ຂ່າວ

ທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງ ຍທຂ ເຂົ້າຮ່ວມກອງປະຊຸມ ແລະ ງານວາງສະແດງ ການຂົນສົ່ງທາງລາງ ແລະ ອຸປະກອນດ້ານທາງລົດໄຟ ສາກົນຈີນ

ໃນລະວ່າງວັນທີ 16-20 ຕຸລາ 2019 ທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງ ຍທຂ, ພ້ອມດ້ວຍຄະນະ, ໄດ້ເຂົ້າຮ່ວມກອງປະຊຸມ ແລະ ງານວາງສະແດງການຂົນສົ່ງທາງລາງ ແລະອຸປະກອນດ້ານທາງລົດໄຟ ສາກົນ ຈີນ ທີ່ນະຄອນຊາງຊາ ແຂວງ ຫູນານ, ສປ ຈີນ.

ການເຂົ້າຮ່ວມກອງປະຊຸມໃນຄັ້ງນີ້ ແມ່ນເພື່ອເຂົ້າຮ່ວມພົບປະແລກປ່ຽນບົດຮຽນ ການຂົນສົ່ງລາງ, ເຊິ່ງຈັດຂຶ້ນທຸກໆ 2ປີ ທີ່ ສປ ຈີນ, ໃນປີນີ້ຫົວຂໍ້ຄື: “ລະບົບການຂົນສົ່ງດ້ວຍລາງອັດສະລິຍະ ເພື່ອອານະຄົດ”, ນອກຈາກການເຂົ້າຮ່ວມກອງປະຊຸມດັ່ງກ່າວແລ້ວ ທ່ານ ຮອງລັດຖະມົນຕີ ພ້ອມດ້ວຍຄະນະ ຍັງໄດ້ຢ້ຽມຊົມງານວາງສະແດງການຂົນສົ່ງທາງລາງ ແລະ ອຸປະກອນດ້ານທາງລົດໄຟສາກົນຈີນ ທີ່ມີການພັດທະນາລະບົບເຕັກໂນໂລຊີ ທີ່ທັນສະໄໝ, ຜະລິດຕະພັນ ດ້ານອຸດສາຫະກໍາການຂົນສົ່ງທາງລາງ ພ້ອມດ້ວຍບັນດາອຸປະກອນຕ່າງໆ.

ການເຂົ້າຮ່ວມກອງປະຊຸມຄັ້ງນີ້ສາມາດຮັດແໜນສາຍພົວພັນທີ່ດີ ລະຫວ່າງ ສປປ ລາວ ແລະ ສປຈີນ, ໂດຍສະເພາະໃນປັດຈຸບັນກ່ຽວກັບວຽກງານການຂົນສົ່ງດ້ວຍລາງ ກໍ່ຄືການພັດທະນາເສັ້ນທາງລົດໄຟ ລາວ-ຈີນ ເຊິ່ງກໍາລັງຈັດຕັ້ງປະຕິບັດ ແລະ ຖອດຖອນບົດຮຽນໃນການພັດທະນາການຂົນສົ່ງດ້ວຍລາງ ຂອງ ສປ ຈີນ, ເພື່ອໝູນໃຊ້ເຂົ້າໃນວຽກງານການພັດທະນາການຂົນສົ່ງດ້ວຍລາງໃນ ສປປ ລາວ, ນອກຈາກນີ້ ຍັງເປັນການພົບປະແລກປ່ຽນບົດຮຽນ ແລະ ສ້າງເຄື່ອຂ່າຍການຂົນສົ່ງດ້ວຍລາງ ລະຫວ່າງ ສປປ ລາວ ແລະ ບັນດາປະເທດຕ່າງໆ ທີ່ເຂົ້າຮ່ວມກອງປະຊຸມ ແລະງານວາງສະແດງໃນຄັ້ງນີ້.

ໂຄງການກໍ່ສ້າງທາງລົດໄຟ ລາວ-ຈີນ ຮ່ວມໃຈບໍລິຈາກຊ່ວຍເຫຼືອເຂດປະສົບໄພນໍ້າຖ້ວມຢູ່ບັນດາແຂວງພາກໃຕ້ຂອງລາວ

ໃນຕອນເຊົ້າຂອງວັນທີ 23 ຕຸລາ 2019 ທີ່​ຫ້ອງ​ຮັບ​ແຂ​ກ ກະຊວງ ​ໂຍທາ​ທິການ ​ແລະ ຂົນ​ສົ່ງ,ທ່ານ ປອ ບຸນຈັນ ສິນທະວົງ ລັດຖະມົນຕີກະຊວງ ຍທຂ ​ໄດ້​ຕ້ອນຮັບ ຜູ້​ຕາງໜ້າໂຄງການກໍ່ສ້າງທາງລົດໄຟ ລາວ-ຈີນ ຮ່ວມໃຈບໍລິຈາກຊ່ວຍເຫຼືອເຂດປະສົບໄພນໍ້າຖ້ວມຢູ່ບັນດາແຂວງພາກໃຕ້ຂອງລາວ, ​ໂດຍໂຄງການກໍ່ສ້າງທາງລົດໄຟ ລາວ-ຈີນ ຮ່ວມໃຈບໍລິຈາກຊ່ວຍເຫຼືອເຂດປະສົບໄພນໍ້າຖ້ວມຢູ່ບັນດາແຂວງ ພາກໃຕ້ຂອງລາວໃນຄັ້ງນີ້ມີມູນຄ່າ 100.000.000 ກີບ,

ໃນ​ໂອກາດ​ດັ່ງກ່າວ​ນີ້ ທ່ານ ປອ ບຸນຈັນ ສິນທະວົງ ລັດຖະມົນຕີ ກະຊວງ ຍທຂ ກໍ່ໄດ້ກ່າວຄໍາຂອບໃຈ ຕໍ່ຄວາມເປັນຫ່ວງເປັນໄຍຂອງທ່ານ​ຜູ້ຕາງໜ້າໂຄງການກໍ່ສ້າງ​ທາງ​ລົດ​ໄຟ​ລາວ-​ຈີນ ທີມີນໍ້າໃຈໃນການຊ່ວຍເຫຼືອໃນຄັ້ງນີ້ ແລະ ທ່ານ ລັດຖະມົນຕີ ຍັງໄດ້ກ່າວອີກວ່າ ເງິນຈໍານວນດັ່ງກ່າວນີ້ຈະໄດ້ມອບໃຫ້ ລັດຖະບານໂດຍກົງເພື່ອມອບໃຫ້ 3 ແຂວງທີ່ປະສົບໄພນໍ້າຖ້ວມ ຄື: ແຂວງ ສະຫວັນນະເຂດ ຈຳນວນ 30 ລ້ານກີບ, ແຂວງ ສາລະວັນ ຈໍານວນ 40 ລ້ານກີບ (ຍ້ອນແຂວງດັ່ງກ່າວປະສົບໄພນໍ້າຖ້ວມໜັກ) ແລະ ແຂວງຈໍາປາສັກ ຈຳນວນ 30 ລ້ານກີບ, ເພື່ອນໍາ​ໄປຊ່ວຍເຫຼືອປະຊາຊົນທີ່ປະສົບໄພນໍ້າຖ້ວມໃນຄັ້ງນີ້, ພ້ອກັນ​ນັ້ນທາງກະຊວງ ຍທຂ ກໍ່ໄດ້ມອບໃບຍ້ອງຍໍໃຫ້ກັບ ໂຄງການກໍ່ສ້າງທາງລົດໄຟ ລາວ-ຈີນ ທີ່ຮ່ວມໃຈບໍລິຈາກຊ່ວຍເຫຼືອໃນຄັ້ງນີ້.

ທ່ານ ປອ ສັນຕິສຸກ ສີມມາລາວົງ ຮອງລັດຖະມົນຕີ ກະຊວງ ຍທຂ ທັດສະນະສຶກສາ ແລະ ຖອດຖອນບົດຮຽນກ່ຽວກັບລະບົບຕິດຕາມຄຸ້ມຄ້ອງຍານພາຫະນະຂົນສົ່ງ ດ້ວຍຄວາມແມ້ນຢໍາສູງ ທີ່ ສປ ຈີນ, ລະຫວ່າງວັນທີ 15-18 ຕຸລາ 2019

ໃນລະຫວ່າງ ວັນ​ທີ 15-18 ຕຸລາ 2019 ທ່ານ ປອ ສັນຕິ​ສຸກ ສີມມາລາ​ວົງ ຮອງ​ລັດຖະມົນ​ຕີກະຊວງ ຍທຂ ພ້ອມດ້ວຍ​ຄະນະ ​ທັດສະນະ​ສຶກ​ສາ ​ແລະ ຖອດ​ຖອນ​ບົດຮຽນ​ກ່ຽວ​ກັບ​ລະບົບ​ຕິດຕາມ​ຄຸ້ມ​ຄ້ອງ​ຍານ​ພາ​ຫະນະ​ຂົນ​ສົ່ງ ດ້ວຍຄວາມ​ແມ້ນ​ຍຳ​ສູງ ທີ່ ສປ ຈີນ, ​ໂດຍ​ຕອບ​ສະໜອງ​ຕາມ​ຄຳ​ເຊີນຂອງ ບໍ​ລິ​ສັດຈົງ​ເຫີງເຕັກ​ນິກ​ເຄືອ​ຂ່າຍຈຳ​ກັດຢູ​ນ​ນານ,ບໍ​ລິ​ສັດເວີນ​​ເຫີງ​ຊື​ກວງວິ​ທະ​ຍາ​ສາດ-ເຕັກ​ນິກຈຳ​ກັດແຂວງ​ຢູນ​ນານ ​ແລະ ກຸ່ມບໍລິສັດ ປັກ​ກິ່ງຊຽນຟາງ ວິທະຍາສາດ​ເຕັກ​ໂນ​ໂລ​ຊີ ຈຳກັດ ​ຊຶ່ງ​ການມາ​ຢ້ຽມ​ຢາມ​ຄັ້ງ​ນີ້ ​ແມ່ນ​ເພື່ອ​ສືບ​ຕໍ່ຊຸກ​ຍູ້​​ຂະ​ຫຍາຍວຽກ​ງານ​ຂົນ​ສົ່ງ​ຮ່ວມ​ກັນ​ຫຼາຍ​ຮູບແບບແລະສົ່ງ​ເສີມ​ການ​ຮ່ວມ​ມື​ແທ້​ຈິງ​ດ້ານ​ຄວາມ​ປອດ​ໄພແລະການ​ຈັດ​ການ​ເຫດ​ການ​ສຸກ​ເສີນ​ການ​ຄົມ​ນາ​ຄົມກັບບັນ​ດາ​ປະ​ເທດ​ຕາມ​ເສັ້ນທາງໜຶ່ງ​ແລວ​ທາງໜຶ່ງ​ເສັ້ນ​ທາງ ທີ່ທ່ານ ​​ສີ​ຈີ້ງ​ຜີງ ປະ​ທານປະ​ເທດ​ ​ແຫ່ງ ສປ ຈີນ ສະ​ເໜີນັ້ນໃຫ້​ເກີດ​ດອກ​ອອກ​ຜົນ​ຂຶ້​ນ​ອີກ​ບາດ​ກ້າວ​ໜຶ່ງ.

ນອກຈາກ​ນັ້ນ ທ່ານ ຮອງ​ລັດຖະມົນຕີ ພ້ອມ​ດ້ວຍ​ຄະນະ ​ໄດ້​ໄປ​​ຢ້ຽມຢາມບໍລິສັດເວີນເຫີງຊື່ກວງວິທະຍາສາດ-ເຕັກນິກຈຳກັດ ​ແລະ ກຸ່ມບໍລິສັດ ປັກ​ກິ່ງຊຽນຟາງ ວິທະຍາສາດ​ເຕັກ​ໂນ​ໂລ​ຊີ ຈຳກັດ ຊຶ່ງເປັນວິສາຫະກິດສໍາຄັນໃນຂົງເຂດເຕັກນິກບິກດາຕາ (Big data) ຕິດຕາມຄຸ້ມຄອງຍານພາຫະນະແລະບໍລິການລະບົບອິນເຕີເກຼດ (integrated)​ ໂດຍ​ນຳ​ໃຊ້ລະບົບດາວທຽມເປີຍໂຕ່ວ​ໃນ​ການຕິດຕາມຄຸ້ມຄອງຍານພາຫະນະແບບດີຈີຕ໋ອນດ້ານການຂົນສົ່ງທາງບົກ. ພ້ອມ​ນີ້ຝ່າຍ​ກະຊວງ ຍທຂ ​ໄດ້​ເຊີນ​ໃຫ້​ບໍລິສັດ​ດັ່ງກ່າວ ຄົ້ນ​ຄ້ວາ​ສຶກສາ​ຄວາມ​ເປັນ​ໄປ​ໄດ້ ​ເພື່ອ​ລົງທຶນ​ໃນ​ດ້ານ​ການ​ຫັນ​ເປັນ​ທັນ​ສະ​ໃໝ ລະບົບ​ຂົນ​ສົ່ງ​ທາງບົກ ຢູ່ ສປປ ລາວ ​ໃນ​ອານາ​ຄົດ.

 

 

ກອງປະຊຸມ ເຜີຍແຜ່ພາລະບົດບາດ ສະຖາປະນິກ ແລະວິສະວະກອນ ໂຍທາລາວ ແລະລະດົມຄວາມຄິດເຫັນໃນການສ້າງ ນິຕິກໍາຮອງຮັບດ້ານວິຊາຊີບ

ກອງປະຊຸມເຜີຍແຜ່ພາລະບົດບາດສະຖາປະນິກ ແລະ ວິສະວະກອນໂຍທາລາວ ແລະ ລະດົມຄວາມ​ຄິດ​ເຫັນ​ໃນ​ການສ້າງນິຕິກໍາຮອງຮັບ​ດ້ານ​ວິຊາ​ຊີບໄດ້ຈັດຂື້ນໃນວັນທີ 18 ຕຸລາ 2019 ທີ່ ໂຮງແຮມດອນຈັນພາເລດ ໂດຍການເປັນປະທານຂອງທ່ານ ລັດຕະນະມະນີ ຄູນນິວົງ ຮອງລັດຖະມົນຕີ ກະຊວງ ຍທຂ, ​ແລະ ທ່ານ ພົງສະຫວັດ ພົມກອງ ຫົວໜ້າຫ້ອງການອົງການການເງິນສາກົນ IFC ກຸ່ມທະນາຄານໂລກ ແຫ່ງ ສປປ ລາວ; ມີບັນດາບັນດາທ່ານຫົວໜ້າກົມ, ຮອງກົມ, ທ່ານຫົວໜ້າຫ້ອງການທະນາຄານໂລກປະຈຳລາວ, ບັນດາທ່ານປະທານ ບໍລິສັດ ແລະ ແຂກທີ່ກ່ຽວຂ້ອງເຂົ້າຮ່ວມ.

ດັ່ງທີ່ພວກເຮົາຮູ້ນຳກັນການພັດທະນາແມ່ນໄວຫຼາຍ ຈະເປັນທາງດ້ານ ອີເລັກໂທນິກ, IT, ເຕັກນິກການກໍ່ສ້າງ, ເຕັກນິກດ້ານສະຖາປະນິກ, ດ້ານວິສະວະກອນ ມີເຄື່ອງນຳໃຊ້ເຄື່ອງມືລະບົບໄອທີ ເຂົ້າໃນການສ້າງ ເຮັດໃຫ້ການເຮັດວຽກງານ​ໄວຂື້ນ ແລະ ມີຄວາມຊັດເຈນ, ປະຈຸບັນແມ່ນມີຄວາມສໍາຄັນຫຼາຍ ແລະ ເປັນນະໂຍບາຍຂອງຫຼາຍປະເທດຄື: ການພັດທະນາແບບຍືນຍົງສີຂຽວ ຫຼື Smart City ແລະ ອື່ນໆ. ຜູ້ທີ່ຄົ້ນຄິດ ແລະ ປະຕິບັດສິ່ງນັ້ນກໍ່ແມ່ນ ນັກວິສະວະກອນ, ນັກສະຖາປານິກ, ເຊີ່ງບຸກຄົນດັ່ງກ່າວນັ້ນ ແມ່ນຜູ້ທີ່ ມີລະດັບການສຶກສາທີ່ແນ່ນອນ, ມີຄວາມຮູ້, ຄວາມສາມາດ, ມີປະສົບການ, ມີຈັນຍາບັນ ຕໍ່ຕົນເອງ, ຕໍ່ໜ້າທີ່ວຽກງານ, ຕໍ່ອາຊີບຂອງຕົນເອງ ຫຼື ເວົ້າວ່າ: ຜູ້ສຳນານງານດ້ານວິຊາຊີບ.

ແຕ່ກ່ອນຈະໄດ້ຄຸນວຸດທິຄືດັ່ງກ່າວມາຂ້າງເທີງນັ້ນ, ຕ້ອງໄດ້ຜ່ານການປະເມີນ ແລະ  ມີສະຖາບັນຢັ້ງຢືນ ‘’ຄວາມສຳນານງານດ້ານວິຊາຊີບ’’ ຈຶ່ງຈະຖືກຕ້ອງ, ຜູ້ທີ່ຈະເຮັດໜ້າທີ່ດັ່ງກ່າວນັ້ນກໍ່ແມ່ນສະພາສະຖາປະນິກ ແລະ ວິສະວະກອນໂຍທາລາວ, ເຊີ່ງເປັນອັນໃໝ່ ແລະ ເປັນຄັ້ງທໍາອິດຂອງ ສປປ ລາວ ທີ່ໄດ້ສ້າງຕັ້ງສະພາສະຖາປະນິກ ແລະ ວິສະກອນໂຍທາຂື້ນ.

ສຳລັບຢູ່ຕ່າງປະເທດ ເປັນຕົ້ນບັນດາປະເທດອາຊຽນ, ສະພາສະຖາປະນິກ ຂອງເຂົາເຈົ້າມີມາດົນແລ້ວ ແລະ ມີຄວາມເຂັ້ມແຂງ, ມີສະມາຊິກຈຳນວນຫຼາຍພັນຄົນ, ສາກົນ ກໍ່ຄືທະນາຄານໂລກແມ່ນໃຫ້ຄວາມສຳຄັນຫຼາຍຕໍ່ສາຍວິຊາຊີບດັ່ງກ່າວ, ເຊັນການປະເມີນບັນຍາກາດການລົງທຶນໃນ ສປປ ລາວ Eser Doing Business ຂອງທະນາຄານໂລກປີ 2019. ລາວຖືກຈັດອັນດັບຢູ່ທີ 154 ຂອງຈຳນວນ 190 ປະເທດ, ຂະແໜງ ຍທຂ ວຽກອອກອະນຸຍາດປຸກສ້າງຢູ່ອັນດັບທີ 90, ໄດ້ຄະແນນ 6,5 ຂອງຄະແນນເຕັມ 15 ໃນນັ້ນມີ 6 ດັດສະນີ, ດັດສະນີທີ 6 ການຢັ້ງຢືນວິຊາຊີບມີ 4 ຄະແນນ ຖືວ່າຫຼາຍກວ່າໝູ່ໃນບັນດາດັດສະນີ, ຍທຂ ໄດ້ 0 ຄະແນນ, ເນື່ອງຈາກວິສະກອນທີ່ເຮັດວຽກບໍ່ມີໃບຢັ້ງຢືນວິຊາຊີບ. ເປັນພຽງຈົບຈາກສະຖາບັນແລ້ວ ມີໃບປະກາດແລ້ວ ໄປເຮັດວຽກເລີຍ ຕາມຫຼັກສາກົນແມ່ນເຂົາຍັງບໍ່ຮັບຮູ້.

ສະນັ້ນ, ສະພາສະຖາປະນິກ ແລະ ວິສະວະກອນໂຍທາ ລາວ ແມ່ນມີຄວາມສໍາຄັນຫຼາຍຕໍ່ກັບການຢັ້ງຢືນພາລະບົດບາດດັ່ງກ່າວ, ການສ້າງຕັ້ງສະພາສະຖາປານິກ ແລະ ວິສະວະກອນໂຍທາ ລາວ ແມ່ນເລີ່ມມີການ ສະເໜີມາແຕ່ປີ 2005 ຈົນມາຮອດປີ 2019 ລວມເວລາ 14 ປີ ຈຶ່ງໄດ້ຮັບການສ້າງຕັ້ງ ຖືວ່າເປັນເວລາດົນພໍສົມຄວນ, ມີການປະຊຸມຫຼາຍຄັ້ງ, ມີການສະເໜີຂໍຄໍາເຫັນນຳຫຼາຍພາກສ່ວນ, ແລ້ວຈຶ່ງລາຍງານຫາລັດຖະບານ ເພີ່ນຈຶ່ງເຫັນດີໃຫ້ສ້າງຕັ້ງ ສະພາສະຖາປານິກ ແລະ ວິສະວະກອນໂຍທາ ລາວ, ຂຽນຫຍໍ້ (ສສວຍລ), ພາອັງກິດ Council of Lao Architects and Civil Engineers (CLACE), ພ້ອມແຕ່ງຕັ້ງຄະນະສະພາສະຖາປະນິກ ແລະ ວິສະວະກອນໂຍທາ ລາວ, ສະນັ້ນ ມື້ນີ້ຖືເປັນມື້ທີ່ສໍາຄັນ ທີ່ໄດ້ມີກອງປະຊຸມປຶກສາຫາລືກ່ຽວກັບ ສະພາສະຖາປະນິກ ແລະ ວິສະວະກອນໂຍທາລາວ ແລະ ລະດົມແນວຄິດໃນສ້າງນິຕິກຳຮັບຮອງດ້ານວິຊາຊີບ ຫຼື ປະກາດການສ້າງຕັ້ງ ສະພາສະຖາປະນິກ ແລະ ວິສະວະກອນໂຍທາລາວ (ສສວຍລ) ຢ່າງເປັນທາງການ.

ບັນດາທ່ານຜູ້ເຂົ້າຮ່ວມກອງຮ່ວມກອງປະຊຸມດັ່ງກ່າວ ເຊີ່ງລ້ວນແຕ່ແມ່ນ ພະນັກງານຜູ້ອາວຸໂສ, ອາດີດການນຳ ຜູ້ທີ່ກີງເກືອກ ລີເລືອຍ ກັບວຽກງານດັ່ງກ່າວມາເປັນເວລາດົນນານ ແລະ ບັນດາປະທານບໍລິສັດ, ຜູ້ຈັດການບໍລິສັດ ທີ່ເຮັດວຽກຕົວຈິງ ແລະ ຜູ້ທີ່ເຂົ້າຮ່ວມກອງປະຊຸມທັງໝົດໄດ້ສຸມໃສ່ຄົ້ນຄ້ວາ, ປະກອບຄຳເຫັນຕໍ່ກັບວຽກງານ ສສວຍລ, ຈະກຳນົດທິດທາງໄປແນວໃດ? ຈະມີມາດຕະຖານ ແລະ ມີເງື່ອນໄຂແນວໃດ ໃນການສ້າງ ສະພາສະຖາປະນິກ ແລະ ວິສະກອນໂຍທາລາວ ເພື່ອຈະນຳຂໍ້ມູນ, ຄວາມຄິດ, ຄວາມເຫັນ ດັ່ງກ່າວໄປສ້າງນິຕິກໍາຂອງວຽກງານ ສສວຍລ ຕໍ່ໄປ ໃຫ້ສາມາດເຊື່ອມຈອດ, ເຊື່ອມໂຍງກັບສາກົນໄດ້.

Additional information