ຂ່າວ

ພິທີມອບ-ຮັບ ແລະ ເປີດການນໍາໃຊ້ຢ່າງເປັນທາງການ ໂຄງການກໍ່ສ້າງເສັ້ນທາງ ຫົງສາ-ຊຽງແມນ ທີ່ເມືອງຈອມເພັດ ແຂວງຫລວງພະບາງ

ພິທີມອບ-ຮັບ ແລະ​ເປີດການນໍາໃຊ້ຢ່າງເປັນທາງການ ໂຄງການກໍ່ສ້າງເສັ້ນທາງແຕ່ເມືອງຫົງສາ,ແຂວງໄຊຍະບູລີ ຫາ ບ້ານຊຽງແມນ, ເມືອງຈອມເພັດ, ແຂວງຫລວງພະບາງ, ໄດ້ຈັດຂື້ນໃນວັນທີ 14 ມັງກອນ 2020 ໂດຍ​ເປັນ​ກຽດ​ເຂົ້າ​ຮ່ວມ ຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງ ການເງິນ; ທ່ານ ປອ ບຸນຈັນ ສິນທະວົງ ລັດຖະມົນຕີກະຊວງ ໂຍທາທິການ ແລະ ຂົນສົ່ງ; ທ່ານ ຄຳ​ຂັນ ຈັນທະ​ວີ​ສຸກ ເຈົ້າແຂວງ ຫລວງພະບາງ; ທ່ານ ຍັນ​ຍົງ ສີ​ປະ​ເສີດ ຮອງເຈົ້າແຂວງໄຊຍະບູລີ; ທ່ານ ປອ ກິແກ້ວ ຈັນທະບູລີ  ຮອງລັດຖະມົນຕີ ກະຊວງ ແຜນການ ແລະ ການລົງທຶນ; ທ່ານ ດໍາຣົງ ​ໄຄ່ຣຄວນ ເອກອັກຄະລັດຖະທູດ ແຫ່ງຣາຊະອານາຈັກໄທ ປະຈຳ ສປປ ລາວ; ທ່ານ ປີຣະເມດ ວຸດທິທອນຕິຣັກ ປະທານອົງການນີດາ (NEDA), ມີບັນດາທ່ານຫົວໜ້າຫ້ອງການກະຊວງ, ຫົວໜ້າກົມ, ຮອງ​ກົມ, ບັນດາທ່ານເຈົ້າເມືອງ, ຮອງ​ເຈົ້າເມືອງ, ຫົວໜ້າພະແນກ, ຮອງ​ພະ​ແນ​ກ ພ້ອມ​ດ້ວຍ​ບັນດາ​ພະນັກງານ​ຈາກ​ສູນ​ກາງ​ ແລະ ທ້ອງຖິ່ນ, ພະນັກງານ​ອາວຸ​ໂສ ແລະ ພໍ່​ແມ່​ປະຊາຊົນກໍ່ໃຫ້​ກຽດເຂົ້າຮ່ວມ.

ໂຄງການ​ກໍ່​ເສັ້ນທາ​ງ​ເລກ 4B (ຫົງ​ສາ-ຊຽງ​ແມນ)​ແມ່ນ​ເສັ້ນທາງ​ຫລວງ​ສາຍ​ຂວາງ, ​ເປັນ​ເສັ້ນທາງ​ຍຸດ​ທະ​ສາດ​ທີ່ສຳຄັນ ​ເພື່ອ​ເຊື່ອມ​ຕໍ່​ໃສ່​ບັນດາ​ເສັ້ນທາງ​ສາຍ​ຕັ້ງ ​ແລະ ສາຍ​ຂວາງ​ທີ່​ເຊື່ອມ​ຕໍ່​ໃສ່​ບັນດາ​ປະ​ເທດ ​ໃນ​ອະນຸ​ພາກ​ພື້ນ​ລຸ່ມ​ແມ່​ນ້ຳຂອງ​ຕອນ​ເທິງ ຂອງ ສປປ ລາວ, ຊຶ່ງ​ຈະ​ສ້າງ​ເງື່ອນ​ໄຂ​ເອື້ອຍ​ອຳນວຍ​ຄວາມ​ສະດວກ​ໃຫ້​ແກ່​ການ​ຮ່ວມ​ມື​ຮອບດ້ານກັບ​ບັນດາ​ອະນຸ​ພາກ​ພື້ນ.

ໂຄງການກໍ່ສ້າງ​​ເສັ້ນທາງ ຫົງສາ-ຊຽງ​ແມນ ​ແມ່ນ​ມີ​ຈຸດ​ເລີ້ມ​ຕົ້ນ​ຈາກ​ ບ້ານນາ​ປຸ່ງ, ​ເມືອງ​ຫົງ​ສາ,ແຂວງໄຊຍະບູລີ ​ຫາ ບ້ານຊຽງແມນ, ເມືອງຈອມເພັດ, ແຂວງ ຫລວງພະບາງ ມີ​ໄລຍະ​ທາງ​ທັງ​ຫມົດ 113,954 ກິ​ໂລ​ແມັດ. ຊຶ່ງ​ໂຄງການ​ກໍ່​ສ້າງ​ເສັ້ນດັ່ງກ່າວ​ແມ່ນມີຄວາມໝາຍຄວາມສຳຄັນຍິ່ງ ໃນການພົວພັນຮ່ວມມືຂອງສອງລັດຖະບານ ແລະປະຊາຊົນສອງຊາດ ລາວ-ໄທ ແລະເປັນໂຄງການທີ່ສໍາຄັນທາງດ້ານເສດຖະກິດ ແລະສັງຄົມ ໃນການຈັດຕັ້ງຜັນຂະຫຍາຍ ແຜນພັດທະນາເສດຖະກິດ-ສັງຄົມ 5 ປີ ເທື່ອທີ VIII ຂອງລັດຖະບານເວົ້າລວມ, ເວົ້າສະເພາະແມ່ນແຜນພັດທະນາເສດຖະກິດ-ສັງຄົມ ຂອງແຂວງໄຊຍະບູລີ ແລະ ແຂວງຫລວງ​ພະບາງ, ​ເພື່ອ​ຮັບປະກັນ​ໃຫ້​ແກ່​ການ​ບໍລິການ​ທາງຜ່ານ​ທີ່​ມີ​ປະສິດ​ທິຜົນ ທັງ​ເປັນ​ການອຳນວຍ​ຄວາມ​ສະດວກ​ໃຫ້​ແກ່​ການ​ສັນຈອນ​ເພື່ອ​ເຊື່ອມ​ຕໍ່​ໃສ່​ເມືອງມໍລະດົກ​ໂລກ​ ​ແຂວງ​ຫລວງ​ພະ​ບາງ ​ແລະ ເພື່ອແນໃສ່ອໍານວຍຄວາມສະດວກ ໃຫ້ແກ່ການຂົນສົ່ງສິນຄ້າ ແລະໂດຍສານ, ການຊຸກຍູ້ສົ່ງເສີມການຜະລິດຈໍລະຈອນສິນຄ້າ, ສ້າງເງື່ອນໄຂອໍານວຍຄວາມສະດວກໃຫ້ແກ່ການລົງທຶນ, ການຄ້າ ການທ່ອງທ່ຽວ, ການບໍລິການຕ່າງໆ ຕະຫລອດຮອດການໄປມາຫາສູ່ຂອງພໍ່ແມ່ປະຊາຊົນທີ່ຢູ່ລຽບຕາມເສັ້ນທາງ, ຊຶ່ງຈະຊ່ວຍເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນບັນດາເຜົ່າໃນຂົງເຂດນີ້ ດີຂຶ້ນເທື່ອລະກ້າວ. ນອກຈາກນັ້ນ, ໂຄງການດັ່ງກ່າວ ເປັນໂຄງການຍຸດທະສາດທີ່ສໍາຄັນຂອງລັດຖະບານໃນການປະຕິບັດເຊື່ອມໂຍງ ແລະ ເຊື່ອມຈອດ ດ້ານຄົມມະນາຄົມ-ຂົນສົ່ງ ກັບບັນດາປະເທດໃກ້ຄຽງ ແລະ ພາກພື້ນ, ໂດຍສະເພາະແມ່ນການເຊື່ອມຈອດລະຫວ່າງ ສປປ ລາວ ກັບຣາຊະອານາຈັກໄທ, ແລະ ເຊື່ອມຕໍ່ໄປຍັງພາກເໜືອຂອງ ສປປ ລາວ ເຊື່ອມຕໍ່ໃສ່ ຊາຍແດນ ສປ ຈີນ ຢູ່ແຂວງຫລວງນ້ຳທາ ແລະ ເຊື່ອມຕໍ່ໃສ່ ສສ ຫວຽດນາມ ຢູ່ເມືອງຂວາ ແຂວງ ຜົ້ງສາລີ. ຍ້ອນ​ພັກ-ລັດ​ເຮົາ​ເຫັນ​ໄດ້​ຄວາມ​ສຳຄັນ​ຂອງ​ວຽກ​ງານການ​ກໍ່ສ້າງພື້ນຖານ​ໂຄງ​ລາງ​​ໃຫ້​ມີ​ຄວາມ​ສະດວກ, ປອດ​ໄພ ດັ່ງນັ້ນ, ພັກ-ລັດ​ຖະບານ​ເຮົາ​ຈຶ່ງ​ໄດ້​ສະ​ເໜີ​ຂໍ​ທຶນ​ສະຫນັບສະຫນູນ ຈາກ​ລັດ​ທະ​ບານ​ແຫ່ງ ຮາ​ຊະ​ອານາຈັກ​ໄທ ​ເພື່ອມາ​ກໍ່ສ້າງ​ເສັ້ນທາງ​ດັ່ງ​ກ່າວ. ມາ​ຮອດ​ວັນ​ທີ 26 ພະຈິກ 2014 ລັດຖະບານ​ໄດ້​ເຊັນ​ສັນຍາ​ຮັບ​ເອົາ​ທຶນ​ກູ້​ຢືມ ​ແລະ ຊ່ວຍ​ເຫຼື່ອລ້າ ​ເພື່ອ​ມາ​ກໍ່ສ້າງ​ເສັ້ນທາງ​ດັ່ງກ່າວ ​ໃນ​ມູນ​ຄ່າທັງ​ຫມົດ 1. 977 ລ້ານ​ບາດ(ສະກຸນ​ເງິນ​ໄທ) ໃນນີ້ 20% ​ແມ່ນຊ່ວຍເຫລືອລ້າ ແລະ 80% ​ແມ່ນທຶນກູ້ຢືມ. ​ໂດຍລັດຖະບານແຫ່ງຣາຊະອານາຈັກໄທ ໄດ້ມອບ​ຫມາຍໃຫ້ອົງການ​ຮ່ວມ​ມື​ພັດທະນາ​ເສດຖະກິດ​ກັບປະ​ເທດ​ເພື່ອນ​ບ້ານນີດາ (NEDA).

ສຳລັບມາດຕະຖານເຕັກນິກການອອກແບບ ຂອງໂຄງການກໍ່ສ້າງເສັ້ນທາງດັ່ງກ່າວເປັນທາງຊັ້ນ 3 ​ແລະ ​ເປັນ​ປະ​ເພດ​ທາງປູຢາງ 2 ຊັ້ນ, ຄວາມກ້ວາງຂອງໜ້າທາງ 7 ແມ້ດ, ບ່າ​ທາງ​ກ້ວາງ​ເບື້ອງ​ລະ 1,5 ​ແມັດ, ສຳລັບ​ເຂດ​ຊຸມ​ຊົນ​ບ່າ​ທາງ​ກ້ວາງ​ເບື້ອງລະ 0,5 ​ແມັດ ​ແລະ ​ເຂດ​ພູ​ສູງຊັນ​ແມ່ນ​ບໍ່​ມີ​ບ່າ​ທາງ. ສາມາດຮັບນ້ຳໜັກໄດ້ 11 ໂຕນຕໍ່ເພົາ. ເຊິ່ງໂຄງການກໍ່ສ້າງເສັ້ນທາງດັ່ງກ່າວແມ່ນນອນຢູ່ໃນ ເສັ້ນທາງຫຼວງແຂວງ ໂດຍແບ່ງອອກເປັນ 2 ສັນຍາຄື:

ສັນຍາ1: ແມ່ນ​ມີ​ຈຸດ​ເລີ້ມ​ຕົ້ນ​ຈາກ​ ບ້ານນາ​ປຸ່ງ, ​ເມືອງ​ຫົງ​ສາ,ແຂວງໄຊຍະບູລີ ​ຫາ ບ້ານ​ສຳພັນ ຊາຍ​ແດນ​ແຂວງ​ໄຊ​ຍະ​ບູລີ-​ແຂວງ​ຫລວງ​ພະ​ບາງ ຢູ່ ກມ 42+300, ມີ​ໄລຍະ​ເສັ້ນ​ທາງສາຍ​ຫລັກ​ຍາວ​ທັງ​ຫມົດ 42,300 ກິ​ໂລ​ແມັດ, ສັນຍາ​ກໍ່ສ້າງ​ເສັ້ນທາງ​ດັ່ງກ່າວ ປະກອບ​ມີຂົວ 1 ​ແຫ່ງ, ມີຄວາມ​ຍາວ​ທັງ​ຫມົດ 160 ​ແມັດ, ມີ​ທໍ່​ຫຼ່ຽມ 1 ​ແຫ່ງ, ຍາວ 36 ​ແມັດ ​ແລະ ມີ​ທໍ່​ກົມ 29 ​ແຫ່ງ, ຍາວ 480 ​ແມັດ. ​ໃນມູນຄ່າການກໍ່ສ້າງ 766.600.261,61 ບາດ, ໂດຍແມ່ນ ບໍລິສັດ ບັນຊາ​ກິດ ຈຳກັດ ເປັນຜູ້ຮັບເໝົາກໍ່ສ້າງ, ​ໃນ​ໄລຍະ​ເວລາ​ການ​ກໍ່ສ້າງ 32 ​ເດືອນ.

ສັນຍາ2: ແມ່ນ​ມີ​ຈຸດ​ເລີ້ມ​ຕົ້ນ​ຈາກ​ ຊາຍ​ແດນ​ແຂວງ​ໄຊ​ຍະ​ບູລີ-​ແຂວງ​ຫລວງ​ພະ​ບາງ ຢູ່ ກມ 42+300 ຫາ ບ້ານຊຽງ​ແມນ, ​ເມືອງ​ຈອມ​ເພັດ, ແຂວງ​ຫລວງ​ພະ​ບາງ ຢູ່ ກມ 113+954, ມີ​ໄລຍະ​ເສັ້ນ​ທາງສາຍ​ຫລັກ​ຍາວ​ທັງ​ຫມົດ 71,654 ກິ​ໂລ​ແມັດ, ສັນຍາ​ກໍ່ສ້າງ​ເສັ້ນທາງ​ດັ່ງກ່າວ ປະກອບ​ມີຂົວ 7 ​ແຫ່ງ, ມີຄວາມ​ຍາວ​ທັງ​ຫມົດ 380 ​ແມັດ, ມີ​ທໍ່​ຫຼ່ຽມ 21 ​ແຫ່ງ, ຍາວ 321 ​ແມັດ ​ແລະ ມີ​ທໍ່​ກົມຈຳນວນ​ໜື່ງ, ຍາວ 4.516 ​ແມັດ. ໃນມູນຄ່າການກໍ່ສ້າງ 1.033.065.704.41 ບາດ, ​ແຕ່​ມູນ​ຄ່າ​ກໍ່ສ້າງ​ຕົວ​ຈິງ​ແມ່ນ 1.103.260.980.92 ບາດ, ໂດຍແມ່ນ ບໍລິສັດ ຊໍ. ທະວີ​ກໍ່ສ້າງ ຈຳກັດ ເປັນຜູ້ຮັບເໝົາກໍ່ສ້າງ, ໃນ​ໄລຍະ​ເວລາ​ການ​ກໍ່ສ້າງ 32 ​ເດືອນ. ຊຶ່ງໂຄງການດັ່ງກ່າວ ແມ່ນກົມຂົວທາງ ກະຊວງ​ໂຍທາ​ທິການ ​ແລະ ຂົນ​ສົ່ງ​ເປັນເປັນເຈົ້າຂອງໂຄງການ ແລະ ບໍລິສັດ ທີ​ມ ຄອນຊາວຕິງ ຈຳກັດ ​ແອນ ​ເມ​ເນ​ຈີ​ເມັນ ເປັນທີ່ປຶກສາປະຈຳ​ໂຄງການ. ໂດຍມີມູນ​ຄ່າ​ວ່າ​ຈ້າງ 61.579.400 ບາດ, ມາເຖິງປັດຈຸບັນໂຄງການດັ່ງກ່າວໄດ້ສໍາເລັດເປັນທີ່ຮຽບຮ້ອຍແລ້ວ ແລະເປີດການນໍາໃຊ້ຢ່າງເປັນທາງການ.

ກອງປະຊຸມໃຫຍ່ໜ່ວຍພັກຮາກຖານກົມຂົນສົ່ງຄັ້ງທີ V

ກອງປະຊຸມໃຫຍ່ ຄັ້ງ​ທີ V ຂອງໜ່ວຍພັກຮາກຖານ ກົມຂົນສົ່ງ ໄດ້ເປີດຂຶ້ນໃນຕອນບ່າຍຂອງ ວັນທີ 24 ທັນວາ 2019 ແລະ ດໍາເນີນເປັນເວລາ​ເຄິ່ງວັນ, ພາຍໃຕ້ການເປັນປະທານ ຂອງ ສະຫາຍ ປອ ບຸນຕາ ອ່ອນນາວົງ ເລຂາໜ່ວຍພັກຮາກຖານ ກົມຂົນສົ່ງ, ຫົວໜ້າກົມຂົນສົ່ງ, ໃຫ້ກຽດເຂົ້າຮ່ວມໂອ້ລົມຕໍ່ກອງປະຊຸມຂອງ ສະຫາຍ ປອ. ບຸນຈັນ ສິນທະວົງ ກໍາມະການສູນກາງພັກ, ເລຂາຄະນະພັກ, ລັດຖະມົນຕີກະຊວງໂຍທາທິການ ແລະ ຂົນສົ່ງ; ສະຫາຍ ລັນ ​ແສງ​ອາພອນ ຄະນະ​ປະຈຳ​ພັກ​ກະຊວງ, ຫົວຫນ້າ​ກົມ​ຈັດ​ຕັ້ງ ​ແລະ ພະນັກງານ; ສະຫາຍ ວຽງ​ສະຫວັດ ສີ​ພັນ​ດອນ ກຳມະການ​ຄະນະ​ພັກ​ກະຊວງ, ຮອງ​ລັດຖະມົນຕີ ກະຊວງ ​ໂຍທາ​ທິການ ​ແລະ ຂົນ​ສົ່ງ; ມີບັນດາສະຫາຍເລຂາ, ຮອງເລຂາຄະນະພັກຮາກຖານ, ໜ່ວຍພັກຮາກຖານ ແລະ ຜູ້ແທນກອງປະຊຸມເຂົ້າຮ່ວມຢ່າງພ້ອມພຽງ.

ບັນດາສະຫາຍທີ່ເຂົ້າຮ່ວມກອງປະຊຸມ ໄດ້ຍົກສູງຄວາມຮັບຜິດຊອບ ແລະ ສຸມສະຕິປັນຍາຂອງຕົນເຂົ້າໃນການຄົ້ນຄວ້າປະກອບຄຳຄິດຄຳເຫັນຕໍ່ກອງປະຊຸມຢ່າງກົງໄປກົງມາ ເຮັດໃຫ້ກອງປະຊຸມດໍາເນີນໄປດ້ວຍບັນຍາກາດຟົດຟື້ນ ແລະ ສຳເລັດຕາມຈຸດປະສົງຄາດໝາຍທີ່ວາງໄວ້.

ກອງປະຊຸມໃຫຍ່ ຄັ້ງ​ທີ V ຂອງໜ່ວຍພັກຮາກຖານກົມຂົນສົ່ງ, ໄດ້ລົງປະຊາມະຕິເປັນເອກະສັນ ຮັບຮອງເອົາບັນດາເນື້ອໃນທີ່ສຳຄັນຄື: ກອງປະຊຸມໄດ້ພ້ອມກັນຄົ້ນຄວ້າ ແລະ ປະກອບຄໍາຄິດຄໍາເຫັນໃສ່ຮ່າງລາຍງານການເມືອງ ແລະ ບົດສຳຫຼວດການນຳພາລວມຂອງຄະນະພັກຊຸດເກົ່າ, ໃນນັ້ນໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນໃນການນຳພາຊີ້​ນໍາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງ​ທີ IV ໃນ 5 ປີຜ່ານມາ, ພ້ອມນີ້ ກອງປະຊຸມຍັງໄດ້ເປັນເອກະສັນຮັບຮອງເອົາທິດທາງ, ແຜນການ 5 ປີ ນັບແຕ່ປີ 2019-2023.

ກອງປະຊຸມໄດ້ຟັງລາຍງານ ແລະ ປະກອບຄໍາຄິດເຫັນຈາກຜູ້ຕາງໜ້າ 2 ພາກສ່ວນ ເຊິ່ງແຕ່ລະພາກສ່ວນລ້ວນແລ້ວແຕ່ສະແດງໃຫ້ເຫັນເຖິງຄວາມເປັນເອກະພາບ ຕໍ່ລາຍງານການເມືອງ, ທິດທາງແຜນການ ແລະ ວຽກງານຮອບດ້ານຕໍ່ກອງປະຊຸມ, ການລາຍງານປະກອບຄໍາຄິດເຫັນ ໄດ້ລົງເລິກລາຍງານຜົນສຳເລັດການຜັນຂະຫຍາຍມະຕິກອງປະຊຸມໃຫຍ່ ເຂົ້າໃນວຽກ​ງານຂອງຕົນ ອັນໄດ້ເຮັດໃຫ້ກອງປະຊຸມມີເນື້ອໃນອຸດົມສົມບູນຂຶ້ນຕື່ມ.

ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຂັດເລືອກເອົາຄະນະໜ່ວຍພັກຊຸດໃໝ່ ບົດພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກຳນົດໄວ້, ເຊິ່ງມີຜູ້ອອກຮັບສະໝັກເລືອກຕັ້ງ 5 ສະຫາຍ, ຍິງ 2 ສະຫາຍ ແລະ ເລືອກຕັ້ງໄດ້ 3 ສະຫາຍ, ຍິງ 1 ສະຫາຍ ຄື:

1)   ສະຫາຍ ປອ ບຸນຕາ ອ່ອນນາວົງ

2)   ສະຫາຍ ວິລະພັນ ໄຊຍະວົງ

3)   ສະຫາຍ ນາງ ອໍາໄພວັນ ແກ້ວປະດິດ

4)   ສະຫາຍ ​ລຽງ ມົນ​ທະລາ​ດ

5)   ສະຫາຍ ໄກ​ເກສອນ ບຸນ​ມາກ

ກອງປະຊຸມຄັ້ງປະຖົມມະລຶກຂອງໜ່ວຍພັກຮາກຖານກົມຂົນສົ່ງ ຄັ້ງ​ທີ V ໄດ້ເປັນເອກະສັນເລືອກເອົາ ເລຂາ, ຮອງເລຂາ, ປະທານກວດກາ ຂອງ​ໜ່ວຍ​ພັກ ດັ່ງນີ້:

1)  ສະຫາຍ ປອ ບຸນຕາ ອ່ອນນາວົງ ເປັນເລຂາ.

2)  ສະຫາຍ ວິລະພັນ ໄຊຍະວົງ ເປັນຮອງເລຂາ

3)  ສະຫາຍ ນາງ ອໍາໄພວັນ ແກ້ວປະດິດ ເປັນກໍາມະການ, ທັງ​ເປັນ​ຜູ້​ກວດກາ.

 ກອງປະຊຸມໄດ້ເລືອກຕັ້ງເອົາຜູ້ແທນສົມບູນ ແລະ ຜູ້ແທນສໍາຮອງ ໄປຮ່ວມກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ໂຍທາທິການ ແລະ ຂົນສົ່ງ, ເຊິ່ງມີຜູ້ອອກຮັບສະໝັກເລືອກຕັ້ງ 8 ສະຫາຍ, ຍິງ 3 ສະຫາຍ ແລະ ເລືອກຕັ້ງໄດ້ຜູ້​ແທນ​ສົມບູນ 6 ສະຫາຍ, ຍິງ 3 ສະຫາຍ ແລະ ຜູ້ແທນສໍາຮອງ 2 ສະຫາຍ.

ກອງປະຊຸມໃຫຍ່ໄດ້ຮັບຟັງການໂອ້ລົມຈາກ ສະ​ຫາຍ ປອ. ບຸນຈັນ ສິນທະວົງ, ກຳມະການ​​ສູນ​ກາງ​ພັກ, ເລຂາຄະນະພັກ, ລັດຖະມົນຕີກະຊວງ ໂຍທາທິການ ແລະ ຂົນສົ່ງ ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການນຳພາຊີ້​ນໍາຂອງຄະນະພັກຊຸດເກົ່າ ທີ່ໄດ້ນຳພາຊີ້​ນໍາພະນັກງານ, ສະມາຊິກພັກ, ລັດຖະກອນ ປະຕິບັດໜ້າທີ່ການເມືອງຂອງຕົນ, ຍາດໄດ້ຜົນສຳເລັດຫຼາຍດ້ານ. ພ້ອມກັນນັ້ນ, ສະຫາຍຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ, ຂໍ້ຄົງຄ້າງ ເຊິ່ງໄດ້ຮຽກຮ້ອງໃຫ້ຄະນະພັກຊຸດໃໝ່ ຈະຕ້ອງໄດ້ສືບຕໍ່ປັບປຸງ, ແກ້ໄຂ ຈາກນັ້ນສະຫາຍ​ໄດ້ໃຫ້ທິດ​ຊີ້ນຳວຽກງານແຕ່ລະດ້ານ, ສະຫາຍມີຄວາມເຊື່ອໝັ້ນຕໍ່ຄະນະພັກຊຸດໃໝ່ ທີ່ຈະສືບຕໍ່ນຳພາຊີ້​ນໍາຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງ​ທີ V ຂອງ   ໜ່ວຍພັກຮາກຖານ ກົມຂົນສົ່ງ ໃຫ້ຍາດໄດ້ຜົນງານ ແລະ ມີຜົນສໍາເລັດຍິ່ງ ໃຫຍ່ກວ່າເກົ່າ.

ພິທີເຊັນສັນຍາ ໂຄງການກໍ່ສ້າງ-ປັບປຸງ ແລະຂະຫຍາຍລະບົບນໍ້າປະປາ ແລະສຸຂາພິບານ ເມືອງລະມາມແຂວງເຊກອງ

ພິທີເຊັນສັນຍາຢ່າງເປັນທາງການ ລະຫວ່າງກົມນໍ້າປະປາ ແລະບໍລິສັດ ຮ້ວຍຈິນ-ແດຢຸນ ຮ່ວມສັນຍາ ເພື່ອກໍ່ສ້າງ-ປັບປຸງ ແລະຂະຫຍາຍລະບົບນໍ້າປະປາ ແລະສຸຂາພິບານ ເມືອງລະມາມ ແຂວງເຊກອງ ສໍາລັບ ໂຄງການນໍ້າປະປາ ແລະສຸຂາພິບານ (ADB Grant 0604-Lao) ໃນວັນທີ 24 ທັນວາ 2019 ຢູ່ທີ່ Grand Hotel Vientiane ໃຫ້ກຽດເຂົ້າຮ່ວມໂດຍ ທ່ານ ນ. ວິໄລຄໍາ ໂພສາລາດ ຮອງລັດຖະມົນຕີ ກະຊວງໂຍທາທິການ ແລະຂົນສົ່ງ; ທ່ານ ບຸນຈັນ ສິນຣາຊະວົງ ຫົວໜ້າຫ້ອງການ ກະຊວງ ຍທຂ; ທ່ານ ພົມມາ ແວວລາວັນ ຫົວໜ້າກົມນໍ້າປະປາ; ທ່ານ ລີ ຈອງ ວອນ ປະທານບໍລິສັດ ຮ້ວຍຈິນ ສປ ເກົາຫຼີ; ທ່ານ ຢຸູນ ກີຊອຍ ຮອງປະທານບໍລິສັດ ແດຢູນ ສປ ເກົາຫຼີ ແລະ ແຂກທີ່ກ່ຽວຂ້ອງເຂົ້າຮ່ວມ.

ໃນພິທີເຊັນສັນຍາດັ່ງກ່າວ ທ່ານ ວັນສະແຫວງ ອຸດທະຈັກ ຫົວໜ້າໂຄງການນໍ້າປະປາ ແລະສຸຂາພິບານ ໄດ້ຂື້ນລາຍງານໂດຍລວມກ່ຽວກັບຂໍ້ມູນ ແລະ ບັນດາໜ້າວຽກຂອງໂຄງການກໍ່ສ້າງ-ປັບປຸງ ແລະຂະຫຍາຍລະບົບນໍ້າປະປາ ເມືອງລະມາມ ແຂວງເຊກອງມີດັ່ງນີ້: ແຫຼ່ງທືນໄດ້ມາຈາກ ADB Grant 0604-Lao ໂຄງການນໍ້າປະປາ ສຸຂາພິບານ, ທະນາຄານພັດທະນາອາຊີ ADB ໄດ້ອານຸມັດເງິນຊ່ວຍເຫຼືອລ້າເພີ້ມຈໍານວນ 30,5 ລ້ານໂດລາສະຫະລັດ ຊຶ່ງໄດ້ເຊັນສັນຍາ ຄັ້ງວັນທີ 16 ຕຸລາ 2018, ເຊັນສັນຍາທີ່ປຶກສາໂຄງການ (PIA): 15 ມີນາ 2018, ທະນາຄານພັດທະນາອາຊີ ADB ຮັບຮອງເອກະສານປະມູນ 19 ມີນາ 2019, ນໍ້າເບີສັນຍາ/ຊື່ສັນຍາ: WS-CW-33 ວຽກກໍ່ສ້າງ-ປັບປຸງ ແລະຂະຫຍາຍລະບົບນໍ້າປະປາ ແລະສຸຂາພິບານ ເມືອງລະມາມ ແຂວງເຊກອງ, ມື້ປະກາດປະມູນ 24 ມີຖຸນາ 2019, ມື້ເປີດຊອງປະມູນ 07 ສິງຫາ 2019, ທະນາຄານພັດທະນາອາຊີ ADB ຮັບຮອງເອົາຜົນການຕີລາຄາການປະມູນ NOL for BER 17 ທັນວາ 2019, ກະຊວງ ຍທຂ ຮັບຮອງຜົນການປະມູນອອກຂໍ້ຕົກລົງໃຫ້ ກົມນໍ້າປະປາເຊັນສັນຍາຮັບເໝົາກໍ່ສ້າງ 20 ທັນວາ 2019, ມື້ເຊັນສັນຍາການຮັບເໝົາການກໍ່ສ້າງ 24 ທັນວາ 2019, ມື້ເລີ່ມລົງມືການກໍ່ສ້າງ 31 ມັງກອນ 2020, ໄລຍະການກໍ່ສ້າງ 36 ເດືອນ, ຄາດຄະ​ເນມື້ສ້າງສໍາເລັດວຽກ 100% ຕາມແຜນການກໍານົດໄວ້ 31 ມັງກອນ 2022, ມື້ສິ້ນສຸດໄລຍະຄໍ້າປະກັນ 1 ປີ, 31 ມັງກອນ 2023, ມູນຄ່າການກໍ່ສ້າງທັງມົດ 3.966.362,04 ໂດລາສະຫະລັດ ລາຄານີ້ບໍ່ລວມພາສີນໍາເຂົ້າວັດສະດຸກໍ່ສ້າງ ແຕ່ລວມອາກອນມູນຄ່າເພີ້ມ VAT 10%, ບໍລິສັດຮັບເໝົາກໍ່ສ້າງ: ບໍລິສັດ ຮ້ວຍຈິນ-ແດຢູນ ຮ່ວມບໍລິສັດ ສປ ເກົາຫຼີ, ສໍາລັບມູນຄ່າການອອກແບບ, ຈໍານວນບ້ານເປົ້າໝາຍໂຄງການມີ 12 ບ້ານ, ຈໍານວນປະຊາກອນປີ 2017 ແມ່ນ 17,342 ຄົນ ແລະຄາດຄະເນປີ 2037 ແມ່ນ 31,322 ຄົນ, ກໍານົດເອົາການຊົມໃຊ້ນໍ້າໄລຍະເລີ້ມຕົ້ນປີ 2023 ແມ່ນ 120 ລິດ/ຄົນ/ວັນ ຈົນເຖິງປີ 2043 ແມ່ນ 133 ລິດ/ຄົນ/ວັນ, ບໍລິມາດນໍ້າທີ່ຕ້ອງການປີ 2037, 7,400 ແມັດກ້ອນ/ມື້, ສໍາລັບແຫຼ່ງນໍ້າດິບແມ່ນ ນໍ້າຫ້ວຍໂທນ (ຈາດເຮ້ຍ) ແລະເຊກອງ.

ໃຫ້ກຽດເຊັນສັນຍາໃນຄັ້ງນີ້ໂດຍ ທ່ານ ພົມມາ ແວວລາວັນ ຫົວໜ້າກົມນໍ້າປະປາ, ທ່ານ ບຸນທະວີ ນະຄອນສິດ ຮອງຫົວໜ້າ ພະແນກ ຍທຂ ແຂວງເຊກອງ, ທ່ານ ລີ ຈອງ ວອນ ຫົວໜ້າບໍລິສັດ ຮ້ວຍຈິນ ສປ ເກົາຫຼີ ຮ່ວມເຊັນສັນຍາຢ່າງເປັນທາງການ.

ຊາວໜຸ່ມກະຊວງ ໂຍທາທິການ ແລະ ຂົນສົ່ງ ຮ່ວມໃຈບໍລິຈາກເລືອດ ເພື່ອຊ່ວຍເຫຼືອສັງຄົມ ແລະ ເພື່ອຂ່ຳນັບຮັບຕ້ອນກອງປະຊຸມໃຫຍ່ຄັ້ງທີ XI ຂອງຄະນະບໍລິຫານງານຊາວໜຸ່ມກະຊວງ ໂຍທາທິການ ແລະ ຂົນສົ່ງ, ຄັ້ງວັນທີ 18 ທັນວາ 2019

ຄະນະ​ບໍລິຫານ​ງານຊາວ​ຫນຸ່​ມ ກະຊວງ ຍທຂ ຈັດ​ກິດຈະກຳ​ຮ່ວມໃຈບໍລິຈາກເລືອດ ເພື່ອຊ່ວຍເຫຼືອສັງຄົມ ​ແລະ ​ເພື່ອ​ຂ່ຳນັບ​ຮັບ​ຕ້ອນ​ກອງ​ປະຊຸມ​ໃຫຍ່ຄັ້ງ​ທີ XI ຂອງຄະນະ​ບໍລິຫານ​ງານຊາວ​ຫນຸ່​ມ ກະຊວງ ຍທຂ ພ້ອມທັງສ້າງໂອກາດສະ​ເຫຼີ​ມສະຫຼອງ​ວັນຊາດ ທີ 2 ທັນວາ 2019 ຄົບຮອບ 44 ປີ (2 ທັນວາ 1975 ຫາ 2 ທັນວາ 2019) ​ແລະ ວັນ​ສຳຄັນ​ຕ່າງໆ​ຂອງ​ຊາດ ກິດຈະກຳ​ຄັ້ງ​ນີ້ ​ໄດ້​ຈັດຂຶ້ນ ​ເມື່ອ​ວັນ​ທີ 18 ທັນວາ 2019 ຜ່ານ​ມາ ທີ່​ຫ້ອງ​ປະຊຸມ​ໃຫຍ່ ກະຊວງ ​ໂຍທາ​ທິການ ​ແລະ ຂົນ​ສົ່ງ. ​ໂດຍ​ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ຄຳ​ຮຸ່ງ ​ເຮືອງ​ວົງ​ສີ ປະທານ​ອົງການ​ກາ​ແດງ​ລາວ; ​ທ່ານ ລັນ ​ແສງອາພອນ ຄະນະ​ປະ​ຈຳ​ພັກກະຊວງ, ຫົວໜ້າ​ກົມ​ຈັດ​ຕັ້ງ ​ແລະ ພະນັກງານ; ທ່ານ ລິດ​ຕາ ຂັດ​ທິຍະ ກຳມະການ​ສູນ​ກາງ​ຊາວ​ຫນຸ່ມ​ປະຊາຊົນ​ປະຕິວັດ​ລາວ, ​ເລຂາ​ຄະນະ​ບໍລິຫານ​ງານຊາວ​ຫນຸ່ມກະຊວງ ຍທຂ; ມີ​ບັນດາຄະນະ​ບໍລິຫານ​ງານ​ຊາວ​ຫນຸ່ມ​ກະຊວງ ພ້ອມດ້ວຍ​ບັນດາສະມາຊິກ​ຊາວ​ຫນຸ່ມ 23 ຮາກ​ຖານ ອ້ອມ​ຂ້າງ​ກະຊວງ ​ໂຍທາ​ທິການ ​ແລະ ຂົນ​ສົ່ງ ເຂົ້າຮ່ວມ.

ເພື່ອ​ເປັນ​ການ​ຂ່ຳນັບ​ຮັບ​ຕ້ອນ​ກອງ​ປະຊຸມ​ໃຫຍ່ຜູ້​ແທນ​ຊາວ​ຫນຸ່ມ ກະຊວງ ​ໂຍທາ​ທິການ ​ແລະ ຂົນ​ສົ່ງ ຄັ້ງ​ທີ XI ທີ່​ຈະ​ເປີດ​ຂື້ນ​ໃນ​ໄວໆ​ນີ້; ​ເພື່ອ​ໃຫ້​ສະມາຊິກ​ຊາວ​ຫນຸ່ມ​ພວກ​ເຮົາ​ຮັບ​ຮູ້ ​ແລະ ​ເຂົ້າ​ໃຈຄວາມ​ສຳ​ຄັນ​ຂອງ​ການ​ບໍລິຈາກ​ເລືອດ, ພ້ອມ​ທັງ​ເປັນ​ການ​ຊ່ວຍ​ເຫ​ລືອສັງຄົມ ທີ່ມີ​ຄວາມ​ຕ້ອງການ​ເລືອດ​ເປັນ​ຈຳນວນ​ຫລວງຫລາຍ ​ເພື່ອ​ນຳ​ໃຊ້​ເຂົ້າ​ໃນ​ການ​ປິ່ນປົວ​ຄົນ​ເຈັບ ທີ່​ນອນ​ຮັກສາ​ຕົວ​ຢູ່ໂຮງ​ຫນໍ​ຕ່າງໆ​ໃນ​ປັດ​ຈຸ​ບັນ; ພ້ອມ​ກັນ​ນີ້, ກໍ່​ໄດ້​ມີ​ພິທີ​ມອບ​ຫຫລຽນ​ໄຊ​ແຮງ​ງານຊັ້ນ3​ ໃຫ້​ແກ່​ສະມາຊິກ​ຊາວ​ຫນຸ່ມ​ຜູ້​ທີ່​ມີ​ນ້ຳ​ໃຈ​ເສຍສະຫລະປະກອບສ່ວນ​ບໍລິຈາກ​ເລືອດ​ຊ່ວຍ​ເຫລືອ​ສັງຄົມ​ທີ່​ພົ້ນ​ເດັ່ນ 1 ສະຫາຍ ​ແລະ ຫລັງຈາກ​ນັ້ນ ສະມາຊິກ​ຊາວ​ຫນຸ່ມພວກ​ເຮົາ​ກໍ່​ໄດ້​ພ້ອມ​ກັນ​ເຂົ້າ​ຮ່ວມ​ບໍລິຈາກ​ເລືອດ​ໃນ​ຄັ້ງ​ນີ້.

Additional information