ກອງປະຊຸມເຜີຍແຜ່ແຜນຂໍ້ຕົກລົງວ່າດ້ວຍການຄຸ້ມຄອງການປຸງສ້າງ

Details

Category: ຂ່າວພາຍໃນກະຊວງ

Published on ສຸກ, 07 ກຸມພາ 2020 06:55

ກະຊວງໂຍທາທິການ ແລະ ຂົນສົ່ງ ຮ່ວມກັບຫ້ອງວ່າການນະຄອນຫຼວງວຽງຈັນ ໄດ້ຈັດກອງປະຊຸມເຜີຍແຜ່ຂໍ້ຕົກລົງວ່າດ້ວຍ ການຄຸ້ມຄອງການປຸງສ້າງ (ສະບັບປັບປຸງ)  ດ້ານກົດລະບຽບໃນການຄຸ້ມຄອງ ການປຸງສ້າງໃຫ້ແກ່ບັນດາເຈົ້າໜ້າທີ່ຂັ້ນທ້ອງຖິ່ນ ແລະ ຂັ້ນທຸລະກິດທີ່ເຄື່ອນໄຫວ ໃນ 4 ເມືອງໃນຂອງນະຄອນຫຼວງວຽງຈັນ, ເພື່ອສ້າງຄວາມຮັບຮູ້ກ່ຽວກັບບັນດາລະບຽບ ແລະ ຂັ້ນຕອນໃນການຂໍອະນຸຍາດ ປຸກສ້າງໃໝ່ ແລະ ຮັບປະກັນການຈັດຕັ້ງປະຕິບັດໃຫ້ມີຄວາມສອດຄ່ອງກັນ, ກອງປະຊຸມໄດ້ຈັດຂື້ນໃນວັນທີ 7 ກຸມພາ 2020 ທີ່​ໂຮງ​ແຮມດອນຈັນພາເລດ, ໂດຍການເປັນປະທານ ຂອງທ່ານ ນາງ ວິໄລຄຳ ໂພສາລາດ ຮອງລັດຖະມົນຕີ ກະຊວງ ຍທຂ; ທ່ານ ພູຂົງ ບັນນາວົງ ຮອງເຈົ້າຄອນ ນະຄອນຫຼວງວຽງຈັນ ​ແລະ ທ່ານ ພົງສະຫວັນ ພົມກອງ ຫົວໜ້າຫ້ອງການ ອົງການການເງິນສາກົນ, ມີບັນດາເອກອັກຄະລັກຖະທູດ ຍີ່ປຸ່ນ ປະຈໍາລາວ, ມີບັນດາຫົວໜ້າກົມ, ຮອງກົມເຄຫາ ແລະຜັງເມືອງ, ຫົວໜ້າສະຖາບັນ, ຮອງສະຖາບັນຄົ້ນຄວ້າ ຍທຂ, ຫົວໜ້າພະແນກ, ຮອງພະແນກ ຍທຂ ແລະຜູ້ຕາງໜ້າ ພະແນກອ້ອມຂ້າງ ລວມທັງລັດວິສາຫະກິດຕິດຕັ້ງໄຟຟ້າ, ຕິດຕັ້ງນໍ້າປະປານະຄອນຫຼວງວຽງຈັນ, ບັນດາທ່ານເຈົ້າເມືອງ, ຮອງເຈົ້າເມືອງ, ຫ້ອງການອ້ອມຂ້າງ, ນາຍບ້ານ ແລະຫົວໜ່ວຍທຸລະກິດ ພາຍໃນ 4 ຕົວເມືອງໃນນະຄອນຫຼວງວຽງຈັນ ກໍ່ໄດ້ໃຫ້ກຽດເຂົ້າຮ່ວມຢ່າງພ້ອມພຽງ.

ກອງປະຊຸມໃນຄັ້ງນີ້ແມ່ນເພື່ອຈັດຕັ້ງປະຕິບັດ ຜັນຂະຫຍາຍ ແລະໂຄສະນາເຜີຍແຜ່ ນິຕິກໍາລຸ່ມກົດໝາຍ, ບົດແນະນຳຕ່າງໆ ທີ່ຕິດພັນກັບວຽກງານ, ການວາງແຜນຂະຫຍາຍຜັງເມືອງ, ການຄຸ້ມຄອງ, ກວດກາ, ຕິດຕາມການປຸກສ້າງ ແລະການສະໜອງຂໍ້ມູນຂ່າວສານທີ່ຈໍາເປັນໃຫ້ແກ່ສັງຄົມ, ບັນດາພະແນກການ, ເມືອງ, ບ້ານ ແລະບັນດາຫົວໜ່ວຍທຸລະກິດທີ່ກ່ຽວຂ້ອງ ໃນຂອບເຂດ 4 ຕົວເມືອງໃນນະຄອນຫຼວງວຽງຈັນ, ໃຫ້ກ້າວເຂົ້າສູ່ລວງເລີກ ແລະມີຄວາມເຂົ້າໃຈຕໍ່ວຽກງານການຄຸ້ມຄອງຜັງເມືອງໃຫ້ ກ້ວາງຂວາງກວ່າເກົ່າ, ກອງປະຊຸມໃນຄັ້ງນີ້ຈະມີການນຳສະເໜີຢູ່ 5 ຫົວຂໍ້ຄື: ແຜນຜັງການນໍາໃຊ້ທີ່ດິນນະຄອນຫຼວງວຽງຈັນ (ເງື່ອນໄຂການອະນຸຍາດປຸກສ້າງ); ຂໍ້ຕົກລົງວ່າດ້ວຍການຄຸ້ມຄອງການປຸກສ້າງ (ສະບັບປັບປຸງ); ຕົວຢ່າງການອອກອະນຸຍາດປຸງສ້າງຢູ່ໃນນະຄອນຫຼວງວຽງຈັນ; ຂໍ້ຕົກລົງວ່າດ້ວຍມາດຕະ ຖານເຕັກນິກການປຸງສ້າງ ແລະປໍ້ານໍ້າມັນເຊື້ອໄຟ ແລະວິທີການປະເມີນການປຸກສ້າງຂອງທະນາຄານໂລກ, ຫຼັງຈາກໄດ້ຮັບຟັງການນໍາສະເໜີຫົວຂໍ້ຕ່າງໆ, ບັນດາແຂກຜູ້ເຂົ້າຮ່ວມກອງປະຊຸມ ໄດ້ມີໂອກາດສະເໜີ ຄໍາຖາມ ທີ່ເປັນຂໍ້ຫຍ້ງຍາກ ເພື່ອແລກປ່ຽນຄໍາຄິດເຫັນ ໃນການປັບປຸງການຂໍອະນຸຍາດປຸກສ້າງ ໃນນະຄອນຫຼວງວຽງຈັນ ແລະດໍາເນີນທຸລະກິດ ໃນຂະແໜງການກໍ່ສ້າງ ເພື່ອຄວາມກະຈ່າງແຈ້ງແກ້ທຸກບັນຫາ ແລະທຸກຄຳຖາມ ເພື່ອການປະຕິບັດຕົວຈິງໃຫ້ມີປະສິດທິຜົນດີ, ກອງປະຊົມໄດ້ດໍາເນີນເປັນເວລາ 1 ວັນເຕັ້ມ, ແລະໄດ້ອັດລົງດ້ວຍໝາກຜົນອັນຈົບງາມ.

ກອງປະຊຸມສາມັນຄົບຄະນະພັກກະຊວງ ຍທຂ ຄັ້ງທີ 18, ສະໄໝທີ IV (ເປີດກວ້າງ)

Details

Category: ຂ່າວພາຍໃນກະຊວງ

Published on ພຸດ, 05 ກຸມພາ 2020 08:17

ກອງປະຊຸມສາມັນຄົບຄະນະພັກກະຊວງ ​ໂຍທາ​ທິການ ​ແລະ ຂົນ​ສົ່ງ ຄັ້ງທີ 18, ສະໄໝທີ IV (ເປີດກວ້າງ) ​ໄດ້​ຈັດ​ຂື້ນ​ໃນ​ວັນ​ທີ 5-6 ກຸມພາ 2020, ​ໂດຍ​ການ​ເຂົ້າ​ຮ່ວມ​ ແລະ ​ເປັນ​ປະ​ທ່ານ​ຂອງ ສະຫາຍ ປອ ບຸນ​ຈັນ ສິນ​ທະ​ວົງ ກຳມະການ​ສູນ​ກາງ​ພັກ, ​ເລຂາ​ຄະນະ​ພັກ, ລັດຖະມົນຕີ​ກະຊວງ ​ໂຍທາ​ທິການ ​ແລະ ຂົນ​ສົ່ງ; ມີ​ບັນດາສະຫາຍຄະນະປະຈໍາພັກ, ກໍາມະການພັກກະຊວງ; ບັນດາ​ສະຫາຍ​ຕາງໜ້າ ຫ້ອງ​ວ່າການ​ສູນ​ກາງ​ພັກ, ຄະນະ​ຈັດ​ຕັ້ງ​ສູນ​ກາງ​ພັກ, ຄະນະ​ກວດກາ​ສູນ​ກາງ​ພັກ, ຄະນະ​ໂຄສະນາ​ອົບຮົມ​ສູນ​ກາງ​ພັກ; ບັນດາສະຫາຍ​ເລຂາ, ຮອງ​ເຂລຂາ, ກຳມະການ​ຄະນະ​ພັກ​ບັນດາ​ຮາກ​ຖານ,  ຫົວໜ້າ ​ແລະຮອງຫົວໜ້າຫ້ອງການ, ກົມ, ສະຖາບັນ, ກອງວິຊາການ, ລັດວິສາຫະກິດ, ປະທານ ​ແລະເລຂາຄະນະບໍລິຫານ​ງານ ສາມອົງການຈັດຕັ້ງມະຫາຊົນຂັ້ນກະຊວງ, ຕະຫຼອດຮອດພະນັກງານຫຼັກແຫຼ່ງ ອ້ອມ​ຂ້າງ​ກະຊວງ ຍທຂ ​ເຂົ້າ​ຮ່ວມ.

ກອງປະຊຸມ ສາມັນຄົບຄະນະພັກກະຊວງໂຍທາທິການ ແລະ ຂົນສົ່ງ ຄັ້ງ​ທີ 18, ສະ​ໄໝທີ IV (ເປີດກວ້າງ) ຂຶ້ນຢ່າງເປັນທາງການ ໃນທ່າມກາງທີ່ທົ່ວພັກ, ທົ່ວລັດ, ທົ່ວປວງຊົນລາວທັງຊາດ ພວມ​ອອກ​ແຮງ​ແຂ່ງຂັນ​ຈັດ​ຕັ້ງ​ຜັນ​ຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ເຂົ້າສູ່ວຽກງານຕົວຈິງ, ຕິດພັນກັບການຈັດຕັ້ງຜັນຂະຫຍາຍມະຕິ​ກອງ​ປະຊຸມ​ໃຫຍ່ ຄັ້ງ​ທີ IV ຂອງອົງຄະນະພັກກະຊວງຂອງພວກເຮົາຢ່າງຕັ້ງໜ້າ ແລະ ໄດ້ມີຜົນສໍາເລັດໃນຫລາຍໆດ້ານເປັນກ້າວໆມາ. ກອງປະຊຸມຄັ້ງນີ້, ຊຶ່ງເປັນກອງປະຊຸມທີ່ມີຄວາມໝາຍ, ຄວາມສໍາຄັນເພາະວ່າພວກເຮົາຈະພ້ອມກັນປຶກສາຫາລື ແລະ ພິຈາລະນາຮັບຮອງຫຼາຍວຽກງານ ດັ່ງນີ້: ບົດສະຫຼຸບຕີລາຄາການເຄື່ອນໄຫວນຳພາຊີ້ນຳວຽກງານຮອບດ້ານ ຂອງຄະນະພັກກະຊວງ ປີ 2019 ແລະ ກຳນົດແຜນການ ປີ 2020; ບົດສະຫຼຸບ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານກວດກາພັກ-ລັດ ແລະຕ້ານການສໍ້ລາດບັງຫລວງ ຂອງ​ກະຊວງໂຍທາທິການ ແລະ ຂົນສົ່ງ ໃນໄລຍະຜ່ານມາ ແລະ ກຳນົດແຜນ ການໃນຕໍ່ໜ້າ; ບົດສະຫຼຸບ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານແຜນການ ປີ 2019 ແລະ ວາງທິດທາງແຜນການ ປີ 2020; ບົດສະຫຼຸບ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານການເງິນ ປີ 2019 ແລະວາງທິດທາງແຜນການ ປີ 2020; ບົດສະຫຼຸບການ​ນຳ​ພາ​ຂອງ​ຄະ​ນະ​ປະ​ຈຳ​ພັກກະຊວງ ​ປີ 2019 ແລະ ວາງທິດທາງແຜນການ ປີ 2020 ​ແລະ ບົດສຳຫຼວດການນຳພາລວມຂອງຄະນະພັກກະຊວງ ສະ​ໄໝທີ IV ປີ 2019.

ກອງປະຊຸມໃນຄັ້ງນີ້ ມີເນື້ອໃນສຳຄັນຫຼາຍດ້ານ ດັ່ງທີ່ໄດ້ກ່າວມາຂ້າງເທິງນັ້ນ ດ້ວຍເວລາອັນຈຳກັດ ຈຶ່ງຮຽກຮ້ອງມາຍັງບັນດາສະຫາຍທັງໝົດ   ທີ່ເຂົ້າຮ່ວມກອງປະຊຸມໃນຄັ້ງນີ້, ຈົ່ງເຊີດຊູ ແລະ ຍົກສູງຄວາມຮັບຜິດຊອບຂອງຕົນ ພ້ອມກັນສຸມສະຕິປັນຍາ ເຂົ້າໃນການຄົ້ນຄວ້າ ແລະ ປະກອບຄໍາຄິດຄໍາເຫັນຢ່າງກົງໄປກົງມາ  ມີເຫດມີຜົນ ຖືກກັບສະພາບຕົວຈິງການເຄື່ອນໄຫວນຳພາ ຂອງຄະນະພັກກະຊວງໃນໄລຍະ 1 ປີ ຜ່ານມາ, ເພື່ອຊອກໃຫ້ເຫັນດ້ານຕັ້ງໜ້າທີ່ພົ້ນເດັ່ນ ແລະ ຂໍ້ຄົງຄ້າງ  ທີ່ຕ້ອງໄດ້ຄົ້ນຄວ້າປັບປຸງແກ້ໄຂໃນຕໍ່ໜ້າ.

ເພື່ອໃຫ້ໄດ້ຕາມລະດັບຄາດໝາຍນັ້ນ,​ ບັນດາສະຫາຍທີ່ເຂົ້າຮ່ວມກອງປະຊຸມທັງໝົດ ຈະຕ້ອງພ້ອມກັນຕັດສິນໃຈສູງ,​ ເຫັນໄດ້ຄວາມຮັບຜິດຊອບການເມືອງຕໍ່ຊາຕາກໍາຂອງປະເທດຊາດ,​ ສ້າງໃຫ້ພັກມີຄວາມປອດໃສ ເຂັ້ມແຂງ ໜັກແໜ້ນ ເພື່ອນໍາພາ-ພາລະກິດປະຕິວັດກ້າວໜ້າຢ່າງບໍ່ຢຸດຢັ້ງ.

ຢາກເຮັດໄດ້ແນວນີ້ ກ່ອນອື່ນໝົດ ເຮົາຕ້ອງເປັນເອກະພາບກັນທາງດ້ານທັດສະນະ ແລະ ຄວາມຮັບຮູ້ ຕັ້ງໜ້າແກ້ໄຂສິ່ງຫຍໍ້ທໍ້ທັງໝົດ ທີ່ເກີດຂຶ້ນຢູ່ໃນກະຊວງໃຫ້ໝົດໄປເທື່ອລະກ້າວ,​ ທັງໝົດນັ້ນ ແມ່ນເພື່ອແນ່ໃສ່ເຮັດໃຫ້ກະຊວງ ຍທຂ ມີບາດກ້າວບຸກທະລຸໃໝ່ຮອບດ້ານ ແລະ ເຮັດໃຫ້ກອງປະຊຸມສໍາເລັດຜົນ ຕາມຈຸດປະສົງຄາດໝາຍ ທີ່ໄດ້ກໍານົດໄວ້ຢ່າງຈົບງາມ, ຕາມຄຳຂວັນຂອງຂະແໜງ ຍທຂ ທີ່ວ່າ: “ພັດທະນາໂຍທາທິການ ແລະ ຂົນສົ່ງ ໃຫ້ເປັນປາຍແຫຼມ, ມີຈຸດສຸມ, ມີປະສິດທິຜົນສູງ, ທັນສະໄໝ, ປອດໄພ, ມີຄວາມທົນທານຕໍ່ການປ່ຽນແປງດິນຟ້າອາກາດ, ເຊື່ອມໂຍງ-ເຊື່ອມຈອດ ແລະ ຍືນຍົງ”.

ກອງປະຊຸມເປີດກວ້າງຄະນະຮັບຜິດຊອບຊີ້ນຳ ພັດທະນາເຂດຈຸດສຸມໃຈກາງແຂວງໄຊສົມບູນ

Details

Category: ຂ່າວພາຍໃນກະຊວງ

Published on ສຸກ, 07 ກຸມພາ 2020 06:45

ກອງປະຊຸມເປີດກ້ວາງຄະນະຮັບຜິດຊອບຊີ້ນຳພັດທະນາເຂດຈຸດສຸມໃຈກາງຢູ່ ແຂວງໄຊສົມບູນເພື່ອຜັນຂະຫຍາຍດຳລັດວ່າດ້ວຍນະໂຍບາຍການພັດທະນາເສດຖະກິດຂອງແຂວງໄຊສົມບູນ ໄດ້ຈັດຂຶ້ນໃນວັນທີ 3 ກຸມພາ 2020 ນີ້, ໂດຍການເປັນປະທານຂອງ ສະຫາຍ ພັນຄຳ ວິພາວັນ ກໍາມະການກົມການເມືອງສູນກາງພັກ ຮອງປະທານປະເທດ ຜູ້ປະຈຳການຄະນະເລຂາທິການສູນກາງພັກ ຫົວໜ້າຄະນະຊີ້ນຳ ພັດທະນາເຂດຈຸດສຸມໃຈກາງ; ສະຫາຍ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ ລັດຖະມົນຕີກະຊວງປ້ອງກັນປະເທດ ຮອງຫົວໜ້າຄະນະຊີ້ນໍາພັດທະນາເຂດຈຸດສຸມໃຈກາງ, ມີສະຫາຍ ເລຂາທິການສູນກາງພັກ, ກຳມະການສູນກາງພັກ, ລັດຖະມົນຕີ, ຮອງລັດຖະມົນຕີ, ຫ້ອງວ່າການສູນກາງພັກ, ຄະນະຮັບຜິດຊອບເຂດຈຸດສຸມໃຈກາງແຂວງໄຊສົມບູນ, ພະແນກການທີ່ກ່ຽວຂ້ອງ, ຕະຫຼອດຮອດອະນຸກຳມະການ ແລະ ບັນດາຫົວໜ່ວຍທຸລະກິດ ເຂົ້າຮ່ວມ.

ຈຸດປະສົງຂອງກອງປະຊຸມໃນ ຄັ້ງນີ້ແມ່ນປະຕິບັດຕາມດຳລັດ ເລກທີ 414 ຂອງລັດຖະບານ ວ່າດ້ວຍການຮັບຮອງເອົາຍຸດທະສາດການພັດ ທະນາຈຸດສຸມໃຈກາງແຂວງ ໄຊສົມບູນ ເພື່ອການຈັດຕັ້ງຜັນຂະຫຍາຍ ແລະ ປະຕິບັດມະຕິຂອງ ກົມການເມືອງສູນກາງພັກ ສະບັບເລກທີ 055/ກມສພ ໃຫ້ເຂົ້າສູ່ການກະທຳຕົວຈິງ, ກຳນົດຫຼັກການ, ລະບຽບການ ແລະ ມາດຕະການກ່ຽວກັບການຈັດຕັ້ງປະຕິບັດນະໂຍບາຍພິເສດເພື່ອຊຸກຍູ້ສົ່ງເສີມ ແລະ ດຶງດູູດນັກລົງທຶນທັງພາຍໃນ ແລະ ຕ່າງປະເທດ, ຜູ້ປະກອບການທີ່ມີຄຸນນະພາບເຂົ້າມາລົງທຶນ ແລະ ພັດທະນາ ຢູ່ແຂວງໄຊສົມບູນ ໃຫ້ມີລະດັບການພັດທະນາເສດຖະກິດ-ສັງຄົມທຽບທັນກັບບັນດາເເຂວງ ອື່ນໆໄປຄວບຄູ່ກັບການທົດລອງ ແບ່ງຂັ້ນຄຸ້ມຄອງດ້ານງົບປະມານ, ການເງິນລະຫວ່າງສູນກາງ ແລະ ທ້ອງຖິ່ນໃຫ້ກົມກຽວສອດຄ່ອງໃນການແກ້ໄຂຄວາມທຸກຍາກສ້າງພື້ນຖານເສດຖະກິດ-ສັງຄົມໃຫ້ໝັ້ນທ່ຽງເປັນມິດກັບສິ່ງແວດລ້ອມຕາມທິດສີຂຽວ ແລະ ຍືນຍົງ, ນອກນັ້ນ ກໍຕ້ອງຍົກສູງປະສິດທິພາບຂອງການ ຄຸ້ມຄອງລັດ-ຄຸ້ມຄອງສັງຄົມ ດ້ວຍກົດໝາຍຢູ່ແຂວງໄຊສົມບູນ ໃຫ້ມີປະສິດທິພາບໃນການບໍລິຫານຂັ້ນທ້ອງຖິ່ນ, ສ້າງສະພາບແວດລ້ອມທີ່ເອື້ອອຳນວຍໃຫ້ແກ່ການພັດທະນາຢ່າງຍຸຕິທຳ ແລະ ທົ່ວເຖິງທັງຮັບປະກັນສິດເປັນເຈົ້າຂອງປະຊາຊົນບັນດາເຜົ່າ ຕາມລັດຖະທຳມະນູນ ແລະ ກົດໝາຍ. ໂອກາດນີ້, ສະຫາຍ ພົນຕີ ຄຳລຽງ ອຸທະໄກສອນ ເລຂາພັກແຂວງເຈົ້າແຂວງໆໄຊສົມບູນໄດ້ ຂຶ້ນຜ່ານແຜນການຈັດຕັ້ງປະຕິບັດການຊີ້ນຳພັດທະນາເຂດຈຸດສຸມໃຈກາງແຂວງໄຊສົມບູນ ໃຫ້ກອງປະຊຸມຮັບຊາບວ່າ: ໂດຍ ປະຕິບັດຕາມມະຕິຂອງກົມການເມືອງສູນກາງພັກວ່າດ້ວຍການຈັດຕັ້ງວຽກງານ 3 ສ້າງ, ພັດທະນາເຂດໃຈກາງຢູ່ແຂວງໄຊສົມບູນໄດ້ສຸມໃສ່ນຳພາການເມືອງ-ນຳພາແນວຄິດເຮັດໃຫ້ປະຊາຊົນບັນດາເຜົ່າມີຄວາມເຊື່ອໝັ້ນຕໍ່ການນຳພາຂອງພັກປະຕິບັດກົດໝາຍຂອງລັດ, ເປັນເຈົ້າຕົນເອງຕີຖອຍແນວຄິດຄອງເດີມ ໃຫ້ໝົດໄປ. ໄດ້ເຂົ້າຮ່ວມຂະບວນການແຂ່ງຂັນຮັກຊາດ ແລະ ພັດທະນາ, ຂົງເຂດວຽກງານປ້ອງ ກັນຊາດ-ປ້ອງກັນຄວາມສະຫງົບ ໄດ້ຫັນເອົາກຳລັງ ປກຊ-ປກສ ແຂວງ ແລະ ພະນັກງານລົງ ກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍ ຮັບປະກັນເຮັດໃຫ້ແຂວງມີຄວາມສະຫງົບປອດໄພໜັກ     ແໜ້ນຂຶ້ນ, ວຽກງານເສດຖະກິດມະຫາພາກໄດ້ຂະຫຍາຍຕົວບໍ່ຫຼຸດ 7% ລວມຍອດຜະລິດຕະພັນພາຍໃນປະຕິບັດໄດ້ 1.050,18 ຕື້ກີບເທົ່າກັບ 11 ລ້ານກວ່າກີບ ຫຼື ປະມານ 1.330 ໂດລາຕໍ່ຄົນຕໍ່ປີ, ໃນນັ້ນ ຂະແໜງກະສິກຳຂະຫຍາຍຕົວ 7,7% ກວມເອົາ 55,4% ຂອງ GDP, ຂະແໜງອຸດສາຫະກຳ ຂະຫຍາຍຕົວ 5,6% ກວມເອົາ 18,2% ຂອງ GDP, ຂະແໜງບໍລິການຂະຫຍາຍຕົວ 7,1% ກວມເອົາ 26,4% ຂອງ GDP, ມາຮອດປັດຈຸບັນລວມມີ 183 ໂຄງການ ມູນຄ່າ 3.523,42 ຕື້ກີບ ແຕ່ໄດ້ຮັບອະນຸມັດທຶນໃນປີ 2019 ຈຳນວນ 123,49 ຕື້ກີບ, ການຈັດເກັບລາຍຮັບຕາມການມອບໝາຍຂອງລັດໃນປີ 2019 ຈຳນວນ 75 ຕື້ກີບ, ຜ່ານການຈັດຕັ້ງປະຕິບັດຕົວຈິງປະຕິບັດໄດ້ 79,21 ຕື້ກີບ, ຂະແໜງການເງິນໄດ້ເກັບລາຍຮັບເຂົ້າງົບປະມານຂອງແຂວງຕາມຄາດໝາຍສູ້ຊົນຂອງແຂວງຢ່າງຮັດກຸມ ແລະ ສອດ ຄ່ອງ, ອຸດຕັນຈຸດທີ່ຮົ່ວໄຫຼ ເຂົ້າ-ອອກປະຕູດຽວ, ຂົງເຂດວຽກງານວັດທະນະທຳ-ສັງຄົມ ແລະ ຍຸຕິທໍາກວມເອົາ 59%, ມີໂຮງຮຽນປະຖົມສົມບູນ, ໂຮງໝໍແຂວງ, ເມືອງ, ສຸກສາລາ, ເຮັດໃຫ້ປະຊາຊົນເຂົ້າເຖິງການບໍລິການ, ຂະແໜງການພະລັງງານ ແລະ ບໍ່ແຮ່ໄດ້ປະຕິບັດຕາມແນວທາງນະໂຍບາຍຂອງພັກ-ລັດກໍຄືຂະ ແໜງການທີ່ກ່ຽວຂ້ອງເຮັດໃຫ້ ສາມາດດຶງດູດນັກລົງທຶນທັງພາຍໃນ ແລະ ຕ່າງປະເທດ ນັບມື້ນັບຫຼາຍຂຶ້ນ, ວຽກງານການພົວພັນຮ່ວມມືກັບຕ່າງປະເທດໄດ້ປະຕິບັດຕາມແນວທາງນະໂຍບາຍການຕ່າງປະເທດຂອງພັກ ໂດຍສະເພາະແມ່ນປະເທດຮ່ວມມືທາງດ້ານຍຸດທະສາດເຊັ່ນ: ສສ ຫວຽດນາມ, ສປ ຈີນ. ຈາກນັ້ນບັນດາອະນຸກຳມະການ, ພະແນກການທີ່ກ່ຽວຂ້ອງກໍໄດ້ຂຶ້ນປະກອບຄຳຄິດຄຳເຫັນ ໃສ່ວຽກງານພັດທະນາຈຸດສຸມເຂດໃຈກາງແຂວງໄຊສົມບູນ ຢ່າງກົງໄປກົງມາ ແລະ ມີເນື້ອ ໃນຄົບຖ້ວນ ແລະ ສະຫາຍ ປະທານ ກອງປະຊຸມ ກໍໄດ້ມີຄຳເຫັນເຈາະຈິ້ມແຕ່ລະອະນຸກຳມະການ ຮັບຜິດຊອບບັນດາໜ້າວຽກ, ພ້ອມທັງເນັ້ນໃຫ້ຄະນະຮັບຜິດຊອບຂັ້ນສູນກາງ ແລະ ທ້ອງຖິ່ນຕະຫຼອດຮອດຫົວໜ່ວຍທຸລະກິດ ຈົ່ງພ້ອມກັນສຸມເຫື່ອແຮງ, ສະຕິປັນຍາເຂົ້າໃນການບໍລິຫານຄຸ້ມຄອງແຜນພັດທະນາແຕ່ລະໜ້າວຽກງານໃຫ້ດຳເນີນໄປຖືກຕ້ອງ ຕາມທິດນຳທີ່ຄະນະຊີ້ນຳຈຸດສຸມກໍານົດໂດຍຖືເອົາແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຂອງພັກວາງອອກເປັນຫນ້າທີ່ຂອງໝົດທຸກຄົນ, ຫັນເອົາກຳລັງລົງກໍ່ສ້າງຮາກຖານການເມືອງພັດທະນາຊົນນະບົດຮອບດ້ານ, ໄປຄວບຄູ່ກັບການຍາດແຍ່ງເອົາການລົງທຶນຈາກພາຍໃນ ແລະ ຕ່າງປະ ເທດ  ໃຫ້ນັບມື້ຫຼາຍຂຶ້ນ, ຂົງເຂດວຽກງານຄົມມະນາຄົມຂົນສົ່ງ, ການສຶກສາ, ສາທາລະນະສຸກ, ຍຸຕິທຳ, ການເງິນ, ການທ່ອງທ່ຽວ, ກະສິກຳສົ່ງເສີມການຜະລິດ ແລະ ຂົງເຂດອື່ນ, ຂະແໜງການທີ່ກ່ຽວຂ້ອງຕ້ອງເປັນເສນາທິການໃຫ້ຂັ້ນເທິງກໍຄືອຳນາດການປົກຄອງທ້ອງຖິ່ນ ແຂວງໃນການປະກອບສ່ວນພັດທະນາ ເສດຖະກິດເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າຮັ່ງມີ ແລະ ສີວິໄລຢ່າງແທ້ຈິງ, ສະນັ້ນຮຽກຮ້ອງໃຫ້ທຸກຄົນຕ້ອງໄດ້ ບຸກບືນສູ້ຊົນ ແລະ ຍົກສູງຄວາມເປັນເຈົ້າຕົນເອງໃຫ້ຫຼາຍຂຶ້ນ, ຍຶດໝັ້ນການພັດທະນາແບບສີຂຽວ ແລະ ຍືນຍົງຖືເອົາການພັດທະນາເສດຖະກິດເປັນໃຈກາງ ເອົາສິ່ງແວດລ້ອມເປັນສຳຄັນຮັບປະກັນ 3 ຜົນປະໂຫຍດຄື: ປະຊາຊົນ, ປະເທດຊາດ ແລະ ຜູ້ລົງທຶນ ຢ່າງກົມກຽວ, ໄປຄຽງຄູ່ກັບການເພີ່ມທະວີຄວາມສາມັກຄີພາຍໃນເປັນປຶກແຜ່ນແໜ້ນໜາເຊີດຊູນ້ຳໃຈຮັກຊາດຮັກລະບອບໃໝ່ເປັນເຈົ້າຕົນເອງພັດທະນາ ແຂວງໄຊສົມບູນ ໃຫ້ກ້າວຂຶ້ນສູ່ຈຸດໝາຍທີ່ພັກວາງອອກ.

ກອງປະຊຸມເຜີຍແຜ່ເອກະສານກ່ຽວກັບສິດທິມະນຸດ, ສິດທິເດັກ ແລະ ການຄ້າມະນຸດ

Details

Category: ຂ່າວພາຍໃນກະຊວງ

Published on ສຸກ, 31 ມັງກອນ 2020 07:28

ກະຊວງ ໂຍທາທິການ ແລະ ຂົນສົ່ງ​ໄດ້​ຈັດກອງປະຊຸມເຜີຍແຜ່ເອກະສານກ່ຽວກັບສິດທິ​ມະນຸດ, ສິດທິ​ເດັກ ​ແລະ ການຄ້າມະນຸດ ​ຂື້ນໃນວັນທີ 31 ມັງກອນ 2020 ທີ່ ຫ້ອງ​ປະຊຸມ​ໃຫຍ່​ກະຊວງ ​ໂຍທາ​ທິການ ​ແລະ ຂົນ​ສົ່ງ, ໂດຍໃຫ້ກຽດເປັນປະທານຂອງ ທ່ານ ບຸນ​ຈັນ ສິນ​ຣາຊະ​ວົງ ຫົວຫນ້າ​ຫ້ອງການ​ກະຊວງ ​ໂຍທາທິການ ​ແລະ​ຂົນ​ສົ່ງ; ໃຫ້ກຽດເຂົ້າຮ່ວມ​ ແລະ ​ເຜີຍ​ແຜ່​ເອກະສານ​ໂດຍ ທ່ານພັນ​ເອກ ນາງ ລີ​ວົງ ລາວ​ລີ ຫົວຫນ້າ​ກົມ​ຕຳຫລວດ​ສະກັດ​ກັ້ນ ​ແລະ ຕ້ານ​ການ​ຄ້າ​ມະນຸດ, ກະຊວງ​ປ້ອງ​ການ​ຄວາມ​ສະຫງົບ; ທ່ານ ນາງ ວິ​ໄລ​ລັກ ​ແສນ​ດວງ​ເດດ ຮອງ​ຫົວ​ຫນ້າ​ກົ​ມສົນທິສັນຍາ​ກົດ​ຫມາຍ, ກະຊວງ​ການ​ຕ່າງປະ​ເທດ ​ແລະ ທ່ານ ສຸວັນ​ທອນ ສຸວັນນະ​ຈັກ ຫົວຫນ້າ​ພະ​ແນ​ກສິດທິ​ເດັກ ກອງ​ເລຂາ​ຄະນະ​ກຳ​ມະ​ທິກ​ານ​ແຫ່ງ​ຊາດ​ ​ເພື່ອ​ຄວາມ​ກ້າວຫນ້າ​ຂອງ​ແມ່ຍິງ ​ແລະ ​ແມ່-​ເດັກ; ມີບັນດາທ່ານ​ຫົວຫນ້າ​ກົມ, ຮອງຫົວໜ້າກົມ, ຫ້ອງການກະຊວງ, ກອງວິຊາ​ການ, ສະຖາບັນ, ລັດ​ວິ​ສາ​ຫະກິດ, ບັນດາຫົວໜ້າພະແນກ, ຮອງຫົວໜ້າພະແນກ ​ແລະ ພະນັກງາ​ນອ້ອມ​ຂ້າງ​ກະຊວງເຂົ້າຮ່ວມ.

ເພື່ອ​ໃຫ້​ພະນັກງານ​ກະຊວງ​ໂຍທາ​ທິການ ​ແລະ ຂົນ​ສົ່ງ ​ເຫັນ​ໄດ້​ຄວາມຫມາຍຄວາມສຳຄັນ​ກ່ຽວກັບສິດທິ​ມະນຸດ, ສິດທິ​ເດັກ ​ແລະ ການຄ້າມະນຸດ  ຊຶ່ງເປັນບັນຫາທີ່ເກີດຂື້ນໃນທົ່ວໂລກມາດົນນານແລ້ວ ແລະ ໃນປະຈຸບັນກໍ່ເປັນສາຍເຫດຫນື່ງທີ່ກໍ່ໃຫ້ເກີດປະກົດການຫຍໍ້ທໍ້ໃນສັງຄົມ ຊຶ່ງເປັນສິ່ງຂີດຂວາງຕໍ່ຜົນສຳເລັດທາງດ້ານວຽກງານ ແລະ ສົ່ງຜົນກະທົບທາງລົບໂດຍຕົງຕໍ່ດ້ານເສດຖະກິດ-ສັງຄົມ, ວັດທະນາທໍາ ເວົ້າລວມແລ້ວມັນສົ່ງຜົນກະທົບຕໍ່ໄວໜຸ່ມທີ່ເປັນກໍາລັງແຮງຂອງຊາດ, ສະຖາບັນຄອບຄົວ, ທັງເປັນອັນຕະລາຍຕໍ່ຮ່າງກາຍ, ອາລົມຈິດ ​ແລະ ຊີວິດ-ຈິດໃຈ. ຈາກບັນຫາດັ່ງກ່າວອາດເກີດຈາກຫລາຍສາຍເຫດຕົ້ນຕໍ່ເຊັ່ນ : ຍ້ອນຄວາມທຸກຍາກ, ລາຍຮັບບໍ່ພຽງພໍ, ລະດັບການສຶກສາ, ສະພາບແວດລ້ອມທາງສັງຄົມ, ໝູ່ເພື່ອນຊັກຊວນ ແລະ ການຮັບຟັງຂໍ້ມູນຂ່າວສານທີ່ບິດເບືອນຄວາມຈິ່ງ ເຊື່ອຟັງຄົນງ່າຍ ແລະ ອື່ນໆ. ຍ້ອນ​ແນວ​ນັ້ນ, ລັດຖະບານ ສປປ ລາວ ຈິ່ງໄດ້ຖືເອົາເປັນບັນຫາສຳຄັນ ແລະ ເອົາໃຈໃສ່ຕ້ານການຄ້າມະນຸດ ໂດຍໄດ້ດໍາເນີນວຽກງານເພື່ອຕອບໂຕ້ ກັບບັນຫາດັ່ງກ່າວຢ່າງເປັນລະບົບ ນັບທັງດ້ານແນວທາງນະໂຍບາຍ ແລະ ການຮ່ວມມື, ປ້ອງກັນສະກັດກັ້ນ, ການດຳເນີນຄະດີ ແລະ ບັງຄັບໃຊ້ກົດໝາຍການປົກຄອງຜູ້ຖືກເຄາະຮ້າຍໂດຍມີກົດໜາຍ ການຄ້າມະນຸດ ອັນເປັນສະເພາະ ແລະ ກົນໄກໃນການຕອບໂຕ້ບັນຫາດັ່ງກ່າວ. ພ້ອມ​ດຽວ​ກັນ​ນີ້, ພວກເຮົາຈະໃດ້ຮັບຟັງການ​ເຜີຍ​ແຜ່​ເອກະສານສິດທິມະນຸດ, ພ້ອມທັງສິດທິເດັກ ໂດຍຮັບຮູ້ວ່າໃນຖະແຫຼງການສາກົນວ່າດ້ວຍສິດທິມະນຸດທຸກຄົນສົມຄວນໄດ້ຮັບທຸກສິດທິ ແລະ ອິດສາລະພາບທີ່ໄດ້ກໍານົດມານັ້ນໂດຍ ປັດສະຈາກການຈໍາແນກໃດໆ ໂດຍສະເພາະດ້ານເຊື້ອຊາດ, ຜິວພັນ, ເພດ, ພາສາ, ສາສະໜາ, ຄວາມຄິດເຫັນທາງດ້ານການເມືອງ ແລະ ອື່ນໆ.