ຂ່າວ

ພິທີ ມອບ-ຮັບ ສະໜາມບິນ ທົ່ງໄຫຫີນ ແຂວງຊຽງຂວາງ ໃຫ້ກອງບັນຊາການທະຫານອາກາດ, ກະຊວງ ປ້ອງກັນປະເທດ

 ໃນວັນທີ 12 ມີຖຸນາ 2020 ທີ່ສະໜາມບິນທົ່ງໄຫຫີນ, ເມືອງແປກ, ແຂວງຊຽງຂວາງ ໄດ້ມີພິທີ ມອບ-ຮັບ ສະໜາມບິນ ທົ່ງໄຫຫີນ ແຂວງຊຽງຂວາງ ໃຫ້ກອງບັນຊາການທະຫານອາກາດ, ກະຊວງປ້ອງກັນປະເທດ; ໂດຍ​ເປັນ​ກ​ຽດ​ເຂົ້າ​ຮ່ວມ​ຂອງ​ທ່ານ ປອ ສັນ​ຕິ​ສຸກ ສີມ​ມາ​ລາ​ວົງ ຮອງ​ລັດ​ຖະ​ມົນ​ຕີ ກະ​ຊວງ ໂຍ​ທາ​ທິ​ການ ແລະ ຂົນ​ສົ່ງ; ທ່ານ ພົຕ ແອສະໄໝ ເລືອງວັນໄຊ, ຮອງລັດຖະມົນຕີກະຊວງປ້ອງກັນປະເທດ; ມີ​ບັນ​ດາ​ທ່ານ​ຫົວ​ໜ້າ​ກົມ, ຮອງ​ຫົວ​ໜ້າ​ກົມ ​ພ້ອມ​ດ້ວຍພະ​ນັກ​ງານ ທັງ​ສອງ​ກະ​ຊວງ​ເຂົ້າ​ຮ່ວມເປັ​ນ​ສັກ​ຂີ​ພະ​ຍານ.

ການບິນພົນລະເຮືອນ ແລະ ການບິນກອງທັບ ແມ່ນຂະ​ແໜງ​ການທີ່ມີຄວາມຜູກພັນກັນຢ່າງສະນິດແໜ້ນ ມາໂດຍຕະຫຼອດ ເຊິ່ງປຽບເໝືອນຄືປາກັບນ້ຳເຊິ່ງມັນສະແດງອອກຕະຫຼອດໄລຍະຜ່ານມາ ພວກເຮົາໄດ້ມີການພົວພັນ ແລະ ປະສານງານກັນດ້ານຄວາມປອດໄພການບິນ ພິເສດພວກເຮົາຍັງມີການເຊັນສັນຍາຮ່ວມກັນ ວ່າດ້ວຍການຮ່ວມມືດ້ານວຽກງານການຊອກຄົ້ນ ແລະ ກູ້ໄພການບິນ ລະຫວ່າງ ກົມການບິນພົນລະເຮືອນ ແລະ ກົມທະຫານອາກາດ ໃນເມື່ອກ່ອນ.

 

 

ສະໜາມບິນທົ່ງໄຫຫີນ ເຊິ່ງໃນເມື່ອກ່ອນ ແມ່ນສ້າງຂຶ້ນມາເພື່ອຮັບໃຊ້ວຽກງານປ້ອງກັນຊາດ, ປ້ອງກັນຄວາມສະຫງົບ ແຕ່ເພື່ອເຮັດໃຫ້ການນຳໃຊ້ສະໜາມບິນດັ່ງກ່າວ ມີຜົນປະໂຫຍດສູງສຸດ ​ຮັບ​ໃຊ້ແກ່ການພັດທະນາເສດຖະກິດສັງຄົມ​ຂອງ​ປະ​ເທດ ແລະ ຂອງ​ແຂວງ​ຊຽງ​ຂວາງ, ກະຊວງປ້ອງກັນປະເທດ ​ຈຶ່ງໄດ້ມອບຄວາມຮັບຜິດຊອບໃນການຄຸ້ມຄອງໃຫ້ແກ່ກະຊວງ ຍທຂ ຕາງ​ໜ້າ​ໂດຍກົມການບິນພົນລະເຮືອນ ເປັນ​ຜູ້ເຮັດໜ້າທີ່ໃນການຄຸ້ມຄອງມະຫາພາກ ເພື່ອເຮັດໃຫ້ການບໍລິການດ້ານການບິນ ໃນສະໜາມບິນທົ່ງໄຫຫີນ ​ໃຫ້ມີຄວາມສະດວກ, ວ່ອງໄວ ແລະ ປອດໄພສູງ ຕາມ​ມາດ​ຕະ​ຖານ​ສາ​ກົນ. ຕະຫຼອດໄລຍະ 22 ປີ ທີ່ມີການນຳໃຊ້ສະໜາມບິນຮ່ວມກັນ, ກົມການບິນພົນລະເຮືອນ ໄດ້ສ້າງກົດໝາຍ, ລະບຽບການ ແລະ ຄູ່ມື ໃນການຄຸ້ມຄອງວຽກງານການບິນໃນຂອບເຂດທົ່ວປະເທດ ເຊິ່ງໃນນັ້ນສະໜາມບິນທົ່ງໄຫຫີນ ກໍ່ແມ່ນສະໜາມບິນໜຶ່ງ ທີ່ຢູ່ພາຍໃຕ້ການຄຸ້ມຄອງດ້ວຍລະບົບນິກຳ ທີ່ສອດຄ່ອງກັບສົນທິສັນຍາສາກົນ ທີ່ ສປປ ລາວ ເປັນພາຄີ. ເພື່ອເຮັດໃຫ້ການບໍລິການວຽກງານການບິນ​ພົນ​ລະ​ເຮືອນ ຢູ່ສະໜາມບິນທົ່ງໄຫຫີນ ສາມາດຈັດຕັ້ງປະຕິບັດສອດຄ່ອງຕາມມາດຕະຖານສາກົນ, ກົມການບິນພົນລະເຮືອນ ໄດ້ເອົາໃຈໃສ່ຊີ້ນຳນຳພາສອງກອງວິຊາການ ຄື:ກອງ​ສະ​ໜາມ​ບິນ​ລາວ ແລະ ກອງ​ຈະ​ລາ​ຈອນ​ທາງ​ອາ​ກາດ​ລາວ ລວມທັງບໍລິສັດສາຍການບິນ ໃນການພັດທະນາພື້ນຖານໂຄງລ່າງໃຫ້ດີຂຶ້ນເລື້ອຍໆເຊັ່ນ:

 

 

ດ້ານ​ວຽກ​ງານສະໜາມບິນ, ມີການພັດທະນາລະບົບພື້ນຖານໂຄງລ່າງຈຳນວນໜຶ່ງເປັນຕົ້ນ: ລານຈອດເຮືອບິນ, ຮົ້ວສະໜາມບິນ, ​ການບໍລິການພາກພື້ນດິນ, ລົດດັບເພີງ, ໄຟຟ້າ, ການປ້ອງກັນຄວາມປອດໄພການບິນ, ຕັດຫຍ້າ ແລະ ການພັດທະນາດ້ານບຸກຄະລາກອນ ​ໃຫ້ໄດ້ມາດຕະຖານ.

ດ້ານວຽກງານຈະລາຈອນອາກາດ, ໄດ້ມີການພັດທະນາລະບົບການບໍລິການຈະລາຈອນອາກາດເຊັ່ນ: ມີການຕິດຕັ້ງລະບົບວິທະຍຸສື່ສານ, ວິທະຍຸນຳທາງ, ວິທະຍຸຕິດຕາມເປົ້າໝາຍ, ລະບົບອຸຕຸນິຍົມການບິນ, ການຍົກລະດັບຂີດຄວາມສາມາດ ດ້ານບຸກຄະລາກອນນັກບັນຊາຈະລາຈອນອາກາດ ແລະ ນາຍຊ້າງສ້ອມແປງວິທະຍຸການບິນ ແລະ ອື່ນໆ.

ດ້ານການບໍລິການສາຍການ, ໄດ້ມີການຍົກລະດັບການບໍລິການຂົນສົ່ງຜູ້ໂດຍສານ ດ້ວຍການນຳໃຊ້ເຮືອບິນທີ່ມີຄວາມທັນສະໄໝ ລະດັບ 70 ບ່ອນນັ່ງ ສ້າງຄວາມເຊື່ອໝັ້ນໃຫ້ແກ່ຜູ້ໂດຍສານທັງພາຍໃນ ແລະ ຕ່າງປະເທດ.

ເນື່ອງຈາກການພັດທະນາວຽກງານການບິນ ທີ່ນັບມື້ນັບມີການຂະຫຍາຍຕົວ, ເພື່ອເຮັດໃຫ້ການບິນພົນລະເຮືອນ ແລະ ກອງທັບ ໄດ້ສືບຕໍ່ພັດທະນາໃຫ້ມີຄວາມເຂັ້ມແຂງຂຶ້ນເລື້ອຍໆ ​ໂດຍ​ປະ​ຕິ​ບັດ​ຕາມ​ທິດ​ຊີ້​ນຳ​ຂອງ​ລັດ​ຖະ​ບານ ກໍ່​ຄືແຈ້ງ​ການ​ຂອງ​ຫ້ອງວ່າ​ການ​ສຳ​ນັກ​ງານ​ນາ​ຍົກ​ລັດ​ຖະ​ມົນ​ຕີ ສະ​ບັບ​ເລກ​ທີ 01/ຫ​ສນຍ, ລົງ​ວັນ​ທີ 12/02/2020. ດັ່ງ​ນັ້ນ, ກົມ​ການ​ບິນ​ພົນ​ລະ​ເຮືອນ ຈຶ່ງມອບຄືນ ຄວາມຮັບຜິດຊອບ ການຄຸ້ມຄອງວຽກງານການບິນ ໃນເຂດສະ ໜາມບິນທົ່ງໄຫຫີນ ໃຫ້ໄປຂຶ້ນກັບຄວາມຮັບຜິດຊອບໂດຍກົງ ຂອງກອງບັນຊາການກອງທັບອາກາດ, ແຕ່ເຖິງຢ່າງໃດກໍຕາມ ເພື່ອເຮັດໃຫ້ສະໜາມບິນແຫ່ງນີ້ ໄດ້ມີການສືບຕໍ່ພັດທະນາ ເຮັດການບິນໃນຂອບເຂດສະໜາມບິນ ສາມາດຈັດຕັ້ງປະຕິບັດ ໂດຍຮັບ​ປະ​ກັນ​ຄວາມ​ປອດ​ໄພ ແລະ ການ​ປ້ອງ​ກັນ​ຄວາມ​ປອດ​ໄພການ​ບິນ ສອດຄ່ອງຕາມລະບຽບການ ແລະ ມາດຕະຖານສາກົນ ແລະ ເພື່ອສ້າງໃຫ້ສະໜາມບິນແຫ່ງນີ້ ເປັນສະໜາມບິນໃຊ້ຮ່ວມກັນ Join Civil-military Use Aerodrome ຊຶ່ງມີຄວາມຈຳເປັນຈະໄດ້ສືບຕໍ່ພັດທະນາ ດັ່ງນີ້:

  1. ສ້າງລະບຽບການວ່າດ້ວຍການຮ່ວມມືລະຫວ່າງການບິນພົນລະເຮືອນ ແລະ ກອງທັບ ນັບ​ທັງ​ການ​ຮ່ວມ​ມື​ກັນ​ບູ​ລະ​ນະ​ຮັກ​ສາ ພຶ້ນ​ຖານ​ໂຄງ​ລ່າງ ແລະ ອຸ​ປະ​ກອນ​ການ​ບິນ​ທີ່​ມີ​ແລ້ວ ໃຫ້​ນຳ​ໃຊ້​ຍືນ​ຍົງ ແລະ ມີ​ປະ​ສິດ​ທິ​ຜົນ​ສູງ;
  2. ແຕ່ງ​ຕັ້ງຄະນະກຳມະການຮ່ວມ ໃນການປະສານງານ ແລະ ບໍລິຫານຄວາມປອດໄພສະໜາມບິນ;
  3. ມີການແລກປ່ຽນບົດຮຽນ ແລະ ພັດທະນາດ້ານບຸກຄະລາກອນຮ່ວມກັນ ຢ່າງ​ເປັ​ນ​ປົກ​ກະ​ຕິ.

ເພາະສະນັ້ນ, ເພື່ອເຮັດໃຫ້ແຜນພັດທະນາໃນອານາຄົດ ສາມາດຈັດຕັ້ງປະຕິບັດໄດ້ຢ່າງເປັນຮູບປະທຳ ຈຶ່ງສະເໜີໃຫ້ຄະນະພັກ-ຄະນະນຳຂອງສອງກະຊວງ ກໍ່ຄືກະຊວງປ້ອງກັນປະເທດ ແລະ ກະຊວງ ຍທຂ ​ໂດຍ​ປະ​ສານ​ສົມ​ທົບ​ກັບ ອຳ​ນາດ​ການ​ປົກ​ຄອງ​ແຂວງ​ຊຽງ​ຂວາງ ຈົ່ງໄດ້ສືບຕໍ່ໃຫ້ການສະນັບສະໜູນ, ຊີ້ນຳ-ນຳພາ ກົມການບິນພົນລະເຮືອນ ແລະ ກອງບັນຊາການທະຫານອາກາດ ໃນການພັດທະນາວຽກງານການບິນຮ່ວມກັນ ແນໃສ່ຮັບປະກັນໃຫ້ການປະຕິບັດການບິນ ທີ່ສະໜາມບິນທົ່ງໄຫຫີນແຫ່ງນີ້ ມີຄວາມສະດວກ, ວ່ອງໄວ ແລະ ປອດໄພ ສູງ​ສຸດ.

 

 

ໃນ​ໂອ​ກາດ​ອັນ​ສະ​ຫງ່າ​ລາ​ສີນີ້ ໃຫ້ກຽດເປັນ​ສັກ​ຂີ​ພະ​ຍານໂດຍ ທ່ານ ປອ ສັນຕິສຸກ ສິມມາລາວົງ ຮອງລັດຖະມົນຕິກະຊວງ ຍທຂ ແລະ ທ່ານ ພົຕ ແອສະໄໝ ເລືອງວັນໄຊ, ຮອງລັດຖະມົນຕີກະຊວງປ້ອງກັນປະເທດ; ​​ໃຫ້​ກຽດ​ກ່າວມອບໂດຍກົມ​ການ​ບິນ​ພົນ​ລະ​ເຮືອນ, ກະ​ຊວງ ຍ​ທ​ຂ ແລະ ກ່າວ​ຮັບ​ໂດຍກອງບັນຊາການທະຫານອາກາດ, ກະຊວງປ້ອງກັນປະເທດ ໃນ​ການການຄຸ້ມຄອງວຽກງານການບິນ ທີ່ສະໜາມບິນທົ່ງໄຫຫີນ ແມ່ນຂຶ້ນກັບຄວາມຮັບຜິດຊອບໂດຍກົງ ຂອງກອງບັນຊາການທະຫານອາກາດ, ກະຊວງປ້ອງກັນປະເທດ.

 

ກອງປະຊຸມສາມັນຄົບຄະນະພັກກະຊວງ ຍທຂ ຄັ້ງທີ 19, ສະໄໝທີ IV

ກອງປະຊຸມສາມັນຄົບຄະນະພັກກະຊວງ ​ໂຍທາ​ທິການ ​ແລະ ຂົນ​ສົ່ງ ຄັ້ງທີ 19, ສະໄໝທີ IV ​ໄດ້​ຈັດ​ຂື້ນ​ໃນ​ວັນ​ທີ 8 ພຶດ​ສະ​ພາ 2020, ​ໂດຍ​ການ​ເຂົ້າ​ຮ່ວມ​ ແລະ ​ເປັນ​ປະ​ທານ​ຂອງ ສະຫາຍ ປອ ບຸນ​ຈັນ ສິນ​ທະ​ວົງ ກຳມະການ​ສູນ​ກາງ​ພັກ, ​ເລຂາ​ຄະນະ​ພັກ, ລັດຖະມົນຕີ​ກະຊວງ ​ໂຍທາ​ທິການ ​ແລະ ຂົນ​ສົ່ງ; ມີ​ບັນດາສະຫາຍຄະນະປະຈໍາພັກ, ກໍາມະການພັກກະຊວງ ເຂົ້າ​ຮ່ວມ.

ກອງປະຊຸມ ສາມັນຄົບຄະນະພັກກະຊວງໂຍທາທິການ ແລະ ຂົນສົ່ງ ຄັ້ງ​ທີ 19, ສະ​ໄໝທີ IV ຂຶ້ນຢ່າງເປັນທາງການ ໃນທ່າມກາງທີ່ທົ່ວພັກ, ທົ່ວລັດ, ທົ່ວປວງຊົນລາວທັງຊາດ ພວມ​ອອກ​ແຮງ​ແຂ່ງຂັນ​ຈັດ​ຕັ້ງ​ຜັນ​ຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ເຂົ້າສູ່ວຽກງານຕົວຈິງ, ຕໍ່ໜ້າສະພາບການຈັດຕັ້ງປະຕິບັດຄໍາສັ່ງເລກທີ 06/ນຍ ວ່າດ້ວຍສະກັດກັ້ນພະຍາດໂຄວິດ-19 ຢ່າງເຂັ້ມງວດ, ຕິດພັນກັບການຈັດຕັ້ງຜັນຂະຫຍາຍມະຕິ​ກອງ​ປະຊຸມ​ໃຫຍ່ ຄັ້ງ​ທີ IV ແລະ ກະກຽມກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງຢ່າງຕັ້ງໜ້າ, ດ້ວຍຄວາມຮັບຜິດຊອບສູງ ແລະ ໄດ້ມີຜົນສໍາເລັດໃນຫລາຍໆດ້ານເປັນກ້າວໆມາ.

ກອງປະຊຸມຄັ້ງນີ້, ຊຶ່ງເປັນກອງປະຊຸມທີ່ມີຄວາມໝາຍ, ຄວາມສໍາຄັນເພາະວ່າເປັນກອງປະຊຸມໃກ້ກັບຄັ້ງສຸດທ້າຍຂອງອົງຄະນະພັກກະຊວງ ສະ​ໄໝ​ທີ IV, ຊຶ່ງຈະພ້ອມກັນປຶກສາຫາລື ແລະ ພິຈາລະນາຮັບຮອງເອົາ​ບັນ​ດາວຽກງານ ດັ່ງນີ້: ບົດສະຫຼຸບຕີລາຄາການເຄື່ອນໄຫວນຳພາຊີ້ນຳວຽກງານຮອບດ້ານ ຂອງຄະນະພັກກະຊວງ 3 ເດືອນ (1,2,3/2020) ແລະ ກຳນົດແຜນການ 3 ເດືອນ (4,5,6/2020); ບົດສະຫຼຸບການ​ນຳ​ພາ​ຂອງ​ຄະ​ນະ​ປະ​ຈຳ​ພັກກະຊວງ ​3 ເດືອນ (1,2,3/2020) ແລະ ກຳນົດແຜນການ 3 ເດືອນຕໍ່ໜ້າ (4,5,6/2020); ບົດສະຫຼຸບ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານກວດກາພັກ-ລັດ ​3 ເດືອນ (1,2,3/2020) ແລະ ກຳນົດແຜນການ 3 ເດືອນຕໍ່ໜ້າ (4,5,6/2020); ບົດສະຫຼຸບ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານພົວພັນຕ່າງປະເທດຂອງກະຊວງ ຍທຂ ໃນໄລຍະຜ່ານມາ ແລະ ກຳນົດແຜນການຕໍ່ໜ້າ; ຜ່ານຮ່າງບົດລາຍງານການເມືອງກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງ ຍທຂ ແລະ ຜ່ານຮ່າງບົດສຳຫຼວດການນຳພາລວມຂອງຄະນະພັກກະຊວງ ຍ​ທ​ຂ.

ເນື່ອງຈາກວ່າກອງປະຊຸມໃນຄັ້ງນີ້ ມີເນື້ອໃນສຳຄັນຫຼາຍດ້ານ ດັ່ງທີ່ໄດ້ກ່າວມາຂ້າງເທິງນັ້ນ, ດ້ວຍເວລາອັນຈຳກັດ ຈຶ່ງຮຽກຮ້ອງມາຍັງບັນດາສະຫາຍທັງໝົດ   ທີ່ເຂົ້າຮ່ວມກອງປະຊຸມໃນຄັ້ງນີ້, ຈົ່ງເຊີດຊູ ແລະ ຍົກສູງຄວາມຮັບຜິດຊອບຂອງຕົນ ພ້ອມກັນສຸມສະຕິປັນຍາ ເຂົ້າໃນການຄົ້ນຄວ້າ ແລະ ປະກອບຄໍາຄິດຄໍາເຫັນຢ່າງກົງໄປກົງມາ  ມີເຫດມີຜົນ, ຖືກກັບສະພາບຕົວຈິງທີ່ຄະນະພັກເຄື່ອນໄຫວນຳພາ ໃນໄລຍະ 3 ເດືອນຜ່ານມາ, ເພື່ອຊອກໃຫ້ເຫັນດ້ານຕັ້ງໜ້າທີ່ພົ້ນເດັ່ນ ແລະ ຂໍ້ຄົງຄ້າງ  ທີ່ຕ້ອງໄດ້ຄົ້ນຄວ້າປັບປຸງແກ້ໄຂໃນຕໍ່ໜ້າ.

ເພື່ອໃຫ້ບັນລຸໄດ້ຕາມລະດັບຄາດໝາຍນັ້ນ,​ ບັນດາສະຫາຍທີ່ເຂົ້າຮ່ວມກອງປະຊຸມທັງໝົດ ຈະຕ້ອງພ້ອມກັນຕັດສິນໃຈສູງ,​ ເຫັນໄດ້ຄວາມຮັບຜິດຊອບການເມືອງທີ່ສູນກາງພັກໄດ້ມອບໝາຍໃຫ້ຄະນະພັກກະຊວງ ຍ​ທ​ຂ ຈັດຕັ້ງປະຕິບັດໂດຍແນ່ໃສ່ສ້າງໃຫ້ພັກມີຄວາມປອດໃສ ເຂັ້ມແຂງ ໜັກແໜ້ນ ເພື່ອນໍາພາ-ພາລະກິດຂອງກະຊວງ ຍ​ທ​ຂ ໃຫ້ມີຜົນສຳເລັດຢ່າງໜັກແໜ້ນ ແລະ ກ້າວຂຶ້ນຢ່າງບໍ່ຢຸດຢັ້ງ, ເພື່ອປະກອບສ່ວນໃຫ້ການສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງ, ເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າຂອງປະເທດເຮົາດີຂຶ້ນຕາມແນວທາງນະໂຍບາຍຂອງພັກເຮົາກຳນົດໄວ້.

ຢາກເຮັດໄດ້ແນວນີ້ ກ່ອນອື່ນໝົດ ເຮົາຕ້ອງເປັນເອກະພາບກັນທາງດ້ານທັດສະນະ ແລະ ຄວາມຮັບຮູ້, ພ້ອມກັນຕັ້ງໜ້າແກ້ໄຂສິ່ງຫຍໍ້ທໍ້ທັງໝົດ ທີ່ເກີດຂຶ້ນຢູ່ໃນກະຊວງ ຍ​ທ​ຂ ໃຫ້ໝົດໄປເທື່ອລະກ້າວ ໂດຍສະເພາະແມ່ນບັນຫາຈັດຕັ້ງປະຕິບັດ 4 ບຸກທະລຸທີ່ພັກເຮົາກຳນົດ,​ ທັງໝົດນັ້ນ ແມ່ນເພື່ອແນ່ໃສ່ເຮັດໃຫ້ກະຊວງ ຍ​ທ​ຂ ມີບາດກ້າວບຸກທະລຸໃໝ່ຮອບດ້ານຕາມຄຳຂວັນຂອງຂະແໜງ ຍທຂ ທີ່ວ່າ: “ພັດທະນາໂຍທາທິການ ແລະ ຂົນສົ່ງ ໃຫ້ເປັນປາຍແຫຼມ, ມີຈຸດສຸມ, ມີປະສິດທິຜົນສູງ, ທັນສະໄໝ, ປອດໄພ, ມີຄວາມທົນທານຕໍ່ການປ່ຽນແປງດິນຟ້າອາກາດ, ເຊື່ອມໂຍງ-ເຊື່ອມຈອດ ແລະ ຍືນຍົງ”.

Additional information