ຂ່າວ

ຍທຂ ຈັດກອງປະຊຸມເປີດກ້ວາງຜ່ານຮ່າງກົດໝາຍ 3 ສະບັບ

ໃນວັນທີ 7 – 9 ສິງຫາ 2012 ຢູ່ທີ່ທ່າລາດແຂວງວຽງຈັນໄດ້ຈັດກອງປະຊຸມເປິດກ້ວາງຜ່ານຮ່າງກົດໝາຍສາມສະບັບ, ​ໂດຍການເປັນປະທານຂອງທ່ານ ລັດຕະນະມະນີ ຄູນນີວົງ ລັດຖະມົນຕີຊ່ວຍວ່າການກະຊວງຍທຂ ພ້ອມດ້ວຍບັນດາພາກສ່ວນກ່ຽວຂ້ອງເຂົ້າຮ່ວມທັງໝົດ 170 ກວ່າທ່ານ.

ທ່ານ ສຈ.ດຣ. ບຸນ​​ເຫຼື່ອມ ສີສຸລາ ປະທານສະພາວິທະຍາສາດແລະເຕັກໂນໂລຊີ ຫົວໜ້າຄະນະຊີ້ນຳກົດໝາຍ ກະຊວງ ຍທຂ, ​ໄດ້ກ່າວຕໍ່ກອງປະຊຸມວ່າ: ດັ່ງທີ່ພວກເຮົາຮູ້ແລ້ວວ່າ ກົດໝາຍຂົນສົ່ງທາງບົກແມ່ນກົດໝາຍທີ່ໄດ້ສ້າງຂື້ນໃນປີ 1997 ​ແລະກົດໝາຍຈະລາຈອນທາງບົກແມ່ນສ້າງຂື້ນໃນປີ 2000, ທັງສອງກົດໝາຍນີ້ແມ່ນໄດ້ປະກອບສ່ວນເຂົ້າໃນການຄຸ້ມຄອງລັດ ຄຸ້ມຄອງເສດຖະກີດ-ສັງຄົມມາເປັນເວລາ 10 ກວ່າປີແລ້ວ ຊື່ໄດ້ຮັບໝາກຜົນເປັນຢ່າງດີ. ​ແຕ່ມາເຖີງເວລານີ້ ສະພາບ​​ເສດຖະກິດ-ສັງຄົມຂອງປະເທດເຮົາໄດ້ກ້າວກະໂດດສູ່ຈັງຫວະ​​ແຫ່ງການຂະຫຍາຍຕົວທີ່ໄວວາຫຼາຍ ບວກໃສ່ກັບບັນຫາການເຊື່ອມໂຍງກັບສາກົນຂອງ ສປປລາວ. ​ເມື່ອເຫັນ​​ເປັນແນວນັ້ນ ສະພາ​​ແຫ່ງຊາດກໍຄືລັດຖະບານໄດ້ເອົາເຂົ້າແຜນປັບປຸງໂດຍໄດ້ມອບໃຫ້ກະຊວງ ຍທຂເປັນເຈົ້າການໃນການທົບທວນກໍຄືປັບປຸງກົດໝາຍສອງສະບັບທີ່ມີໃນປັດຈຸບັນຄື: ກົດໝາຍຂົນສົ່ງທາງບົກແລະກົດໝາຍຈະລາຈອນທາງບົກແລ້ວກໍຍັງສະເໜີໃຫ້ສ້າງກົດໝາຍໃໝ່ອີກໜຶ່ງສະບັບ ກ່ຽວກັບການຂົນສົ່ງຫຼາຍຮູບແບບ. ການທີ່ນຳສະເໜີສອງກົດໝາຍເຂົ້າໃນກອງປະຊຸມໃນເທື່ອນີ້ ຄະນະຄົ້ນຄ້ວາຂອງພວກເຮົາໄດ້ຖືເອົາກົດໝາຍສະບັບປັດຈຸບັນເປັນພື້ນຖານ, ​ແລ້ວກໍຍັງນຳເອົາພຶດຕິກຳກໍຄືການເຄື່ອນໄຫວ, ປະສົບການແລະການຄຸ້ມຄອງຕົວຈິງກ່ຽວກັບວຽກງານຂົນສົ່ງໃນຊຸມປີຜ່ານມາເປັນປະເດນຕົ້ນຕໍ​ ​ເຂົ້າໃນການສຶກສາຄົ້ນຄ້ວາຮ່າງກົດໝາຍເຫຼົ່ານີ້. ນອກຈາກນີ້ກອງປະຊຸມຍັງອິ່ງໃສ່ກົດໝາຍປະເທດເພື່ອນບ້ານແລະສາກົນມາພິຈາລະນາໃຫ້ສາມາດຕອບສະໜອງກັບຄວາມຮຽກຮ້ອງຕ້ອງການໃນໄລຍະໃໝ່ເຂົ້າໃນການພັດທະນາເສດຖະກິດ-ສັງຄົມກໍຄືການເຊື່ອ​​ໂຍງກັບສາກົນ ຂອງປະເທດເຮົາຢ່າງປະສິດທິຜົນ.

ຮ່າງກົດໝາຍສາມສະບັບທີ່ນຳສະເໜີຕໍ່ກອງປະຊຸມເປິດກ້ວາງທົ່ວປະເທດໃນຄັ້ງນີ້ແມ່ນມີຄວາມໝາຍສຳຄັນຫຼາຍເພາະວ່າໄດ້ເຊີນເອົາບຸກຄົນສຳຄັນ, ນັກວິຊາການແລະຜູ້ມີຄວາມຮັບຜິດຊອບດ້ານການຂົນສົ່ງມາປະກອບຄວາມຄິດຄຳເຫັນໃສ່ຮ່າງກົດໝາຍທັງສາມສະບັບໃຫ້ມີຄວາມສົມບູນແລະຄົບຖ້ວນດີກວ່າເກົ່າ ທັງໃຫ້ສອດຄ່ອງແລະຕອບສະໜອງໄດ້ກັບໜ້າທີ່ການເມືອງໃນໄລຍະໃໝ່ໃນການຄຸ້ມຄອງລັດ ຄຸ້ມຄອງເສດຖະກິດ-ສັງຄົມຂອງປະເທດເຮົາ ທັງນີ້ກໍເພື່ອເປັນການຊຸກຍູ້ສົ່ງເສີ່ມວຽກງານບໍລິການດ້ານການຂົນສົ່ງໃຫ້ກ້າວໜ້າແລະທັນສະໄໝ.

ຄະນະຜູ້ແທນຂັ້ນສູງ ກະຊວງໂຍທາທິການ ແລະ ຂົນສົ່ງ

ໂດຍຕອບສະໜອງຕາມຄເຊີນຂອງ ທ່ານ ຄິນມອງມິນ, ລັດຖະມົນຕີວ່າການ ກະຊວງ ກໍ່ສ້າງ ແຫ່ງ ສ. ມຽນມາ, ທ່ານ ສົມມາດ ພົລເສນາ, ລັດຖະມົນຕີວ່າການ ກະຊວງ ໂຍທາທິການ ແລະຂົນສົ່ງ ແຫ່ງ ສປປລາວ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ສ.ມຽນມາ ໃນລະຫວ່າງວັນທີ 15-19 ມີນາ 2012 ໂດຍມີຈຸດປະສົງ ເພື່ອສືບຕໍ່ປຶກສາຫາລື ກັບ ກະຊວງ ກໍ່ສ້າງ, ສ.ມຽນມາ ກ່ຽວກັບໂຄງການກໍ່ສ້າງຂົວຂ້າມນ້ຳຂອງມິດຕະພາບ ລາວ - ມຽນມາ ລະຫວ່າງ ຊຽງກົກ (​ແຂວງ​ຫຼວງນ້ຳທາ, ສປປລາວ) ແລະ ແກ້ງລາບ (ສ.ມຽນມາ), ຊຶ່ງ​​ໃນ​ໄລຍະ ​ເດືອນກັນຍາ 2011

Read more: ຄະນະຜູ້ແທນຂັ້ນສູງ ກະຊວງໂຍທາທິການ ແລະ ຂົນສົ່ງ

ພິທີມອບ-ຮັບລົດເມ 42 ຄັນທີ່ໄດ້ຮັບການຊ່ວຍເຫຼືອລ້າຈາກ ລັດຖະບານ ແລະຊາຊົນຍີ່ປຸ່ນ

ໃນ​ວັນ​ທີ 19 ມີ​ຖຸນາ 2012 ຢູ່​ທີ່​ຫ້ອງວ່າ​ການປົກ​ຄອງ​ນະຄອນຫຼວງ​ວຽງ​ຈັນ ​ໄດ້​ຈັດ​ພິທີ​ມອບ-ຮັບ​ລົດ​ເມ​ໃໝ່​ທີ່​​ໄດ້​ຮັບການ​ຊ່ວຍ​ເຫຼືອ​ລ້າ​ຈາກ​ລັດຖະບານ​ຍີ່ປຸ່ນ. ​ເປັນ​ກຽດ​ເຂົ້າ​ຮ່ວມ​ຂອງພະນະ​ທ່ານນາງ Junko YOKOTA ​ເອກ​ອັກຄະ​ລັດຖະທູດ​ຍີ່ປຸ່ນ​ປະຈຳ​ລາວ,​ ພະນະທ່ານ Masato TOGAWA ຫົວໜ້າ​ອົງການ JICA ປະຈຳ​ລາວ, ພະນະ​ທ່ານສຸ​ກັນມະຫາລາດ ​ເຈົ້າ​ຄອງ​ນະຄອນຫຼວງ​ວຽງ​ຈັນ. ພະນະ​ທ່ານສົມ​ມາດພົລ​ເສນາລັດຖະມົນຕີ​ວ່າການ​ກະຊວງ ​ໂຍທາ​ທິການ ​ແລະ​ຂົນ​ສົ່ງ, ທ່ານ ວຽງ​ສະຫວັດ ສີ​ພັນ​ດອນ ຫົວໜ້າ​ກົມ​ຂົນ​ສົ່ງ, ອຳນວຍ​ການ​ໂຄງ​ການ ພ້ອມດ້ວຍ​ບັນດາ​ແຂກ​ທີ່​ຖືກ​ເຊີນ ​ແລະ​ພະນັກງານ, ລັດຖະກອນ​ລັດ​ວີ​ສາ​ຫະກິດ​ລົດ​ເມ​ກໍ​ໄດ້ເຂົ້າ​ຮ່ວມ​ຢ່າງ​ພ້ອມພຽງ.

ພິທີ​ມອບ-ຮັບ​ລົດ​ເມ​ໃໝ່​ຈາກ​ລັດຖະບານ​ຍີ່ປຸ່ນ​ທີ່ໃຫ້ການ​ຊ່ວຍ​ເຫຼືອ​ລ້າ​ໂດຍ​ຜ່ານ​ໂຄງການ“ ປັບປຸງ​ການ​ຂົນ​ສົ່ງ​ສາທາລະນະ​ໃນ​ນະຄ​ອນ​ຫຼວງ​ວຽງ​ຈັນ “ ​ເປັນ​ມູນ​ຄ່າ 500 ລ້ານ​ເຢັນຫຼື​ປະມານ 6 ລ້ານ​ໂດ​ລາ​ສະຫະລັດ ​ເຊີ່ງ​ປະກອບ​ມີ​ລົດ​ເມຈຳນວນ 42 ຄົນ ​ແລະ​ເຄື່ອງ​ອຸປະກອນ​ສ້ອມ​ແປງ​ລົດ​ທີ່​ຈະ​ມອບ​ໃຫ້​​ແກ່ບໍລິສັດ​ລັດ​ວິ​ສາ​ຫະກິດ​ລົດ​ເມ​ນະ​ຄ​ອນຫຼວງ​ວຽງ​ຈັນ ​ແລະ​ປະຈຸ​ບັນ​ນີ້ລົດ​ເມ​ພ້ອມ​ດ້ວຍ​ເຄື່ອງມື​ຕ່າງໆ ​ໄດ້​ສົ່ງ​ມາ​ຮອດ​ລາວ​ເປັນ​ທີ່​ຮຽບຮ້ອຍ​ແລ້ວ. ນັບ​ແຕ່​ປີ 1997 ​ເປັນ​ຕົ້ນ​ມາ, ນີ້​ກໍ​ແມ່ນ​ຄັ້ງ​ທີ 3​ແລ້ວທີ່​ທາງ​ລັດຖະບານ​ຍີ່ປຸ່ນ​ໄດ້​ມອບ​ລົດ​ເມ​ໃຫ້​ແກ່ສປປລາວ, ລວມຈຳນວນ​ທັງ​ໝົດ 135 ຄັນ ​ໃນ​ນັ້ນລົດ​ເມ 42 ຄັນ​ທີ່​ມອບ​ໃຫ້​ຄັ້ງ​ນີ້ ​ເປັນ​ລົດ​ໂດຍສານ​ປັບ​ອາກາດ​ຂະໜາດ 45 ບ່ອນ​ນັ່ງ, ມີ​ຄວາມ​ຍາວ​ກວ່າ​ລົດ​ເມ​ລຸ້ນກ່ອນ 1 ​ແມັດ, ມີ​ຮູບຊົງ​ທີ່​ທັນ​ສະ​ໄໝ ​ແລະ​ມີ​ສີສັນ​ສວຍ​ງາມ​ເປັນ​ສີຂາວ. ສຳ​ລັບໂຄງການ​ປັບປຸງ​ລະບົບ​ການ​ຂົນ​ສົ່ງ​ສາທາລະນະ ​ໃນ​ນະຄອນຫຼວງ​ວຽງ​ຈັນ​ນີ້ ​ແມ່ນ​ໜຶ່ງ​ໃນ​ບັນ​ດາ​ໂຄງການ​ພາຍ​ໃຕ້​ຍຸດ​ທະ​ສາດ​ແຫ່ງ​ຊາດ ວ່າ​ດ້ວຍ​ການ​ຂົນ​ສົ່ງ​ແບບ​ຍືນ​ຍົງ​ຕໍ່​ສີ່​ງ​ແວດ​ລ້ອມ, ​ເວົ້າ​ສະ​ເພາະ​ແມ່ນ​ແຜນ​ແມ່​ບົດ​ການ​ຂົນ​ສົ່ງ​ໃນ​ຕົວ​ເມືອງ ນະຄອນຫຼວງ​ວຽງ​ຈັນ. ​ໂຄງການ​ນີ້​ມີ​ຄວາມ​ສຳຄັນ​ຫຼາຍ ​ເພາະ​ຈະ​ສາມາດ​ຊ່ວຍ​​ແກ້​ໄຂ​ສະພາບ​ຄວາມ​​ແອອັດ ​ແລະ​ຫຼຸດຜ່ອນ​ການ​ເກີດ​ອຸປະຕິ​ເຫດ​ທີ່​ເກີດ ຈາກການສັນຈອນ ​ໂດຍ​ສະ​ເພາະ​ເວລາ​ເລັ່ງດ່ວນ, ການ​ປັບປຸງ​ການ​ບໍລິການ​ດັ່ງກ່າວ ຈະ​ຊ່ວຍ​ດຶງ​ດູດ​ໃຫ້​ຜູ້​ຄົນ​ຫັນ​ມາ​ນຳ​ໃຊ້​ການ​ບໍລິການ​ຂົນ​ສົ່ງ​ສາທາລະນະ​ຫຼາຍ​ຂື້ນ ​ແທນ​ທີ່​ຈະນຳ​ໃຊ້​ພາ​ຫາ​ນະ​ສ່ວນ​ຕົວ. ຫວັງ​ຢ່າງ​ຍີ​ງວ່າ​ນະຄອນຫຼວງ​ວຽງ​ຈັນ ຈະ​ກາຍ​ເປັນ​ຕົວ​ແບບ​ໃຫ້​ແກ່​ແຂວງ​ອື່ນໆ ​ໃນ ສປປ ລາວ ​ໃນ​ການ​ນຳ​ໃຊ້​ການ​ບໍລິການ​ລະບົບ​ຂົນ​ສົ່ງ​ສາທາລະນະ ​ເພາະ​ວ່າ​ປະຈຸ​ບັນ ອົງການ​ໃຈກາ JICA ກຳລັງ​ຊ່ວຍ​ສຶກສາ​ຄວາມ​ເປັນ​ໄປ​ໄດ້​ໃນ​ການ​ນຳ​ໃຊ້​ລົດ​ໄຟຟ້າ ​ເປັນ​ພາຫາ​ນະ​ຂົນ​ສົ່ງ​ສາທາລະນະ ສຳ​ລັບ​ຕົວ​ເມືອງ​​ໃຫຍ່​ເຊັ່ນ: ຫຼວງ​ພະ​ບາງ, ສະຫວວັນນະ​ເຂດ ​ແລະຈຳປາ​ສັກ.

ປາຖະກະຖາເລົ່າມູນເຊື້ອວັນສ້າງຕັ້ງກອງທັບປະຊາຊົນລາວ ຄົບຮອບ 63 ປີ (20/01/1949 – 20/01/2012)

ໃນວັນ 20 ມັງກອນ 2012 ໄດ້ຈັດປາຖະກະຖາຂຶ້ນເພື່ອລະນຶກເຖີງວັນສ້າງຕັ້ງກອງທັບ ປະຊາຊົນ ລາວ ຄົບຮອບ 63 ປີ (20/01/1949 – 20/01/2012) ປາຖະກະຖາໂດຍທ່ານ ພົນຕີ ຈັນສະໝອນ ຈັນຍາລາດ ກຳມະການສູນກາງພັກ, ລັດຖະມົນຕີຊ່ວຍວ່າການ ກະຊວງປ້ອງ ກັນປະເທດ. ເປັນກຽດ ເຂົ້າຮ່ວມຂອງ ທ່ານ ສົມມາດ ພົລເສນາ ກຳມະການສູນກາງພັກ, ລັດຖະມົນຕີວ່າການກະຊວງ ໂຍທາທີການ ແລະຂົນສົ່ງ ພ້ອມດ້ວຍຄະນະນຳກະຊວງ, ຫົວໜ້າຫ້ອງການ, ຫົວໜ້າກົມ, ຮອງກົມ ແລະທຽມເທົ່າ, ພະນັກງານສະມາຊິກພັກຜູ້ເປັນຫຼັກແຫຼ່ງ, ຂອງບັນດາກົມ, ຫ້ອງການ, ອົງການ, ສະຖາບັນ, ສະພາວິທະຍາສາດ-ເຕັກນິກ, ກອງວິຊາການ, ສູນຝຶກ, ຫ້ອງການດັດສົມນ້ຳປະປາ ແລະ ບັນດາລັດວິສາຫະກິດ ອ້ອມຂ້າງກະຊວງເຂົ້າຮ່ວມທັງໝົດ 161 ຄົນ. ໃນນີ້ ທ່ານ ໄດ້ຍົກໃຫ້ເຫັນປະຫວັດຄວາມເປັນມາຂອງກອງທັບປະຊາຊົນລາວ ພາຍໃຕ້ ການນຳພາ ຂອງພັກປະຊາຊົນປະຕິວັດລາວ ໃນການຕໍ່ສູ້ແຕ່ລະໄລຍະ, ວັນທີ 20 ມັງກອນ 1949 ກອງທັບລາວ ອິດສະຫລະ ໄດ້ຮັບການສ້າງ ຕັ້ງຂຶ້ນຢູ່ເຂດລາວຮຸ່ງພຽງສາ ເມືອງຊຳເໜືອ ແຂວງຫົວພັນ ໂດຍແມ່ນປະທານ ໄກສອນ ພົມວິຫານ ເປັນຜູ້ບັນຊາໂດຍກົງຈົນມາເຖີງປະຈຸບັນ ກອງທັບປະຊາຊົນ ລາວໄດ້ກຳເນີດເຕີບໃຫຍ່ຂະຫຍາຍຕົວພາຍໃຕ້ການຊີ້ນຳ-ນຳພາຂອງພັກ, ເປັນກຳລັງຫຼັກແຫຼ່ງ ໃຫ້ແກ່ ຂະບວນການຕໍ່ສູ້ຂອງ ປະຊາຊົນເພື່ອຄວາມສົມບູນພູນສຸກ ແລະເພື່ອຄວາມວັດທະນາຖາວອນຂອງປະ ຊາຊົນກໍ່ຄືປະເທດຊາດ ດັ່ງຄຳເວົ້າຂອງປະທານ ໄກສອນ ພົມວິຫານ ທີ່ວ່າ: “ເວລາໃດກອງທັບກໍ ນຳໜ້າທຸກວຽກງານ ເດັດດ່ຽວໜຽວແໜ້ນ ຜ່ານຜ່າອຸປະສັກ ສຳເລັດທຸກໜ້າທີ່ ຕິຊະນະສັດຕູທຸກໂຕ ສົມແລ້ວເປັນກຳລັງແກ່ນສານທີ່ເຂັ້ມແຂງຂອງການປະຕິວັດເປັນເຄື່ອງມືອັນແຫຼມຄົມຂອງພັກ“
ສຸດທ້າຍນີ້ ທ່ານ ກໍຍັງຍົກໃຫ້ພະນັກງານພາຍໃນຂະແໜງການ ຍທຂ ເຂົ້າໃຈແຈ້ງ ແລະ ເຊື່ອມຊືມ 6 ມູນເຊື້ອອັນສະຫງ່າອົງອາດຂອງ ກອງທັບ ປະຊາຊົນລາວຄື:


1) ກອງທັບປະຊາຊົນລາວມີຄວາມຈົ່ງຮັກພັກດີຕໍ່ພັກ, ຕໍ່ປະຊາຊົນ, ຕໍ່ອຸດົມການສັງຄົມນິຍົມ.
2) ກອງທັບປະຊາຊົນລາວມີນ້ຳໃຈຕໍ່ສູ້ພິລະອາດຫານ, ກ້າແກ່ນໜຽວແໜ້ນມີໄຫວພິບ ແລະ ປະດິດສ້າງ.
3) ກອງທັບປະຊາຊົນລາວມີນ້ຳໃຈດຸໝັ່ນຂະຫຍັນພຽນ, ອອກແຣງງານເພີ່ມພູນຜະລິດຜົນ ແລະ ປະຍັດມັດມະຍັດ.
4) ກອງທັບປະຊາຊົນລາວຍາມໃດກໍມີຄວາມສາມັກຄີອັນແໜ້ນແຟ້ນກັບປະຂາຂົນບັນດາເຜົ່າ.
5) ກອງທັບປະຊາຊົນລາວໄດ້ສາມັກຄີກັບກອງທັບປະຊາຊົນບັນດາປະເທດສັງຄົມນິຍົມອ້າຍນ້ອງ ແລະ ບັນດາປະເທດເພື່ອນມິດທີ່ກ້າວໜ້າໃນໂລກ, ໂດຍສະເພາະຄວາມສາມັກຄີຮ່ວມສຳພັນສູ້ ຮົບແບບພິເສດກັບກອງທັບປະຊາຊົນຫວຽດນາມອ້າຍນ້ອງ.
6) ກອງທັບປະຊາຊົນລາວເວລາໃດກໍຮັກສາມູນເຊື້ອອັນດີງາມ ມີປະຂາທິປະໄຕ ແລະ ມີລະບຽບວິໄນ.

Additional information