ຂ່າວຕ່າງແຂວງ

ຄວາມຄືບໜ້າຂອງໂຄງການປູຢາງ ທາງແຕ່ ປາກລາຍ-ພູດູ່

ໃນ​ການ​ພັດທະນາ​​ເສດຖະກິດ-ສັງຄົມ ​ເສັ້ນທາງ​ກໍແມ່ນປັດໄ​ຈທີ່ສຳຄັນ, ສໍາລັບ​​ແຂວງ​ໄຊຍະບູລີ ແລ້ວກໍ່​ຄື​ກັບ​ແຂວງ​ອື່ນ​ໆ​​ໃນ​ທົ່ວ​ປະ​ເທດ ​​ທີ່ໄດ້​ມີ​ການ​ພັດທະນາ​ພື້ນຖານ​ໂຄງ​ລ່າງ​ ຢ່າງ​ບໍ່​ຢຸດ​ຢັ້ງ​ເປັນຕົ້ນແມ່ນ​ການ​ກໍ່ສ້າງ​ເສັ້ນທາງ, ການສ້າງຍົກລະດັບທາງ ແລະການສ້ອມແປງທາງສາຍຕ່າງໆໃນຂອບເຂດທົ່ວແຂວງໄຊຍະບູ ລີ. ໃນນັ້ນໂຄງການປູຢາງທາງ ປາກລາຍ-ພູດູ່ ກໍ່ເປັນອີກໂຄງການໜຶ່ງທີ່ນອນໃນບູລິມະສິດ ຂອງແຂວງ. ທີ່ໄດ້ທຶນສະໜັບສະໜູນຈາກ ສໍານັກງານຄວາມຮ່ວມມື ພັດທະນາເສດຖະກິດ ກັບປະເທດເພື່ອນບ້ານ ຫຼື ເອີ້ນວ່າ “ອົງການນີດາ” ແຫ່ງຣາຊະອານາຈັກໄທ. ໃນການປັບປຸງເສັ້ນທາງດັ່ງກ່າວແມ່ນປູດ້ວຍອັດສະ ຟານທີ່ໄດ້ມາດຕະຖານ ທີ່ມີມູນຄ່າທັງໝົດ 718 ລ້ານບາດ. ໃນນັ້ນແບ່ງທຶນຊ່ວຍ ເຫຼືອລ້າ 20% ເທົ່າກັບ 143.6 ລ້ານບາດ ແລະເປັນທຶນກູ້ຢືມດອກເບ້ຍຕໍ່າ 80% ເທົ່າກັບ 574.4 ບາດ. ພິເສດຈໍານວນທຶນທັງໝົດນອກຈາກ ການກໍ່ສ້າງເສັ້ນທາງແລ້ວ ຍັງມີການກໍ່ສ້າງດ່ານສາກົນຢູ່ໃກ້ກັບຊາຍແດນ ລາວ-ໄທ.

      ໂຄງການປູຢາງທາງປາກລາຍ-ພູດູ່ ແມ່ນເລີ່ມເຊັນສັນຍາ ໃນຄັ້ງວັນທີ 30 ພະຈິກ 2012 ລະຫວ່າງ ກົມຂົວທາງ ກະຊວງ ຍທຂ ກັບບໍລິສັດ ຊໍ ການຊ່າງ ຈໍາກັດມະຫາຊົນ ແລະໄດ້ເລີ່ມລົງມືໃນ ການກໍ່ສ້າງຕົວຈິງໃນວັນທີ 10 ທັນວາ 2012. ເສັ້ນທາງດັ່ງກ່າວມີຄວາມຍາວທັງໜົດ 32.20 ກມ. ໃນນັ້ນ ເປັນສາຍຫຼັກ 27.99 ກມ ແລະທາງຊອຍເຂົ້າບ້ານປະຊາຊົນ 4.21 ກມ. ໃນນີ້ມີການກໍ່ສ້າງຂົວ 5 ແຫ່ງ ມີຄວາມຍາວ 174 ແມດ. ໂຄງການດັ່ງກ່າວແມ່ນຖືວ່າເປັນໂຄງການທີ່ມີໄລຍະເວລາສັ້ນທີ່ສຸດຄື 18 ເດືອນ ເລີ່ມແຕ່ວັນທີ 10 ທັນວາ 2012 ຫາ ວັນທີ 3 ມິຖຸນາ 2014 ແມ່ນໃຫ້ສໍາເລັດໂຄງການ.

      ປະຈຸບັນໂຄງການມີຄວາມຄືບໜ້າຫລາຍພໍສົມຄວນ, ຖ້າທຽບໃສ່ແຜນການທີ່ວາງໄວ ແມ່ນ 13.42% ແຕ່ຕົວຈິງແລ້ວ ສາມາດປະຕິບັດໄດ້ 19.17% ຊຶ່ງລື່ນແຜນການ 5.75% ຂອງແຜນວຽກທັງໝົດທີ່ວາງໄວ້. ດັ່ງນັ້ນທາງເຈົ້າຂອງໂຄງການ, ບໍລິສັດທີ່ຮັບເໝົາການກໍ່ສ້າງ ໄດ້ເອົາໃຈໃສ່ ໃຫ້ຄວາມສໍາຄັນ ແລະໄດ້ຮ່ວມມືກັບອົງການຈັດຕັ້ງທຸກພາກສ່ວນ ໃນການຈັດຕັ້ງປະຕິບັດວຽກງານດັ່ງກ່າວ ເຊິ່ງສະແດງອອກໃນການນໍາເອົາ ກົນຈັກຈໍານວນຫຼາຍເຂົ້າມາ ເພື່ອສຸມໃສ່ໃນການກໍ່ສ້າງ ທັງກາງເວັນ ແລະ ກາງຄືນ ໂດຍບໍ່ມີຜົນກະທົບຕໍ່ການຈັດຕັ້ງປະຕິບັດວຽກງານ.

ໂຄງການກໍ່ສ້າງຂົວເຊກະໝານ 2 ຢູ່ແຂວງ ອັດຕະປື

 ໃນການແກ້ໄຂຄວາມທຸກຍາກຂອງປະຊາຊົນລາວບັນດາເຜົ່າແມ່ນໜ້າທີ່ຂອງລັດແລະທົ່ວປວງຊົນລາວທັງຊາດຕ້ອງໄດ້ຮ່ວມແຮງຮ່ວມຈິດຮ່ວມໃຈສາມັກຄີປອງດອງເພື່ອສ້າງສາພັດທະນາເຮັດໃຫ້ເສດຖະກິດ-ສັງຄົມແຫ່ງຊາດບັນລຸຜົນສໍາເລັດຕາມຄາດໝາຍ. ນໍາພາປະເທດຊາດລຸດພົ້ນອອກຈາຄວາມ ທຸກຍາກໃນປີ 2015 ​ແລະນຳພາປະເທດຊາດຫຼຸດພົ້ນອອກຈາກຄວາມດ້ອຍພັດທະນາໃນປີ 2020 ຕາມມະຕິຂອງກອງປະຊຸມໃຫຍ່ຄັ້ງທີ IX ຂອງພັກວາງອອກໃຫ້ປາກົດຜົນເປັນຈິງ. ໃນພະແນກໂຍທາທິການແລະຂົນສົ່ງປະຈຳ ແຂວງອັດຕະປື ກໍມີສ່ວນຮ່ວມທີ່ສໍາຄັນຫຼາຍຢ່າງ ໂດຍສະເພາະແມ່ນການສ້າງເທດສະບານຂອງແຂວງໃຫ້ກາຍເປັນສູນລວມທາງດ້ານ ເສດຖະກິດ, ສັງຄົມ, ວັດທະນະ ທໍາ ແລະເປັນຈຸດສຸມທີ່ຕັ້ງຂອງສໍານັກງານ, ເຂດປົກຄອງຂອງແຂວງ, ເປັນຈຸດໃຈກາງໃນເຂດອຸດສາຫະກໍາຂອງ ແຂວງ ທີ່ຈະນໍາລາຍໄດ້ເຂົ້າສູ່ແຂວງ. ໂດຍອີງຕາມແຜນແມ່ບົດໃນການເຊື່ມຕໍ່ກັບສາກົນໃຫ້ມີຄວາມສະດວກຍິ່ງຂື້ນ ແລະ ເພື່ອແນ່ໃສ່ການພັດທະນາຈຸດສາມລ່ຽມເສດຖະກິດລະຫວ່າງ ກຳປູເຈ້ຍ-ລາວ-ຫວຽດນາມ (CLV). ໃນນັ້ນ ໂຄງການກໍ່ສ້າງຂົວເຊກະໝານ 2 ຖືເປັນບູລິມະສິດໜຶ່ງຂອງແຂວງ ໃນການກໍ່ສ້າງໂຄງການດັ່ງກ່າວ ແມ່ນຖືເປັນວຽກ ງານທີ່ເລັ່ງດ່ວນ ເພື່ອໃຫ້ທັນກັບຄວາມຮຽກຮ້ອງຕ້ອງການຂອງຜູ້ຊົມໃຊ້. ສໍາລັບການກໍ່ສ້າງຂົວດັ່ງກ່າວ ແມ່ນໄດ້ຮັບ ການຊີ້ນຳໂດຍກົງຈາກ ກະຊວງໂຍທາທິການ ແລະຂົນສົ່ງ. ທີ່ໄດ້ມອບຄວາມຮັບຜິດຊອບໂດຍກົງໃຫ້ພະແນກ ຍທຂ ແຂວງອັດຕະປືເປັນຜູ້ໃກຊິດຕິດແທດຢ່າງເປັນປະຈໍາ ແລະ ໄດ້ຮັບການຮ່ວມມືຈາກທຸກພາກສ່ວນ ຕະຫຼອດຮອດ ອໍານາດການປົກຄອງທ້ອງຖິ່ນ ລວມເຖິງພໍ່ແມ່ປະຊາຊົນໃນເຂດດັ່ງກ່າວ.

ໂຄງການກໍ່ສ້າງຂົວດັ່ງກ່າວ ແມ່ນຕັ້ງຢູ່ລະຫວ່າງບ້ານສາມັກຄິໄຊ ແລະ ບ້ານເຊກະໝານ ເມືອງສາມັກ ຄີໄຊແຂວງ ອັດຕະປື, ມີຈຸດເລີ່ມຕົ້ນທີ່ບ້ານສາມັກຄີຢູ່ກິໂລແມັດທີ 1+200 ຂອງເສັ້ນທາງເລກທີ 18B ຕັຜ່ານແມ່ນ້ຳ ເຊກະໝານຫາເສັ້ນທາງ 1J ທີ່ຫ່າງຈາກບ້ານເຊກະໝານມາທາງ ເມືອງພູວົງປະມານ 1 ກມ. ຂົວດັ່ງກ່າວ ຈະເປັນ ເສັ້ນທາງເຊື່ອມຕໍ່ລະຫວ່າງເສັ້ນທາງເລກທີ 18B ກັບເສັ້ໜທາງ 1J ໄປຫາເມືອງພູວົງ ຫຼືໄປຫາຊາຍແດນ ກຳປູເຈ້ຍ ພາຍຫຼັງການກໍ່ສ້າງສຳເລັດແລ້ວ, ຂອບເຂດພຶ້ນທີ່ຂອງໂຄງການບ່ອນເຂົ້າຫາຂົວທາງ ບ້ານສາມັກຄີໄຊ ດິນໃນເຂດ ດັ່ງກ່າວເໜາະສົມໃນການປູກຕົ້ນໄມ້, ພືດກະສິກຳຂະໜາດນ້ອຍ ເພື່ອຊ່ວຍໃນການສ້າງລາຍໄດ້ໃຫ້ກັບປະຊາຊົນ ໃນເຂດດັ່ງກ່າວ. ສ່ວນທາງເຂົ້າບ້ານເຊກະໝານ ດິນໃນເຂດດັ່ງກ່າວກໍ່ແທດເໝາະກັບການເຮັດກະສິກຳ ໃນການປູກ ເຂົ້າຂອງປະຊາຊົນ.

ໃນໂຄງການກໍ່ສ້າງຂົວດັ່ງກ່າວ ແມ່ນໄດ້ຮັບທຶນການຊ່ວຍເຫຼືອລ້າຈາກ ລັດຖະບານຍີ່ປຸ່ນ ຈຳນວນ 2.6 ລ້ານໂດລາ ສະຫະລັດ ແລະ ທຶນສົມທົບພາຍໃນສປປລາວ 3.27 ລ້ານໂດລາສາຫະລັດ ລວມທັງໜົດ 5.87 ລ້ານໂດລາ ສະຫະລັດ ແລະ ໄດ້ມອບໃຫ້ລັດວິສາຫະກິດວິສະວະກຳຄົມມະນາຄົມ (LTEC) ເປັນຜູ້ລົງມືສຳຫຼວດ-ອອກແບບ ແລະ ໄດ້ມອບໃຫ້ບໍລິສັດລັດວິສາຫະກິດກໍ່ສ້າງຂົວທາງເລກ 8 (R8CE) ເປັນຜູ້ຮັບເໝົາການກໍ່ສ້າງ ແລະ ຮ່ວມ ກັບບໍລິສັດສົມໄຊຈະເລີນກໍ່ສ້າງ (SXCC). ໃນສັນຍາເບື້ອງຕົ້ນໄລຍະຂອງການກໍ່ສ້າງ 24 ເດືອນ ແລະ ເລີມລົງ ມືປະຕິບັດໃນວັນທີ 5 ສິງຫາ 2010 ເປັນ ຕົ້ນມາ ແຕ່ເນື່ອງຈາກວ່າມີໜ້າວຽກເພີ່ມ 15% ຂອງມູນຄ່າສັນຍາ ເບື້ອງຕັ້ນ ໂດຍອີງຕາມບົດບັນທຶກກອງປະຊຸມໃນວັນທີ 31 ກໍລະກົດ 2012 ທີ່ພະແນກ ຍທຂ ແຂວງອັດຕະປື ແລະ ຂໍ້ຕົກລົງຂອງເຈົ້າແຂວງ ສະບັບເລກທີ 1099/ຈຂ.ອປ ວັນທີ 9 ສິງຫາ 2012. ມາໃນວັນທີ 5 ສິງຫາ 2012  ຈຶ່ງໄດ້ມີການຕໍ່ສັນຍາການກໍ່ສ້າງຕື່ມອີກ 09 ເດືອນ. ເລີ່ມການກໍ່ສ້າງແຕ່ວັນທີ 6 ສິງຫາ 2012 ຫາວັນທີ 5 ພຶດສະພາ 2013, ໄລຍະການກໍ່ສ້າງລວມທັງໜົດ 33 ເດືອນ ແລະ ໄລຍະການຄ່ຳປະກັນ 12 ເດືອນ. ຂົວດັ່ງກ່າວ ແມ່ນໄດ້ຮັບການອອກແບບຕາມມາດຕະຖານສາກົນ ທີ່ມີຄວາມຍາວທັງໜົດ 208 ແມັດ, ກ້ວາງທັງໜົດ 11.5 ແມັດ, ໜ້າທາງລົດແລ່ນມີ 2 ເລ່ນກວ້າງເລ່ນລະ 3.75 ແມັດທັງໜົດ 7.5 ແມັດ, ມີທາງຍ່າງສອງເບື້ອງກວ້າງເບື້ອງ ລະ 1.5 ແມັດ ເປັນຂົວປະເພດຂາງເບຕົງທີ່ອັດແຮງຮູບຕົວໄອ (I) ຊ່ວງຍາວ 33 ແມັດມີຈຳນວນທັງໜົດ 6 ຊ່ວງ ແລະ ມີທາງເຂົ້າຂົວຍາວທັງໜົດ 3.7 ກມ, ທາງກວ້າງທັງໜົດ 9 ແມັດລວມມີບ່າທາງເບື້ອງລະ 1 ແມັດ.

ເພື່ອເຮັດໃຫ້ໂຄງການການກໍ່ສ້າງຂົວເຊກະໝານ 2 ແຫ່ງນີ້ ​​ໃຫ້ສໍາເລັດແລະທ່ວງທັນກັບເວລານັ້ນຜູ້ຮັບຜິດຊອບ ກໍຄື ພະແນໂຍທາທິການແລະຂົນສົ່ງ ປະຈໍາແຂວງອັດຕະປື ກໍ່ໄດ້ມີຄວາມພະຍາ ຍາມຈັດຕັ້ງປະຕິບັດໃຫ້ທິດຊີ້ນໍາ, ໃກ້ສິດຕິດແທດ, ກວດກາບັນດາໜ້າວຽກຂອງການດໍາເນີນງານ ຢ່າງເປັນປະຈໍາ ແລະ ໄດ້ອໍານວຍຄວາມສະດວກທຸກ ປະການໃນການກໍ່ສ້າງ ພ້ອມດຽວກັນນັ້ນທາງບໍລິສັດທີ່ຮັບເໜົາການກໍ່ສ້າງ ໄດ້ຮັບປະກັນວ່າ ຈະໃຫ້ສໍາເລັດຕາມທີ່ ຄາດໝາຍໄວ້, ຮັບປະກັນໄດ້ເຖິງຄຸນະພາບຂອງຂົວໃນການຮ້ອງຮັບການຂົນສົ່ງຜ່ານຂົວແຫ່ງນີ້, ເພື່ອເຮັດໃຫ້ຊີວິດ ການເປັນຢູ່ຂອງປະຊາຊົນໄດ້ມີການປ່ຽນແປງ ແລະແນ່ໃສ່ລຶບລ້າງຄວາມທຸກຍາກຂອງປວງຊົນ ຕາມທິດຊີ້ນໍາຂອງ ພັກ-ລັດຖະບານທີ່ວາງໄວໃຫ້ບັນລຸຜົນເປັນຈິງ.

 

ວຽກງານການພັດທະນາຕາໜ່າງຄົມມະນາຄົມ ຢູ່ແຂວງບໍລິຄຳໄຊ

       ແຂວງ​ບໍລິຄຳໄຊ ກໍຄື​ກັບ​ແຂວງ​ອື່ນ​ໆ​​ໃນ​ທົ່ວ​ປະ​ເທດ ​​ທີ່ໄດ້​ມີ​ການ​ພັດທະນາ​ພື້ນຖານ​ໂຄງ​ລ່າງ​ຢ່າງ​ບໍ່​ຢຸດ​ຢັ້ງ​ເປັນຕົ້ນແມ່ນ​ການ​ກໍ່ສ້າງ​ເສັ້ນທາງ ບໍ່​ວ່າ​ຈະ​ຢູ່​ໃນ​​ເທດສະບາ​ນ​​​ແຂວງ, ເມືອງ​ ​ແລະ ການ​ເຊື່ອມ​ຕໍ່​ກັບປະ​ເທດໄກ້ຄຽງ. ໃນນັ້ນ, ພະ​ແນ​ກ​ໂຍທາ​ທິການ ​ແລະ ຂົນ​ສົ່ງ​ ປະຈໍາແຂວງ​ບໍລິຄຳໄຊ ​ໃນ​ນາມສາຍຕັ້ງຢູ່ທ້ອງຖິ່ນ ກໍ່ໄດ້ເປັນ​ເຈົ້າ ການໃນທຸກໆໂຄງການທີ່ຂື້ນກັບຄວາມຮັບຜິດຊອບຂອງຕົນ, ນອກນັ້ນຍັງໄດ້ມີການປະສານສົມທົບກັບຂະແໜງອື່ນ ເພື່ອແນ່ໃສ່ພັດທະນາເສັ້ນທາງຄົມມະນາຄົມ, ພັດທະນາຕົວເມືອງພາຍໃນແຂວງ ໃຫ້ນັບມື້ນັບມີໃບໜ້າໃໝ່. ເມື່ອ​ເວົ້າ​ເຖິງ​ການ​ພັດທະນາ​ຢູ່​ ແຂວງ​​ບໍລິຄຳໄຊ ແລ້ວຂະແໜງ ໂຍທາທິການ ແລະ ຂົນສົ່ງ ແມ່ນມີຄວາມສໍາຄັນຫລາຍ ໃນການພັດທະນາພື້ນຖານໂຄ່ງລ່າງເສດຖະກິດ-ສັງຄົມ ພາຍໃນແຂວງ, ເຮັດໃຫ້ຂະແໜງການອື່ນໄດ້ເຂົ້າໄປພັດທະນາ ນັບມື້ນັບຫຼາຍຂື້ນ ອັນສຳຄັນແມ່ນການຍົກສູງຊີວິດການເປັນຢູ່ຂອງປະຊາຊົນບັນດາເຜົ່າ ພາຍໃນແຂວງບໍລິຄຳໄຊ ໃຫ້ສູງຂື້ນເລື້ອຍໆ.

      ໃນຊຸມປີທີ່ຜ່ານມາ ພັກກໍຄືລັດຖະບານໄດ້ສຸມທຶນຮອນຈຳນວນ ມະຫາສານເຂົ້າໃນການບຳລຸງຮັກສາ, ຍົກລະດັບ ແລະກໍ່ສ້າງພື້ນຖານໂຄງລ່າງດ້ານຄົມມະນາຄົມ-ຂົນສົ່ງ ສະເລ່ຍແລ້ວແມ່ນກວມເອົາປະມານ 35-50% ຂອງມູນຄ່າ ການລົງທຶນລັດ ໃນແຕ່ລະປີ. ບັນດາເສັ້ນທາງໃນເທດສະບານເມືອງເປັນຕົ້ນແມ່ນເທດສະບານ ເມືອງປາກຊັນ, ເທດສະ ບານ ເມືອງຄຳເກີດ, ເທດສະບານ ເມືອງວຽງທອງ, ເທດສະບານ ເມືອງບໍລິຄັນ ກໍໄດ້ຮັບການຟື້ນຟູ ແລະກໍ່ສ້າງໃໝ່ ທັງປະດັບດ້ວຍໄຟເຍືອງທາງ ໂດຍສະເພາະແມ່ນການປັບປຸງກໍ່ສ້າງເສັ້ນທາງໃນເທດສະບານແຂວງ. ນອກຈາກນັ້ນ ຍັງໄດ້ສຸມໃສ່ ການຍົກລະດັບ ແລະກໍ່ສ້າງໃໝ່ ບັນດາເສັ້ນທາງໄປຍັງເຂດຊາຍແດນ, ເຂດຈຸດສຸມ, ເສັ້ນທາງຫລວງຂອງ ແຂວງ, ເສັ້ນທາງຫລວງຂອງເມືອງ, ເສັ້ນທາງໄປຫາບ້ານ ແລະ ກຸ້ມບ້ານພັດທະນາ, ແນ່ໃສສ້າງບ້ານ, ກຸ້ມບ້ານ ໃຫ້ກາຍເປັນຕົວເມືອງນ້ອຍ ແລະມີທ່າແຮງ ໃນການພັດທະນາຊົນນະບົດ ເພື່ອຫລຸດຜ່ອນຄວາມທຸກຍາກ. ໃນການ ກໍ່ສ້າງ ແລະ ສ້ອມແປງເສັ້ນທາງແຕ່ລະປີ ນັບແຕ່ປີ 2010 ເຖິງປັດຈຸບັນ ສາມາດປະຕິບັດຕົວຈິງໄດ້ດັ່ງນີ້:

ປີ 2010-2011 ວຽກກໍ່ສ້າງ: ປູຢາງ 2 ຊັ້ນໄດ້ 424.12 ກມ, ປູດິນແຮ່ໄດ້ 122 ກມ, ທາງທະລຸໃໝ່ໄດ້ 107 ກມ, ສ້ອມແປງຂົວທາງປູດິນແຮ່ໄດ້ 24 ກມ, ສ້ອມແປງປົກກະຕິໄດ້ 315 ກມ.

ປີ 2011-2012 ວຽກກໍ່ສ້າງ: ປູຢາງ 2 ຊັ້ນໄດ້ 424.12 ກມ, ປູດິນແຮ່ໄດ້ 786 ກມ, ທາງທະລຸໃໝ່ໄດ້ 823.8 ກມ, ສ້ອມແປງສຸກເສີນ 1.13 ກມ.

ສຳລັບເສັ້ນທາງເຂົ້າເຖິງບ້ານໃນປີ 2012 ທົ່ວແຂວງມີບ້ານທັງໜົດ 317 ບ້ານ ເສັ້ນທາງເຂົ້າໄປເຖິງ 315 ບ້ານ ກວມເອົາຈຳນວນບ້ານ 99.36% ໃນທົ່ວແຂວງ, ກວມເອົາກຸ່ມບ້ານໄດ້ເຖິງ 37 ກຸ່ມບ້ານ ໃນນັ້ນມີທາງ ປູຢາງເຖິງບ້ານມີ 127 ບ້ານ, ທາງດິນແດງເຂົ້າເຖິງບ້ານມີ 136 ບ້ານ, ທາງທະລຸເຂົ້າເຖິງບ້ານໄດ້ 52 ບ້ານ, ທາງນ້ຳ ທີ່ເດີນທາງດ້ວຍເຮືອມີ 2 ບ້ານ ແລະທາງທີ່ສາມາດທ່ຽວໄດ້ເຖິງ 2 ລະດູມີ 267 ບ້ານ. ລະບົບຕາໜ່າງເສັ້ນ ທາງໃນທົ່ວແຂວງ ປີ 2012 ມີເສັ້ນທາງທັງໝົດ 166 ເສັ້ນ, ມີລວງຍາວ 2.057.45 ກມ, ມີຂົວທັງໝົດ 121 ແຫ່ງ, ມີລວງຍາວ 5.630.09 ແມັດ, ມີຂົວເບຕົງ 79 ແຫ່ງ, ຂົວ ປະສົມ 6 ແຫ່ງ, ຂົວເບເລມີ 28 ແຫ່ງ, ຂົວປີໂຊມີ 3 ແຫ່ງ, ຂົວໄມ້ມີ 3 ແຫ່ງ ແລະຂົວຈົມມີ 2 ແຫ່ງ.

 ຈາກຄວາມທຸ້ມເທ ແລະ ຄວາມເອົາໃຈໃສ່ຮັບຜິດຊອບອັນສູງສົ່ງຂອງພະແນກ ຍທຂ ປະຈໍາແຂວງບໍລິຄຳໄຊ, ບວກ ກັບຄວາມພະຍາຍາມໃນຂະຫຍາຍຕົວຂອງວຽກງານ ກ່ຽວກັບການຄົມມະນາຄົມ-ຂົນສົ່ງ ທາງບົກ, ທາງນ້ຳ, ເຄຫະ ສະຖານ ແລະ ນ້ຳປະປາ ໃນຂອບເຂດທົ່ວແຂວງບໍລິຄຳໄຊ ເຮັດໃຫ້ການພັດທະນາເສດຖະກິດ-ສັງຄົມ ບັນລຸຕາມຈຸດ ປະສົງ ທີ່ພັກ-ລັດຖະບານເຮົາໄດ້ວາງອອກ ແນໃສ່ໃຫ້ຊີວິດການເປັນຢູ່ຂອງປະຊາຊົນບັນດາເຜົ່າດີຂື້ນເທື່ອລະກ້າວ.

ພະແນກ ຍທຂ ແຂວງອັດຕະປື ສຳເລັດການຝຶກອົບຮົມວຽກງານອອກອະນຸຍາດການປຸກສ້າງໃຫ້ພະນັກງານ ຍທຂ ໃນ 5 ຕົວເມືອງ

 ໃນການ​ພັດທະນາ​ຢູ່​ພື້ນຖານ ໂຄງລ່າງຢູ່ແຂວງ​ອັດຕະປື, ພະແນກໂຍທາທິການ ແລະຂົນສົ່ງ ກໍມີສ່ວນຮ່ວມທີ່ສໍາຄັນ ຫຼາຍຢ່າງ ໂດຍສະເພາະແມ່ນການຄຸ້ມຄອງເຄຫາ-ຜັງເມືອງ ແລະ ສິ່ງແວດລ້ອມ ຂອງແຂວງໂດຍອີງຕາມຂໍ້ຕົກລົງ ຂອງລັດຖະມົນຕີວ່າການກະຊວງ ໂຍທາທິການ ແລະຂົນສົ່ງ ເລກທີ 9555/ຍທຂ ລົງວັນທີ 16 ກໍລະກົດ 2009 ວ່າດ້ວຍການຈັດຕັ້ງ ແລະ ເຄື່ອນໄຫວ ຂອງພະແນກ ຍທຂ ປະຈຳແຂວງ ແລະ ນະຄອນຫຼວງວຽງຈັນ ແລະ ພະແນກ ຍທຂ ແຂວງອັດຕະປື ເຫັນໄດ້ເຖິງຄວາມ  ໝາຍຄວາມສຳຄັນໃນການອອກອະນຸຍາດໃນການປຸກສ້າງ ແລະ ເພື່ອເຮັດໃຫ້ພະນັກງານ ຍທຂ ໃນ 5 ເມືອງອ້ອມຂ້າງໄດ້ມີຄວາມເຂົ້າໃຈໃນວຽກງານດັ່ງກ່າວ.

 ໃນຕອນເຊົ້າຂອງວັນທີ 13 ທັນວາ 2012 ຢູ່ທີ່ຫ້ອງປະຊຸມຂອງພະແນກ ຍທຂ ແຂວງອັດຕະປື ໄດ້ເປີດການຝຶກ ອົບຮົມວຽກງານອອກອະນຸຍາດໃນການປຸກສ້າງໃຫ້ແກ່ພະນັກງານ ຍທຂ ໃນ 5 ຕົວເມືອງ ໂດຍການເປັນປະທານ ຂອງ ທ່ານ ສູນນະຄອນ ແກ້ວວຽງຄຳ ຮອງ​ຫົວໜ້າພະແນກ ຍທຂ ແຂວງອັດຕະປື ຜູ້ຊີ້ນຳວຽກງານເຄຫາສະຖານ, ນອກນັ້ນຍັງມີບັນດາຫົວໜ້າຂະ​ແໜງ, ຮອງ​ຂະ​ແໜງ ພ້ອມ​ດວ້ຍພະນັກງານ ຈາກຂະແໜງຄຸ້ມຄອງເຄຫາ-ຜັງເມືອງ ແລະ ສິ່ງແວັດລ້ອມ ແລະ ຫົວໜ້າຫ້ອງການ ຍທຂ 5 ​ຕົວເມືອງ ພ້ອມວິຊາການຈາກຫ້ອງການ ຍທຂ ໃນ 5 ຕົວ ເມືອງ ໄດ້ເຂົ້າຮ່ວມທັງໝົດ 27 ທ່ານ.

 ໃນການຝຶກອົບຮົມໃນຄັ້ງນີ້ ແມ່ນໄດ້ເນັ້ນໃຫ້ທຸກຄົນໄດ້ມີຄວາມເຂົ້າໃຈລະອຽດກ່ຽວກັບຂັ້ນຕອນ ໃນການປະກອບ ເອກະສານ ແລະຂັ້ນຕອນການອອກອະນຸຍາດທີ່ເປັນມິດກັບສິ່ງແວັດລ້ອມ, ສ້າງເງື່ອນໄຂ ທີ່ອຳນວຍຄວາມສະດວກ ໃຫ້ປະຊາຊົນໃນການປຸກສ້າງ ໂດຍການໃຊ້ແບບຕົວຢ່າງທີ່ແຂວງເຄີຍປະຕິບັດໃນທີ່ຜ່ານມາກ່ອນໜ້ານີ້ ເພື່ອນຳມາ ໝູນໃຊ້ໃຫ້ເປັນບົດຮຽນໃນການຝຶກອົບຮົມ ແລະ ອະທິບາຍໃຫ້ທຸກທ່ານໄດ້ມີຄວາມກະຈ່າງແຈ້ງໃນດ້ານເຄຫາ- ຜັງເມືອງ ແລະ ສິ່ງແວັດລ້ອມ ຂອງແຂວງອັດຕະປື ແນ່ໃສ່ເພື່ອເຮັດໃຫ້ຕົວເມືອງ ຂອງແຂວງອັດຕະປື ເປັນເມືອງ ໜ້າຢູ່. ການຝຶກອົບຮົມໄດ້ຮັບຜົນສຳເລັດຢ່າງຈົບງາມ ເນື່ອງຈາກພະນັກງານວິຊາການ ຍທຂ ທັງ 5 ຕົວເມືອງ ໄດ້ມີຄວາມເຂົ້າໃຈລະອຽດກ່ຽວກັບຂັ້ນຕອນຕ່າງໆ ໃນດ້ານເຄຫາ-ຜັງເມືອງ ແລະ ສິ່ງແວັດລ້ອມ ເພື່ອຈະນຳໄປຜັນ ຂະຫຍາຍສູ່ທ້ອງຖິ່ນ ໃຫ້ໄດ້ຮັບຜົນດີ.

 

Additional information