ຂ່າວ

ກອງປະຊຸມເຜີຍແຜ່ ດຳລັດວ່າດ້ວຍສະມາຄົມ, ຄຳແນະນຳ, ບັນດາແບບຟອມ ຄູ່ມືການສ້າງຕັ້ງສະມາຄົມ ແລະ ຮ່າງຂໍ້ຕົກລົງ ວ່າດ້ວຍການຄຸ້ມຄອງສະມາຄົມ ໃນຂະແໜງ ໂຍທາທິການ ແລະ ຂົນສົ່ງ

ກະຊວງ ໂຍທາທິການ ແລະ ຂົນສົ່ງ​ໄດ້​ຈັດກອງປະຊຸມເຜີຍແຜ່ ດຳລັດວ່າດ້ວຍສະມາຄົມ, ຄໍາແນະນຳ, ບັນດາແບບຟອມ ຄູ່ມືການສ້າງຕັ້ງສະມາຄົມ ແລະ ຮ່າງຂໍ້ຕົກລົງ ວ່າດ້ວຍການຄຸ້ມຄອງສະມາຄົມ ໃນຂະແໜງ ໂຍທາທິການ ແລະ ຂົນສົ່ງ ​ຂື້ນໃນວັນທີ 28-29 ມັງກອນ 2020 ທີ່ ຣີສອດນາປ່າກວາງ, ແຂວງວຽງຈັນ, ໂດຍໃຫ້ກຽດເປັນປະທານຂອງ ທ່ານ ປອ ສັນຕິສຸກ ສິມມາລາວົງ ຮອງລັດຖະມົນຕີກະຊວງ ຍທຂ; ໃຫ້ກຽດເຂົ້າຮ່ວມໂດຍ ທ່ານ ສຈ. ປອ ສົົມພອນ ເດດອຸດົມ ອະດີດທີ່ປຶກສາລັດຖະມົນຕີ ກະຊວງ ຍທຂ, ມີບັນດາທ່ານ​ຫົວຫນ້າ​ກົມ, ຮອງຫົວໜ້າກົມ, ຫ້ອງການກະຊວງ, ກອງວິຊາ​ການ, ສະຖາບັນ, ບັນດາຫົວໜ້າພະແນກ, ຮອງຫົວໜ້າພະແນກ, ປະທານສະມາຄົມ ແລະ ວິຊາການບັນດາພະແນກ ຍທຂ ທົ່ວປະເທດເຂົ້າຮ່ວມ.

ເພື່ອສືບຕໍ່ຈັດຕັ້ງຄຸ້ມຄອງວຽກງານດັ່ງກ່າວ ໃຫ້ໄດ້ຮັບຜົນດີໃນຕໍ່ໜ້ານີ້ທາງ​ກະຊວງ ໂຍທາທິການ ແລະ ຂົນສົ່ງ ຈິ່ງ​ໄດ້ຈັດ​ກອງປະຊຸມເຜີຍແຜ່​ໃນຄັ້ງນີ້ ​ໃນການຄຸ້ມຄອງສະມາຄົມວິຊາຊີບ ທີ່ຂຶ້ນກັບຂະ     ແໜງ ໂຍທາທິການ ແລະ ຂົນສົ່ງ, ເພື່ອໃຫ້ມີ​ຄວາມ​ເປັນ​ເອ​ກະ​ພາບ​ກັນ ແລະ ສ້າງຄວາມສາມາດໃຫ້ແກ່ ບັນດາກົມ, ກອງ, ສະຖາບັນອ້ອມຂ້າງກະຊວງ ຍທຂ. ຊຶ່ງຈຸດປະສົງ ຂອງການເຜີຍແຜ່ໃນຄັ້ງນີ້ແມ່ນ: ເພື່ອສ້າງຄວາມເຂົ້າໃຈ ແລະ ສ້າງຄວາມເຂັ້ມແຂງໃຫ້ແກ່ບັນດາກົມ, ບັນດາພະແນກ ຍທຂ ແລະ ບັນດາສະມາຄົມ, ເພື່ອເຂົ້າໃຈດຳລັດ, ບົດແນະນຳ ແລະ ແບບຟອມຕ່າງໆ ທີ່ກະຊວງພາຍໃນກຳນົດອອກ ມາໃຫ້ເຂົ້າໃຈຢ່າງເລິກເຊີ່ງ ​ແລະ ເພື່ອຄົ້ນຄ້ວາ, ປະກອບຄຳເຫັນໃສ່ຮ່າງຂໍ້ຕົກລົງ ຂອງລັດຖະມົນຕີ ກະຊວງ ຍທຂ ວ່າດ້ວຍ ການຄຸ້ມຄອງສະມາຄົມ ຂອງຂະແໜງ ຍທຂ ໃຫ້ລະອຽດ ແລະ ເປັນເອກະພາບກັນ ສາມາດຈັດຕັ້ງ ປະຕິບັດໄດ້ໃນຂອບເຂດທົ່ວປະເທດ. ພ້ອມ​ດຽວ​ກັນ​ນີ້​, ກອງ​ປະຊຸມຄັ້ງ​ນີ້​ຍັງ​ໄດ້ຮຽກຮ້ອງໃຫ້ນັກສຳມະນາກອນທັງໝົດ ເອົາໃຈໃສ່ຄົ້ນຄ້ວາ ແລະ ປະກອບຄຳເຫັນ ຢ່າງກົງໄປກົງມາ ເພື່ອເຮັດໃຫ້ກອງປະຊຸມປະສົບຜົນສຳເລັດ, ມີປະສິດທິຜົນສູງ ​ແລະ ສາມາດຈັດຕັ້ງ ປະຕິບັດໄດ້ໃນຂອບເຂດທົ່ວປະເທດ.

ສໍາເລັດກອງປະຊຸມໃຫຍ່ຮາກຖານພັກຫ້ອງການກະຊວງ ຍທຂ ຄັ້ງທີ V ຢ່າງຈົບງາມ.

 

ກອງປະຊຸມໃຫຍ່ ຂອງຄະນະພັກຮາກຖານຫ້ອງການ ກະຊວງໂຍທາທິການ ແລະຂົນສົ່ງ (ຍທຂ)  ຄັ້ງທີ V ໄດ້ໄຂຂຶ້ນຢ່າງເປັນທາງການ ໃນວັນທີ 17 ມັງກອນ 2020 ຜ່ານ​ມາ ທີ່ຫ້ອງປະຊຸມໃຫຍ່ ກະຊວງ ຍທຂ, ໂດຍເປັນກຽດເຂົ້າຮ່ວມກອງສະຫາຍ ປອ. ບຸນຈັນ ສິນທະວົງ, ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງ ຍທຂ; ສະຫາຍ ປອ ສັນຕິ​ສຸກ ສີມມະ​ລາ​ວົງ ຄະນະ​ປະຈຳ​ພັກ​ກະຊວງ, ຮອງ​ລັດຖະມົນຕີ ກະຊວງ ຍທຂ; ສະຫາຍ ລັນ ​ແສງ​ອາພອນ ຄະນະ​ປະຈຳ​ພັກ​ກະຊວງ, ຫົວຫນ້າ​ກົມ​ຈັດ​ຕັ້ງ ​ແລະ ພະນັກງານ ​ແລະ ສະຫາຍ ບຸນຈັນ ສິນຣາຊະ​ວົງ ​ເລຂາຄະ​ນະ​ພັກ​ຮາກ​ຖານ​ຫ້ອງການ​ກະຊວງ, ຫົວຫນ້າ​ຫ້ອງການ​ກະຊວງ; ມີບັນດາສະຫາຍເລຂາ, ຮອງເລຂາຄະນະພັກຮາກຖານ, ໜ່ວຍພັກຮາກຖານອ້ອມຂ້າງກະຊວງ ແລະ ຜູ້ແທນກອງປະຊຸມເຂົ້າຮ່ວມຢ່າງພ້ອມພຽງ.

ສະຫາຍ ບຸນຈັນ ສິນຣາຊະວົງ, ເລຂາຄະນະພັກຮາກຖານຫ້ອງການ ກະຊວງ ຍທຂ ກ່າວວ່າ: ນັບແຕ່ກອງປະຊຸມໃຫຍ່ຄັ້ງທີ IV ຂອງຄະນະພັກຮາກຖານຫ້ອງການ ໃນປີ 2013 ເປັນຕົ້ນມາ, ຄະນະພັກຮາກຖານຫ້ອງການ ໄດ້ນຳພາ-ຊີ້ນຳ ການຈັດຕັ້ງປະຕິບັດແນວທາງຂອງພັກ, ໂດຍສະເພາະແມ່ນມະຕິຂອງກອງປະຊຸມໃຫຍ່ ຄັ້ງທີ IV ຂອງອົງຄະນະພັກກະຊວງ ຍທຂ ຊຶ່ງສາມາດຍາດໄດ້ຜົນງານຫລາຍດ້ານ, ເປັນຕົ້ນແມ່ນການນຳພາດ້ານວຽກງານວິຊາສະເພາະ ໃນການປະຕິບັດໜ້າທີ່ເປັນເສນາທິການໃຫ້ຄະນະນຳກະຊວງ ໃນການຄຸ້ມຄອງ ແລະບໍລິຫານວຽກງານທັງໝົດ ພາຍໃນກະຊວງ ຍທຂ ໂດຍການເປັນໃຈກາງປະສານງານ ແລະອຳນວຍຄວາມສະດວກ ໃຫ້ແກ່ບັນດາກົມ, ສະຖາບັນ, ກອງວິຊາການ ລວມທັງບັນດາຫົວໜ່ວຍທຸລະກິດທີ່ຂຶ້ນກັບກະຊວງ ແລະອົງການຈັດຕັ້ງຕ່າງໆ ທັງພາຍໃນ ແລະຕ່າງປະເທດ, ສູນກາງ ແລະທ້ອງຖິ່ນ, ອັນເປັນປັດໃຈພື້ນຖານໃນການຊຸກຍູ້ ການພັດທະນາວຽກງານຂອງຂະແໜງການໂຍທາທິການ ແລະຂົນສົ່ງ ທີ່ເປັນປາຍແຫລມຂອງຂະບວນການສ້າງເສດຖະກິດແຫ່ງຊາດ ໄດ້ເປັນຢ່າງດີ.

ກອງປະຊຸມໄດ້ຟັງລາຍງານ ແລະ ປະກອບຄໍາຄິດເຫັນຕໍ່​ບົດ​ລາຍ​ງານ​ການ​ເມືອງຂອງ​ຄະນະ​ພັກ​ຮາກ​ຖານ​ຫ້ອງການ​ກະຊວງຈາກຜູ້ຕາງໜ້າ 3 ພາກສ່ວນ ເຊິ່ງແຕ່ລະພາກສ່ວນລ້ວນແລ້ວແຕ່ສະແດງໃຫ້ເຫັນເຖິງຄວາມເປັນເອກະພາບ ຕໍ່ລາຍງານການເມືອງ, ທິດທາງແຜນການ ແລະ ວຽກງານຮອບດ້ານຕໍ່ກອງປະຊຸມ, ການລາຍງານປະກອບຄໍາຄິດເຫັນ ໄດ້ລົງເລິກລາຍງານຜົນສຳເລັດການຜັນຂະຫຍາຍມະຕິກອງປະຊຸມໃຫຍ່ ເຂົ້າໃນວຽກ​ງານຂອງຕົນ ອັນໄດ້ເຮັດໃຫ້ກອງປະຊຸມມີເນື້ອໃນອຸດົມສົມບູນຂຶ້ນຕື່ມ.

ພ້ອມກັນນັ້ນ, ກອງປະຊຸມໄດ້ຮຽກຮ້ອງໃຫ້ສະມາຊິກພັກ-ພະນັກງານ ລັດຖະກອນ ທັງໝົດ ພາຍໃນຄະນະພັກຮາກຖານຫ້ອງການ ກະຊວງ ຍທຂ ໃຫ້ອອກແຮງຄົ້ນຄວ້າ ເຊື່ອມຊຶມມະຕິຂອງກອງປະຊຸມໃຫຍ່ຂອງຕົນ, ເຊີດຊູສະຕິຕໍ່ການຈັດຕັ້ງ, ປະຕິບັດລະບຽບວິໄນ, ຝຶກຝົນຫລໍ່ຫລອມຄຸນສົມບັດ ສິນທຳປະຕິວັດ, ຍົກລະດັບຄວາມຮູ້-ຄວາມສາມາດໃຫ້ສູງຂຶ້ນກວ່າເກົ່າ ເພື່ອຍົກລະດັບການປະຕິບັດໜ້າທີ່ການເມືອງ ຕາມຄຳຂວັນໃໝ່ຂອງຫ້ອງການກະຊວງທີ່ວ່າ “ເປັນເສນາທິການທີ່ເຂັ້ມແຂງ, ເປັນໃຈກາງປະສານງານທີ່ວ່ອງໄວ ແລະເປັນຜູ້ບໍລິການທີ່ທັນສະໄໝ”.

ນອກຈາກ​ນີ້ ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຂັດເລືອກເອົາຄະນະພັກຮາກ​ຖານ​ຫ້ອງການກະຊວງຊຸດໃໝ່ ບົດພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກຳນົດໄວ້, ເຊິ່ງມີຜູ້ອອກຮັບສະໝັກເລືອກຕັ້ງ 7 ສະຫາຍ, ຍິງ 3 ສະຫາຍ ແລະ ເລືອກຕັ້ງໄດ້ 5 ສະຫາຍ, ຍິງ 2 ສະຫາຍ ຄື:

1)   ສະຫາຍ ບຸນ​ຈັນ ສິນຣາຊະ​ວົງ

2)   ສະຫາຍ ​ແສງ​ຈັນ ຫອມ​ສີ​ລາ​ຮັກ

3)   ສະຫາຍ ນະ​ລົງ​ໄຊ ມີ​ວາ​ປະດິດ

4)   ສະຫາຍ ​ນາງ ​ເກສອນ ວົງສາ

5)   ສະຫາຍ ນາງ ​ເກສອນ ສີ​ສຸວັນ

ກອງປະຊຸມຄັ້ງປະຖົມມະລຶກຂອງຄະນະພັກຮາກຖານຫ້ອງການ​ກະຊວງ ຄັ້ງ​ທີ V ໄດ້ເປັນເອກະສັນເລືອກເອົາ ເລຂາ, ຮອງເລຂາ, ປະທານກວດກາ ຂອງ​ຄະນະ​ພັກຮາກ​ຖານ ດັ່ງນີ້:

1)  ສະຫາຍ ສະຫາຍ ບຸນ​ຈັນ ສິນຣາຊະ​ວົງ         ເປັນເລຂາ

2)  ສະຫາຍ ນະ​ລົງ​ໄຊ ມີ​ວາ​ປະດິດ               ເປັນຮອງເລຂາ

3)  ສະຫາຍ ​ແສງ​ຈັນ ຫອມ​ສີ​ລາ​ຮັກ             ເປັນ​ປະທານກວດກາ

4)  ສຫ ນາງ ເກສອນ ວົງສາ             ເປັນກໍາມະການພັກ

5)  ສຫ ນາງ ເກສອນ ສີສຸວັນ                   ເປັນກໍາມະການພັກ

 ກອງປະຊຸມໄດ້ເລືອກຕັ້ງເອົາຜູ້ແທນສົມບູນ ແລະ ຜູ້ແທນສໍາຮອງ ໄປຮ່ວມກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ໂຍທາທິການ ແລະ ຂົນສົ່ງ, ເຊິ່ງມີຜູ້ອອກຮັບສະໝັກເລືອກຕັ້ງ 10 ສະຫາຍ, ຍິງ 5 ສະຫາຍ ແລະ ເລືອກຕັ້ງໄດ້ຜູ້​ແທນ​ສົມບູນ 8 ສະຫາຍ, ຍິງ 4 ສະຫາຍ ແລະ ຜູ້ແທນສໍາຮອງ 2 ສະຫາຍ.

ກອງປະຊຸມໃຫຍ່ໄດ້ຮັບຟັງການໂອ້ລົມຈາກ ສະ​ຫາຍ ປອ. ບຸນຈັນ ສິນທະວົງ, ກຳມະການ​​ສູນ​ກາງ​ພັກ, ເລຂາຄະນະພັກ, ລັດຖະມົນຕີກະຊວງ ໂຍທາທິການ ແລະ ຂົນສົ່ງ ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການນຳພາຊີ້​ນໍາຂອງຄະນະພັກຮາກ​ຖານ​ຫ້ອງການກະຊວງຊຸດເກົ່າ ທີ່ໄດ້ນຳພາຊີ້​ນໍາພະນັກງານ, ສະມາຊິກພັກ, ລັດຖະກອນ ປະຕິບັດໜ້າທີ່ການເມືອງຂອງຕົນ, ຍາດໄດ້ຜົນສຳເລັດຫຼາຍດ້ານ. ພ້ອມກັນນັ້ນ, ສະຫາຍຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ, ຂໍ້ຄົງຄ້າງ ເຊິ່ງໄດ້ຮຽກຮ້ອງໃຫ້ຄະນະພັກຊຸດໃໝ່ ຈະຕ້ອງໄດ້ສືບຕໍ່ປັບປຸງ, ແກ້ໄຂ ຈາກນັ້ນສະຫາຍ​ໄດ້ໃຫ້ທິດ​ຊີ້ນຳວຽກງານແຕ່ລະດ້ານ, ສະຫາຍມີຄວາມເຊື່ອໝັ້ນຕໍ່ຄະນະພັກຮາກ​ຖານ​ຫ້ອງການກະຊວງຊຸດໃໝ່ ທີ່ຈະສືບຕໍ່ນຳພາຊີ້​ນໍາຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງ​ທີ V ຄະນະພັກຮາກ​ຖານ​ຫ້ອງການກະຊວງ ໃຫ້ຍາດໄດ້ຜົນງານ ແລະ ມີຜົນສໍາເລັດຍິ່ງໃຫຍ່ກວ່າເກົ່າ.

ກອງປະຊຸມສໍາມະນາ ກ່ຽວກັບການສ້າງນະໂຍບາຍ ການກໍານົດມາດຖານເຕັກນິກ ແລະມາດຕະການດ້ານການເງິນເພື່ອການຍົກລະດັບພາຫະນະໄຟຟ້າ ໃນ ສປປ ລາວ

ກອງປະຊຸມສໍາມະນາກ່ຽວກັບນະໂຍບາຍ ການກໍານົດມາດຖານເຕັກນິກ ແລະມາດຕະການດ້ານການເງິນ ເພື່ອການຍົກລະດັບພະຫະນະໄຟຟ້າ ໃນ ສປປ ລາວ, ເພື່ອເປັນການຮັກສາສິ່ງແວດລ້ອມ ແລະຊ່ວຍກັນປະຢັດພະລັງງານ ຈຶ່ງໄດ້ຈັດກອງປະຊຸມດັ່ງກ່າວຂື້ນ, ພາຍໃຕ້ການເປັນປະທານຂອງທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງ ຍທຂ, ທ່ານ ເຈສັນ ລີ Country Representative of GGGI-Laos, ມີບັນດາກະຊວງອອ້ມຂ້າງທີ່ເຂົ້າຮ່ວມ ແລະບັນດາບໍລິສັດເຂົ້າຮ່ວມ, ເພື່ອເປັນການແລກປ່ຽນບົດຮຽນໃນຄັ້ງນີ້, ກອງປະຊຸມໄດ້ຈັດຂື້ນໃນຕອນເຊົ້າຂອງວັນທີ 21 ມັງກອນ 2020, ທີ່ໂຮງແຮມແລນມາກ.

ກອງປະຊຸມ, ໄດ້ມີການກໍານົດກົດລະບຽບສໍາລັບຍານພາຫະນະ ແລະ ຊ່ອງຫວ່າງສໍາລັບຍານພາ ຫະນະໄຟຟ້າ (Evs) ໃນ ສປປ ລາວ, ໄດ້ຮັບຮູ້ເຖິງສະພາບລວມການຄຸ້ມຄອງຍານພາຫະນະ ແລະກົນຈັກໃນ ສປປ ລາວ, ກົດລະບຽບການຄຸ້ມຄອງຍານພາຫະນະໃນ ສປປ ລາວ ໃນປັດຈຸບັນ, ພາຍຫຼັງໄດ້ຮັບຟັງການບັນຍາຍຂ້າງເທິງນັ້ນແລ້ວ ທາງບໍລິສັດ ໄດ້ມີການແນະນໍາເບື້ອງຕົ້ນຕໍ່ການສຶກສາຄົ້ນຄວ້າ ແລະຊ່ອງຫວ່າງດ້ານກົດໝາຍ, ມາດຕະຖານເຕັກນິກ ແລະການວິເຄາະດ້ານເສດຖະກິດສໍາລັບ Evs, ໃນກອງປະຊຸມໄດ້ມີການຖາມຕອບກັນຢ່າງກົງໄປກົງມາເພື່ອຊ່ວຍກັນຊອກຫາວິທີທາງອອກນຳກັນ, ກອງປະຊຸມໄດ້ດໍາເນີນເປັນເວລາເຄິ່ງວັນ ແລະປິດລົງດ້ວຍໝາກຜົນອັນຈົບງາມ.

ພິທີເຊັນສັນຍາ ວ່າດ້ວຍການບໍລິການ ຮັບຊໍາລະຄ່າໂດຍສານ ດ້ວຍການສະແກນ QR Code ຜ່ານລະບົບ ທະນາຄານພັດທະນາລາວ ລະຫວ່າງ ທະນາຄານພັດທະນາລາວ ແລະລັດວິສາຫະກິດລົດເມ ນະຄອນຫຼວງວຽງຈັນ

ທະນາຄານພັດທະນາລາວ (ທພລ) ຮ່ວມມືກັບລັັດວິສາຫະກິດລົດເມ ນະຄອນຫຼວງວຽງຈັນ ໄດ້ເພິ່ມຊ່ອງທາງໃນການຊໍາລະສະສາງຄ່າໂດຍສານດ້ວຍການສະແກນ QR Code ເພື່ອອໍານວຍຄວາມສະດວກ ໃຫ້ກັບຜູ້ໂດຍສານພາຍໃນນະຄອນຫຼວງວຽງຈັນ, ຕ່າງແຂວງ ແລະຕ່າງປະເທດ ທີ່ໂດຍສານໄປກັບລັດວິສາຫະກິດລົດເມ ນະຄອນຫຼວງວຽງຈັນ, ໃນວັນທີ 16 ມັງກອນ 2020 ໄດ້ມີພິທີ ເຊັນສັນຍາ ວ່າດ້ວຍການບໍລິການ ຮັບຊໍາລະຄ່າໂດຍສານ ດ້ວຍການສະແກນ QR Code ຜ່ານລະບົບ ທະນາຄານພັດທະນາລາວ ລະຫວ່າງ ທະນາຄານພັດທະນາລາວ ແລະ ລັດວິສາຫະກິດລົດເມ ນະຄອນຫຼວງວຽງຈັນ.

​ໂດຍໃຫ້ກຽດເຊັນສັນຍາໃນຄັ້ງນີ້ໂດຍ ທ່ານ ອາຄົມ ປຣະເສີດ ຜູ້ອໍານວຍການ ທພລ ແລະ ທ່ານ ແກ້ວວັນພອນ ວອນທີວົງສີ ຜູ້ອໍານວຍການ ລັດວິສາຫະກິດລົດເມ ນະຄອນຫຼວງວຽງຈັນ, ​ໂດຍ​ໃຫ້ກຽດເຂົ້າ​ຮ່ວ​ມເປັນສັກຂີພິຍານຂອງ ທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງ ຍທຂ ແລະ ພາກສ່ວນທີ່ກ່ຽວຂ້ອງ.

 

Additional information