ຂ່າວຕ່າງແຂວງ

ລັດຖະມົນຕີວ່າການກະຊວງ ຍທຂ ພ້ອມດ້ວຍຄະນະ ລົງເຮັດວຽກຢູ່ ເມືອງສີສັດຕະນາກ

ໃນຕອນບ່າຍຂອງວັນອັງຄານ, ວັນທີ 16/10/2012 ທ່ານ ສົມມາດ ພົລເສນາ, ລັດຖະມົນຕີວ່າການກະຊວງ ໂຍທາ ທິການ ແລະຂົນສົ່ງ ພ້ອມດ້ວຍພະນັກງານການນໍາຂອງກະຊວງ ຍທຂ ໄດ້ລົງໄປເຮັດວຽກທົດລອງສາມສ້າງຢູ່ ເມືອງ ສີສັດຕະນາກ ນະຄອນຫລວງວຽງຈັນ, ໂດຍມີທ່ານ ອຸດອນ ໄຊມົນຕີ , ເຈົ້າເມືອງ ເມືອງສີສັດຕະນາກ, ບັນດາ ຄະນະນຳເມືອງດັ່ງກ່າວ, ຫົວໜ້າພະແນກ ຍທຂ ນະຄອນຫລວງ ແລະຫ້ອງການ ຍທຂ ຂັ້ນເມືອງເຂົ້າຮ່ວມຫລາຍ ກ່ວາ 50 ຄົນ. ພາຍຫລັງທີ່ໄດ້ຮັບຟັງລາຍງານການຈັດຕັ້ງປະຕິບັດທົດລອງສາມສ້າງ ຈາກອໍານາດການປົກຄອງ ເມືອງ ກ່ຽວກັບວຽກງານທົດລອງສາມສ້າງ ແລ້ວເຫັນວ່າປະຈຸບັນ ເມືອງສີສັດຕະນະນາກ ແມ່ນພວມດໍາເນີນວຽກ ດັ່ງກ່າວໄປຢ່າງເປັນເຈົ້າການ ໂດຍໄດ້ມອບບາງວຽກໃຫ້ບ້ານເປົ້າໝາຍຮັບຜິດຊອບ ເຊັ່ນ ການຈອດລົດຢູ່ສະຖານທີ່ ສາທາລະນະຂອງບ້ານ, ມອບໂຄງການກໍ່ສ້າງເສັ້ນທາງຮອ່ມ ໃຫ້ຫ້ອງການ ຍທຂ ເມືອງເປັນເຈົ້າການ ສົມທົບກັບ ປະຊາຊົນໃນການຈັດຕັ້ງປະຕິບັດ ສໍາເລັດ ແລະນໍາໃຊ້ແລ້ວ 8 ເສັ້ນທາງ ຈາກທັງໝົດ 16 ເສັ້ນທາງ. ໃນທົ່ວ ເມືອງສີສັດຕະນາກປະກອບດ້ວຍ 37 ໝູ່ບ້ານ, ປະຈຸບັນສ້າງໄດ້ບ້ານປ້ອງກັນຄວາມສະຫງົບດີ 27 ບ້ານ, ບ້ານ ປອດຄະດີ 27 ບ້ານ, ບ້ານປອດຢາເສບຕິດ 27 ບ້ານ, ບ້ານສາມດີ 35 ບ້ານ, ບ້ານວັດທະນະທໍາ 27 ບ້ານ, ບ້ານພັດທະນາຮອບດ້ານ 27 ບ້ານ. ປະຈຸບັນກໍາລັງສຸມໃສ່ສ້າງ 7 ບ້ານໃຫ້ເປັນບ້ານສີຂຽວ ແລະບ້ານສຸຂະອານາ ໄມ ຂອງເມືອງ. ຈາກນັ້ນ, ທ່ານ ລັດຖະມົນຕີວ່າການ ສົມມາດ ພົລເສນາ ກໍໄດ້ໃຫ້ທິດຊີ້ນໍາໃນການຈັດຕັ້ງປະຕິບັດ ໃຫ້ບັນລຸຜົນຕາມຈຸດປະສົ່ງ ແລະລະດັບຄາດໝາຍທີ່ວາງໄວ້ ໂດຍທ່ານໄດ້ເນັ້ນໃຫ້ທຸກພາກສ່ວນສືບຕໍ່ຜັນຂະຫຍາຍ ແລະເອົາໃຈໃສ່ປະຕິບັດຕາມມະຕິ 03 ຂອງກົມການເມືອງສູນກາງພັກ ແລະຄໍາສັ່ງເລກທີ16 ຂອງນາຍົກລັດຖະມົນຕີ ກ່ຽວກັບການສ້າງແຂວງໃຫ້ເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະສ້າງບ້ານ ໃຫ້ເປັນຫົວໜ່ວຍພັດທະນາ.

ການສ້ອມແປງເສັ້ນທາງເລກທີ 13 ເໜືອ ແຕ່ເມືອງໂພນໂຮງ-ກາສີ

 ໃນກາງ ປີ 2011 ໄພທໍາມະຊາດທີ່ເກີດຂຶ້ນ ໄດ້ສ້າງຄວາມຫຍຸ້ງຍາກ ແລະ ໄດ້ສົ່ງຜົນກະທົບຕໍ່ການດໍາລົງຊີວິດ ຂອງປະຊາຊົນລາວບັນດາເຜົ່າ ກໍ່ຄືບັນດາຜູ້ນໍາໃຊ້ເສັ້ນທາງ, ນັກທ່ອງທ່ຽວທັງພາຍໃນ ແລະຕ່າງປະເທດຢ່າງຫລວງ ຫລາຍ, ໂດຍສະເພາະແມ່ນຜູ້ທີ່ມີຄວາມຈໍາເປັນຕ້ອງນໍາໃຊ້ເສັ້ນທາງເລກທີ 13 ເໜືອ ຊ່ວງຜ່ານແຂວງວຽງຈັນ ນັບ ແຕ່ເມືອງໂພນໂຮງ ໄປຈົນເຖິງເຂດເມືອງກາສີ ເພາະເສັ້ນທາງໃນເຂດນີ້ຖືກເຊາະເຈື່ອນ, ເປ່ເພ ແລະ ເສັຍຫາຍ ຢ່າງໜັກ.

      ໃນປີ 2011 ທີ່ຜ່ານມາ ປະເທດລາວຂອງພວກເຮົາກໍ່ເປັນປະເທດໜຶ່ງທີ່ໄດ້ຮັບຜົນກະທົບ ຈາກໄພທໍາມະ ຊາດບໍ່ໜ້ອຍ ໂດຍສະເພາະແມ່ນຈາກພາຍຸໄຮມາ ແລະພາຍຸນົກເຕັນ ເຊິ່ງເຮັດໃຫ້ເກີດມີນ້ຳຖ້ວມເປັນບໍລິເວນກ້ວາງ ຢູ່ໃນຫລາຍເຂດແຂວງ, ເສັ້ນທາງຫລາຍເສັ້ນໃນທົ່ວປະເທດໄດ້ຖືກເຊາະເຈື່ອນ, ຖະໜົນຫົນທາງຖືກເປ່ເພ ມີຫລາຍ ເສັ້ນຖືກຕັດຂາດ. ທາງເລກທີ 13 ເໜືອກໍ່ເປັນສັ້ນທາງໜຶ່ງທີ່ໄດ້ຮັບຜົນກະທົບຢ່າງໜັກ ໂດຍສະເພາະແມ່ນເຂດ ເມືອງໂພນໂຮງ-ກາສີ ອັນໄດ້ສ້າງຄວາມເສັຍຫາຍໃຫ້ແກ່ຊັບສົມບັດຂອງຊາດ, ສ້າງຄວາມຫຍຸ້ງຍາກໃຫ້ກັບປະຊາ ຊົນລາວບັນດາເຜົ່າ ໃນການເດີນທາງຈາກພາກເໜືອຂອງລາວ ເຂົ້າມາສູ່ນະຄອນຫລວງວຽງຈັນ ແລະ ຈາກ ນະຄອນຫລວງວຽງຈັນ ໄປຫາບັນດາແຂວງຕ່າງໆຢູ່ເຂດພາກເໜືອຂອງລາວ. ຕໍ່ສະພາບການດັ່ງກ່າວ ກະຊວງ ໂຍທາທິການ ແລະ ຂົນສົ່ງ ໄດ້ສົມທົບກັບແຂວງວຽງຈັນ ເອົາໃຈໃສ່, ຮີບຮ້ອນແກ້ໄຂຢ່າງທັນການ ໂດຍໄດ້ ປະສານສົມທົບຢ່າງເລັ່ງດວ່ນກັບພະແນກໂຍທາທິການ ແລະ ຂົນສົ່ງປະຈໍາແຂວງວຽງຈັນ ຕະຫລອດເຖິ່ງອໍານາດ ການປົກຄອງທ້ອງຖິ່ນ ເພື່ອເຮັດແນວໃດໃຫ້ພໍ່ແມ່ປະຊາຊົນ ສາມາດນໍາໃຊ້ເສັ້ນທາງດັ່ງກ່າວ ໃນການເດີນທາງໄປ ມາຫາສູ່ໄດ້ຕາມປົກກະຕິ, ເດັດຂາດ ບໍ່ໃຫ້ເສັ້ນທາງຖືກຕັດຂາດ ແລະ ຍຸດສະງັກ. ວັນພະຫັດ, ທີ 5 ເດືອນກໍລະກົດ ປີ 2012 ລາຍການໂທລະພາບ ໂຍທາເພື່ອປະຊາຊົນ ໄດ້ອອກຂ່າວ ກ່ຽວກັບການຟື້ນຟູ ບູລະນະຮັກສາເສັ້ນທາງ ເລກທີ 13 ເໜືອ, ທ່ານ ແທ່ນຄໍາ ທອງບົນ, ຫົວໜ້າພະແນກ ໂຍທາທິການ ແລະ ຂົນສົ່ງ ປະຈໍາແຂວງວຽງຈັນ ກໍ່ໄດ້ໃຫ້ສໍາພາດຕໍ່ລາຍການຂອງພວກເຮົາ ການຟື້ນຟູບູລະນະຮັກສາເສັ້ນທາງຊ່ວງຜ່ານແຂວງວຽງຈັນ ມີໄລຍະທາງ ທັງໝົດ 202 ກິໂລແມັດ ພວກເຮົາມີຜູ້ຮັບຜິດຊອບບົວລະບັດຮັກສາຢູ່ທຸກແມັດຍາວ ເພາະພວກເຮົາໄດ້ຈັດຕັ້ງ ປະຕິບັດສັນຍາແບບມອບ   ເໝົາສ້ອມແປງປັກກະຕິ 3 ປີກັບຜູ້ຮັບເໝົາ. ປີນີ້ຝົນກໍ່ມາໄວ, ເຮັດໃຫ້ການກໍ່ສ້າງເສັ້ນ ທາງທີ່ຖືກຜົນກະທົບມີຄວາມຫຍຸ້ງຍາກ, ຖ້າປູຢາງໃນລະດູຝົນ ກໍ່ຈະບໍ່ມີຄຸນນະພາບ. ແຕ່ແນໃສ່ຮັບໃຊ້ປະຊາຊົນ ເຮັດແນວໃດໃຫ້ການເດີນທາງມີຄວາມໂລ່ງລ່ຽນ ໄດ້ເອົາໃຈໃສ່ປະຕິບັດ ແກ້ໄຂສຸກເສີນ ໂດຍການສ້ອມແປງຮ່ອງ ລະບາຍນ້ຳ, ການຖົມດິນອັດແໜ້ນ ເພື່ອຮັບປະ ກັນໃຫ້ພໍ່ແມ່ ປະຊາຊົນ ສາມາດເດີນທາງໄປມາຕາມປົກກະຕິໄດ້, ຈາກນັ້ນ ເວລາກ້າວສູ່ລະດູແລ້ງ ເຊິ່ງເປັນລະດູການທີ່ມີຄວາມເໝາະສົມໃນການກໍ່ສ້າງສ້ອມແປງທາງ ພວກເຮົາຈຶ່ງ ພ້ອມກັນ ລົງມືກໍ່ສ້າງໃຫ້ໄດ້ຕາມມາດຕະຖານເຕັກນິກທີ່ກໍານົດໄວ້ ເຮັດແນວໃດໃຫ້ການກໍ່ສ້າງເສັ້ນທາງມີຄຸນນະພາບ ສາມາດນໍາໃຊ້ໄດ້ຢ່າງຍາວນານ.

      ເວົ້າລວມແລ້ວ, ຕະຫລອດໄລຍະຜ່ານມາ ຄະນະພັກຄະນະນໍາກະຊວງ ໂຍທາທິການ ແລະຂົນສົ່ງ ກໍຄື ພະແນກ ໂຍທາທິການ ແລະຂົນສົ່ງ ປະຈໍາແຂວງວຽງຈັນ ຍາມໃດກໍໄດ້ເປັນຫ່ວງເປັນໃຍ ແລະ ຖືເປັນບັນຫາ  ສໍາຄັນ ໃນການໃຫ້ບໍລິການຮັບໃຊ້ປະຊາຊົນ, ໂດຍໄດ້ໃຫ້ທິດຊີ້ນໍາ, ໃກ້ສິດຕິດແທດໃນການຈັດຕັ້ງ ປະຕິບັດໜ້າທີ່ ວຽກງານ ຂອງພະນັກງານຂະແໜງ ຍທຂ ຕາມສາຍຄວາມຮັບຜິດຊອບຂອງຕົນ, ຄືດັ່ງການສ້ອມແປງທາງເລກທີ 13 ເໜືອ ຊ່ວງແຕ່ເມືອງໂພນໂຮງ ຫາເມືອງກາສີ ແຂວງວຽງຈັນ. ໜ້າແລ້ງປີນີ້ ພະແນກ ຍທຂ ປະຈໍາແຂວງ ວຽງຈັນ ກໍຈະຂຸ້ນຂ້ຽວດໍາເນີນການກໍ່ສ້າງ ສ້ອມແປງ ເພື່ອເຮັດສໍາເລັດໜ້າທີ່ຂອງຕົນ ຄືໃຫ້ປະຊາຊົນໄດ້ນໍາໃຊ້ ເສັ້ນ ທາງໃໝ່ ແລະ ດີມີຄຸນນະພາບ ຕາມເຕັກນິກທີ່ໄດ້ກໍານົດໄວ້ທຸກປະການ.(ຂັດຈາກລາຍການໂທລະພາບ ໂຍທາ ເພື່ອປະຊາຊົນ ວັນທີ 5 ກໍລະກົດ 2012)

 

ມອບ-ຮັບ ອຸປະກອນການຮຽນໃຫ້ໂຮງຮຽນສາມັນຊົນເຜົ່າ ຢູ່ແຂວງຄຳມ່ວນ

ເນື່ອງຈາກວ່າ ທາງບໍລິສັດຂົວທາງຈີນ (CRCB) ​ໄດ້ຮັບກຽດຈາກກະຊວງໂຍທາທິການແລະຂົນສົ່ງແລະແຂວງຄຳມ່ວນໃນການມອບໂຄງການປັບປຸງໂຄງລ່າງພື້ນຖານຢູ່ແຂວງຄຳມ່ວນ, ​ເພື່ອເປັນການຊຸກຍູ້ວຽກງານພັດທະນາສັງຄົມໃຫ້ກ້າວໜ້າໄປເລື້ອຍແລະເພື່ອຮັດແໜ້ນຄວາມສາມັກຄີລະຫວ່າງສອງປະເທດລາວ-ຈີນ.  

ໃນວັນທີ 10 ຕຸລາ 2012 ຢູ່ທີ່ໂຮງຮຽນສາມັນຊົນເຜົ່າ ບ້ານນ້ຳໂດນເມືອງທ່າແຂກແຂວງຄຳມ່ວນໄດ້ຈັດພິທີມອບ-ຮັບເຄື່ອງອຸປະກອນການຮຽນລະຫວ່າງ ບໍລິສັດ ຂົວທາງຈິນແລະໂຮງຮຽນສາມັນຊົນເຜົ່າ ບ້ານນ້ຳໂດນເມືອງທ່າແຂກແຂວງຄຳມ່ວນ ຂື້ນໂດຍ​​ເປັນກຽດມອບແມ່ນທ່ານ ກົວະລົງ (Guo Rong) ຕາງໜ້າຜູ້ແທນ ບໍລິສັດ ຂົວທາງຈິນ LAOS’OFFICE OF CHINA ROAD & BRIDGE CORPORATION (CRBC) ​ແລະຮັບໂດຍທ່ານ ອີນສອນ ລັດທະວົງ ຜູ້ອຳນວຍການໂຮງຮຽນສາມັນຊົນເຜົ່າ, ​ເປັນກຽດເຂົ້າຮ່ວມຂອງທ່ານ ສີໄຮແກ້ວໄກ່ຖິ່ນ ກຳມະການພັກແຂວງ ຫົວໜ້າພະແນກສຶກສາທິການແລະກິລາແຂວງ ຄຳມ່ວນ, ທ່ານໂອເດັດ   ໄຕຍະວົງ ຮອງພະແນໂຍທາທິການແລະຂົນສົ່ງແຂວງ ຄຳມ່ວນ ພ້ອມດ້ວຍ ຄູ​-ອາຈານແລະນ້ອງນັກຮຽນເຂົ້າຮ່ວມ 100 ກວ່າຄົນ. ສ່ວນເຄື່ອງມອບໃນຄັ້ງນີ້ແມ່ນເປັນຖົງແລະຊຸດປີກ​-ສໍ ກອບປາ ຈຳນວນ​ 100 ຊຸດເຊີ່ງເປັນມູນຄ່າ 12.000.000 ກີບ (ສິບສອງລ້ານກີບ).

      ໃນການມອບເຄື່ອງໃນຄັ້ງນີ້ ທ່ານ ກົວະລົງ ຕາງໜ້າ ບໍລິສັດ ຂົວທາງຈີນກໍໄດ້ກ່າວມອບແລະໃຫ້ຄຳໂອ້ວາດຕໍ່ຄູ​-ອາຈານແລະພວກນ້ອງນັກຮຽນວ່າ: ​ເຖີງເຄື່ອງເລັກໆນ້ອຍໆກໍຕາມ​​ແຕ່ຂ້າພະເຈົ້າກໍພາກພູມໃຈມອບໃຫ້ແລະກໍຂໍໃຫ້ພວກນ້ອງນັກຮຽນຈົ່ງຕັ້ງໃຈຮ່ຳຮຽນແລໝັ້ນຝຶກຝົນຫຼໍ່ຫຼອມຕົນເອງໃຫ້ກາຍເປັນຄົນດີຂອງປະເທດຊາດໃນອານາຄົດ. ຫລັງຈາກນັ້ນ, ທ່ານ ອິນສອນ  ລັດຖະຈັກ ຜູ້ອຳນວຍການໂຮງຮຽນກໍໄດ້ກ່າວຮັບແລະຂໍຂອບໃຈນຳບໍລິສັດ ຂົວທາງຈີນ ຫລັງຈາກນັ້ນ ທ່ານກໍໄດ້ມອບໃບສົມມະນາບຸນຄຸນແລະກ່າວໃຫ້ຄວາມຫວັງນຳບໍລິສັດອີກ​​ເທື່ອໜຶ່ງວ່າຈະມາອຸປະຖຳນຳພວກເຮົາໃນຕໍ່ໜ້າອີກ.

 

 

ກະຊວງ ຍທຂ ຢ້ຽມຢາມ, ເຮັດວຽກ ແລະ ເຂົ້າຮ່ວມງານພົບປະແລກປ່ຽນ ເນື່ອງໃນໂອກາດປີສາມັກຄີ ມິດຕະພາບ ລາວ -ຫວຽດນາມ ປີ 2012 ທີ່ ສສ ຫວຽດນາມ

ໃນລະຫວ່າງວັນທີ 8-13/08/2012 ຄະນະຜູ້ແທນ ຂັ້ນສູງຂອງ ກະຊວງ ໂຍທາທິການ ແລະ ຂົນສົ່ງ ນຳໂດຍ ທ່ານ ສົມມາດ ພົລເສນາ, ລັດຖະມົນຕີ ວ່າການ ໄດ້ໄປເຄື່ອນໄຫວຢ້ຽມຢາມ ແລະ ເຮັດ ວຽກກັບ ກະຊວງ ຄົມມະນາຄົມຂົນສົ່ງ ແລະ ກະຊວງ ກໍ່ສ້າງ ແຫ່ງ ສສຫວຽດນາມ ທີ່ ນະຄອນ ຫຼວງຮ່າໂນ້ຍ ແລະ ເຂົ້າຮ່ວມງານພົບປະແລກປ່ຽນ ລະຫວ່າງ ກະຊວງ ຍທຂ ແລະ ກະຊວງ ຄົມມະ ນາຄົມ ຂົນສົ່ງ, ຫວຽດນາມ ທີ່ແຂວງ ແທງຮວາ ເພື່ອສະເຫຼີມສະຫຼອງ ປີສາມັກຄີມິດຕະພາບ ລາວ- ຫວຽດນາມ ປີ 2012” ກໍຄື 2 ວັນ ປະຫັວດສາດ ຄື: 50ປີ ແຫ່ງການສ້າງຕັ້ງສາຍພົວພັນທາງການທູດ (5/9/1962-5/9/2012) ແລະ 35 ປີ ແຫ່ງການ ລົງນາມສັນຍາມິດຕະພາບ ແລະ ການຮ່ວມມື (18/7/1977-18/7/2012) ລະຫວ່າງ ລາວ-ຫວຽດນາມ.
ໃນໂອກາດການພົບປະສອງຝ່າຍ ກັບກະຊວງ ຄົມມະນາຄົມ ຂົນສົ່ງ, ສສຫວຽດນາມ ນີ້, ກະຊວງ ຍທຂ ໄດ້ສະແດງຄວາມຂອບໃຈ ແລະ ຍ້ອງຍໍຊົມເຊີຍຕໍ່ ກະຊວງຄົມມະນາຄົມ ຂົນສົ່ງ, ສສຫວຽດນາມ, ຊຶ່ງໄດ້ໃຫ້ການ ຊ່ວຍເຫຼືອແກ່ຝ່າຍລາວ ອັນໄດ້ເປັນການປະກອບໃຫ້ແກ່ການ ພັດທະນາວຽກງານ ຄົມມະນາ ຄົມ-ຂົນສົ່ງ ຂອງ ສປປ ລາວ ເປັນຕົ້ນແມ່ນ: ໂຄງການກໍ່ສ້າງເສັ້ນທາງເລກ2E ເມືອງຂວາ-ໄຕຈາງ, ການຊ່ວຍເຫຼືອ ອອກໃບຢັ້ງຢືນ ເຕັກນິກໃຫ້ເຮືອຂອງລາວ ແລະ ຍັງໄດ້ຊ່ວຍສັງລວມ ເນື້ອໃນເອກະສານສົນທິສັນຍາ ຂອງອົງການເດີນທະເລສາ ກົນ (IMO) ເພື່ອກະກຽມເຂົ້າເປັນ ສະມາຊິກອົງການດັ່ງກ່າວ ຂອງ ສປປລາວ ແລະການລິເລີ້ມຂົນສົ່ງຜ່ານທ່າເຮືອ ຫວຸງອ່າງ. ພ້ອມດຽວກັນນີ້, ຍັງເຫັນວ່າທັງສອງຝ່າຍ ຍັງໄດ້ຕັ້ງໜ້າປະຕິບັດບັນດາສັນຍາ ແລະ ອະນຸສັນຍາ ຮ່ວມມືຫຼາຍຝ່າຍ ໃນກອບອາຊຽນ, CLV, CLMV ແລະ GMS ເປັນຢ່າງດີ, ໃນນັ້ນ ຈະໄດ້ພ້ອມກັນປຶກສາຫາລື ກັນຕື່ມ ກ່ຽວກັບການອຳນວຍຄວາມສະດວກໃຫ້ແກ່ ການຂົນສົ່ງທາງບົກຜ່ານແດນໃນກອບ GMS ຜ່ານທາງເລກ8 (ດ່ານນ້ຳພາວ-ເກົາແຈວ) ແລະ ເລກ 12 (ດ່ານນາເພົ້າ-ຈາລໍ) ໂດຍຈະປະຕິບັດຕາມຖະແຫຼງ ການຮ່ວມຂອງ ລັດຖະມົນຕີຊ່ວຍວ່າການ ກະຊວງ ການຕ່າງ ປະເທດລາວ, ຫວຽດນາມ ແລະ ໄທ ທີ່ໄດ້ເຊັນຮ່ວມກັນໃນເດືອນ 5 ທີ່ຜ່ານມາ ແລະຈະເອົາໃຈ ໃສ່ປຶກສາຫາລື ເພື່ອແກ້ໄຂອຸບປະສັກ ແນໃສ່ອຳນວຍຄວາມສະດວກໃຫ້ແກ່ການຂົນສົ່ງ ລະຫວ່າງ ລາວ- ຫວຽດນາມ, ລາວ-ໄທ-ຫວຽດນາມ ແລະ ລາວ-ຫວຽດນາມ -ກຳປູເຈຍ.
ສຳລັບການພົບປະກັບ ກະຊວງ ກໍ່ສ້າງ, ຫວຽດນາມ, ທັງສອງຝ່າຍ ລາວ-ຫວຽດນາມ ຈະພ້ອມກັນ ຮ່ວມມືໃນວຽກງານຄຸ້ມຄອງລັດ, ຊຶ່ງປະກອບດ້ວຍການແລກປ່ຽນເອກະສານ ແລະ ການຄົ້ນຄ້ວາຮຽບຮຽງ ບັນດາ ນິຕິກຳຕ່າງໆໃນຂົງເຂດການກໍ່ສ້າງ ແລະ ເຄຫາຜັງເມືອງ. ຝ່າຍລາວໄດ້ສະເໜີໃຫ້ມີການຮ່ວມມືກັນ ດ້ານວຽກງານ ວາງແຜນຜັງເມືອງ, ໂດຍ ກະຊວງໂຍທາທິການ ແລະ ຂົນສົ່ງ ສະເໜີໃຫ້ ສະຖາບັນ ໂຍທາ ແລະ ຂົນສົ່ງ ເປັນ ເຈົ້າການສົມທົບກັບ ສະຖາບັນວາງແຜນຜັງເມືອງ ແລະ ຊົນນະບົດ ທີ່ຂື້ນກັບ ກະຊວງ ກໍ່ສ້າງ, ສສຫວຽດນາມ. ທັງສອງຝ່າຍ ຈະຄົ້ນຄ້ວາສ້າງແຜນຮ່ວມມືດ້ານການພັດທະນາຊັບພະຍາກອນ ມະນຸດ ແລະພັດທະນາຝີມືແຮງງານ. ລວມທັງໃຫ້ມີການ ແລກປ່ຽນບົດຮຽນ ດ້ານການກວດກາຄຸນນະພາບ ການກໍ່ສ້າງ.
ນອກຈາກນີ້, ຄະນະຜູ້ແທນ ກະຊວງ ຍທຂ ເຂົ້າຢ້ຽມຂຳນັບ ທ່ານ ຫວຽນຊິງຟຸກ, ຮອງນາຍົກລັດຖະ ມົນຕີ, ປະທານຄະນະກຳມະ ທິການຮ່ວມມືຫວຽດນາມ-ລາວ. ໃນໂອກາດນີ້ ທ່ານຮອງນາຍົກລັດຖະມົນຕີ ກໍໄດ້ຊົມເຊີຍ ການມາເຮັດວຽກຄັ້ງນີ້ຂອງ ກະຊວງ ຍທຂ ແລະ ໄດ້ບາງມີຄຳເຫັນ ເພື່ອໃຫ້ຝ່າຍລາວ ພິຈາລະນາ ເປັນຕົ້ນແມ່ນ: ໄດ້ຊົມເຊີຍຜົນສຳເລັດຂອງໂຄງການກໍ່ສ້າງເສັ້ນທາງເລກ 2E ເມືອງຂວາ-ໄຕ ຈາງ, ຊຶ່ງຈະມີພິທີມອບຮັບໃນທ້າຍປີ 2012 ຊຶ່ງເປັນປີທີ່ມີຄວາມໝາຍສຳຄັນຂອງສອງຊາດລາວ-ຫວຽດນາມ ແລະ ຍັງເຫັນວ່າໂຄງການນີ້ ເປັນໂຄງການ ຕົວແບບຂອງການຮ່ວມມືສອງຝ່າຍ. ລັດຖະບານ ຫວຽດນາມ ເຫັນດີໃຫ້ໂຄງການກໍ່ສ້າງເສັ້ນທາງ ແຕ່ ນາຊອນ - ພູທິດເຜີ້ງ ໄດ້ເລີ້ມຈັດຕັ້ງປະຕິບັດໄວ ແລະ ຂໍໃຫ້ສອງຝ່າຍ ລາວ-ຫວຽດນາມ ເອົາໃຈໃສ່ປຶກສາຫາລື ເພື່ອແກ້ໄຂອຸ ປະສັກ ແນໃສ່ອຳນວຍ ຄວາມສະດວກ ໃຫ້ແກ່ການຂົນສົ່ງລະຫວ່າງລາວ-ຫວຽດນາມ, ລາວ-ໄທ-ຫວຽດນາມ ແລະ ລາວ-ຫວຽດນາມ-ກຳປູເຈຍ.
ພ້ອມດຽວກັນນີ້, ຄະນະຜູ້ແທນ ກະຊວງ ຍທຂ ຍັງໄດ້ພົບປະກັບ ຄະນະກຳມະການປົກຄອງ ແຂວງ ແທງຮວາ, ຮ່າຕິງ ແລະ ກວາງຈິ, ຊຶ່ງທັງສອງຝ່າຍ ໄດ້ປຶກສາຫາລືກ່ຽວກັບການສ້າງຄວາມສະດວກໃຫ້ແກ່ ໄປມາ ລະຫວ່າງ ບັນດາແຂວງຂອງ ສປປລາວ ກັບ ບັນດາແຂວງຂອງ ສສຫວຽດນາມ.
ເພື່ອເປັນການສະເຫຼີມສະຫຼອງ ປີສາມັກຄີ ມິດຕະພາບ ລາວ - ຫວຽດນາມ ປີ 2012, ກະຊວງ ຄົມມະນາຄົມ ຂົນສົ່ງ, ສສຫວຽດນາມ ຮ່ວມກັບ ແລະ ແຂວງແທງຮວາ ໄດ້ເປັນເຈົ້າພາບຈັດງານພົບປະ ແລກປ່ຽນ ກັບ ກະຊວງ ຍທຂ. ໃນງານໄດ້ຈັດໃຫ້ມີການ ແລກປ່ຽນຄຳເຫັນລະຫວ່າງຄະນະນຳ ຂອງສອງ ກະຊວງ ເພື່ອຫວນ ຄືນມູນເຊື້ອ ມິດຕະພາບ ແລະ ການຮ່ວມມືຮອບດ້ານແບບພິເສດ ໃນຂະແໜງຄົມມະ ນາຄົມ-ຂົນສົ່ງ ນັບແຕ່ສະໄໝ ຕໍ່ສູ້ກູ້ຊາດ ແລະ ໄລຍະສ້າງສາພັດທະນາປະເທດຊາດ, ນອກຈາກນັ້ນ ກໍຍັງມີການສະແດງສິນລະປະຈາກ ຊາວໜຸ່ມ ກະຊວງ ຄົມມະນາຄົມຂົນສົ່ງ ຫວຽດນາມ ແລະສະແດງຮ້ອງເພງ ຈາກຄະນະນຳ, ຜູ້ແທນ ແລະສິນລະປິນ ທັງສອງຝ່າຍລາວ-ຫວຽດນາມ, ຊຶ່ງບັນຍາກາດ ແມ່ນເຕັມໄປ ດ້ວຍຄວາມຮັກແພງໃກ້ຊິດສະໜິດສະໜົມອັນດູດດື່ມ ແລະ ເບີກບານມ່ວນຊື່ນ ບົນຈິດໃຈ ຄວາມສາມັກ ຄີແບພິເສດ ແລະ ການຮ່ວມມືຮອບດ້ານລາວ-ຫວຽດນາມ.
ນອກຈາກໄດ້ມີການພົບປະກັບພາກສ່ວນຕ່າງໆ ແລະ ເຂົ້າຮ່ວມງານພົບປະແລກປ່ຽນແລ້ວ, ຄະນະ ຜູ້ແທນ ກະຊວງ ຍທຂ ຍັງໄດ້ໄປຢ້ຽມຢາມ ເຮືອນປະທານໂຮ່ຈີມິນ ທີ່ແຂວງເງອານ, ຢ້ຽມຢາມລັດວິສາຫະກິດວິສະວະກຳ ອອກແບບຄົມມະນາຄົມ (TEDI), ບໍລິສັດລັດວິສາຫະກິດວິສະວະ ກຳກໍ່ສ້າງເລກ1, ໂຄງການກໍ່ສ້າງທາງ ດ່ວນຍົກ ລະດັບ Gie – Ninh Binh, ຢ້ຽມຢາມພາລາຊະວັງລາຊະວົງໂຮ່ ຊຶ່ງໄດ້ຮັບການຮັບຮອງ ເປັນມໍລະດົກໂລກ ຈາກ ອົງການ UNESCO ທີ່ແຂວງແທງຮວາ, ຢ້ຽມຢາມ ແລະ ວາງພວງມາລາອະນຸສາລະວີນັກ ຮົບນິລິນາມຕາມເສັ້ນ ທາງເລກ 9 ແລະ ອະນຸສາວະລີນັກຮົບນິລິນາມ ເຈືອງເຊິນ ທີ່ແຂວງ ກວາງຈິ.

Additional information