: ຍ້ອນວ່າທີ່ຕັ້ງຂອງ ເມືອງກະລຶມໃນປັດຈຸບັນບໍ່ເໝາະສົມ, ມີຄວາມຫຍຸ້ງຍາກໃນດ້ານການ ປົກຄອງ, ດ້ານການພັດທະ ນາ, ການແກ້ໄຂຄວາມທຸກຍາກ ກໍ່ຄືການປົກປັກຮັກສາຄວາມສະຫງົບຢູ່ຊາຍແດນ, ຍ້ອນພົນລະເມືອງຂອງເມືອງ ກະລືມ 90% ແມ່ນອາໃສຢູ່ຟາກນໍ້າເຊກອງ ເບື້ອງຕາເວັນອອກລຽບ ຊາຍແດນເປັນສ່ວນໃຫຍ່. ຍ້ອນທີ່ຕັ້ງເມືອງກະລຶມ ເກົ່າຕັ້ງຢູ່ຫ່າງໄກ ຈາກບັນດາກຸ້ມບ້ານ ເຮັດໃຫ້ການໄປ ມາຫາສູ່ແຕ່ກຸ່ມບ້ານ ຫາເມືອງມີຄວາມຍາກລໍາບາກ ແລະພື້ນທີ່ ບໍ່ສາມາດຮອງຮັບ ໃຫ້ແກ່ການພັດທະນາ ໃນອານາຄົດໄດ້. ສາເຫດທີ 4: ຖືວ່າໂຄງການດັ່ງກ່າວເປັນພັນທະຂອງ ພັກ-ລັດຖະບານລາວ ທີ່ມີຕໍ່ທ້ອງ ຖິ່ນວິລະຊົນ, ຊົນເຜົ່າພູດອຍ ທີ່ໄດ້ປະກອບສ່ວນເຮັດການປະຕິວັດ ປົດປ່ອຍຊາດ ໃນເມື່ອກ່ອນຕາມແນວ ທາງ ແຜນນະໂຍບາຍຂອງພັກ.

        ຍ້ອນສາເຫດດັ່ງກ່າວ, ພັກ-ລັດຖະບານ ຈຶ່ງຕົກລົງໃຫ້ກໍ່ສ້າງເມືອງກະລືມໃໝ່ຂື້ນ ເພື່ອຍົກຍ້າຍ ຈາກບ່ອນເກົ່າ ໄປຢູ່ຂົງເຂດ ບ້ານວັກ ເຊິ່ງຫ່າງຈາກ ເມືອງກະລຶມເກົ່າໄປປະມານ 32 ກມ, ເຊິ່ງເປັນ ບ່ອນທີ່ມີຄວາມເໝາະສົມກວ່າໝູ່ ສະພາບພູມມີປະເທດເປັນຫຼຸບໂນນ ມີລະດັບຄວາມສູງຫ່າງຈາກໜ້ານໍ້າ ທະເລປະມານ 580 ແມັດ, ມີແຫຼ່ງນໍ້າທີ່ ອຸດົມສົມບູນ ທີ່ສາມາດສະໜອງໃຫ້ເທດສະບານເມືອງໃໝ່ເຊິ່ງ ເໝາະແກ່ການຜະລິດກະສິກໍາ, ປູກຝັງ, ລ້ຽງສັດ ແລະ ອື່ນໆ. ເມື່ອໄດ້ຮັບການຊີ້ນໍາຈາກ ພັກ-ລັດຖະບານ ທີ່ຕົກລົງມອບໃຫ້ກຸ່ມ ບໍລິສັດພອນສັກ ເປັນຜູ້ລົງທືນກໍ່ສ້າງ ເມືອງ ກະລືມໃໝ່ ແລະຜ່ານການກໍານົດໂຄງ ການ, ຄິດໄລ່ມູນຄ່າ, ເຈລະຈາຕໍ່ລອງ ຈິ່ງໄດ້ເຊັນສັນຍາຢ່າງເປັນທາງການ ຂື້ນໃນວັນທີ 16 ມັງກອນ 2012 ຢູ່ທີ່ໂຮງແຮມລາວພຣາຊາ. ມູນຄ່າຂອງໂຄງການຍົກຍ້າຍ ຈັດສັນເທດສະບານ ເມືອງ ກະລືມ ແມ່ນ 930.549.357.936 ກີບ ຄິດເປັນ USD = 116.318.670, ໃນນັ້ນມີມູນຄ່າວ່າຈ້າງທີ່ປືກສາ 1.110.000 ໂດລາ ແລະຮັບຮອງເອົາ ບໍລິສັດບົວລະພາພັດທະນາ ວິສາວະກອນ ທີ່ປຶກສາເປັນຜູ້ຄວບ ຄຸມການກໍ່ສ້າງ.

        ຫຼັງຈາກນັ້ນມາໃນວັນທີ 31 ມັງກອນ 2012 ທາງອໍານາດການປົກຄອງແຂວງ ແລະເມືອງສົມ ທົບກັບປະຊາຊົນ ໃນຂົງເຂດດັ່ງກ່າວ ໄດ້ພ້ອມກັນຈັດພິທີວາງສີລາລືກຂຶ້ນ ຕາມຮີດຄອງປະເພນີທາງສາ ສະໜາ ຢູ່ທີ່ເມືອງກະລືມໃໝ່ ໂດຍມີອໍານາດການປົກຄອງແຂວງ, ເມືອງ ແລະປະຊາຊົນເຂົ້າຮ່ວມຢ່າງ ພ້ອມພຽງ. ໄລຍະການປະຕິບັດໂຄງການແມ່ນ 36 ເດືອນ, ຈະໃຫ້ສໍາເລັດໂຄງການໃນວັນທີ 16 ມັງ ກອນ 2015.

      ປະຈຸບັນ ໂຄງການດັ່ງກ່າວມີຄວາມຄືບໜ້າໄປຫຼາຍ, ໜ້າວຽກທີ່ສາມາດປະຕິບັດໄດ້ມີຄື: ເກັບ ກູ້ລະເບີດທີ່ຍັງບໍ່ ທັນແຕກ ອອກຈາກເນື້ອທີ ທີ່ຈະກໍ່ສ້າງເມືອງກະລຶມໃໝ່ສໍາເລັດ 100%, ສໍາຫຼວດ-ອອກ ແບບຜັງເມືອງ, ອອກແບບ ອາຄານ, ສໍານັກງານຂອງລັດ, ເຮືອນປະຊາຊົນ ແລະແລວທາງຂື້ນຫາເມືອງ- ທາງໃນເທດສະບານເມືອງ ສໍາເລັດ, ຟື້ນຟູເສັ້ນທາງແຕ່ ເມືອງກະລືມເກົ່າ-ເມືອງກະລືມໃໝ່ ປະຕິບັດໄດ້ 45%, ປະຈຸບັນກໍາລັງສ້ອມແປງຈຸດທີ່ມີຄວາມສ່ຽງ ຕາມເສັ້ນທາງໃຫ້ສາມາດທຽວໄດ້ທັງສອງລະດູ ສາ ມາດເຄື່ອນຍ້າຍ ນໍາວັດສະດຸໄວ້ເພື່ອກໍ່ສ້າງ ໃນໄລຍະລະດູຝົນ, ປຸກເບີກສະຖານທີ່ທະລຸເສັ້ນທາງ ຕາມ ແຜນຜັງຊີ້ນໍາລວມ ແລະມີບາງອັນໄດ້ມີການປ່ຽນແປງແລວທາງ, ດັດປັບເພື່ອ ໃຫ້ເໝາະສົມກັບສະພາບ ພື້ນທີຕົວຈິງ ໂດຍສົມທົບກັບສະຖາບັນ ໂຍທາ ແລະຂົນສົ່ງ ລົງມາໃກ້ຊິດ ເປີດກອງປະຊຸມ ເພື່ອດັດແກ້ ແຜນຜັງເຊັ່ນ: ການຈັດວາງລະບົບເສັ້ນທາງ, ອາຄານທີ່ຢູ່ອາໃສ, ບາງສວນຕາມການວາງແຜນໃນເບື້ອງ ຕົ້ນ ແມ່ນຕົກຢູ່ເຫວເລິກບໍ່ສາມາດປະຕິບັດໄດ້, ບຸກເບີກເນື້ອທີດິນຕັດ, ດິນຖົມບ່ອນທີ່ປຸກສ້າງອາຄານໄດ້ ຈໍານວນໜຶ່ງ, ກໍ່ສ້າງທາງປູຢາງໃນເທດສະບານແຂວງເຊກອງ ປະຕິບັດໄດ້ປະມານ 28% ທີ່ມີມູນຄ່າ ນອນໃນມູນຄ່າກໍ່ສ້າງ ເມືອງກະລືມໃໝ່.

Additional information