ຂ່າວ

ພິທີເຊັນສັນຍາໂຄງການກໍ່ສ້າງ-ປັບປຸງ ແລະ ຂະຫຍາຍລະບົບນໍ້າປະປາ ແລະ ສຸຂະພິບານ ເມືອງສາມັກຄີໄຊ ແຂວງອັດຕະປື

ໃນວັນທີ 13 ທັນວາ 2019 ທີ່ຜ່ານມານີ້, ກົມນໍ້າປະປາ ກະຊວງໂຍທາທິການ ແລະ ຂົນສົ່ງ ໄດ້ຈັດພິທີເຊັນສັນຍາ ໂຄງການກໍ່ສ້າງ-ປັບປຸງ ແລະ ຂະຫຍາຍລະບົບນໍ້າປະປາ ແລະ ສຸຂະພິບານ ເມືອງສາມັກຄີໄຊ ແຂວງອັດຕະປື ກັບ ບໍລິສັດສ່ວນບຸກຄົນ ເພັດຖາວອນ ກໍ່ສ້າງເຄຫາ ຂົວທາງ-ຊົນລະປະທານ ຈຳກັດ, ໂດຍໃຫ້ກຽດເຂົ້າຮ່ວມຂອງ ທ່ານ ນາງ ວິໄລຄຳ ໂພສາລາດ ຮອງລັດຖະມົນຕີ ກະຊວງ ຍທຂ; ທ່ານພອນສະໄໝ ມຽງລາວັນ ຮອງເຈົ້າແຂວງ ແຂວງອັດຕະປື; ທີ່ປືກສາລັດຖະມົນຕີ, ພ້ອມດ້ວຍບັນດາທ່ານຫົວໜ້າກົມ, ຮອງກົມ, ຜູ້ຕາງໜ້າຈາກ ກະຊວງການເງິນ, ກະຊວງແຜນການ ແລະ ການລົງທຶນ, ທ່ານຮອງເຈົ້າເມືອງ, ຫົວໜ້າພະແນກ, ຮອງຫົວໜ້າພະແນກ, ຜູ້ອຳນວຍການວັດວິສາຫະກິດນ້ຳປະປາ ແຂວງອັດຕະປື ແລະ ບັນດາແຂກ ທີ່ນອນໃນໂຄງການດັ່ງກ່າວເຂົ້າຮ່ວມ.

ທ່ານຫົວໜ້າໂຄງການນ້ຳປະປາ ແລະ ສຸຂາພິບານ ໄດ້ລາຍງານໂດຍຫຍໍ້ ກ່ຽວກັບໂຄງການກໍ່ສ້າງ-ປັບປຸງ ແລະ ຂະຫຍາຍລະບົບນໍ້າປະປາ ແລະ ສຸຂະພິບານ ເມືອງສາມັກຄີໄຊ ແຂວງອັດຕະປື ເຊິ່ງໄດ້ແບ່ງອອກເປັນໂຄງການຍ່ອຍ ຄື: ໂຄງການກໍ່ສ້າງ-ປັບປຸງ ແລະ ຂະຫຍາຍລະບົບນ້ຳປະປາ ເມືອງສາມັກຄີໄຊ ແຂວງອັດຕະປື, ພາຍໃຕ້ການຊີ້ນໍາຂອງ ກົມນໍ້າປະປາ, ກະຊວງໂຍທາທິການ ແລະ ຂົນສົ່ງ ເຊິ່ງໂຄງການດັ່ງກ່າວ ແມ່ນໄດ້ທຶນກູ້ຢືມຈາກທະນະຄານພັດທະນາອາຊີ  ທີ່ໄດ້ເຊັນກັນ ລະຫວ່າງລັດຖະ ບານ ແຫ່ງ  ສປປ ລາວ  ແລະ ທະນາຄານພັດທະນາອາຊີ  ຄັ້ງວັນທີ 16 ຕຸລາ 2018 ໃນມູນຄ່າການກໍ່ສ້າງທັງຫມົດ 5.050.030,66 ໂດລາສະຫະລັດ. ສໍາລັບລາຍລະອຽດຂໍ້ມູນ  ແລະ ໜ້າວຽກຕົ້ນຕໍ  ໃນການກໍ່ສ້າງປັບປຸງ-ແລະຂະຫຍາຍລະບົບນ້ຳປະປາ  ແລະ ສຸຂະພິບານ. ຊຶ່ງ​ໜ້າວຽກຕົ້ນຕໍຂອງໂຄງການ ປະກອບດ້ວຍ 8 ໜ້າວຽກຄື: 

ກໍ່ສ້າງສະຖານີດູດນໍ້າພ້ອມດ້ວຍປ້ຳສູບສົ່ງ ແລະ ສາຍທໍ່ສົ່ງຂື້ນໂຮງງານ; ກໍ່ສ້າງໂຮງງານຜິດນ້ຳປະປາໃຫມ່ທີມີກຳລັງການຜະລິດ 10,300 ມ3/ມື້. ປະກອບມີ: ອ່າງຕົກຕະກອນເບື້ອງຕົ້ນ, ເຄື່ອງສີດສານເຄມີ, ອ່າງກວນນ້ຳ, ອ່າງນ້ຳນອນ, ອ່າງຕອງຊາຍແບບໄວ, ອ່າງລ້າງກັບໃຊ້ອ່າງນ້ຳສູງເກົ່າ, ອ່າງນ້ຳສະອາດຊູດິນເກົ່າ (100 ມ3), ເຮືອນປະສົມສານເຄມີ, ຫ້ອງທົດລອງ, ປັບປຸງ ແລະ ສ້ອມແປງຫ້ອງການບໍລິການນ້ຳປະປາ 1 ຫລັງ, ສາງມ້ຽນເຄື່ອງ ແລະ ອ່າງຖີ້ມຕົມ ແລະ ກໍ່ສ້າງສະຖານີສູບສົ່ງ 2 ຈຸດ; ຄວາມຍາວສາຍສົ່ງທັງໝົດ 113,431 ແມັດ ແລະ ສາຍທໍ່ແຈກ 124,000 ແມັດ; ກໍ່ສ້າງວິດຖ່າຍສາທາລະນະ 24 ຫຼັງ (2 ຫ້ອງ 13 ຫຼັງ ແລະ 4 ຫ້ອງ 11 ຫຼັງ); ຕິດຕັ້ງໝໍ້ແທກນ້ຳເຂົ້າເຮືອນປະຊາຊົນ 2,250 ໜ່ວຍ; ຕິດຕັ້ງກ໋ອກດັບເພິງຈໍານວນ 18 ໜ່ວຍ; ຕິດຕັ້ງປະຕູລົມ 212 ຈຸດ ແລະ ຕິດຕັ້ງປະຕູລະບາຍນ້ຳ 187 ຈຸດ. ນອກຈາກນັ້ນຍັງມີວຽກປັບປຸງສະພາບແວດລ້ອມບ້ານມີຄື: ກໍ່ສ້າງຮ່ອງລະບາຍນ້ຳແຄມທາງ 732 ແມັດ; ສ້ອມແປງຫ້ອງການບ້ານ5 ຫລັງ; ປັບປຸງເສັ້ນທາງ 23 ເສັ້ນ, ຍາວທັງຫມົດ 4,055 ແມັດ ແລະ ຍັງຈັດຊື້ວັດສະດຸໃຫ້ຄອບຄົວທຸກຍາກ 119 ຄອບຄົວເພື່ອສ້າງຫ້ອງນ້ຳ. ຊຶ່ງຈະໃຊ້ເວລາໃນການກໍ່ສ້າງທັງຫມົດ 36 ເດືອນ.

ເຊື່ອມຊືມມະຕິກອງປະຊຸມຄົບຄະນະ ຂອງຄະນະບໍລິຫານງານສູນກາງພັກ ຄັ້ງທີ 9 ສະໄໝ X ແລະມະຕິກົມການເມືອງສູນກາງພັກ ວ່າດ້ວຍການປັບປຸງແບ່ງຂັ້ນຄຸ້ມຄອງ ເພື່ອສ້າງຄວາມເຂັ້ມແຂງຂອງລະບົບບໍລິຫານລັດໃນໄລຍະໃໝ່

ໃນຕອນເຊົ້າຂອງວັນທີ 6 ທັນວາ 2019, ກະຊວງ ຍທຂ ໄດ້ຈັດ ເຊື່ອມຊືມມະຕິກອງປະຊຸມຄົບຄະນະ ຂອງຄະນະບໍລິຫານງານສູນກາງພັກ ຄັ້ງທີ 9 ສະໄໝ X ແລະ ມະຕິກົມການເມືອງສູນກາງພັກ, ວ່າດ້ວຍການປັບປຸງແບ່ງຂັ້ນຄຸ້ມຄອງ ເພື່ອສ້າງຄວາມເຂັ້ມແຂງຂອງລະບົບບໍລິຫານລັດໄລຍະໃໝ່, ໃຫ້ກຽດເຜີຍແຜ່ເຊື່ອມຊືມໃນຄັ້ງນີ້ໂດຍ, ສະຫາຍ ປອ ບຸນຈັນ ສິນທະວົງ ກໍາມະການສູນກາງພັກ, ເລຂາຄະນະພັກ, ລັດຖະມົນຕີກະຊວງ ຍທຂ, ມີບັນດາສະຫາຍຄະນະປະຈໍາພັກ, ຄະນະພັກກະຊວງ, ບັນດາສະຫາຍຄະນະພັກຮາກຖານ, ຄະນະໜ່ວຍພັກຮາກຖານ ແລະ ຄະນະພັກທີ່ຂຶ້ນກັບຄະນະພັກຮາກຖານ, ຜູ້ຊ່ວຍລັດຖະມົນຕີ, ທີ່ປຶກສາລັດຖະມົນຕີ, ບັນດາຫົວໜ້າກົມ, ຮອງກົມ, ຫ້ອງການ, ສະຖາບັນ, ກອງວິຊາການ, ຜູ້ອໍານວຍການລັດວິສາຫະກິດ, ຫົວໜ້າພະແນກ, ຮອງຫົວໜ້າພະແນກ, ວິຊາການລະດັບປະລິນຍາເອກທີ່ຂຶ້ນກັບກົມ, ຫ້ອງການ, ສະຖາບັນ ແລະ ກອງວິຊາການ ກໍ່ເຂົ້າຮ່ວມຮັບຟັງຢ່າງພ້ອມພຽງ.

ໂດຍການປະຕິບັດຕາມມະຕິກອງປະຊຸມຄົບຄະນະ ຂອງຄະນະບໍລິຫານງານສູນກາງພັກ ຄັ້ງທີ 9 ສະໄໝ X, ຄັ້ງວັນທີ 14 ຕຸລາ 2019 ແລະມະຕິຂອງກົມການເມືອງສູນກາງພັກປະຊາຊົນປະຕິວັດລາວ ສະບັບເລກທີ 076/ກມສພ, ລົງວັນທີ 19 ສິງຫາ 2019 ວ່າດ້ວຍການປັບປຸງການແບ່ງຂັ້ນຄຸ້ມຄອງ, ເພື່ອສ້າງຄວາມເຂັ້ມແຂງຂອງລະບົບບໍລິຫານລັດໃນໄລຍະໃໝ່, ຄະນະພັກກະຊວງ ຍທຂ ຈຶ່ງໄດ້ເຫັນດີເປັນເອກະພາບຈັດຕັ້ງການເຊື່ອມຊືມເອກະສານດັ່ງກ່າວຂື້ນ, ຕາມແຜນການຂອງຄະນະພັກກະຊວງສະບັບເລກທີ 448/ຄພກຊ, ລົງວັນທີ 19 ພະຈິກ 2019 ແລະ ສະບັບເລກທີ 460/ຄພກຊ, ລົງວັນທີ 22 ພະຈິກ 2019, ຈຸດປະສົງຂອງການຈັດຕັ້ງເຊື່ອມຊືມຄັ້ງນີ້ແມ່ນເພື່ອ ເຮັດໃຫ້ຄະນະພັກຂັ້ນຕ່າງໆ ມີຄວາມຮັບຮູ້, ເຂົ້າໃຈກໍາແໜ້ນ ເຊື່ອມຊືມ ແລະເປັນເອກະພາບສູງຕໍ່ບັນດາເນື້ອໃນສໍາຄັນ ຂອງມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9, ສະໄໝ X ທີ່ໄດ້ຄົ້ນຄວ້າພິຈາລະນາ ແລະໃຫ້ທິດຊີ້ນໍາ ຕໍ່ບັນຫາສໍາຄັນໃນຂົງເຂດ ເສດຖະກິດ-ສັງຄົມ, ຂົງເຂດຄວາມໝັ້ນຄົງ, ວຽກງານແນວໂຮມ ແລະມະຫາຊົນຂອງພັກ, ໄປພ້ອມໆກັບການເຊື່ອມຊືມມະຕິຂອງກົມການເມືອງສູນກາງພັກ ເລກທີ 076 ຕາມເນື້ອໃນສໍາຄັນກ່ຽວກັບການປັບປຸງ ແລະການສ້າງຄວາມເຂັ້ມແຂງຂອງລະບົບບໍລິຫານລັດໃນໄລຍະໃໝ່.

ກະຊວງ ຍທຂ ຈັດຕັ້ງໂຄສະນາ-ປາຖະກະຖາ ວັນຊາດທີ 2 ທັນວາ ຄົບຮອບ 44 ປີ ແລະ ລະນຶກວັນເກີດປະທານ ໄກສອນ ພົມວິຫານ ຄົບຮອບ 99 ປີ.

 

ໃນ​ວັນ​ທີ 13 ທັນວາ 2019 ຢູ່​ທີ່​ຫ້ອງ​ປະຊຸມ​​ໃຫຍ່ ກະຊວງ ​ໂຍທາ​ທິການ ​ແລະ ຂົນ​ສົ່ງ ​​ໄດ້ຈັດ​ຕັ້ງ​ໂຄສະນາ-ປາຖະກະຖາ ​ວັນຊາດ​ທີ 2 ທັນວາ ຄົບຮອບ 44 ປີ (02/12/1975–02/12/2019)  ​ແລະ  ລະນຶກ​ວັນ​ເກີດປະທານ ໄກສອນ ພົມວິຫານ ຄົບຮອບ 99 ປີ (13/12/1920–13/12/2019)  . ໂດຍໃຫ້​ກຽດ​ປາຖະກະຖາ​ຂອງ ທ່ານ ພັນ​ເອກ ​ແສງ​ທອງ ດວງ​ບັນດິດ ​​ຄະນະ​ພັກ, ຄະ​ນະ​ບໍລິຫານ​ງານ, ຫົວໜ້າ​ກົມ​ໂຄສະນາ​-ອົບຮົມ, ​ສະຫະພັນ​ນັກຮົບ​ເກົ່າ​ແຫ່ງ​ຊາດ​ລາວ; ​ ​ໂດຍ​ໃຫ້​ກຽດ​ເຂົ້າ​ຮ່ວມ​ຂອງ ທ່ານ ບຸນ​ຈັນ ສິນຣາຊະ​ວົງ ​ເລຂາຄະນະ​​ພັກຮາກ​ຖານ, ຫົວໜ້າ​ຫ້ອງການ​ກະຊວງ ຍທຂ; ມີ​ບັນດາ​ສະຫາຍ ຄະນະ​ປະ​ຈໍາ​ພັກກະຊວງ​, ກຳມະການ​ພັກ​ກະຊວງ, ບັນດາ​ສະຫາຍ​ ຄະນະ​ພັກ​ຮາກ​ຖານ, ຄະນະ​ໜ່ວຍ​ພັກ​ຮາກ​ຖານ, ຫົວໜ້າ​ກົມ, ຮອງ​ຫົວໜ້າ​ກົມ, ຫົວໜ້າພະ​ແນ​ກ, ຮອງ​ຫົວໜ້າ​ພະ​ແນ​ກ, ຫ້ອງການ, ກົມ, ສະ​ຖາ​ບັນ, ກອງວິຊາ​ການ ​ແລະ ຜູ້ອໍານວຍ​ການ ​ແລະ ຮອງ​ຜູ້ອຳນວຍການ​ລັດ​ວິ​ສາ​ຫະກິດ ອ້ອມ​ຂ້າງ​ກະຊວງ, ຄະນະ​ບໍລິຫານ​ງານ ສາມ​ອົງການ​ຈັດ​ຕັ້ງ​ມະຫາຊົນ ຂັ້ນ​ກະຊວງ ​ເຂົ້າ​ຮ່ວມ​ຢ່າງ​ພ້ອມພຽງ.

      ​ໃນ​ທ່າມກາງ ທົ່ວ​ພັກ, ທົ່ວ​ລັດ ​ແລະ ທົ່ວ​ປວງ​ຊົນ​ລາວ ທັງ​ຊາດ ພວມ​ສູ້​ຊົນ​ຈັດ​ຕັ້ງ​ປະຕິບັດ ຜັນ​ຂະຫຍາຍ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ X ຂອງ​ພັກ, ມະຕິ​ກອງ​ປະຊຸມ​ໃຫຍ່ ຄັ້ງ​ທີ IV ຂອງ​ອົງຄະ​ນະ​ພັກ​ກະຊວງ ຍທຂ ​ຢ່າງ​ເປັນ​ຂະ​ບວນຟົດ​ຟື້ນ, ​ກໍ​ຄືສ້າງ​ຂະ​ບວນການ​ເພື່ອ​ສະ​ເຫຼີມສະຫຼອງ 2 ວັນ​ປະຫວັດສາດ ຄື: ວັນ​ສະຖາ​ປະນາ ສປປ ລາວ ຄົບຮອບ 44 ປີ ​ແລະ ວັນ​ຄ້າຍ​ວັນ​ເກີດ​ຂອງ​ປະທານ ​ໄກສອນ ພົມວິຫານ ຄົບຮອບ 99 ປີ  ​ແລະ​ ​ເພື່ອ​ຂໍ່ານັບ​ຮັບຕ້ອນ​ກອງ​ປະຊຸມ​ໃຫຍ່ ຄັ້ງ​ທີ XI ຂອງ​ພັກ ທີ່​ຈະ​ໄຂ​ຂື້ນ​ໃນ​ຕໍໍ່ໜ້າ​ນີ້. ນອກຈາກ​ນັ້ນ ​ເພື່ອ​ເຮັດ​ໃຫ້​ພະນັກງານ, ສິມາ​ຊິກ​ພັກ, ພາຍ​ໃນ​ກະຊວງ ​ໂຍທາ​ທິການ ​ແລະ ຂົນ​ສົ່ງ ມີ​ຄວາມ​ຮັບ​ຮູ້​ເຂົ້າ​ໃຈ​ເລີກ​ເຊີ່ງ​ກ່ຽວ​ກັບ​ຄວາມ​ໝາຍ​ຄວາມ​ສໍາຄັນ​ຂອງ​​ວັນສະຖາປະນາ ສປປ ລາວ ຄົບຮອບ 44 ປີ ​ເຊີ່ງ​ເປັນ​ເຫດການ​ປະຫວັດສາດ​ສໍາຄັນ​ໃຫຍ່​ຫຼວງ​ຂອງ​ຊາດ​ລາວ​ເຮົາ​, ຕິດ​ພັນ​ກັບ​ການ​ເສີມ​ຂະຫຍາຍ​ມູນ​ເຊື້ອ​ອັນ​ດີງາມ​ຂອງ​ຊາດ, ຂອງ​ພັກ. ​ເພື່ອເສີມ​ຂະຫຍາຍ​ ມູນ​ເຊື້ອ​ອັນ​ດີງາມ, ຄຸນງາມ​ຄວາມ​ດີ, ຄຸນ​ສີນ​ທໍາ​ປະຕິວັດ​ຂອງ​ປະທານ ​ໄກສອນ ພົມ​ວິຫານ, ຜູ້​ນໍາ​ທີ່​ແສນ​ເຄົາລົບ​ຮັກ ຂອງ​ປະຊາຊົນ​ລາວ​ບັນດາ​ເຜົ່າ. ​

ເພື່ອ​ໃຫ້​ພະນັກງານ, ສະມາຊິກ​ພັກ ​ໄດ້​ຮັບ​ຮູ້ ​ໄດ້​ຮໍ່າຮຽນ​ເອົາ​ແບບຢ່າງ​ອັນ​ໃສ່​ແຈ້ງ​ດີ​​ເດັ່ນ​ຂອງ​ເພີ່ນ ​ແລະ ຝຶກ​ຝົນ​ຫຼໍ່​ຫຼອມ​ຕົນ​ເອງ​ເພື່ອ​ຮັບ​ໃຊ້​ຊາດ, ຮັບ​ໃຊ້​ປະຊາຊົນ​ດ້ວຍ​ຄວາມ​ບໍລິສຸດ​ຜຸດ​ຜ່ອງ, ຕັ້ງໜ້າຈັດ​ຕັ້ງ​ປະຕິບັດ​ແນວທາງ​ແຜນ​ນະ​ໂຍບາຍ​ຂອງ​ພັກ-ລັດ ​ເຮັດ​ໃຫ້​ປະກົດ​ຜົນ​ເປັນ​ຈີ​ງຍີ່​ງໆ​ຂຶ້ນ. ​ເພື່ອປຸກລະດົມ​ຂະ​ບວນການ​ຂໍ່ານັບຮັບ​ຕ້ອນ​ກອງ​ປະຊຸມ​ໃຫຍ່ ຄັ້ງ​ທີ XI ຂອງ​ພັກ ​ໃຫ້​ຟົດ​ຟື້ນ ​ເປັນ​ລະບຽບ​ຮຽບຮ້ອຍ, ສັງຄົມ​ມີ​ຄວາມ​ສະຫງົບ ​ແລະ ມີ​ຄວາມ​ເບີກບານ​ມ່ວນ​ຊື່ນ. ການ​ໂຄສະນາ-ປາຖະກະຖາ ​ໃນ​ຄັງ​ນີ້ ​ເພື່ອ​ຍົກ​ໃຫ້​ເຫັນ​ມູນ​ເຊື້ອ ​ແລະ ຜົນງານ​ອັນ​ໃຫຍ່​ຫຼວງ​ຂອງ​ພັກ​ປະຊາຊົນ​ປະຕິວັດ​ລາວ ​ໃນ​ການ​ນໍາພາຕະຫຼອດ​ໄລຍະ 44 ປີ, ​ໃຫ້​ແກ່​ຄະນະ​ພັກ-ຄະນະ​ນໍາ​ກະຊວງ, ບັນດາ​ຮາກ​ຖານ ​ແລະ ພະນັກງານ ສະ​ມາຊິກ​ພັກ ​ໄດ້​ຮັບ​ຮູ້​ຢ່າງ​ເລີກ​ເຊີງ ​ແລະ ຖອດ​ຖອນ​ບົດຮຽນ ​ເຂົ້າ​ໃນ​ການ​ເຮັດວຽກ​ງານ​ຕົວ​ຈີ​ງ.

ກອງປະຊຸມໃຫຍ່ ຄັ້ງທີ IV ຂອງໜ່ວຍພັກທີ 2 ຄະນະພັກຮາກຖານຫ້ອງການ ກະຊວງ ຍທຂ

ກອງປະຊຸມໃຫຍ່ ຄັ້ງທີ IV ຂອງໜ່ວຍ​ພັກ​ທີ 2 ຄະນະພັກຮາກຖານຫ້ອງການ ກະຊວງ ຍທຂ  ໄດ້ເປີດຂຶ້ນໃນຕອນ​ແລງຂອງ ວັນທີ 4 ທັນວາ 2019 ​ໂດຍ​​ເປັນ​ກຽດ​ເຂົ້າ​ຮ່ວມ ຂອງ​ສະຫາຍ ບຸນ​ຈັນ ສິນ​ທະ​ວົງ ​ເລຂາ​ຄະນະ​ພັກ​ກະຊວງ, ລັດຖະມົນຕີ​ກະຊວງ ​ໂຍທາ​ທິການ ​ແລະ ຂົນສົ່ງ ​ແລະ ພາຍ​ໃຕ້ການເປັນປະທານ ຂອງ ສະຫາຍ ບຸນຈັນ ສິນຣາຊະ​ວົງ, ເລຂາຄະນະພັກຮາກຖານ, ຫົວໜ້າ​ຫ້ອງການ​ກະຊວງ ຍທຂ; ສະຫາຍ ນະ​ລົງ​ໄຊ ມີ​ວາ​ປະດິດ ​ເລຂາ​ໜ່ວຍ​ພັກ​ທີ 2; ໂດຍໃຫ້ກຽດເຂົ້າຮ່ວມຂອງສະຫາຍ ກໍາມະການຄະນະພັກຮາກຖານຫ້ອງການ, ຕາງໜ້າ​ຫ້ອງການ​ຄະນະພັກ​ກະຊວງ, ຜູ້ແທນກອງປະຊຸມ ​ແລະ ​ແຂກ​ຖືກ​ເຊີນເຂົ້າຮ່ວມຢ່າງພ້ອມພຽງ.

ບັນດາສະຫາຍຜູ້​ແທນເຂົ້າຮ່ວມກອງປະຊຸມ ໄດ້ຍົກສູງຄວາມຮັບຜິດຊອບ ແລະ ສຸມສະຕິປັນຍາຂອງຕົນເຂົ້າໃນການຄົ້ນຄວ້າປະກອບຄຳຄິດຄຳເຫັນຕໍ່ກອງປະຊຸມຢ່າງກົງໄປກົງມາ ເຮັດໃຫ້ກອງປະຊຸມດໍາເນີນໄປດ້ວຍບັນຍາກາດຟົດຟື້ນ ແລະ ສຳເລັດຕາມຈຸດປະສົງຄາດໝາຍທີ່ວາງໄວ້.

ກອງປະຊຸມໃຫຍ່ ຄັ້ງທີ IV ຂອງໜ່ວຍ​ພັກ​ທີ 2 ຄະນະພັກຮາກຖານຫ້ອງການ ກະຊວງ ຍທຂ  ໄດ້ລົງປະຊາມະຕິເປັນເອກະສັນ ຮັບຮອງເອົາບັນດາເນື້ອໃນສຳຄັນ ຄື: ກອງປະຊຸມໄດ້ພ້ອມກັນຄົ້ນຄວ້າ ແລະ ປະກອບຄໍາຄິດຄໍາເຫັນໃສ່ຮ່າງລາຍງານການເມືອງ, ແລະ ບົດສໍາຫຼວດການນໍາພາລວມຂອງຄະນະພັກຊຸດເກົ່າ, ໃນນັ້ນໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນໃນການນຳພາຊີ້​ນໍາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ໃນປີ 2014-2019 ຜ່ານມາ, ພ້ອມນີ້ ກອງປະຊຸມຍັງໄດ້ເປັນເອກະສັນຮັບຮອງເອົາທິດທາງ, ແຜນການ 5 ປີ ນັບແຕ່ປີ 2020-2024. ນອກຈາກ​ນີ້, ກອງປະຊຸມຍັງໄດ້ຮັບຟັງລາຍງານ ແລະ ປະກອບຄໍາຄິດເຫັນຈາກຜູ້ຕາງໜ້າ 3 ອົງການຈັດ​ຕັ້ງມະຫາ​ຊົນ ເຊິ່ງສະແດງໃຫ້ເຫັນເຖິງຄວາມເປັນເອກະພາບ ຕໍ່ລາຍງານການເມືອງ, ທິດທາງແຜນການ ແລະ ວຽກງານຮອບດ້ານຕໍ່ກອງປະຊຸມ, ການລາຍງານປະກອບຄໍາຄິດເຫັນ ໄດ້ລົງເລິກລາຍງານຜົນສໍາເລັດການຜັນຂະຫຍາຍມະຕິກອງປະຊຸມໃຫຍ່ ເຂົ້າໃນວຽກ​ງານຂອງຕົນ ອັນໄດ້ເຮັດໃຫ້ກອງປະຊຸມມີເນື້ອໃນອຸດົມສົມບູນຂຶ້ນຕື່ມ.

ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຂັດເລືອກເອົາຄະນະໜ່ວຍພັກຊຸດໃໝ່ ບົດພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກຳນົດໄວ້, ເຊິ່ງມີຜູ້ອອກຮັບສະໝັກເລືອກຕັ້ງ 5 ສະຫາຍ, ຍິງ 2 ສະຫາຍ ແລະ ເລືອກຕັ້ງໄດ້ 3 ສະຫາຍ, ຍິງ 2 ສະຫາຍ ຄື:

1. ສະຫາຍ ນະ​ລົງໄຊ​ ມີ​ວາ​ປະດິດ

2. ສະຫາຍ ນາງ ວະ​ນິດາ ວໍລະ​ສານ

3. ສະຫາຍ ນາງ ຈິນດາ​ໄລ ວົງ​ໄຊ 

ກອງປະຊຸມຄັ້ງປະຖົມມະລຶກຂອງໜ່ວຍ​ພັກ​ທີ 2 ຄະນະພັກຮາກຖານຫ້ອງການ ກະຊວງ ຍທຂ  ໄດ້ເປັນເອກະສັນເລືອກເອົາ ເລຂາ, ຮອງເລຂາ, ກຳມະການ-ຜູ້ກວດກາໜ່ວຍ​ພັກ ດັ່ງນີ້:

1.  ສະຫາຍ ນະ​ລົງ​ໄຊ ມີ​ວາ​ປະດິດ         ​ເປັນ​ເລຂາ

2.  ສະຫາຍ ນາງ ວະ​ນິດາ ວໍລະ​ສານ       ເປັນ​ຮອງເລຂາ

3.  ສະຫາຍ ນາງ ຈິນດາ​ໄລ ວົງ​ໄຊ  ກຳມະການ, ທັງ​ເປັນ​ຜູ້​ກວດກາ​ໜ່ວຍ​ພັກ

ກອງປະຊຸມໃຫຍ່ໄດ້ຮັບຟັງການໂອ້ລົມຈາກ ສະ​ຫາຍ ບຸນຈັນ ສິນຣາຊະວົງ, ເລຂາຄະນະພັກຮາກຖານ, ຫົວໜ້າ​ຫ້ອງການ​ກະຊວງ ຍທຂ; ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້​ນໍານຳພາ ຂອງຄະນະໜ່ວຍພັກທີ 2 ທີ່ໄດ້ນໍາພາຊີ້​ນໍາພະນັກງານ, ສະມາຊິກພັກ, ລັດຖະກອນ ປະຕິບັດໜ້າທີ່ການເມືອງຂອງຕົນ, ຍາດໄດ້ຜົນສຳເລັດຫຼາຍດ້ານ. ພ້ອມກັນນັ້ນ, ສະຫາຍຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ, ຂໍ້ຄົງຄ້າງ ເຊິ່ງໄດ້ຮຽກຮ້ອງໃຫ້ຄະນະໜ່ວຍພັກທີ 2 ຊຸດໃໝ່ ຈະຕ້ອງໄດ້ສືບຕໍ່ປັບປຸງ, ແກ້ໄຂ. ຈາກນັ້ນສະຫາຍ​ໄດ້ໃຫ້ທິດ​ຊີ້ນຳວຽກງານແຕ່ລະດ້ານ, ​ເຊິ່ງສະຫາຍມີຄວາມເຊື່ອໝັ້ນຕໍ່ຄະນະໜ່ວຍພັກທີ 2 ຊຸດໃໝ່ ທີ່ຈະສືບຕໍ່ນຳພາຊີ້​ນໍາຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງ​ທີ IV ຂອງໜ່ວຍພັກທີ 2 ໃຫ້ຍາດໄດ້ຜົນງານ ແລະ ມີຜົນສໍາເລັດ​ເປັນ​ກ້າວໆ.

Additional information