ຂ່າວ

ທ່ານລັດຖະມົນຕີກະຊວງ ຍທຂ ຕ້ອນຮັບເອກອັກຄະລັດຖະທູດສິງກະໂປ

ທ່ານ ປອ ບຸນຈັນ ສິນທະວົງ ລັດຖະມົນຕີ​ກະຊວງ​ ໂຍທາທິການ ແລະ ຂົນສົ່ງ (ຍທຂ) ໄດ້​ຕ້ອນຮັບ​ການ​ເຂົ້າ​ຢ້ຽມ​ຂ່ຳນັບ​ຂອງ ທ່ານ ນາງ Leow Siu Lin ເອກ​ອັກ​ຄະ​ລັດຖະທູດ​ສິງກະໂປ ​ປະຈຳ ສປປ ​ລາວ ເຂົ້າ​ຢ້ຽມ​ຂ່ຳນັບ​ໃນ​ວັນ​ທີ 8 ຕຸລາ 2019​ ທີ່ຫ້ອງຮັບແຂກ​ກະຊວງ ຍທຂ ເນື່ອງ​ໃນ​ໂອກາດ​ທີ່​ທ່ານ ມາ​ດຳລົງ​ຕຳ​ແໜ່​ງ​ເປັນ​ເອກ​ອັກ​ຄະ​ຣາ​ຊະ​ທູດ​ສິງກະໂປ​ຄົນ​ໃໝ່​ປະຈຳ​ລາວ.

ໃນ​ໂອກາດ​ດັ່ງກ່າວ​ ທ່ານ ປອ ບຸນຈັນ ສິນທະວົງ ກໍ​ໄດ້​ສະແດງ​ຄວາມ​ຍິນດີ​ຕ້ອນຮັບ ແລະ ຊົມເຊີຍ​ ພ້ອມ​ຕີ​ລາຄາ​ສູງ​ຕໍ່​ການ​ເຂົ້າ​ຢ້ຽມ​ຂ່ຳນັບ​ຂອງ​ ທ່ານ ນາງ Leow Siu Lin ຊຶ່ງ​ມາ​ດຳລົງ​ຕຳແໜ່​ງ​ເປັນ​ເອກ​ອັກ​ຄະ​ລັດຖະະ​ທູດ​ສິງກະໂປ​ຄົນ​ໃໝ່​ ປະຈໍາ ສປປ ​ລາວ​ ຄັ້ງ​ນີ້​ ເປັນ​ຂີດ​ໝາຍ​ສຳຄັນ​ ໃນ​ການ​ຮັດ​ແໜ້ນ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື, ຊ່ວຍເຫຼືອ​ຊຶ່ງ​ກັນ ແລະ ກັນ​ລະຫວ່າງ ລາວ​-​ສິງກະໂປ ໃຫ້​ເຕີບ​ໃຫຍ່​ຂະຫຍາຍຕົວ ແລະ ແໜ້ນ​ແຟ້ນ​ຍິ່ໆ​ຂຶ້ນ ພ້ອມ​ດຽວ​ກັນ​ນັ້ນ ຍັງ​ໄດ້​ມີ​ການ​ປຶກສາ​ຫາລື​ກ່ຽວ​ກັບ​ການ​ສືບ​ຕໍ່​ວຽກ​ງານ​ການ​ຮ່ວມ​ມື ແລກປ່ຽນ ວຽກງານການພັດທະນາພື້ນຖານໂຄງລາງ​ຕື່ມ​ອີກ. ທ່ານທູດ​ກໍ​ໄດ້​ສະແດງ​ຄວາມ​ຂອບໃຈ​ຕໍ່​ທ່ານ ລັດຖະມົນຕີ​ກະຊວງ ຍທຂ ທີ່​ໃຫ້ການ​ຕ້ອນຮັບ​ຢ່າງ​ອົບ​ອຸ່ນໃນຄັ້ງນີ້.

ກອງປະຊຸມໃຫຍ່ຄັ້ງທີ VII ຂອງກໍາມະບານຮາກຖານກົມຂົວທາງ

ໃນຕອນບ່າຍຂອງວັນທີ 4 ຕຸລາ 2019 ທີ່ຫ້ອງປະຊຸມໃຫຍ່ກະຊວງ ຍທຂ, ໄດ້ຈັດກອງປະຊຸມໃຫຍ່ຄັ້ງທີ VII ຂອງກໍາມະບານກົມຂົວທາງຂື້ນ, ໂດຍການເປັນປະທານຂອງສະຫາຍ ແສງດາວີ ກັດຕິຍະສັກ, ຄະນະບໍລິຫານງານສູນກາງສະຫະພັນກໍາມະບານລາວ, ປະທານສະຫະພັນ ກໍາມະບານ ກະຊວງ ຍທຂ, ມີບັນດາແຂກທີ່ຖືກເຊີນຈາກບັນດາກົມ, ກອງ, ສະຖາບັນ ອ້ອມຂ້າງກະຊວງ ແລະບັນດາສະມາຊິກກໍາມະບານກົມຂົວທາງເຂົ້າຮ່ວມຢ່າງພ້ອມພຽງ.

ກອງປະຊຸມໃຫຍ່ກຳມະບານຮາກຖານກົມຂົວທາງໃນຄັ້ງນີ້: ໄດ້ຜ່ານບົດລາຍງານການເມືອງຊຸດທີ VI ປີ 2015-2018 ແລະ ທິດທາງແຜນການປີ 2019-2023. ນອກຈາກນັ້ນ ກອງປະຊຸມຍັງພ້ອມກັນປ່ອນບັດຄັດເລືອກເອົາຄະນະກໍາມະບານຮາກຖານກົມຂວທາງຊຸດໃໝ່ ແລະ ປ່ອນບັດເອົາຜູ້ແທນສົມບູນ, ສໍາຮອງເພື່ອໄປຮ່ວມກອງປະຊຸມໃຫຍ່ ສະຫະພັນກໍາມະບານກະຊວງ ຄັ້ງທີ VII.

ໃນກອງປະຊຸມ ສະຫາຍ ໄລທອງ ພົມມະວົງ ປະທານກໍາມະບານຮາກຖານ ກົມຂົວທາງ ໄດ້ຂຶ້ນກ່າວເປີດກອງປະຊຸມ ພ້ອມທັງອ່ານຜ່ານບົດລາຍງານການເມືອງຊຸດທີ VI ປີ 2015-2018 ແລະທິດທາງແຜນການປີ 2019-2023. ກອງປະຊຸມຄັ້ງນີ້, ບັນດາຜູ້ແທນເຂົ້າຮ່ວມໄດ້ພ້ອມກັນຄົ້ນຄວ້າ ແລະ ປະກອບຄໍາຄິດຄໍາເຫັນໃສ່ຮ່າງລາຍງານການເມືອງ ແລະ ບົດສໍາຫຼວດການນໍາພາລວມຂອງກໍາມະບານຮາກຖານກົມຂົວທາງຊຸດເກົ່າ, ໃນນັ້ນໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນທີ່​ຖອດ​ຖອນ​ໄດ້ ໃນການຊີ້ນຳ-ນຳພາ ແລະ ການຈັດຕັ້ງປະຕິບັດວຽກ​ງານ ໃນໄລ​ຍະຜ່ານມາ. ພ້ອມນີ້, ກອງປະຊຸມຍັງໄດ້ເປັນເອກະສັນຮັບຮອງເອົາທິດທາງ, ແຜນການ 5 ປີ ນັບແຕ່ປີ 2019-2023. ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຄະນະບໍລິຫານງານກຳມະບານຮາກຖານກົມຂົວທາງຊຸດໃໝ່ ບົນພື້ນຖານຫລັກການລວມສູນປະຊາທິປະໄຕ ແລະ ຖືກ ຕ້ອງສອດຄ່ອງກັບມາດຖານເງື່ອນໄຂທີ່ກຳນົດໄວ້. ຊຶ່ງມີຜູ້ລົງສະໝັກເລືອກຕັ້ງ 7 ສະຫາຍ, ຍິງ 1 ສະຫາຍ ແລະ ເລືອກຕັ້ງໄດ້ 5 ສະຫາຍ, ຍິງ 1 ສະ​ຫາຍ. ກອງປະຊຸມໄດ້ເລືອກຕັ້ງເອົາຜູ້ແທນສົມບູນ ແລະ ຜູ້ແທນສໍາຮອງ ໄປຮ່ວມກອງປະຊຸມໃຫຍ່ ຄັ້ງທີ VII ຊຶ່ງມີຜູ້ລົງສະໝັກເລືອກຕັ້ງ 11 ສະຫາຍ, ຍິງ 2 ສະຫາຍ ແລະ ເລືອກຕັ້ງໄດ້ 5 ສະຫາຍ, ຍິງ 1 ສະຫາຍ ແລະ ຜູ້ແທນສໍາຮອງ 2 ສະຫາຍ, ຍິງ 0 ສະຫາຍ.

ໃນໂອກາດນີ້, ສະຫາຍ ແສງດາວວີ ກັດຕິຍະສັກ ປະທານສະຫະພັນກຳມະບານກະຊວງ ຍທຂ ໄດ້ໂອ້ລົມຕໍ່ກອງປະຊຸມ ກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນໍາ-ນໍາພາຂອງຄະນະບໍລິຫານງານກຳມະບານຮາກຖານກົມຂົວທາງຊຸດເກົ່າ ທີ່ໄດ້ນຳພາສະມາຊິກກຳມະບານປະຕິບັດໜ້າທີ່ ການເມືອງຂອງຕົນ, ຍາດໄດ້ຜົນສຳເລັດຫຼາຍດ້ານ ພ້ອມກັນນັ້ນ, ສະຫາຍຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ, ຂໍ້ຄົງຄ້າງ ຊຶ່ງໄດ້ຮຽກຮ້ອງໃຫ້ຄະນະກຳມະບານຮາກຖານກົມຂົວທາງຊຸດໃໝ່ຈະຕ້ອງໄດ້ສືບຕໍ່ປັບປຸງ, ແກ້ໄຂ ຈາກນັ້ນ ສະຫາຍໄດ້ໃຫ້ທິດຊີ້ນຳວຽກງານແຕ່ລະດ້ານ, ຕໍ່ຄະນະກຳມະບານຮາກຖານກົມຂົວທາງຊຸດໃໝ່ ໃຫ້ສືບຕໍ່ຊີ້ນໍາ-ນໍາພາຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VII ຂອງກຳມະບານຮາກຖານກົມຂົວທາງ ໃຫ້ຍາດໄດ້ຜົນງານ ແລະ ມີຜົນສໍາເລັດກວ່າເກົ່າ.

ທ່ານລັດຖະມົນຕີກະຊວງ ຍທຂ ຕ້ອນຮັບເອກອັກຄະລັດຖະທູດຍີ່ປຸ່ນ

ທ່ານ ປອ ບຸນຈັນ ສິນທະວົງ ລັດຖະມົນຕີ​ກະຊວງ​ ໂຍທາທິການ ແລະ ຂົນສົ່ງ (ຍທຂ) ໄດ້​ຕ້ອນຮັບ​ການ​ເຂົ້າ​ຢ້ຽມ​ຂ່ຳນັບ​ຂອງ ທ່ານ ເຄ​ໂຊ ທາ​ເກ​ວະ​ກະ ເອກ​ອັກ​ຄະ​ລັດຖະທູດ​ຍີ່ປຸ່ນ​ປະຈຳ ສປປ ​ລາວ ເຂົ້າ​ຢ້ຽມ​ຂ່ຳນັບ​ໃນ​ວັນ​ທີ 8 ຕຸລາ 2019​ ທີ່ຫ້ອງຮັບແຂກ​ກະຊວງ ຍທຂ ເນື່ອງ​ໃນ​ໂອກາດ​ທີ່​ທ່ານ ມາ​ດຳລົງ​ຕຳ​ແໜ່​ງ​ເປັນ​ເອກ​ອັກ​ຄະ​ລັດ​ຖະ​ທູດ​ຍີ່ປຸ່ນ​ຄົນ​ໃໝ່​ປະຈຳ​ລາວ.

ໃນ​ໂອກາດ​ດັ່ງກ່າວ​ ທ່ານ ປອ ບຸນຈັນ ສິນທະວົງ ກໍ​ໄດ້​ສະແດງ​ຄວາມ​ຍິນດີ​ຕ້ອນຮັບ ແລະ ຊົມເຊີຍ​ ພ້ອມ​ຕີ​ລາຄາ​ສູງ​ຕໍ່​ການ​ເຂົ້າ​ຢ້ຽມ​ຂ່ຳນັບ​ຂອງ​ ທ່ານ ເຄ​ໂຊ ທາ​ເກ​ວະ​ກະ ຊຶ່ງ​ມາ​ດຳລົງ​ຕຳແໜ່​ງ​ເປັນ​ເອກ​ອັກ​ຄະ​ຣາ​ຊະ​ທູດ​ຍີ່ປຸ່ນ​ຄົນ​ໃໝ່​ ປະຈໍາ ສປປ ​ລາວ​ ຄັ້ງ​ນີ້​ ເປັນ​ຂີດ​ໝາຍ​ສຳຄັນ​ ໃນ​ການ​ຮັດ​ແໜ້ນ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື, ຊ່ວຍເຫຼືອ​ຊຶ່ງ​ກັນ ແລະ ກັນ​ລະຫວ່າງ ລາວ​-​ຍີ່ປຸ່ນ ໃຫ້​ເຕີບ​ໃຫຍ່​ຂະຫຍາຍຕົວ ແລະ ແໜ້ນ​ແຟ້ນ​ຍິ່ໆ​ຂຶ້ນ ພ້ອມ​ດຽວ​ກັນ​ນັ້ນ ຍັງ​ໄດ້​ມີ​ການ​ປຶກສາ​ຫາລື​ກ່ຽວ​ກັບ​ການ​ສືບ​ຕໍ່​ວຽກ​ງານ​ການ​ຮ່ວມ​ມື ແລກປ່ຽນ ວຽກງານການພັດທະນາພື້ນຖານໂຄງລາງ​ຕື່ມ​ອີກ. ທ່ານທູດ​ກໍ​ໄດ້​ສະແດງ​ຄວາມ​ຂອບໃຈ​ຕໍ່​ທ່ານ ລັດຖະມົນຕີ​ກະຊວງ ຍທຂ ທີ່​ໃຫ້ການ​ຕ້ອນຮັບ​ຢ່າງ​ອົບ​ອຸ່ນໃນຄັ້ງນີ້.

ກອງປະຊຸມຮ່ວມມືເຄືອຂ່າຍ ເມືອງທ່າ ຈີນ-ອາຊຽນ ປະຈໍາປີ 2019

ໃນລະຫວ່າງວັນທີ 20-24 ກັນຍາ 2019, ທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງ ຍທຂ, ພ້ອມດ້ວຍຄະນະ ຈາກບັນດາ ກົມຂົວທາງ, ກົມຂົນສົ່ງ, ກົມທາງນໍ້າ, ກົມທາງລົດໄຟ ແລະ ບັນດາຫົວໜ່ວຍທຸລະກິດດ້ານການຂົນສົ່ງ ແລະໂລຊິດສະຕິກ ໄດ້ເຂົ້າຮ່ວມກອງປະຊຸມຮ່ວມມືເຄື່ອຂ່າຍເມືອງທ່າ ຈີນ-ອາຊຽນ (2019 China-ASEAN port Cities Cooperation Network Conference)  ທີ່ນະຄອນນານນິງ, ສປ ຈີນ ໃນລະຫວ່າງວັນທີ 21-23 ກັນຍາ 2019.

ໃນທຸກໆປີ ນະຄອນນານນິງ ສປຈີນ ໄດ້ມີການຈັດງານວາງສະແດງສິນຄ້າ ຈີນ-ອາຊຽນ China-ASEAN EXPO (CAEXPO) ຂຶ້ນເຊິ່ງໃນຄັ້ງນີ້ເປັນຄັ້ງທີ 16, ໂດຍມີກິດຈະກໍາຕ່າງໆເຊັ່ນ: ກອງປະຊຸມວິຊາການ, ການຈັດສໍາມະນາ, ການຝຶກອົບຮົມ, ການແລກປ່ຽນດ້ານທຸລະກິດ-ການຄ້າ, ການເຊັນສັນຍາ ແລະບັນດາກິດຈະກໍາອື່ນໆ, ພາຍໃຕ້ການສະແດງສິນຄ້າ ຈີນ-ອາຊຽນ ໃນຄັ້ງນີ້ໄດ້ມີກິດຈະກໍາ ທີ່ກ່ຽວຂ້ອງກັບຂະແໜງ ຍທຂ ເຊິ່ງປະກອບດ້ວຍ 3 ງານຫຼັກຄື: ກອງປະຊຸມຮ່ວມືເຄື່ອຂ່າຍເມືອງທ່າ ຈີນ-ອາຊຽນ (2019 China-ASEAN port Cities Cooperation Network Conference), ສໍາມະນາວິຊາການ ກ່ຽວກັບການຮ່ວມມືເຄື່ອຂ່າຍເມືອງທ່າ ຈີນ-ອາຊຽນ (2019 China-ASEAN port Cities Cooperation Network Symposium) ແລະ ການຝຶກອົບຮົມ ການສື່ສານສາກົນ ຂອງການຮ່ວມມືເຄື່ອຂ່າຍເມືອງທ່າ ຈີນ-ອາຊຽນ, ໃນການເຂົ້າຮ່ວມກອງປະຊຸມໃນຄັ້ງນີ້ ໂດຍການເປັນປະທານເປີດກອງປະຊຸມຂອງທ່ານ Wong Xiongchang ຮອງຜູ້ທີໜຶ່ງເຈົ້າຄອງ ເມືອງຊິນໂຈ ແລະທັງເປັນຫົວໜ້າເລຂາທິການຮ່ວມມືເຄື່ອຂ່າຍເມືອງທ່າ ຈີນ-ອາຊຽນ, ນອກຈາກນີ້ຍັງມີທ່ານ Yang Jinbai ຮອງເຈົ້າຄອງຜູ້ແທນປະຊາຊົນ ເຂດປົກຄອງຕົນເອງ ເຜົ່າຈວ້າງ-ກວາງຊີ ແລະ ບັນດາແຂກຈາກບັນດາປະເທດຕ່າງໆເຂົ້າຮ່ວມ.

ໃນ ກອງປະຊຸມດັ່ງກ່າວ ຜູ້ແທນຝ່າຍລາວ ໄດ້ມີຄໍາເຫັນປະກອບ ໃນກອງປະຊຸມສໍາມະນາວິຊາການ ກ່ຽວກັບການເຊື່ອມຈອດການພັດທະນາ ທ່າເຮືອ ແລະທ່າບົກ ສໍາລັບລະບົບການຂົນສົ່ງຫຼາຍຮູບແບບ, ເຊິ່ງໃນນີ້ ຝ່າຍລາວເຮົາໄດ້ຍົກໃຫ້ເຫັນຍຸດທະສາດ ຂອງປະເທດກ່ຽວກັບການເປັນປະເທດເຊື່ອມຕໍ່, ການຂົນສົ່ງຂ້າມແດນ, ການອໍານວຍຄວາມສະດວກ ແບບປະຕູດຽວ ແລະອື່ນໆ, ໃນນັ້ນໄດ້ເນັ້ນໜັກເຖິງການເຊື່ອມໂຍງ ແລະເຊື່ອມຈອດ ບັນດາກິດຈະການຂົນສົ່ງ ແລະການຫັນປະເທດທີ່ບໍ່ມີຊາຍແດນຕິດກັບທະເລເປັນປະເທດທາງຜ່ານ ເພື່ອອໍານວຍຄວາມສະດວກໃນດ້ານການຂົນສົ່ງ ແລະໂລຊິດສະຕິກ, ພ້ອມນີ້ຍັງສາມາດຖອດຖອນບົດຮຽນຈາກພາກສ່ວນອື່ນໆ ກ່ຽວກັບການພັດທະນາ ແລະວາງແຜນການຂົນສົ່ງ ຂອງແຕ່ລະປະເທດ ເຊິ່ງບົດຮຽນຈາກພາກສ່ວນອື່ນໆ ກ່ຽວກັບການພັດທະນາ ແລະ ວາງແຜນການຂົນສົ່ງຂອງແຕ່ລະປະເທດ ທີ່ເປັນບົດຮຽນທີ່ດີແກ່ການນໍາໃຊ້ໃນອານາຄົດ ແລະ ສໍາລັບພາກທຸລະກິດ ສາມາດສ້າງເຄື່ອຂ່າຍ ແລະ ຂະຫຍາຍຕະຫຼາດດ້ານການຂົນສົ່ງ ແລະໂລຊິດສະຕິກ ກັບບັນດາປະເທດໃນອາຊຽນ ແລະໂດຍສະເພາະກັບ ສປ ຈີນ, ເຊິ່ງເປັນປະເທດທີ່ມີຕະຫຼາດພ້ອມດ້ວຍລະບົບການຂົນສົ່ງ ແລະໂລຊິດສະຕິກໃນລະດັບດີ. 

ນອກຈາກນັ້ນ ໃນຕໍ່ໜ້າທຸກພາກສ່ວນໃນ ກະຊວງ ຍທຂ ໂດຍສະເພາະ ບັນດາກົມ ທີ່ເຂົ້າຮ່ວມແມ່ນຈະໄດ້ສືບຕໍ່ປະສາມສົມທົບກັບບັນດາອົງການທີ່ກ່ຽວຂ້ອງຂອງ ສປ ຈີນ ເພື່ຶອການພັດທະນາ,  ພົວພັນ, ແລກປ່ຽນປະສົບການ ແລະ ບັນດາຂໍມູນໃນການພັດທະນາວຽກງານໃນຂະແໜງການຂອງຕົນໃຫ້ໄດ້ດີກວ່າເກົ່າ. ສືບຕໍ່ປະສານສົມທົບ ເພື່ອຍາດແຍ່ງການຊ່ວຍເຫລືອ ເພື່ອໃຫ້ ບັນດາຂະແໜງການຕ່າງໆ ໄດ້ຮັບການພັດທະນາ ໂດຍສະເພາະ ແມ່ນດ້ານເຕັກນິກ-ວິຊາການ ເພື່ອເຮັດໃຫ້ ວຽກງານຂອງຕົນໄດ້ຮັບການພັດທະນາ. ນອກຈາກນີ້, ກໍ່ເປັນການເປີດຕະຫລາດຂອງ ບັນດາຫົວໜ່ວນທຸລະກິດດ້ານການຂົນສົ່ງ ແລະ ໂລຊິດສະຕິກ ສູ່ຕະຫລາດຂອງ ສປ ຈີນ ແລະ ອາຊຽນ ເພຶ່ອເປັນການເຊື່ອມໂຍງ ແລະ ເຊື່ອມຈອດລະຫວ່າງ ຈີນ-ອາຊຽນ ໃຫ້ມີປະສິດທິຜົນກວ່າເກົ່າ.

Additional information