ຂ່າວ

ກອງປະຊຸມໃຫຍ່ ຄັ້ງທີ I ຂອງໜ່ວຍພັກຮາກຖານກົມນິຕິກຳ ກະຊວງໂຍທາທິການ ແລະຂົນສົ່ງ

ກອງປະຊຸມໃຫຍ່ ຄັ້ງທີ I ຂອງໜ່ວຍພັກຮາກຖານ ກົມນິ​ຕິກຳ ກະຊວງໂຍທາທິການ ແລະ ຂົນສົ່ງ ໄດ້ຈັດຂຶ້ນໃນວັນທີ 23 ສິງຫາ 2019 ຜ່ານມາ ທີ່ກະຊວງ ຍທຂ ພາຍໃຕ້ການເປັນປະທານຂອງ ສະຫາຍ ງາມ​ປະ​ສົງ ເມືອງ​ມະ​ນີ, ເລຂາໜ່ວຍພັກຮາກ​ຖານ ຫົວໜ້າກົມນິ​ຕິ​ກຳ ໂດຍໃຫ້ກຽດເຂົ້າຮ່ວມ ແລະ ໂອ້ລົມຕໍ່ກອງປະຊຸມຂອງສະຫາຍ ບຸນຈັນ ສິນທະວົງ ກໍາມະການສູນກາງພັກ, ເລຂາຄະນະພັກ, ລັດຖະມົນຕີກະຊວງໂຍທາທິການ ແລະ ຂົນສົ່ງ, ມີບັນດາສະຫາຍເລຂາ, ຮອງເລຂາ ຄະນະພັກຮາກຖານ, ໜ່ວຍພັກຮາກຖານ, ປະ​ທານ ແລະ ເລ​ຂາ ຄະ​ນະ​ບໍ​ລິ​ຫານ​ງານ ຂອງ​ສາມ​ອົງ​ການ​ຈັດ​ຕັ້ງ​ມະ​ຫາ​ຊົນ​ເຂົ້າຮ່ວມ. ບັນດາສະຫາຍທີ່ເຂົ້າຮ່ວມກອງປະຊຸມໄດ້ຍົກສູງຄວາມຮັບຜິດຊອບ ແລະ ສຸມສະຕິປັນຍາຂອງຕົນເຂົ້າໃນການຄົ້ນຄວ້າປະກອບຄຳຄິດຄຳເຫັນຕໍ່ກອງປະຊຸມຢ່າງກົງໄປກົງມາ ເຮັດໃຫ້ກອງປະຊຸມ ດຳເນີນໄປດ້ວຍບັນຍາກາດຟົດຟື້ນ ແລະ ສຳເລັດຕາມຈຸດປະສົງຄາດໝາຍທີ່ວາງໄວ້.

ກອງປະຊຸມຄັ້ງນີ້, ບັນດາຜູ້ແທນເຂົ້າຮ່ວມໄດ້ພ້ອມກັນຄົ້ນຄວ້າ ແລະ ປະກອບຄໍາຄິດຄໍາເຫັນໃສ່ຮ່າງລາຍງານການເມືອງ ແລະ ບົດສຳຫຼວດການນຳພາລວມຂອງຄະນະພັກຊຸດເກົ່າ, ໃນນັ້ນໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນທີ່ຖອດຖອນໄດ້ ໃນການນຳພາ ຊີ້ນໍາ ແລະ ການຈັດຕັ້ງປະຕິບັດວຽກງານ ໃນໄລຍະຜ່ານມາ.ພ້ອມນີ້, ກອງປະຊຸມຍັງໄດ້ເປັນເອກະສັນຮັບຮອງເອົາທິດທາງ, ແຜນການ 5 ປີ ນັບແຕ່ປີ 2019-2024.
ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ບົນພື້ນຖານຫຼັກການລວມສູນປະຊາທິປະໄຕ ແລະ ຖືກຕ້ອງສອດຄ່ອງກັບມາດຖານເງື່ອນໄຂທີ່ກຳນົດໄວ້.ຊຶ່ງມີຜູ້ລົງສະໝັກເລືອກຕັ້ງ 5 ສະຫາຍ, ຍິງ 2 ສະຫາຍ ແລະ ເລືອກຕັ້ງໄດ້ 3 ສະຫາຍ, ຍິງ 1 ສະຫາຍ. ກອງປະຊຸມຄັ້ງປະຖົມມະລືກໄດ້ເປັນເອກະສັນເລືອກເອົາສະຫາຍ ງາມປະສົງ ເມືອງມະນີ ເປັນເລຂາ, ສະຫາຍ ນາງ ມະນິວອນ ໄຄ້ຍະວົງ ເປັນຮອງເລຂາ, ສະຫາຍ ທອງວັນ ເພັດທະວີແສງ ເປັນກໍາມະການທັງເປັນຜູ້ກວດກາ.
ກອງປະຊຸມໄດ້ເລືອກຕັ້ງເອົາຜູ້ແທນສົມບູນ ແລະ ຜູ້ແທນສໍາຮອງ ໄປຮ່ວມກອງປະ-ຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ຍທຂ ຊຶ່ງມີຜູ້ລົງສະໝັກເລືອກຕັ້ງ 6ສະຫາຍ, ຍິງ 3ສະຫາຍ ແລະ ເລືອກຕັ້ງໄດ້ 4ສະຫາຍ, ຍິງ 1ສະຫາຍ ແລະ ຜູ້ແທນສໍາຮອງ 1ສະຫາຍ, ຍິງ 1 ສະຫາຍ.
ໃນໂອກາດນີ້, ສະຫາຍ ບຸນຈັນ ສິນທະວົງ ໄດ້ໂອ້ລົມຕໍ່ກອງປະຊຸມ ກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນໍານໍາພາຂອງຄະນະ ພັກຊຸດເກົ່າ ທີ່ໄດ້ນຳພາພະນັກງານ, ສະມາຊິກພັກ, ລັດຖະກອນປະຕິບັດໜ້າທີ່ ການເມືອງຂອງຕົນ, ຍາດໄດ້ຜົນສຳເລັດຫຼາຍດ້ານ ພ້ອມກັນນັ້ນ, ສະຫາຍຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ, ຂໍ້ຄົງຄ້າງ ຊຶ່ງໄດ້ຮຽກຮ້ອງໃຫ້ຄະນະພັກຊຸດໃໝ່ຈະຕ້ອງໄດ້ສືບຕໍ່ປັບປຸງ, ແກ້ໄຂ ຈາກນັ້ນ ສະຫາຍໄດ້ໃຫ້ທິດຊີ້ນຳວຽກງານແຕ່ລະດ້ານ, ຄະນະພັກຊຸດໃໝ່ ສືບຕໍ່ຊີ້ນໍານໍາພາຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ I ຂອງໜ່ວຍພັກຮາກຖານກົມນິຕິກຳ ໃຫ້ຍາດໄດ້ຜົນງານ ແລະ ມີຜົນສໍາເລັດກວ່າເກົ່າ.

(ຂ່າວພາບ: ກະຊວງ ຍທຂ)

ພິທີ ປະດັບຫຼຽນ, ມອບໃບຍ້ອງຍໍໃຫ້ແກ່ກົມກອງລວມໝູ່ ແລະບຸກຄົນ ທີ່ມີຜົນງານດີເດັ່ນ ປະກອບສ່ວນເຂົ້າໃນການປະຕິບັດໜ້າທີ່ວຽກງານ ໂຄງການ ພັດທະນາຄວາມອາດສາມາດ ດ້ານການຄຸ້ມຄອງໃຫ້ແກ່ ຂະແໜງນໍ້າປະປາ

ເພື່ອເປັນການຍ້ອງຍໍຜົນສໍາເລັດ ການຈັດຕັ້ງປະຕິບັດ ໂຄງການພັດທະນາຄວາມອາດສາມາດດ້ານການຄຸ້ມຄອງໃຫ້ແກ່ຂະແໜງນໍ້າປະປາ, ພາຍໃຕ້ການນໍາໃຊ້ທຶນຊ່ວຍເຫຼືອລ້າ ຂອງລັດຖະບານຍີ່ປຸ່ນ, ​ໂດຍຜ່ານອົງການໄຈກາ ແລະທຶນສົມທົບຂອງລັດຖະບານລາວ, ທີ່ໄດ້ຈັດຕັ້ງປະຕິບັດໄລຍະ 5 ປີຜ່ານ​ມາ ແຕ່ເດືອນ ສິງຫາ 2012- ເດືອນ ສິງຫາ 2017 ໄດ້ສໍາເລັດໄປດ້ວຍດີ, ດັ່ງນັ້ນ ໃນວັນທີ 9 ສິງຫາ 2019 ທີ່ໂຮງແຮມລ້ານຊ້າງ, ນະຄອນຫຼວງວຽງຈັນ ໄດ້ຈັດພິທີປະດັບຫຼຽນ, ມອບໃບຍ້ອງຍໍໃຫ້ແກ່ກົມກອງລວມໝູ່ ແລະບຸກຄົນ ທີ່ມີຜົນງານດີເດັ່ນປະກອບສ່ວນເຂົ້າໃນການປະຕິບັດໜ້າທີ່ວຽກງານ ໂຄງການພັດທະນາ ຄວາມອາດສາມາດດ້ານການຄຸ້ມຄອງໃຫ້ຂະແໜງນໍ້າປະປາໃນທົ່ວປະເທດ, ໂດຍການເປັນປະທານ ຂອງທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງ ຍທຂ, ມີຫົວໜ້າກົມຈັດຕັ້ງ ​ແລະ ພາກສ່ວນທີ່ກ່ຽວຂ້ອງກໍໍ່ໄດ້​ໃຫ້​ກຽດ​ເຂົ້າຮ່ວມ.

​ພິທີປະດັບ​ຫຼຽນ​ໄຊ​ໃນ​ຄັ້ງ​ນີ້​ໂດຍເປັນກຽດຂື້ນ​ປະດັບຫຼຽນ​ໄຊ​ຂອງທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງ ຍທຂ, ​ໃຫ້​ແກ່​ບຸກຄົນທີ່ມີຜົນງານ, ຄຸນຄວາມດີປະກອບສ່ວນດ້ານເຫື່ອແຮງ, ສະຕິປັນຍາເຂົ້າໃນການປະຕິບັດໜ້າວຽກງານໂຄງການພັດທະນາຄວາມອາດສາມາດດ້ານການຄຸ້ມຄອງໃຫ້ຂະ ແໜງນໍ້າປະປາ ນະຄອນ ຫຼວງວຽງຈັນ, ແຂວງຫຼວງພະບາງ ແລະແຂວງຄໍາມ່ວນ, ຊຶ່ງແມ່ນທຶນຊ່ວຍເຫຼືອລ້າຂອງລັດຖະບານຍີ່ປຸ່ນ, ໂດຍຜ່ານອົງການໄຈກາ ແລະທືນສົມທົບຂອງລັດຖະບານລາວ, ໄດ້ຮັບຜົນສໍາເລັດເປັນຢ່າງດີໃນໄລຍະຜ່ານມາ ຊຶ່ງ​ປະກອບ​ມີຫຼຽນໄຊແຮງງານ ຊັ້ນ II ໃຫ້ຈໍານວນ 3 ທ່ານ, ຫຼຽນໄຊແຮງງານຊັ້ນ III ຈໍານວນ 12 ທ່ານ ແລະ 2 ກົມກອງ, ຫຼຽນກາແຮງງານ ຈໍານວນ 18 ທ່ານ ແລະ 6 ກົມກອງ ແລະໃບຍ້ອງຍໍ ລັດຖະບານຈໍານວນ 39 ທ່ານ. ຜົນງານດັ່ງກ່າວ ເປັນການປະກອບສ່ວນອັນສໍາຄັນໃນການສ້າງສາພັດທະນາປະເທດຊາດ, ໂຄງການດັ່ງກ່າວໄດ້ມອບໃຫ້ກະຊວງ ຍທຂ ເປັນຜຸູ້ຮັບຜິດ ຊອບໃນການຈັດຕັ້ງປະຕິບັດ, ສໍາລັບມູນຄ່າການຊ່ວຍເຫຼືອລ້າ 4,5 ລ້ານໂດລາສະຫະລັດ, ເງິນສົມທົບຂອງລັດຖະບານ ສປປ ລາວ 150 ລ້ານກີບ, ເງິນສົມທົບທຶນທັງ 3 ລັດວິສາຫະກິດນໍ້າປະປາ ນະຄອນຫຼວງວຽງຈັນ, ແຂວງຫຼວງພະບາງ ແລະແຂວງຄໍາມ່ວນ ປະກອບສ່ວນເຂົ້າຢູ່ໃນໂຄງການ ເພື່ອເຮັດກິດຈະກໍາ, ລວມເປັນມູນຄ່າທັງໝົດ 3,421,137,440 ກີບ, ມາເຖິງປະຈຸບັນໂຄງການດັ່ງກ່າວ​ໄດ້ສ້າງສໍາເລັດ​ແລ້​ວ​ເປັນ​ຕົ້ນ: ໄດ້ສ້າງ​ຖານ​ຂໍ້​ມູນ​ຄຸ້ມ​ຄອງ​​ໃຫ້​ເປັນລະບົບສຳ​ລັບ ​ການ​ສ້າງ​ແຜນ​ໄລ​ຍະ​ຍາວ, ແຜນ​ໄລ​ຍະ​ກາງ ແລະ ແຜນ​ປະ​ຈຳ​ປີ ໃນ​ລັດ​ວິ​ສາ​ຫະ​ກິດ​ນ້ຳ​ປະ​ປາ​ຕົວ​ແບບ, ຄູ່ມືຄຸ້ມຄອງຂໍ້ມູນໄດ້ເຜີຍແຜ່ໃຫ້ແກ່ລັດວິສາຫະກິດນ້ຳປະປາແຂວງໃນທົ່ວປະເທດ; ເສີມ​ສ້າງ​ຄວາມ​ເຂັ້ມ​ແຂງ​ໃຫ້​ແກ່​ວຽກ​ງານ​ຕິດ​ຕາມກວດ​ກາ​​ແຜນ​ດຳ​ເນີນ​ທຸ​ລະກິດລະ​ດັບ​ແຂວງ, ບົດແນະນຳສຳລັບການຄຸ້ມຄອງ ແລະ ການປະເມີນຜົນການປະຕິບັດງານ ການບໍລິການນ້ຳປະປາ ທົດລອງນໍາໃຊ້ຢູ່ 3 ລັດວິສາຫະກິດນ້ຳປະປາຕົວແບບ; ສ້າງກົນໄກ​ວິທີການເຜີຍແຜ່​ ບັນດາຄູ່ມື ແລະ ບົດແນະ​ນຳຕ່າງໆ ທີ່ສຳເລັດໃຫ້​ແກ່​ລັດວິສາ​ຫະ​ກິດ​ນ້ຳ​ປະ​ປາ​ທົ່ວ​ປະ​ເທດ ແລະ ຂະແໜງການທີ່ກ່ຽວຂ້ອງ. ໂດຍອີງ​ໃສ່ແຜນພັດທະນາເສດຖະກິດຂອງລັດຖະບານ 5 ປີ ຄັ້ງທີ VII (2011-2015) ລັດຖະບານ ໄດ້ຕັ້ງເປົ້າໝາຍໃຫ້ປະຊາຊົນທີ່ອາໃສໃນຕົວເມືອງໃຫ້ສາມາດເຂົ້າເຖິງນ້ຳປະປາໄດ້ 67 % ໃນປີ 2015. ໂດຍອີງ ແຜນພັດທະນາ ເສດຖະກິດຂອງລັດຖະບານ 5 ປີ ຄັ້ງທີ VIII (2016-2020) ລັດຖະບານ ໄດ້ຕັ້ງເປົ້າໝາຍໃຫ້ປະຊາຊົນທີ່ອາໃສໃນຕົວເມືອງໃຫ້ສາມາດເຂົ້າເຖິງນ້ຳປະປາໄດ້ 90 % ໃນປີ 2020 ຕາມແຜນການໃຫ້ໄດ້ 84% ໃນປີ 2014. ຖືເອົາ ການລົງທຶນໃສ່ລະບົບນໍ້າປະປາໃນຕົວເມືອງເປັນບຸລິມະສິດຕົ້ນຕໍ ແລະ ມີເປົ້າໝາຍຄາດຄະເນການລົງທຶນໃສ່ປະມານ (USD 187 ລ້ານ ປີ 2015). ນອກຈາກ​ນັ້ນ ຍຸດທະສາດ ຂະແໜງນ້ຳປະປາ ແລະ ຂະແໜງສຸຂາອະນາໄມ ເລີ່ມແຕ່ປີ 2013-2030 ກະຊວງ ໂຍທາທິການ ແລະ ຂົນສົ່ງ ໄດ້ຕັ້ງເປົ້າໝາຍ ປະຊາຊົນທີ່ອາໄສໃນຕົວເມືອງສາມາດ ເຂົ້າເຖິງນ້ຳສະອາດ ແລະ ປອດໄພ 67% ໃນປີ 2015, 80% ປີ 2020, ແລະ 90% ປີ 2030.

ໜ່ວຍພັກຮາກຖານ ກົມຈັດຕັ້ງ ແລະ ພະນັກງານ ເປີດກອງປະຊຸມໃຫຍ່ ຄັ້ງທີ VII

ກອງປະຊຸມໃຫຍ່ ຄັ້ງ​ທີ VII ຂອງໜ່ວຍພັກຮາກຖານກົມ​ຈັດ​ຕັ້ງ ​ແລະ ພະນັກງານ ໄດ້ເປີດຂຶ້ນໃນຕອນເຊົ້າຂອງ ວັນທີ 12/08/2019 ແລະ ດໍາເນີນເປັນເວລາ​ເຄິ່ງວັນ, ພາຍໃຕ້ການເປັນປະທານ ຂອງ ສະຫາຍ ລັນ ແສງອາພອນ ຄະນະປະຈໍາພັກກະຊວງ, ເລຂາໜ່ວຍພັກ, ຫົວໜ້າກົມຈັດຕັ້ງ ແລະ ພະນັກງານ; ໃຫ້ກຽດເຂົ້າຮ່ວມໂອ້ລົມຕໍ່ກອງປະຊຸມຂອງ ສະຫາຍ ປອ. ບຸນຈັນ ສິນທະວົງ ກໍາມະການສູນກາງພັກ, ເລຂາຄະນະພັກ, ລັດຖະມົນຕີກະຊວງໂຍທາທິການ ແລະ ຂົນສົ່ງ, ມີບັນດາສະຫາຍເລຂາ, ຮອງເລຂາຄະນະພັກຮາກຖານ, ໜ່ວຍພັກຮາກຖານ ແລະ ຜູ້ແທນກອງປະຊຸມເຂົ້າຮ່ວມທັງໝົດ 44 ສະຫາຍ, ຍິງ 12 ສະຫາຍ.

ບັນດາສະຫາຍທີ່ເຂົ້າຮ່ວມກອງປະຊຸມ ໄດ້ຍົກສູງຄວາມຮັບຜິດຊອບ ແລະ ສຸມສະຕິປັນຍາຂອງຕົນເຂົ້າໃນການຄົ້ນຄວ້າປະກອບຄຳຄິດຄຳເຫັນຕໍ່ກອງປະຊຸມຢ່າງກົງໄປກົງມາ ເຮັດໃຫ້ກອງປະຊຸມດຳເນີນໄປດ້ວຍບັນຍາກາດຟົດຟື້ນ ແລະ ສຳເລັດຕາມຈຸດປະສົງຄາດໝາຍທີ່ວາງໄວ້.

  1. ກອງປະຊຸມໃຫຍ່ ຄັ້ງ​ທີ VII ຂອງໜ່ວຍພັກຮາກຖານກົມ​ຈັດ​ຕັ້ງ ​ແລະ ພະນັກງານ ໄດ້ລົງປະຊາມະຕິເປັນເອກະສັນ ຮັບຮອງເອົາບັນດາເນື້ອໃນທີ່ສຳຄັນ ຄື: ກອງປະຊຸມໄດ້ພ້ອມກັນຄົ້ນຄວ້າ ແລະ ປະກອບຄໍາຄິດຄໍາເຫັນໃສ່ຮ່າງລາຍງານການເມືອງ, ແລະ ບົດສຳຫຼວດການນຳພາລວມຂອງຄະນະພັກຊຸດເກົ່າ, ໃນນັ້ນໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນໃນການນຳພາຊີ້​ນໍາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ໃນ 5 ປີຜ່ານມາ, ພ້ອມນີ້ ກອງປະຊຸມຍັງໄດ້ເປັນເອກະສັນຮັບຮອງເອົາທິດທາງ, ແຜນການ 5 ປີ ນັບແຕ່ປີ 2019-2023.
  2. ກອງປະຊຸມໄດ້ຟັງລາຍງານ ແລະ ປະກອບຄໍາຄິດເຫັນຈາກຜູ້ຕາງໜ້າ 3 ພາກສ່ວນ ເຊິ່ງແຕ່ລະພາກສ່ວນລ້ວນແລ້ວແຕ່ສະແດງໃຫ້ເຫັນເຖິງຄວາມເປັນເອກະພາບ ຕໍ່ລາຍງານການເມືອງ, ທິດທາງແຜນການ ແລະ ວຽກງານຮອບດ້ານຕໍ່ກອງປະຊຸມ, ການລາຍງານປະກອບຄໍາຄິດເຫັນ ໄດ້ລົງເລິກລາຍງານຜົນສຳເລັດການຜັນຂະຫຍາຍມະຕິກອງປະຊຸມໃຫຍ່ ເຂົ້າໃນວຽກ​ງານຂອງຕົນ ອັນໄດ້ເຮັດໃຫ້ກອງປະຊຸມມີເນື້ອໃນອຸດົມສົມບູນຂຶ້ນຕື່ມ.
  3. ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຂັດເລືອກເອົາຄະນະໜ່ວຍພັກຊຸດໃໝ່ ບົດພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກຳນົດໄວ້, ເຊິ່ງມີຜູ້ອອກຮັບສະໝັກເລືອກຕັ້ງ 7 ສະຫາຍ, ຍິງ 3 ສະຫາຍ ແລະ ເລືອກຕັ້ງໄດ້ 5 ສະຫາຍ, ຍິງ 1 ສະຫາຍ ຄື:

1)   ສະຫາຍ ລັນ ແສງອາພອນ.

2)   ສະຫາຍ ຈັນທະລາ ພິມມະຈັກ.

3)   ສະຫາຍ ນາງ ນຸ້ຍ ສັງວີບຸດ.

4)   ສະຫາຍ ບຸນມາ ຫຼວງບັນດິດ.

5)   ສະຫາຍ ພຸດມີໄຊ ແສນພັນວົງຍໍ.

  1. ກອງປະຊຸມຄັ້ງປະຖົມມະລຶກຂອງໜ່ວຍພັກຮາກຖານກົມ​ຈັດ​ຕັ້ງ ​ແລະ ພະນັກງານ ສະ​ໄໝທີ VII ໄດ້ເປັນເອກະສັນເລືອກເອົາ ເລຂາ, ຮອງເລຂາ, ປະທານກວດກາ ຂອງ​ໜ່ວຍ​ພັກ ດັ່ງນີ້:

1)  ສະຫາຍ ລັນ ແສງອາພອນ ເປັນເລຂາ.

2)  ສະຫາຍ ຈັນທະລາ ພິມມະຈັກ ເປັນຮອງເລຂາ

3)  ສະຫາຍ ບຸນມາ ຫຼວງບັນດິດ ເປັນກໍາມະການ, ທັງ​ເປັນ​ຜູ້​ກວດກາ.

  1.  ກອງປະຊຸມໄດ້ເລືອກຕັ້ງເອົາຜູ້ແທນສົມບູນ ແລະ ຜູ້ແທນສໍາຮອງ ໄປຮ່ວມກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ໂຍທາທິການ ແລະ ຂົນສົ່ງ, ເຊິ່ງມີຜູ້ອອກຮັບສະໝັກເລືອກຕັ້ງ 9 ສະຫາຍ, ຍິງ 4 ສະຫາຍ ແລະ ເລືອກຕັ້ງໄດ້ 7 ສະຫາຍ, ຍິງ 3 ສະຫາຍ ແລະ ຜູ້ແທນສໍາຮອງ 2 ສະຫາຍ, ຍິງ 1 ສະຫາຍ.
  2. ກອງປະຊຸມໃຫຍ່ໄດ້ຮັບຟັງການໂອ້ລົມຈາກ ສະ​ຫາຍ ປອ. ບຸນຈັນ ສິນທະວົງ, ກຳມະການ​​ສູນ​ກາງ​ພັກ, ເລຂາຄະນະພັກ, ລັດຖະມົນຕີກະຊວງ ໂຍທາທິການ ແລະ ຂົນສົ່ງ ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການນຳພາຊີ້​ນໍາຂອງຄະນະພັກຊຸດເກົ່າ ທີ່ໄດ້ນຳພາຊີ້​ນໍາພະນັກງານ, ສະມາຊິກພັກ, ລັດຖະກອນ ປະຕິບັດໜ້າທີ່ການເມືອງຂອງຕົນ, ຍາດໄດ້ຜົນສຳເລັດຫຼາຍດ້ານ. ພ້ອມກັນນັ້ນ,ສະຫາຍຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ, ຂໍ້ຄົງຄ້າງ ເຊິ່ງໄດ້ຮຽກຮ້ອງໃຫ້ຄະນະພັກຊຸດໃໝ່ ຈະຕ້ອງໄດ້ສືບຕໍ່ປັບປຸງ, ແກ້ໄຂ ຈາກນັ້ນສະຫາຍ​ໄດ້ໃຫ້ທິດ​ຊີ້ນຳວຽກງານແຕ່ລະດ້ານ, ສະຫາຍມີຄວາມເຊື່ອໝັ້ນຕໍ່ຄະນະພັກຊຸດໃໝ່ ທີ່ຈະສືບຕໍ່ນຳພາຊີ້​ນໍາຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງ​ທີ VII ຂອງໜ່ວຍພັກຮາກຖານກົມ​ຈັດ​ຕັ້ງ ​ແລະ ພະນັກງານ ໃຫ້ຍາດໄດ້ຜົນງານ ແລະ ມີຜົນສໍາເລັດຍິ່ງ ໃຫຍ່ກວ່າເກົ່າ.

ຂະແໜງທາງນ້ຳເອົາໃຈໃສ່ປັບປຸງລາຄາຫົວໜ່ວຍ ເພື່ອໃຫ້ແທດເໝາະກັບສະພາບໃນປະຈຸບັນ

ໃນວັນທີ 7 ສິງຫາ 2019 ຢູ່ທີ່ສະຖາບັນຝຶກອົບຮົມ ຍທຂ (ຫຼັກ 19), ໄດ້ເປີດກອງປະຊຸມຜ່ານຮ່າງໂຄງປະກອບລາຄາຫົວໜ່ວຍ ກໍ່ສ້າງປ້ອງກັນຕະຝັ່ງເຈື່ອນ, ລາຄາບໍລິການຫີນແຮ່, ຊາຍ ແລະ ລະບຽບການກວດກາເຕັກນິກເຮືອ ຂື້ນ ໂດຍການເປັນປະທານຂອງ ທ່ານ ລັດຕະນະມະນີ ຄູນນີວົງ ຮອງລັດຖະມົນຕີ ກະຊວງ ຍທຂ, ມີຄະນະກົມທາງນ້ຳ, ບັນດາຄະນະພະແນກ ຍທຂ ປະຈຳແຂວງ ແລະ ນະຄອນຫລວງ, ບັນດາພາກສ່ວນຫົວໜ່ວຍທຸລະກິດ ຜູ້ຕາງໜ້າຈາກຂະແໜງການຕ່າງໆ ເຂົ້າຮ່ວມ.

ກອງປະຊຸມໃນຄັ້ງນີ້, ທ່ານປະທານໄດ້ກ່າວວ່າ ໃນໄລຍະຜ່ານມາການນໍາກະຊວງໂຍທາທິການ ແລະ ຂົນສົ່ງ ໄດ້ເອົາໃຈໃສ່ຊີ້ນໍານໍາພາໃນການສ້າງ ແລະປັບປຸງນິຕິກໍາລຸ່ມກົດໝາຍ ເຊັ່ນ: ໄດ້ສໍາເລັດໃນການສ້າງໂຄງປະກອບລາຄາຫົວໜ່ວຍປ້ອງກັນຕະຝັ່ງເຈື່ອນ ໃນປີ 2019 ແລະ ໄດ້ນໍາໄປຜ່ານການນໍາກະຊວງ ຍທຂ ແລະເຫັນດີນໍາໃຊ້ນັບແຕ່ນັ້ນເປັນຕົ້ນມາ, ລາຄາຫົວໜ່ວຍບໍລິການຫີນແຮ່, ຊາຍ ມີຄວາມແຕກຕ່າງກັນ ແລະບໍ່ຖືກຕ້ອງຕາມສະພາວະຄວາມເປັນຈິງ, ລະບຽບການກວດກາເຕັກນິກເຮືອ ໃນທີ່ຜ່ານມາ ກະຊວງ ຍທຂ ໄດ້ອອກນິຕິກໍາລຸ່ມກົດໝາຍຫລາຍສະບັບເຊັ່ນ: ຂໍ້ກໍານົດກ່ຽວກັບການຂົນສົ່ງທາງນໍ້າ ສະບັບເລກທີ 104/ຄຂປກ, ລົງວັນທີ 12 ມັງກອນ 2000, ຂໍ້ກໍານົດວ່າດ້ວຍກົດລະບຽບຈະລາຈອນ ສະບັບເລກທີ 219/ຄຂປກ, ລົງວັນທີ 19 ເມສາ 2000, ຂໍ້ກໍານົດວ່າດ້ວຍການຕໍ່ເຮືອ ສະບັບເລກທີ 1442/ຄຂປກ, ລົງວັນທີ 26 ມີຖຸນາ 1996, ມາດຕະຖານລະບຽບການກວດກາສະພາບເຕັກນິກເຮືອ ແລະເຮືອບັກ ສະບັບເລກທີ 0030/ກຂສ, ລົງວັນທີ 8 ມັງກອນ 1996 ແລະຂໍ້ແນະນໍາ ກ່ຽວກັບລະບຽບການກວດກາເຕັກນິກເຮືອ ສະບັບເລກທີ 0052/ກຂສ, ລົງວັນທີ 8 ມັງກອນ 1996 ເພື່ອເປັນການສົ່ງເສີມ ວຽກງານຂົນສົ່ງທາງນໍ້າ ໃຫ້ມີມາດຕະຖານ, ໃຫ້ມີຄວາມປອດໄພ ແລະຫັນສູ່ການຄຸ້ມຄອງດ້ວຍລະບຽບກົດໝາຍເທື່ອລະກ້າວ.

ສຸດທ້າຍປະທານຍັງໄດ້ເນັ້ນໃຫ້ຜູ້ເຂົ້າຮ່ວມກອງປະຊຸມເອົາໃຈໃສ່ຢ່າງຕັ້ງໜ້າ ເພື່ອຄົ້ນຄວ້າປຶກສາຫາລື ແລະ ແລກປ່ຽນຖອດຖອນບົດຮຽນຮ່ວມກັນ ເພື່ອເຮັດໃຫ້ຮ່າງໂຄງປະກອບການຄິດໄລ່ລາຄາຫົວໜ່ວຍກໍ່ສ້າງປ້ອງກັນຕະຝັ່ງເຈື່ອນ, ລາຄາບໍລິການຫີນແຮ່, ຊາຍ ແລະ ລະບຽບກວດກາເຕັກນິກເຮືອ ໃຫ້ສາມາດນຳໃຊ້ເປັນລະບຽບການໄດ້ໃນອະນາຄົດຢ່າງມີປະສິດທິຜົນສູງ.

Additional information