ຂ່າວພາຍໃນກະຊວງ

ກອງປະຊຸມ ສະຫລຸບ ແລະ ມອບຮັບບົດລາຍງານການສຶກ ການກະກຽມການສຶກສາຄວາມເປັນໄປໄດ້ເບື້ອງຕົ້ນ ສໍາລັບໂຄງການລົງທືນປັບປຸງ ສິ່ງແວດລ້ອມຕົວເມືອງ

   ໃນຕອນບ່າຍຂອງວັນທີ 9 ກັນຍາ 2021, ທີ່ໂຮງແຮມຄຣາວພລາຊາ, ນະຄອນຫຼວງວຽງຈັນ. ໄດ້ຈັດກອງປະຊຸມ ສະຫລຸບ ແລະ ມອບຮັບບົດລາຍງານການສຶກ ການກະກຽມການສຶກສາຄວາມເປັນໄປໄດ້ເບື້ອງຕົ້ນ ສໍາລັບໂຄງການລົງທືນປັບປຸງ ສິ່ງແວດລ້ອມຕົວເມືອງ ໂດຍຜ່ານລະບົບກອງປະຊຸມທາງໄກ; ໂດຍເປັນກຽດເຂົ້າຮ່ວມເປັນປະທານຂອງ ທ່ານ ນ. ວິໄລຄໍາ ໂພສາລາດ ຮອງລັດຖະມົນກະຊວງໂຍທາທິການ ແລະ ຂົນສົ່ງ ແລະ ທ່ານ ວຽງທະວີສອນ ເທບພະຈັນ ຮອງເຈົ້າແຂວງໆ ສະຫວັນນະເຂດ;  ມີບັນດາທ່ານ ຮອງເຈົ້າແຂວງໆ ຈໍາປາສັກ; ຮອງເຈົ້າແຂວງໆ ຫລວງພະບາງ ແລະ ບັນດາທ່ານຫົວໜ້າກົມ, ຮອງຫົວໜ້າກົມ, ພາກສ່ວນຕ່າງຂອງກະຊວງໂຍທາທິການ ແລະ ຂົນສົ່ງ;  ຜູ້ຕາງໜ້າ ກະຊວງອອ້ມຂ້າງ, ອົງການ ທັງສູນກາງ ແລະ ທ້ອງຖິ່ນ;  ຜູ້ຕາງໜ້າ ຈາກທະນາຄານພັດທະນາອາຊີ (ADB) ປະຈຳສຳນັກງານໃຫຍ່ ແຫ່ງ ສປປ ລາວ ແລະ CDIA (Cities Development Initiative for Asia) ແລະ ຜູ້ຕາງໜ້າບໍລິສັດທີ່ປຶກສາ ເຂົ້າຮ່ວມ.

   ກອງປະຊຸມ ສະຫລຸບ ແລະ ມອບຮັບບົດລາຍງານການສຶກ ການກະກຽມການສຶກສາຄວາມເປັນໄປໄດ້ເບື້ອງຕົ້ນ ສໍາລັບໂຄງການລົງທືນປັບປຸງສິ່ງແວດລ້ອມຕົວເມືອງ(Urban Environment Improvement Investment Program)(ມີຊື່ຫຍໍ້ວ່າ UEIIP), ການສຶກສານີ້ ແຕ່ກ່ອນແມ່ນ ການກະກຽມການສຶກສາຄວາມເປັນໄປໄດ້ເບື້ອງຕົ້ນສໍາລັບໂຄງການຕົວເມືອງໜ້າຢູ່ (The PFS for ADB Livable Cities Project). ຊື່ງຜູ້ໃຫ້ທືນໄດ້ສະເໜີປ່ຽນຊື່ໃນກອງປະຊຸມໄລຍະກາງ (INTERIM  WORKSHOP). ມາເປັນໂຄງການລົງທືນປັບປຸງຕົວເມືອງໜ້າຢູ່ (UEIIP).

   ກອງປະຊຸມສະຫລຸບ ແລະ ມອບຮັບບົດລາຍງານການສຶກສາ ຂອງການສຶກສາຄວາມເປັນໄປໄດ້ເບື້ອງຕົ້ນ ໂຄງການລົງທືນປັບປຸງສິ່ງແວດລ້ອມຕົວເມືອງ, ໂຄງການດັ່ງກ່າວນີ້ ທາງຊ່ຽວຊານທີ່ປຶກສາ CDIA ໄດ້ຜັນຂະຫຍາຍ ຕາມນະໂຍບາຍຂອງ ທະນາຄານພັດທະນາອາຊີ (ADB), ໃນການສືບຕໍ່ປັບປຸງ ພັດທະນາຕົວເມືອງ ໃນ 03 ນະຄອນທີ່ສ້າງໃຫມ່ ຄື: ນະຄອນຫຼວງພະບາງ, ນະຄອນໄກສອນພົມວິຫານ ແລະ ນະຄອນປາກເຊ ໃຫ້ກາຍເປັນຕົວເມືອງທີ່ມີສະພາບແວດລ້ອມທີ່ດີ ແລະ ໜ້າຢູ່ ໃນອະນາຄົດທີ່ໃກ້ຈະມາເຖິງນີ້.

   ສໍາລັບຈຸດປະສົງເປົ້າໝາຍຂອງ ກອງປະຊຸມໃນມື້ນີ້ແມ່ນ ເພື່ອສະຫລຸບຜົນຂອງການສຶກສາ ແລະ ມອບຮັບບົດລາຍງານການສຶກສາຂອງໂຄງການດັ່ງກ່າວ ໂດຍສະເພາະແມ່ນການກຳນົດກອບໜ້າວຽກ ແລະ ການປະເມີນລາຄາຂອງບັນດາກິດຈະກຳ ໂຄງການຍ່ອຍຕ່າງໆ  ທີ່ຕິດພັນກັບບັນດາໜ້າວຽກຈຸດສຸມ 4 ໜ້າວຽກຕົ້ນຕໍ ຄຶ: 1. ການຄຸ້ມຄອງຂີ້ເຫຍື້ອ (Solid waste management), 2. ການຄຸ້ມຄອງນໍ້າເປື້ອນ (Wastewater management), 3. ການປັບປຸງຜັງເມືອງ ແລະ ພູມິທັດໃນຕົວເມືອງ (Urban planning/ Streetlife improvement) ແລະ 4. ການສ້າງຂີດຄວາມສາມາດໃຫ້ສະຖາບັນ ແລະ ການປູກຈິດສໍານຶກໃຫ້ປະຊາຊົນ.  ການສຶກສາໂຄງການດັ່ງກ່າວ ແມ່ນໄດ້ມີການປຶກສາຫາລື ທາງດ້ານວິຊາການມາຫຼາຍຄັ້ງ ແລະ ໄດ້ຕົກລົງເຫັນດີເປັນເອກະພາບ ບໍ່ວ່າຈະເປັນທາງດ້ານຄວາມຕ້ອງການ ແລະ ບູລິມະສິດຂອງນະຄອນ ແລະ ຄວາມສອດຄ່ອງກັບເປົ້າໝາຍຂອງໂຄງການ.

ພິທີເຊັນບົດບັນທຶກຄວາມເຂົ້າໃຈ ການນຳໃຊ້ໂປຣແກມຖານຂໍ້ມູນສຳ ລັບການປະເມີນຜົນ ແລະ ການລາຍງານກ່ຽວກັບອຸບປະຕິເຫດທາງຫຼວງ

   ໃນຕອນບ່າຍຂອງວັນທີ 3 ກັນຍາ 2021 ທີ່ຫ້ອງປະຊຸມ ກົມຂົນສົ່ງ ກະຊວງ ໂຍທາທິການ ແລະ ຂົນສົ່ງ,  ໄດ້ພິທີເຊັນບົດບັນທຶກຄວາມເຂົ້າໃຈ  ການນຳໃຊ້ໂປຣແກມຖານຂໍ້ມູນສຳລັບການປະເມີນຜົນ  ແລະ ການລາຍງານກ່ຽວກັບອຸບປະຕິເຫດທາງຫຼວງ  ລະຫວ່າງ   ກົມຂົນສົ່ງ ແລະ ກົມໃຫຍ່ຕຳຫຼວດ, ໂດຍການເຂົ້າຮ່ວມເປັນສັກຂີພະຍານຂອງ ທ່ານ ລັນ ແສງອາພອນ ຮອງລັດຖະມົນຕີ ກະຊວງ ໂຍທາທິການ ແລະ ຂົນສົ່ງ; ທ່ານ ພົນຕີ ປອ ທອງເຫຼັກ ມັງໜໍ່ເມກ ຮອງລັດຖະມົນຕີ ກະຊວງປ້ອງກັນຄວາມ; ບັນດາ ທ່ານຫົວໜ້າກົມ, ຮອງກົມ, ຫ້ອງການ, ຫົວໜ້າພະແນກ, ຮອງພະແນກ ແລະ ວິຊາການທັງສອງພາກສ່ວນ.

   ການນຳໃຊ້ໂປຣແກມຖານຂໍ້ມູນສຳລັບການປະເມີນຜົນ ແລະ ການລາຍງານກ່ຽວກັບອຸບປະຕິເຫດທາງຫຼວງ ເພື່ອຊ່ວຍໃນການສັງລວມລາຍງານກ່ຽວກັບການເກີດອຸບປະຕິເຫດຍັງມີ ສູງ ຖ້າທຽບໃສ່ປະຊາກອນ, ການເກີດອຸບປະຕິເຫດແຕ່ລະຄັ້ງ ເຮັດໃຫ້ມີຜູ້ບາດ ເຈັບ ຫຼື ເສຍຊີວິດຢ່າງຫຼວງຫຼາຍ ໂດຍສະເລ່ຍໃນແຕ່ລະປີ ມີຜູ້ເສຍຊີວິດ 14 ຄົນ ຕໍ່ປະຊາ ກອນໜຶ່ງແສນຄົນ. ດັ່ງນັ້ນ, ອົງການສະຫະປະຊາຊາດ ຈຶ່ງເຫັນຄວາມອັນຕະລາຍ ແລະ  ໃຫ້ຄວາມສໍາຄັນຕໍ່ຜົນເສຍຫາຍດັ່ງກ່າວ. ເພື່ອບັນລຸເປົ້າໝາຍແຜນດໍາເນີນງານແຫ່ງທົດສະວັດ ຂອງອົງການສະຫະປະຊາຊາດ ຫຼື UN ໃນການຫຼຸດຜ່ອນຈໍານວນຜູ້ເສຍຊີວິດຈາກການເກີດອຸບປະຕິເຫດຕາມທາງຫຼວງຫຼຸດລົງ 50% ຈາກປີ 2020-2030 ຊຶ່ງເພິ່ນໄດ້ເນັ້ນໜັກກ່ຽວກັບຂໍ້ມູນການເກີດອຸບປະຕິເຫດ ຕ້ອງມີຄວາມຈະແຈ້ງ ແລະ ຊັດເຈນ ເພື່ອຈະໄດ້ນໍາເອົາຂໍ້ມູນ ດັ່ງກ່າວເປັນບ່ອນອີງໃນການວິເຄາະ, ວິໄຈ ເພື່ອຫາວິທີການ, ຂັ້ນຕອນການປ້ອງກັນ ແລະ ແກ້ໄຂບັນຫາການເກີດອຸບປະຕິເຫດຕາມທາງຫຼວງ ໃນຕໍ່ໜ້າ.

   ໃນປີ 2017 ພາຍໃຕ້ໂຄງການຂົວທາງໄລຍະ 2 ຫຼື LRSP2 ທະນະຄານໂລກ ໄດ້ຈັດສັນງົບປະມານຈໍານວນໜຶ່ງ ເພື່ອຈັດຝຶກອົບຮົມ, ແນະນໍາລະບົບໂປຼແກຼມ DRIVER ໂດຍມີຜູ້ຕາງໜ້າຈາກ ກົມຂົນສົ່ງ ກະຊວງ ຍທຂ, ກົມຕໍາຫຼວດຈະລາຈອນ ກະຊວງ ປກສ, ຜູ້ຕາງໜ້າຈາກກະຊວງສາທາລະນະສຸກ, ພະແນກຕໍາຫຼວດຈະລາຈອນ ນະຄອນຫຼວງວຽງຈັນ. ພາຍຫຼັງໄດ້ມີການຈັດຝຶກອົບຮົມແລ້ວ ແຕ່ລະພາກສ່ວນເຫັນດີ ໃນການລິເລີ່ມນໍາໃຊ້ລະບົບດັ່ງກ່າວເປັນແຂວງຕົ້ນແບບໃນນະຄອນຫຼວງວຽງຈັນ.  ຕໍ່ມາໃນປີ 2018 ໄດ້ສືບຕໍ່ຈັດຝຶກອົບຮົມ ເພື່ອແນະນໍາການນໍາເຂົ້າໃຊ້ ແລະ ການເອົາຂໍ້ມູນໂປຼແກຼມ ໃຫ້ເຈົ້າໜ້າທີ່ຕໍາຫຼວດຈະລາຈອນ 9 ຕົວເມືອງ ໃນນະຄອນຫຼວງວຽງຈັນ, ຫຼັງຈາກນັ້ນ ໄດ້ຝຶກອົບຮົມ ໃຫ້ເຈົ້າໜ້າທີ່ຕໍາຫຼວດຈະລາຈອນເມືອງ ໂພນໂຮງ ແຂວງວຽງຈັນ;  ເມືອງ ທ່າພະບາດ, ປາກຊັນ, ບໍລິຄັນ, ປາກກະດິງ ແຂວງບໍລິຄໍາໄຊ; ເມືອງ ຫີນບູນ, ເຊບັ້ງໄຟ, ທ່າແຂກ ແຂວງຄໍາມ່ວນ ລວມການຝຶກອົບຮົມທັງໝົດ 7 ຄັ້ງ ມີຜູ້ເຂົ້າຮ່ວມທັງໝົດ 100 ເທື່ອຄົນ, ນອກຈາກນັ້ນ ທາງໂຄງການ ຍັງໄດ້ສະໜອງເຄື່ອງມື, ອຸປະກອນ ແລະ ຍານພາຫະນະຈໍານວນໜຶ່ງ ເພື່ອຮັບໃຊ້ໃຫ້ແກ່ການປະຕິບັດໜ້າທີ່ວຽກງານຄື: ລົດຈິບ ຈໍານວນ 2 ຄັນ, ລົດບັນທຸກ 2 ຄັນ, ຄອມພິວເຕີຕັ້ງໂຕະ 17 ເຄື່ອງ, ໂນດບຸກ 22 ເຄື່ອງ ແລະ ເຄື່ອງພິມ 21 ເຄື່ອງ. ມາຮອດປະຈຸບັນໄດ້ທໍາການທົດລອງນໍາໃຊ້ລະບົບດັ່ງກ່າວນີ້ແລ້ວ ແລະ ສາມາດເກັບກໍາຂໍ້ມູນອຸບປະຕິເຫດໄດ້ທັງໝົດ 2.231 ກໍລະນີ.

     ສະນັ້ນ, ເພື່ອເຮັດໃຫ້ການນໍາໃຊ້ລະບົບຖານຂໍ້ມູນ ສໍາລັບການປະເມີນຜົນ ແລະ ການລາຍງານເຫດການອຸບປະຕິເຫດທີ່ເກີດຂຶ້ນຕາມທາງຫຼວງ ໃຫ້ມີຄວາມຍືນຍົງ ແລະ ໄດ້ນໍາໃຊ້ໃນຂອບເຂດທົ່ວປະເທດ ຈຶ່ງຈະໄດ້ມີພິທີເຊັນບົດບັນທຶກຊ່ວຍຈໍາໃນມື້ນີ້ ລະຫວ່າງ ຫົວໜ້າ ກົມຂົນສົ່ງ ກະຊວງ ໂຍທາທິການ ແລະ ຂົນສົ່ງ ແລະ ຫົວໜ້າ ກົມໃຫຍ່ຕໍາຫຼວດ ກະຊວງ ປ້ອງກັນຄວາມສະຫງົບ ເພື່ອສືບຕໍ່ຮ່ວມມື ແລະ ຍາດແຍ່ງການຊ່ວຍເຫຼືອຈາກຕ່າງປະເທດ ແລະ ອົງການຈັດຕັ້ງສາກົນອື່ນໆ ມານໍາໃຊ້ເຂົ້າໃນວຽກງານດັ່ງກ່າວ ເພື່ອເປັນການປ້ອງກັນ ແລະ ແກ້ໄຂບັນຫາອຸບປະຕິເຫດ ແນໃສ່ເຮັດໃຫ້ການເກີດອຸບປະຕິເຫດຫຼຸດລົງເທື່ອລະກ້າວ. 

ທ່ານລັດຖະມົນຕີ ຢ້ຽມຢາມໂຮງງານຜະລິດທໍ່ນໍ້າລາວ

ທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ) ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມໂຮງງານຜະລິດທໍ່ນໍ້າລາວ ອຸດສາຫະກໍາ ເທັກໂນໂລຍີ ຈໍາກັດຜູ້ດຽວ ພ້ອມທັງຊຸກຍູ້ສົ່ງເສີມການນໍາໃຊ້ຜະລິດຕະພັນພາຍໃນ, ວັນທີ 14 ກັນຍາ 2021 ທີ່ບໍລິສັດທໍ່ນໍ້າລາວ ອຸດສາຫະກໍາ ແລະ ເທັກໂນໂລຢີ ຈໍາກັດຜູ້ດຽວ ບ້ານນາແຄ ເມືອງໄຊທານີ ນະຄອນຫຼວງວຽງຈັນ ເຊີ່ງຕ້ອນຮັບຈາກທ່ານ ບຸນລົງ ດວງນາລີ ປະທານບໍລິສັດ ທໍ່ນໍ້າລາວ ອຸດສາຫະກໍາ ແລະ ເທັກໂນໂລຢີ ຈໍາກັດຜູ້ດຽວ ພ້ອມຄະນະ ແລະ ພະນັກງານຫຼັກແຫຼ່ງຂອງບໍລິສັດ.

ບໍລິສັດ ທໍ່ນໍ້າລາວ ອຸດສາຫະກຳ ເທັກໂນໂລຢີ ຈຳກັດຜູ້ດຽວ ສ້າງຕັ້ງຂື້ນໃນປີ 2006 ເປັນຕົ້ນມາປັດຈຸບັນມີປະສົບການໃນການເຮັດວຽກປະມານ 16 ປີ ໂດຍມີສຳນັກງານ ແລະ ໂຮງງານຕັ້ງຢູ່ບ້ານນາແຄ ເມືອງໄຊທານີ ນະຄອນຫຼວງວຽງຈັນ ເຊິ່ງມີເນື້ອທີ່ທັງໝົດຫຼາຍກວ່າ 5 ເຮັກຕາ ແລະ ມີເຄື່ອງຈັກທັນສະໄໝໃຊ້ໃນການຜະລິດທໍ່ PVC U-PVC HDPE PPR ອຸປະກອນຂໍ້ຕໍ່ຕ່າງໆລວມທັງຂະໜາດນ້ອຍ ແລະ ຂະໜາດໃຫຍ່ຫຼາຍກວ່າ 30 ເຄື່ອງ ນອກນີ້ຍັງມີເຄື່ອງຈັກຜະລິດຖັງເກັບນໍ້າ ແລະ ຖັງບໍາບັດນໍ້າເປື້ອນຕື່ມອີກ ໂດຍມີກໍາລັງການຜະລິດ 7.000 ໂຕນຕໍ່ປີ ວັດຖຸດິບທີ່ນໍາເຂົ້າມາຜະລິດສ່ວນໃຫຍ່ແມ່ນນຳເຂົ້າຈາກບໍລິສັດ SCG ສ່ວນ PVC ແມ່ນບໍລິສັດວິນີໄທ ແລະ ມີພະນັກງານທັງໝົດ 200 ຄົນ ຜັດປ່ຽນກັນເຮັດວຽກຕະຫຼອດ 24 ຊົ່ວໂມງ ມີລົດຂົນສົ່ງທັງໝົດ 25 ຄັນ ເພື່ອເຮັດໃຫ້ການຂົນສົ່ງໃຫ້ສະດວກ ແລະ ວ່ອງໄວໃຫ້ກັບທົ່ວແທນຈໍາໜ່າຍ ແລະ ລູກຄ້າທົ່ວປະເທດຫຼາຍກວ່າ 5.000 ຮ້ານ.

ຍັງໄດ້ສະໜອງທໍ່ ແລະ ອຸປະກອນໃຫ້ແກ່ໂຄງການນໍ້າປະປາ ທົ່ວປະເທດ ແລະ ໂຄງການນໍ້າສະອາດຫຼາຍກວ່າ 100 ແຫ່ງ ພົ້ນເດັ່ນສະໜອງທໍ່ໃຫ້ນໍ້າປະປາທົ່ວປະເທດ ແລະ ໄດ້ຮັບຄວາມໄວ້ເນື້ອເຊື່ອໃຈຈາກ ນໍ້າປະປາ ນະຄອນຫລວງວຽງຈັນ ໄດ້ສະໜອງທໍ່ໃຫ້ຍາວນານ 5 ປີຕິດຕໍ່ກັນ ແລະ ກໍາລັງຕິດຕັ້ງກົງເຕີ້ນໍ້າເຂົ້າບ້ານຫຼາຍກວ່າ 20.000 ໜ່ວຍ ສະໜອງທໍ່ ແລະ ຮັບເໝົາຕິດຕັ້ງໄຫ້ໂຄງການ ADB ຢູ່ເມືອງວຽງຄໍາ ແຂວງຫຼວງພະບາງ ລົງທຶນກໍ່ສ້າງໂຮງງານຜະລິດຕາຂ່າຍນໍ້າປະປາຮູບແບບ PPP ຢູ່ກຸ່ມບ້ານເມືອງຂາຍ ແຂວງຫຼວງພະບາງ ມີກໍາລັງການຜະລິດ 1.200 ແມັດກ້ອນຕໍ່ມື້ ເຊິ່ງໄດ້ທຶນຊ່ວຍເຫຼືອຈາກມູນນິທິ EAST MEET WEST ຈໍານວນໜຶ່ງ ຮັບເໝົາກໍ່ສ້າງໂຮງງານ ສະໜອງທໍ່ ແລະ ຕິດຕັ້ງລະບົບນ້ຳປະປາຢູ່ ເມືອງຊຽງຮອນ ແຂວງໄຊຍະບູລີ  ຈາກລັດວິສາຫະກິດນໍ້າປະປາ ແຂວງໄຊຍະບູລີ ມີກໍາລັງການຜະລິດ 1.400 ແມັດກ້ອນຕໍ່ມື້ ສະໜອງທໍ່ໄຫ້ໂຄງການ (SUNWIP) ຢູ່ເມືອງເຊໂນ ແຂວງສະຫວັນນະເຂດ ສະໜອງທໍ່ ແລະ ອຸປະກອນໃຫ້ໂຄງການໂນເລໂກ້ ຢູ່ ເມືອງບຸນເໜືອ ແຂວງຜົ້ງສາລີ ຄວາມຍາວທໍ່ທັງໝົດປະມານ 100 ກວ່າກິໂລແມັດ ສະໜອງທໍ່ ແລະ ອຸປະກອນໃຫ້ໂຄງການກໍ່ສ້າງ ແລະ ຕິດຕັ້ງລະບົບນ້ຳປະປາ ຢູ່ເມືອງສະໜາມໄຊ ແຂວງອັດຕະປື.

ດ້ວຍປະສົບການເຮັດວຽກອັນຍາວນານ ບໍລິສັດມີຄວາມມຸ້ງໝັ້ນຕອບສະໜອງສິນຄ້າທີ່ມີຄຸນນະພາບສູງ ສ້າງຄວາມເພິ່ງພໍໃຈໃຫ້ແກ່ລູກຄ້າໃນວຽກງານຕ່າງໆ ໂດຍຄຽງຄູ່ກັບການພັດທະນາຄຸນນະພາບຂອງຜະລິດຕະພັນຢ່າງຕໍ່ເນື່ອງ ແລະ ມີຄວາມຫຼາກຫຼາຍ ເພື່ອມຸ້ງໄປສູ່ການເປັນຜູ້ນໍາດ້ານລະບົບທໍ່, ພິເສດໂຮງງານຍັງມີຫ້ອງທົດລອງຄຸນະພາບທໍ່ ແລະ ອຸປະກອນ ເປັນໂຮງງານທຳອິດໃນ ສປປ ລາວ ເພື່ອກວດສິນຄ້າໃຫ້ໄດ້ຕາມມາດຕະຖານສາກົນ ISO9001:2015 ແລະ ມາດຕະຖານລາວ ມລ 71-2009.

ໂອກາດນີ້ ທ່ານລັດຖະມົນຕີ ກະຊວງ ຍທຂ ໄດ້ມີຄໍາເຫັນວ່າ: ການພັດທະນາໂຄງລ່າງພື້ນຖານ ໂຍທາທິການ ແລະ ຂົນສົ່ງ ເວົ້າລວມແມ່ນວຽກງານຂົວທາງ, ທາງນໍ້າ, ເຄຫາ ແລະຜັງເມືອງ ເວົ້າສະເພາະວຽກງານນໍ້າປະປາ ແລະ ສຸຂາພິບານໄດ້ມີການພັດທະນາຢ່າງຕໍ່ເນື່ອງ ແລະ ໄດ້ນໍາໃຊ້ວັດສະດຸກໍ່ສ້າງເຂົ້າໃນກິດຈະກໍາຂອງໂຄງການເປັນຈໍານວນຫຼາຍ ລັດຖະບານໄດ້ສົ່ງເສີມການນໍາໃຊ້ຜະລິດຕະພັນພາຍໃນເຂົ້າໃນວຽກງານ ເຊິ່ງມີຄໍາຂັວນທີ່ວ່າ “ລາວເຮັດ ລາວໃຊ້ ລາວໄດ້ ລາວຈະເລີນ” ເພື່ອຫຼຸດຜ່ອນການນໍາເຂົ້າຈາກຕ່າງປະເທດເທື່ອລະກ້າວ ສະນັ້ນການຜະລິດທໍ່ ແລະ ອຸປະກອນຊະນິດຕ່າງໆທີ່ຮັບໃຊ້ເຂົ້າໃນວຽກງານກໍ່ສ້າງນໍ້າປະປາ ແລະ ສຸຂາພິບານຂອງໂຮງງານຜະລິດທໍ່ນໍ້າລາວ ອຸດສະຫະກໍາເທັກໂນໂລຢີ ຈໍາກັດຜູ້ດຽວ ແມ່ນມີຄວາມໜ້າເຊື່ອຖື ເພາະມີລະບົບກວດກາທົດລອງຄຸນນະພາບຂອງທໍ່ທີ່ໄດ້ມາດຕະຖານສາກົນ ທັງເປັນການຊຸກຍູ້ສົ່ງເສີມໃຫ້ເສດຖະກິດຂອງລາວຈະເລີນຮຸ່ງເຮືອງ ທັງເປັນການສ້າງວຽກເຮັດງານທໍາໃຫ້ແກ່ອ້າຍນ້ອງກໍາມະກອນລາວ ຈໍານວນ 200 ຄົນ ທີ່ເຮັດວຽກຢູ່ໃນໂຮງງານໄດ້ຜັດປ່ຽນກັນເຮັດວຽກຕະຫຼອດ 24 ຊົ່ວໂມງ ເພື່ອກາຍເປັນມືອາຊີບ ແລະ ເປັນການຫຼຸດຜ່ອນການຂາຍແຮງງານອອກຕ່າງປະເທດ ພ້ອມນີ້ຍັງເປັນການສະໜັບສະໜູນເສດຖະກິດພາຍໃນປະເທດ ແລະ ເປົ້າໝາຍການພັດທະນາຂອງຂະແໜງການ ຍທຂ ຍາດເອົາໃຫ້ໄດ້ຕົວເລກຄາດໝາຍສູ້ຊົນຂະແໜງການໃຫ້ສໍາເລັດຕາມແຜນການທີ່ວາງໄວ້ ນອກນັ້ນທາງໂຮງງານກໍ່ໄດ້ເອົາໃຈໃສ່ໃນການພັດທະນາຕົນເອງຢ່າງບໍ່ຢຸດຢັ້ງໃນການຜະລິດເຮັດໃຫ້ໄດ້ຜະລິດຕະພັນທີ່ມີຄຸນນະພາບຕາມມາດຕະຖານສາກົນ ແລະ ເປັນໂຮງງານຜະລິດທໍ່ແຫ່ງທໍາອິດທີ່ໄດ້ຮັບມາດຕະຖານສາກົນ ISO 9001:2015 ແລະ ມາດຕະຖານລາວ ມລ 71-2009 ໄດ້ສະໜອງທໍ່ ແລະ ອຸປະກອນໃຫ້ບັນດາບໍລິສັດລັດວິສາຫະກິດນໍ້າປະປາ ແລະ ບັນດາໂຄງການກໍ່ສ້າງລະບົບນໍ້າປະປາໃນຂອບເຂດທົ່ວປະເທດ ໃນອານາຄົດສະເໜີໃຫ້ໂຮງງານຈົ່ງເອົາໃຈໃສ່ໃນການຜະລິດໃຫ້ມີຄຸນນະພາບສູງ ເພື່ອຕອບສະໜອງໃຫ້ຕະຫຼາດພາຍໃນປະເທດ ແລະ ໃຫ້ສາມາດຍາດແຍ່ງຕະຫຼາດສາກົນໄດ້.

 

ພິທີເຊັນສັນຍາໂຄງການປັບປຸງ ແລະ ສ້ອມແປງ ທາງ 13 ໃຕ້, ຊ່ວງສັນຍາທີ 3 ແຕ່ ກມ 190 - ກມ 268

   ໃນຕອນບ່າຍຂອງວັນທີ 27 ສິງຫາ 2021 ທີ່ຫ້ອງປະຊຸມ ກົມຂົວທາງ ກະຊວງ ຍທຂ, ໄດ້ມີພິທີເຊັນສັນຍາໂຄງການປັບປຸງ ແລະ ສ້ອມແປງ ທາງ 13 ໃຕ້, ຊ່ວງສັນຍາທີ 3 ແຕ່ ກມ 190-ກມ 268, ລະຫວ່າງກົມຂົວທາງ ກະຊວງ ຍທຂ ແລະ ບໍລິສັດ China International Water and Electric Corporation, ໂຄງການກປັບປຸງ ແລະ ສ້ອມແປງເສັ້ນທາງເລກທີ 13 ໃຕ້ຊ່ວງທີ 4 ທີ່ມີລວງຍາວ 78 ກມ (ກມ 190-ກມ 268) ແຂວງບໍລິຄຳໄຊ ແລະ ແຂວງຄຳມ່ວນ, ໂດຍໄດ້ຮັບທືນຈາກທະນາຄານລົງທືນພື້ນຖານໂຄງລ່າງອາຊີ ແລະ ກອງທືນທາງ, ໂດຍໃຫ້ກຽດເຂົ້າຮ່ວມເປັນສັກຄີພະຍານໃນພິທີດັ່ງກ່າວ: ມີທ່ານຫົວໜ້າຫ້ອງການ, ຫົວໜ້າກົມອ້ອມຂ້າງກະຊວງ ຍທຂ,  ຫົວໜ້າບໍລິສັດ China International Water and Electric Corporation,  ແລະ ບັນດາຄະນະກໍາມະການປະມູນໂຄງການປັບປຸງ ແລະ ສ້ອມແປງເສັ້ນທາງເລກ 13ໃຕ້.

   ໃນພິທີດັ່ງກ່າວ ທ່ານ ສຸກສາກົນ ແຫວນວົງສົດ ຫົວໜ້າໂຄງການປັບປຸງ ແລະ ສ້ອມແປງເສັ້ນທາງ 13ໃຕ້ແຕ່ ກມ 71 ຫາ ກມ 346 ມີຄວາມຍາວທັງໝົດ 275 ກິໂລແມັດ, ໂດຍໄດ້ແບ່ງອອກ ເປັນ 4 ຊ່ວງ, ຊື່ງແຕ່ລະຊ່ວງ ໄດ້ຮັບການສະໜັບສະໜູນເງິນກູ້ດອກເບ້ຍຕໍ່າຈາກ ສາມ ສະຖາບັນການເງິນຄື: ທະ ນາຄານໂລກ (WB) IDA ພາຍໃຕ້ໂຄງການ ຂະແໜງຂົວທາງໄລຍະ2 LRSP2, ທະນາຄານ ລົງທືນ ເອີ ຣົບ (EIB), ທະນາຄານການລົງທຶນໂຄງລ່າງພື້ນຖານອາຊີ (AIIB) ແລະ ລັດຖະບານລາວ(ກອງທຶນທາງ) ຮູບແບບສັນຍາແມ່ນໃຊ້ຮູບແບບສັນຍາໃໝ່ OPBRC ໂດຍກໍ່ສ້າງ 3 ປີ ແລະ ບູລະນະຮັກສາ 7 ປີ.

   ໃນການອອກແບບເພື່ອປັບປຸງ ແລະ ສ້ອມແປງ ທາງດັ່ງກ່າວ ແມ່ນເປັນການຍົກລະດັບຈຸດນໍ້າຖ້ວມ, ຂະຫຍາຍໜ້າທາງໃຫ້ກ້ວາງອອກໄປຕື່ມ ບາງຊ່ວງ(ຈາກ 9 ແມັດ ມາເປັນ 12 ແມັດ) ແລະ ເພື່ອໃຫ້ສາມາດຮັບນໍ້າໜັກການບັນທຸກຕາມມາດຕະຖານຂອງອາຊຽນຄື 11 ໂຕນຕໍ່ເພົາ(ຂອງລາວແມ່ນ 9,1 ໂຕນຕໍ່ເພົາ) ສຳລັບໂຄງສ້າງທາງໄດ້ອອກແບບເປັນ ໜ້າທາງປູຢາງຂົ້ວ AC; ສະເພາະຊ່ວງທີ 3 ແຕ່ ກມ 190 ຫາ ກມ​ 268, ລວງຍາວ 78 ກມ, ໃນມູນຄ່າ: 29.690.305,78 ໂດລາສະຫະລັດ; ໃນກອບສັນຍາແບບມອບເໝົາ (Output- and Performance- Based Road Contract – OPBRC) ໝາຍຄວາມວ່າ ຜູ້ຮັບເໝົາເປັນຜູ້ດຳເນີນການກໍ່ສ້າງ ສຳເລັດແລ້ວສືບຕໍ່ບູລະນະຮັກສາໄປອີກຕື່ມ 7 ປີ ຈຶ່ງມອບໃຫ້ແກ່ເຈົ້າຂອງໂຄງການ.

Additional information