ຂ່າວພາຍໃນກະຊວງ

ກອງປະຊຸມທາບທາມບຸກຄະລາກອນຄະນະບໍລິຫານງານພັກກະຊວງ ຍທຂ ສະໄໝທີ V ຮອບທີ 3

ກອງປະຊຸມທາບທາມບຸກຄະລາກອນຄະນະບໍລິຫານງານພັກກະຊວງ ຍທຂ ສະໄໝທີ V (ຮອບທີ 3) ໄດ້ຈັດຂຶ້ນໃນວັນທີ 25 ກັນຍາ 2020 ທີ່ຫ້ອງປະຊຸມ (ICTC ຫຼັກ 5), ໂດຍການເປັນປະທານ ຂອງສະຫາຍ ປອ. ບຸນຈັນ ສິນທະວົງ ກຳມະການສູນກາງພັກ, ເລຂາຄະນະພັກກະຊວງ ຍທຂ, ລັດຖະມົນຕີກະຊວງ ຍທຂ, ບັນດາສະຫາຍ ຕາງໜ້າໃຫ້ຄະນະຮັບຜິດຊອບຂັ້ນສູນກາງ, ມີບັນດາສະຫາຍ ຄະນະປະຈໍາພັກກະຊວງ, ກຳມະການພັກກະຊວງ, ຄະນະຮັບຜິດຊອບ ບຸກຄະລາກອນຂັ້ນສູນກາງ, ບັນດາສະຫາຍ ເລຂາ, ຮອງເລຂາ ຂອງຄະນະພັກຮາກຖານ, ໜ່ວຍພັກຮາກຖານ, ຄະນະໜ່ວຍພັກ  ແລະ ສະມາຊິກພັກສົມບູນ ເຂົ້າຮ່ວມ.

ກອງປະຊຸມທາບທາມບຸກຄະລາກອນຄະນະບໍລິຫານງານພັກກະຊວງ ຍທຂ ສະໄໝທີ V (ຮອບທີ 3) ໄດ້ໄຂຂຶ້ນໃນທ່າມກາງທີ່ທົ່ວພັກທົ່ວລັດ, ທົ່ວປວງຊົນລາວທັງຊາດ ພວມອອກແຮງແຂ່ງຂັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ; ໄປຄຽງຄູ່ກັນນັ້ນ ສະມາຊິກພັກ, ພະນັກງານທົ່ວກະຊວງ ຍທຂ ໄດ້ພ້ອມກັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກກະຊວງໄດ້ຮັບຜົນສຳເລັດເປັນກ້າວໆມາ; ພ້ອມດຽວກັນນີ້ ກໍ່ໄດ້ກຽມຄວາມພ້ອມຮອບດ້ານ ໃຫ້ແກ່ກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງດ້ວຍຄວາມຮັບຜິດຊອບສູງ ແລະໄດ້ສຳເລັດຕາມແຜນການທີ່ໄດ້ວາງໄວ້. ກອງປະຊຸມຄັ້ງນີ້ຈະໃຊ້ເວລາຢູ່ 1 ວັນ, ຊຶ່ງເປັນກອງປະຊຸມທີ່ມີຄວາມໝາຍ, ຄວາມສໍາຄັນຫລາຍ ເພາະວ່າເປັນກອງປະຊຸມສະເພາະແຕ່ຜູ້ແທນສົມບູນ ຈະໄດ້ພ້ອມກັນເລືອກເອົາຜູ້ທີ່ຈະອອກສະໝັກເປັນຄະນະພັກກະຊວງ ໃນກອງປະຊຸມໃຫຍ່ ຜູ້ແທນອົງຄະນະພັກກະຊວງ ຍທຂ ຄັ້ງທີ V, ພ້ອມດຽວກັນນີ້ ຍັງໄດ້ພ້ອມກັນເຊື່ອມຊືມ ແລະຄົ້ນຄວ້າປະກອບຄຳເຫັນຕໍ່ເອກະສານສຳຄັນຕ່າງໆ ດັ່ງນີ້:

1. ເຊື່ອມຊຶມ ແລະປະກອບຄຳເຫັນ ຕໍ່ເອກະສານຕ່າງໆ ຄື: ບົດທີ 1 ເສີມຂະຫຍາຍມູນເຊື້ອ ແລະຄວາມ ສາມັກຄີເປັນເອກະພາບພາຍໃນພັກ; ບົດທີ 2 ຍົກສູງຄວາມສາມາດນຳພາ ແລະຄວາມເປັນແບບຢ່າງນຳໜ້າຂອງພັກ ແລະບົດທີ 3 ຕັ້ງໜ້າຝຶກຝົນຫລໍ່ຫລອມຄຸນທາດການ ເມືອງ ແລະຄຸນສົມບັດສິນທຳປະຕິວັດ.

2. ປະກອບຄຳເຫັນຕໍ່ເອກະສານ, ຮ່າງລາຍງານການເມືອງຕໍ່ກອງປະຊຸມໃຫຍ່ສະໄໝທີ V ແລະຮ່າງແຜນພັດທະນາຂະແໜງ ຍທຂ ໃນ 5 ປີ ຕໍ່ໜ້າ 2021-2025.

3. ຜ່ານບົດລາຍງານ ຜົນການກະກຽມດຳເນີນກອງປະຊຸມໃຫຍ່ ຜູ້ແທນອົງຄະນະພັກກະຊວງໂຍທາທິການ ແລະຂົນສົ່ງ ຄັ້ງທີ V.

4. ຈະໄດ້ຮັບຟັງຜົນການດຳເນີນຊີວິດການເມືອງ, ການນຳພາລວມຂອງຄະນະພັກກະຊວງ ແລະ ບຸກຄົນ, ຄະນະພັກ ກະຊວງສະໄໝທີ IV ໃນວັນທີ 21-22/9/2020 ທີ່ຜ່ານມານັ້ນ.

5. ຜ່ານມາດຕະຖານເງື່ອນໄຂ ແລະດໍາເນີນການທາບທາມເລືອກເຟັ້ນ ເອົາເປົ້າໝາຍບຸກຄະລາກອນ ທີ່ຈະອອກສະໝັກເລືອກຕັ້ງເປັນຄະນະພັກກະຊວງໂຍທາທິການ ແລະຂົນສົ່ງ ສະໄໝທີ V ຮອບທີ 3.

ໃນກອງປະຊຸມ ສະຫາຍ ປອ. ບຸນຈັນ ສິນທະວົງ ກຳມະການສູນກາງພັກ, ເລຂາຄະນະພັກກະຊວງ ຍທຂ, ລັດຖະມົນຕີກະຊວງ ຍທຂ, ໄດ້ຮຽກຮ້ອງມາຍັງບັນດາສະຫາຍທັງໝົດທີ່ເຂົ້າຮ່ວມກອງປະຊຸມ, “ຈົ່ງເຊີດຊູ ແລະຍົກສູງຄວາມຮັບຜິດຊອບຂອງຕົນ ພ້ອມກັນສຸມສະຕິປັນຍາ ເຂົ້າໃນການຄົ້ນຄວ້າ ແລະ ປະກອບຄໍາຄິດຄໍາເຫັນຢ່າງກົງໄປກົງມາ ມີເຫດມີຜົນຕໍ່ເອກະສານສຶກສາອົບຮົມການເມືອງ-ແນວຄິດ ທັງ 3 ບົດ, ຮ່າງບົດລາຍງານການເມືອງ, ຮ່າງແຜນພັດທະນາຂະແໜງ ຍທຂ ໃນໄລຍະ 5 ປີ ຕໍ່ໜ້າ, ເພື່ອຊອກໃຫ້ເຫັນດ້ານຕັ້ງໜ້າທີ່ພົ້ນເດັ່ນ ແລະຂໍ້ຄົງຄ້າງ ທີ່ຕ້ອງໄດ້ຄົ້ນຄວ້າປັບປຸງແກ້ໄຂໃນຕໍ່ໜ້າ ແລະພ້ອມກັນນີ້, ກໍ່ສະເໜີບັນດາສະຫາຍທັງໝົດໄດ້ພ້ອມກັນຄົ້ນຄວ້າຕັດສິນໃຈຢ່າງມີເຫດຜົນ ແລະມີຄວາມຮັບຜິດຊອບການເມືອງສູງ ເພື່ອຮັບປະກັນໃຫ້ແກ່ການເລືອກເຟັ້ນເອົາບຸກຄະລາກອນຜູ້ທີ່ມີຄວາມຮູ້, ຄວາມສາມາດ, ມີຄຸນສົມບັດສິນທຳປະຕິວັດ, ມີລະບອບເຮັດວຽກທີ່ດີ, ຜູ້ເຮັດແທ້ທຳຈິງ, ມີຜົນສຳເລັດຕົວຈິງວຽກທີ່ຖືກມອບໝາຍໃຫ້ນັ້ນ, ມີຈິດໃຈກວ້າງຂວາງ ສາມາດເຕົ້າ ໂຮມຄວາມສາມະຄີ, ມີຄວາມເປັນເອກະພາບພາຍໃນພັກສູງ ເພື່ອປະກອບເປັນຄະນະພັກ ຖືຄັນທຸງນຳໜ້າ ຢູ່ອົງຄະນະພັກກະຊວງ ຍທຂ, ເພື່ອໃຫ້ບັນລຸໄດ້ຕາມລະດັບຄາດໝາຍທີ່ກ່າວມານັ້ນ, ຂໍຮຽກຮ້ອງມາຍັງບັນດາສະຫາຍ ທີ່ເຂົ້າຮ່ວມກອງປະຊຸມຄັ້ງນີ້ ຈົ່ງມີຄວາມຮັບຜິດຊອບໜ້າທີ່ການເມືອງສູງ, ໃນການຕັດສິນໃຈເພື່ອເລືອກ ເຟັ້ນເອົາບຸກຄະລາກອນ ທີ່ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ເປັນບຸກຄົນທີ່ມີຄວາມສັດຊື່, ຈິງໃຈ, ມີວິຊາສະເພາະໃດໜຶ່ງທີ່ແນ່ນອນ ທີ່ກ່ຽວພັນກັບຂະແໜງ ຍທຂ ທັງມີປະສົບການໃນວຽກງານຕົວຈິງ, ມີຄວາມຮັບຜິດຊອບສູງຕໍ່ໜ້າທີ່ວຽກງານທີ່ຖືກມອບໝາຍ, ເຄົາລົບນັບຖືຄໍາຄິດຄໍາເຫັນຂອງໝູ່ຄະນະ ແລະມະຫາຊົນ, ປະຕິບັດລະບອບແບບແຜນວິທີເຮັດວຽກແບບ ລວມສູນປະຊາທິປະໄຕຂອງພັກ, ຮູ້ນຳພາແກ້ໄຂບັນຫາທີ່ເກີດຂຶ້ນຢ່າງກົງໄປກົງມາ, ມີເຫດມີຜົນ, ມີຄວາມສະຫງົບ, ຕົກລົງບັນຫາເປັນໝູ່ຄະນະ ແລະຜ່ານມາ ປະຕິບັດລະບຽບການ ແລະກົດໝາຍເຂັ້ມງວດ. ພ້ອມກັນນີ້, ກໍ່ຍັງໄດ້ຮຽກຮ້ອງໃຫ້ບັນດາສະຫາຍ ໃຫ້ຕີຖອຍແນວຄິດອັກຄະຕິ, ກຸ່ມກ້ອນ, ພັກພວກ, ເຊື້ອສາຍ ແລະອື່ນໆ ທີ່ຈະເຮັດໃຫ້ຜູ້ມີຄວາມຮູ້-ຄວາມສາມາດ ຂາດໂອກາດເຂົ້າຮ່ວມເປັນຄະນະພັກກະຊວງ ຫລື ເປັນການກໍ່ໃຫ້ເກີດຄວາມແຕກແຍກຄວາມສາມັກຄີ ພາຍໃນອົງຄະນະພັກ ກະຊວງ; ໃນກໍລະນີຖ້າວ່າມີຜູ້ມາຊັກຊວນໄປໃນທາງບໍ່ດີ ກໍ່ຕ້ອງໄດ້ມີສະຕິຄິດຫງຳໃຫ້ດີ, ໂດຍສະເພາະແມ່ນການເຄື່ອນໄຫວຊັກຊວນ ໃສ່ຮ້າຍປ້າຍສີຕໍ່ຜູ້ທີ່ມີຜົນງານ, ມີຄວາມຮັບຜິດຊອບ ເຮັດແທ້ທຳຈິງ, ຊຶ່ງການໃສ່ຮ້າຍປ້າຍສີນັ້ນບໍ່ຖືກກັບຄວາມເປັນຈິງ, ຂໍສະເໜີບັນດາສະຫາຍເອົາໃຈໃສ່ ຢຶດໝັ້ນຕາມອຸດົມການຂອງພັກ ເພື່ອສ້າງບຸກຄະລາກອນນຳພາ ໃຫ້ໄດ້ຜູ້ທີ່ດີ”. ດ້ວຍມູນເຊື້ອອັນດີງາມ ຂອງສະມາຊິກພັກຂອງກະຊວງ ຍທຂ, ຊຶ່ງເຊື່ອໝັ້ນ ແລະມີຄວາມຫວັງຢ່າງສູງວ່າ ກອງປະຊຸມໃນຄັ້ງນີ້ ຈະພ້ອມກັນຄົ້ນຄວ້າປະກອບຄຳເຫັນທີ່ດີມີເຫດມີຜົນຖືກກັບສະພາບຄວາມເປັນຈິງ, ສິ່ງສຳຄັນແມ່ນການຕັດສິນໃຈທີ່ມີຄວາມຮັບຜິດ ຊອບການເມືອງສູງ, ເລືອກເຟັ້ນໄດ້ບັນດາສະຫາຍທີ່ມີຄຸນທາດການເມືອງ, ມີຄວາມຮູ້-ຄວາມສາມາດ, ເປັນຜູ້ເຮັດແທ້ທຳຈິງ ມີຄວາມຮັບຜິດຊອບສູງຕໍ່ໜ້າທີ່ຖືກມອບໝາຍ ເຂົ້າໃນຄະນະບໍລິຫານງານພັກກະຊວງສະໄໝທີ V ເພື່ອສືບຕໍ່ນຳພາກະຊວງ ຍທຂ ໃຫ້ມີບາດກ້າວບຸກທະລຸໃໝ່ຮອບດ້ານ ຕາມຄໍາຂວັນຂອງຂະແໜງພວກເຮົາທີ່ວ່າ: "ພັດທະນາໂຍທາທິການ ແລະຂົນສົ່ງໃຫ້ເປັນປາຍແຫລມ, ມີຈຸດສຸມ, ມີປະສິດທິຜົນສູງ, ທັນສະໄໝ, ປອດໄພ, ມີຄວາມທົນທານຕໍ່ການປ່ຽນແປງດິນຟ້າອາກາດ, ເຊື່ອມຈອດ ແລະຍືນຍົງ".

 

ກອງປະຊຸມເປີດກວ້າງເພື່ອທາບທາມຄໍາເຫັນ ໃສ່ຮ່າງດໍາລັດວ່າດ້ວຍເຂດສະຫງວນຂອງທາງຫຼວງ

  

     ກອງປະຊຸມ ເປີດກ້ວາງທາບທາມຄຳເຫັນ ໃສ່ຮ່າງດໍາລັດວ່າດ້ວຍເຂດສະຫງວນຂອງທາງຫຼວງ ໄດ້ຈັດຂື້ນໃນວັນທີ 17 ກັນຍາ 2020 ທີຫ້ອງປະຊຸມໃຫຍ່ຂອງກະຊວງ ຍທຂ, ໂດຍການເປັນປະທານຂອງ ທ່ານ ປອ ສັນຕິສຸກ ສິມມາວົງ ຮອງລັດຖະມົນຕີກະຊວງ ຍທຂ, ມີຫ້ອງການ, ກົມ, ກອງ, ສະຖາບັນ, ພະ​ແນກ ຍທຂ ແຂວງທົ່ວປະເທດ, ສະພາແຫ່ງຊາດ, ກະຊວງປ້ອງກັນປະ​ເທດ, ກະຊວງ ຍຸຕິທຳ, ກະຊວງ ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ ແລະ ພາກສ່ວນຕ່າງໆທີ່ກ່ຽວຂ້ອງກໍ່ໄດ້ເຂົ້າຮ່ວມ.

    ຄາດໝາຍຕາມແຜນແມ່ນຈະໄດ້ເອົາເຂົ້າຜ່ານກອງປະຊຸມລັດຖະບານ ສະໄໝສາມັນ ປະຈຳເດືອນ ມີຖຸນາ 2020 ນີ້, ແຕ່ເນື່ອງຈາກ ສະພາບການແຜ່ລະບາດຂອງເຊື້ອພະຍາດໂຄວິດ 19 ຍັງສືບຕໍ່ແຜ່ລະບາດຈົນເຖິງປະຈຸບັນ ຈຶ່ງເຮັດໃຫ້ການຄົ້ນຄ້ວາຮ່າງດໍາລັດສະບັບດັ່ງກ່າວ ຢຸດສະງັກໄປໃນໄລຍະຫນຶ່ງ ລວມທັງບໍ່ສາມາດຈັດກອງປະຊຸມເປີດກ້ວາງຂຶ້ນໄດ້, ດັ່ງທີ່ທຸກທ່ານຮູ້ແລ້ວວ່າຮ່າງດໍາລັດ ສະບັບນີ້ ເປັນດໍາລັດທີ່ສ້າງຂຶ້ນໃໝ່ ຕາມຄວາມຮຽກຮ້ອງຕ້ອງການຂອງເສດຖະກິດ-ສັງຄົມ ແລະ ມີຄວາມສຳຄັນຫລາຍ ຕໍ່ກັບການຄຸ້ມຄອງເຂດສະຫງວນຂອງທາງຫຼວງໃນປະຈຸບັນ, ໂດຍປະຕິບັດຕາມຂັ້ນຕອນ ແລະ ລະບຽບການຜ່ານຮ່າງດຳລັດ, ກະຊວງ ຍທຂ, ຈຶ່ງໄດ້ກໍານົດຈັດກອງປະຊຸມເປີດກວ້າງ ຂຶ້ນໃນລະຫວ່າງວັນທີ 17-18/9/2020 ແລະ ພາຍຫລັງສໍາເລັດກອງປະຊຸມເປີດກວ້າງໃນຄັ້ງນີ້ແລ້ວກໍ່ຈະໄດ້ນຳສະເໜີກະຊວງຍຸຕິທຳ ເພື່ອກວດກາຄວາມສອດຄ່ອງທາງດ້ານກົດໝາຍ.

 

      ປັດຈຸບັນ ຄຽງຄູ່ກັບການຂະຫຍາຍໂຕທາງດ້ານເສດຖະກິດ ແລະ ສັງຄົມ ວຽກງານການຄຸ້ມຄອງເຂດສະຫງວນຂອງທາງຫຼວງ ເປັນວຽກງານໜຶ່ງທີ່ເປັນຄວາມທ້າທາຍຂອງຂະແໜງໂຍທາທິການ ແລະ ຂົນສົ່ງ, ໃນການຄຸ້ມຄອງ ແລະ ຈັດສັນໃຫ້ມີຄວາມເປັນລະບຽບສວຍງາມ ແລະ ສອດຄ່ອງກັບກົດໝາຍເຊັ່ນ: ການປຸກສ້າງເຮືອນຊານ ທີ່ຢູ່ອາໄສຂອງປະຊາຊົນ, ນໍາໃຊ້ເປັນພື້ນທີ່ການຜະລິດ, ຮ້ານຄ້າຂາຍ, ຂຸດດິນ, ຖົມດິນ, ການຕັ້ງເສົາໄຟຟ້າ, ການຕັ້ງປ້າຍໂຄສະນາ, ການຕັ້ງເສົາໂທລະສັບ, ການວາງລະບົບສາຍໄຍແກ້ວ, ການວາງລະບົບທໍ່ນໍ້າປະປາ ແລະ ອື່ນໆ, ນອກຈາກນີ້, ລັກສະນະພູມີປະເທດຂອງພວກເຮົາ ໂດຍສະເພາະເຂດພູດອຍ ກໍ່ເປັນບັນຫາໜຶ່ງທີ່ທ້າທາຍໃນການກໍານົດເຂດສະຫງວນໃຫ້ແທດເໝາະກັບສະພາບຄວາມເປັນຈິງ, ບັນຫາການບຸກລຸກເຂດສະຫງວນທາງແບບເຄິ່ງຖາວອນ ແລະ ແບບຖາວອນ ກໍ່ນັບມື້ເກີດຂຶ້ນຢ່າງຫລວງຫລາຍ, ພວກເຮົາຍັງບໍ່ທັນສາມາດຄຸ້ມຄອງວຽກງານດັ່ງກ່າວໄດ້ດີ ແລະ ຍັງມີຄວາມຫຍຸ້ງຍາກຫລາຍດ້ານ ເນື່ອງຈາກວ່າ ພວກເຮົາມີກົດໝາຍແລ້ວ ແຕ່ຍັງບໍ່ທັນມີນິຕິກຳໃຕ້ກົດໝາຍເປັນອັນລະອຽດເພື່ອຄຸ້ມຄອງ, ສະນັ້ນ, ຈຶ່ງມີຄວາມຈໍາເປັນສ້າງດໍາລັດສະບັບນີ້ຂຶ້ນ ເພື່ອເປັນເຄື່ອງມືຄຸ້ມຄອງວຽກງານດັ່ງກ່າວ ໃຫ້ມີປະສິດທິພາບ, ປະສິດທິຜົນສູງ, ດໍາລັດວ່າດ້ວຍເຂດສະຫງວນທາງຫຼວງ ຄະນະຮ່າງດຳລັດຂອງກະຊວງ ຍທຂ ໄດ້ຮ່າງສໍາເລັດໂດຍພື້ນຖານ ເປັນທີ່ຮຽບຮ້ອຍແລ້ວ.  ໃນການຈັດກອງປະຊຸມໃນຄັ້ງນີ້ ເພື່ອເປີດກ້ວາງ ປະກອບຄໍາຄິດຄໍາເຫັນ ໃສ່ຮ່າງດຳລັດສະບັບນີ້ ໃຫ້ອຸດົມສົມບູນ ໄປດ້ວຍເນື້ອໃນ, ຫຼັງຈາກນັ້ນ, ຈະໄດ້ນໍາເອົາຄໍາສະເໜີ ແລະ ການປະກອບຄໍາຄິດຄໍາເຫັນ ຈາກຫຼາຍພາກສ່ວນໄປພິຈາລະນາ ເພື່ອປັບປຸງໃຫ້ເປັນອັນລະອຽດ, ຄົບຖ້ວນ ແລະ ສົມບູນ, ແທດເໝາະກັບການຂະຫຍາຍຕົວທາງດ້ານເສດຖະກິດ ໃນປະຈຸບັນ ແລະ ເຊື່ອມໂຍງກັບສາກົນ.

    ເພື່ອເຮັດໃຫ້ກອງປະຊຸມຄັ້ງນີ້ ປະສົບຜົນສໍາເລັດ ແລະ ເຮັດໃຫ້ຮ່າງດໍາລັດດັ່ງກ່າວມີເນື້ອໃນຄົບຖ້ວນ, ສົມບູນ   ຂໍຮຽກຮ້ອງມາຍັງທຸກພາກສ່ວນທີ່ເຂົ້າຮ່ວມກອງປະຊຸມໝົດທຸກຄົນ ຈົ່ງໄດ້ພ້ອມກັນສຸມສະຕິປັນຍາ, ເຫື່ອແຮງ, ຄວາມຮູ້ຄວາມສາມາດ ຂອງຕົນເອງ ແລະ ຮັບຜິດຊອບສູງ ເຂົ້າໃນການຄົ້ນ  ຄ້ວາ ປະກອບຄໍາຄິດຄໍາເຫັນໃຫ້ເລິກເຊິ່ງ, ມີເຫດມີຜົນ, ກົງໄປກົງມາ ແລະ ແທດເໝາະກັບຄວາມເປັນຈິງ ເພື່ອເຮັດໃຫ້ຮ່າງດໍາລັດສະບັບນີ້ ອຸດົມສົມບູນໄປດ້ວຍເນື້ອໃນ ແລະ ເພື່ອເປັນພື້ນຖານໃຫ້ແກ່ການຄຸ້ມຄອງ, ກວດກາ ກ່ຽວກັບວຽກງານເຂດສະຫງວນທາງຫຼວງ, ກອງປະຊຸມ ຈະດໍາເນີນໄປເປັນເວລາ 2 ວັນ ສຸດທີ່ມີຄວາມສໍາຄັນ ແລະ ເລັ່ງດ່ວນ ໃນການພັດທະນາວຽກຂອງຂະແໜງ ຍທຂ, ພັດທະນາປະ ເທດຊາດ ແລະ ການຄຸ້ມຄອງຂອງຊັບສິນຂອງລັດ.

 

ກອງປະຊຸມດຳເນີນຊີວິດການເມືອງຂອງຄະນະພັກ ກະຊວງ ຍທຂ ສະໄໝທີ IV

   ກອງປະຊຸມດຳເນີນຊີວິດການເມືອງຂອງຄະນະພັກ ກະຊວງ ຍທຂ ສະໄໝທີ IV, ໄດ້ຈັດຂື້ນໃນວັນທີ 21 ກັນຍາ 2020 ທີ່ຫ້ອງປະຊຸມໃຫຍ່ຂອງກະຊວງ ຍທຂ, ໂດຍການເປັນປະທານຂອງ ສະຫາຍ ປອ ສອນໄຊ ສີພັນດອນ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງ ແຜນການ ແລະການລົງທືນ, ມີບັນດາສະຫາຍຕ່າງໜ້າຈາກຫ້ອງວ່າການສູນກາງພັກ, ຄະນະຈັດຕັ້ງສູນກາງພັກ, ຄະນະກວດກາສູນກາງພັກ, ຄະນະໂຄສະນາອົບຮົມສູນກາງພັກ, ບັນດາສະຫາຍຄະນະປະຈຳພັກ, ກຳມະການພັກກະຊວງ ຍທຂ ກໍ່ໄດ້ເຂົ້າຮ່ວມຢ່າງພ້ອມພຽງ.

   ກອງປະຊຸມຄັ້ງນີ້ ຈະໃຊ້ເວລາຢູ່ 2 ວັນ, ເຊິ່ງເປັນກອງປະຊຸມທີ່ມີຄວາມໝາຍ, ຄວາມສໍາຄັນຫລາຍ ເພາະຈະໄດ້ພ້ອມກັນສໍາຫຼວດກວດກາ ຕີລາຄາຄວາມຮັບຜິດຊອບລວມຂອງຄະນະພັກກະຊວງ ແລະບຸກຄົນຄະນະພັກກະຊວງ ສະໄໝທີ IV ທີ່ໄດ້ປະຕິບັດໜ້າທີ່ວຽກງານນຳພາ ໃນໄລຍະ 5 ປີ ຜ່ານມາ (ແຕ່ປີ 2016-2020) ເພື່ອຊອກໃຫ້ເຫັນຜົນສຳເລັດດ້ານດີ ແລະບັນດາດ້ານອ່ອນຂໍ້ຄົງຄ້າງ ໃນການນໍາພາລວມ ແລະຂອງບຸກຄົນຄະນະພັກ ແຕ່ລະສະຫາຍຕະຫຼອດໄລຍະສະໄໝກອງປະຊຸມ; ເພື່ອຕີລາຄາຄຸນທາດການເມືອງ, ຄວາມເຊື່ອໝັ້ນຕໍ່ການນຳພາ ແລະຜົນສຳເລັດຂອງແຕ່ລະສະຫາຍ, ພ້ອມທັງຕີລາຄາຈັດແບ່ງເປັນປະເພດຂອງຄະນະພັກແຕ່ລະສະຫາຍຄື: ແຂງ, ກາງ ແລະອ່ອນ, ເພື່ອເປັນເປັນຂໍ້ມູນບ່ອນອີງ ໃຫ້ແກ່ຜູ້ແທນສົມບູນຂອງກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ຍ​ທ​ຂ ຕັດສິນໃຈເລືອກເຟັ້ນບຸກຄະລາກອນ ປະກອບເຂົ້າເປັນຄະນະພັກກະຊວງ ຍທຂ ສະໄໝທີ V.

   ເນື່ອງຈາກວ່າກອງປະຊຸມໃນຄັ້ງນີ້ ມີເນື້ອໃນສຳຄັນດັ່ງທີ່ໄດ້ກ່າວມານັ້ນ ແລະດ້ວຍເວລາທີ່ຈຳກັດ, ຈຶ່ງຮຽກຮ້ອງມາຍັງບັນດາສະຫາຍຄະນະປະຈຳພັກ ແລະຄະນະພັກກະຊວງ, ຈົ່ງເຊີດຊູ ແລະຍົກສູງຄວາມຮັບຜິດຊອບການເມືອງຂອງຕົນ ພ້ອມກັນສຸມສະຕິປັນຍາເຂົ້າໃນການຄົ້ນຄວ້າ ແລະປະກອບຄໍາຄິດຄໍາເຫັນຢ່າງກົງໄປກົງມາ ມີເຫດມີຜົນຕໍ່ຮ່າງບົດສຳຫຼວດການນຳພາລວມຂອງຄະນະພັກກະຊວງ ແລະການປະກອບຄຳເຫັນຕໍ່ບົດສຳຫລວດຂອງບຸກຄົນ ໃນຄະນະພັກກະຊວງ ໃຫ້ຖືກກັບສະພາບຕົວຈິງ ທີ່ໄດ້ເຄື່ອນໄຫວນຳພາຈັດຕັ້ງປະຕິບັດໃນ 5 ປີ ຜ່ານມາ ພ້ອມກັນຊອກໃຫ້ເຫັນດ້ານຕັ້ງໜ້າທີ່ພົ້ນເດັ່ນ ແລະຈຸດອ່ອນຂໍ້ຄົງຄ້າງ ເພື່ອນຳໄປປັບປຸງຄົ້ນຄວ້າແກ້ໄຂ; ອັນນີ້ແມ່ນຫລັກການ, ອຸດົມການ ແລະມູນເຊື້ອທີ່ດີຂອງພັກເຮົາ ທີ່ໄດ້ຈັດຕັ້ງປະຕິບັດຕະຫລອດມາ, ເພື່ອສ້າງໃຫ້ພັກເຮົາມີຄວາມປອດໃສ ເຂັ້ມແຂງ ແລະໜັກແໜ້ນ.

   ເພື່ອໃຫ້ບັນລຸໄດ້ຕາມລະດັບຄາດໝາຍດັ່ງກ່າວນັ້ນ, ຂໍຮຽກຮ້ອງມາຍັງບັນດາສະຫາຍຄະນະປະຈຳພັກ ແລະຄະນະພັກກະຊວງທັງໝົດ ຈົ່ງໄດ້ຄົ້ນຄວ້າຄິດຫງຳ ແລະມີຄວາມຮັບຜິດຊອບການເມືອງສູງ ໃນການປະກອບຄໍາຄິດຄໍາເຫັນ ຕໍ່ການສໍາຫຼວດແຕ່ລະສະຫາຍ ບົນພື້ນຖານຄວາມເປັນຈິງທີ່ມີເຫດມີຜົນ, ກົງໄປກົງມາ, ພ້ອມດຽວກັນນີ້ ກໍ່ຂໍຮຽກຮ້ອງມາຍັງບັນດາສະຫາຍທັງໝົດ ຈົ່ງພ້ອມກັນຕີຖອຍ ແລະຫຼີກລ້ຽງແນວຄິດອັກຄະຕິ ຕໍ່ກັນດ້ານໃດດ້ານໜຶ່ງ, ຊຶ່ງຈະນໍາໄປສູ່ຕົ້ນເຫດ ກໍ່ໃຫ້ເກີດຄວາມບໍ່ເຂົ້າໃຈກັນ, ສ້າງຄວາມແຕກແຍກຄວາມສາມັກຄີພາຍໃນຄະນະພັກກະຊວງ, ສ້າງເງື່ອນໄຂເຮັດໃຫ້ຄົນບໍ່ດີ ແຊກຊຶມເຂົ້າແບ່ງແຍກພາຍໃນຄະນະພັກກະຊວງ.

   ຈຸດປະສົງຄາດໝາຍ ການດຳເນີນຊີວິດການເມືອງຂອງພັກເຮົາຢາກໄດ້ ແມ່ນຢາກເຮັດໃຫ້ພັກມີຄວາມປອດໃສ ເຂັ້ມແຂງ ແລະໜັກແໜ້ນ; ພາຍຫລັງດຳເນີນກອງປະຊຸມ ດຳເນີນຊີວິດການເມືອງສຳເລັດແລ້ວ, ເຮັດໃຫ້ພາຍໃນຄະນະພັກມີບັນຍາກາດໃໝ່, ແຕ່ລະສະຫາຍມີຄວາມເບີກບານມ່ວນຊື່ນ, ມີຄວາມສະມັກຄີຮັກແພງກັນແໜ້ນຂຶ້ນ ແລະວຽກງານມີຜົນສຳເລັດຫລາຍຂຶ້ນ ແລະແຕ່ລະສະຫາຍມີຄວາມກ້າວໜ້າໃນ​ໜ້າ​ທີວ​ຽກ​ງານ​ທີ​ຕົນ​ເອງ​ຮັບ​ຜິດ​ຊອບ.

   ຢາກເຮັດໄດ້ແນວນັ້ນ ກ່ອນອື່ນໝົດພາຍໃນຄະນະປະຈຳພັກ ແລະຄະນະພັກ ຕ້ອງເປັນເອກະພາບກັນສູງທາງດ້ານທັດສະນະ ແລະຄວາມຮັບຮູ້ຕໍ່ການຈັດຕັ້ງປະຕິບັດແນວທາງນະໂຍບາຍ ຂອງພັກ, ລະບຽບການ ແລະກົດໝາຍຂອງລັດຢ່າງເຂັ້ມງວດ, ພ້ອມກັນຕັ້ງໜ້າແກ້ໄຂຈຸດອ່ອນ, ຂໍ້ຄົງຄ້າງ ແລະສິ່ງຫຍໍ້ທໍ້ທັງໝົດ ທີ່ເກີດຂຶ້ນຢູ່ໃນກະຊວງ ຍ​ທ​ຂ ໃຫ້ໝົດໄປເທື່ອລະກ້າວ; ໃນນີ້ກ່ອນອື່ນໝົດຕ້ອງຕັ້ງໜ້າປະຕິບັດ 4 ບຸກທະລຸທີ່ພັກເຮົາກໍານົດໃຫ້ມີຜົນສໍາເລັດ ໂດຍສະເພາະແມ່ນການບຸກທະລຸດ້ານແນວຄິດຈິນຕະນາການ, ທັງໝົດນັ້ນແມ່ນເພື່ອແນ່ໃສ່ເຮັດໃຫ້ແຕ່ລະສະຫາຍມີຄວາມກ້າວໜ້າ ປະກອບສ່ວນເຮັດໃຫ້ກະຊວງ ຍ​ທ​ຂ ມີບາດກ້າວບຸກທະລຸໃໝ່ຮອບດ້ານ, ໃນການສ້າງສາພັດທະນາປະເທດຊາດ ໃຫ້ມີຄວາມຈະເລີນຮຸ່ງເຮືອງເຮັດໃຫ້ ປະຊາຊົນບັນດາເຜົ່າມີຊີວິດການເປັນຢູ່ທີ່ດີຂຶ້ນ ຕາມແນວທາງນະໂຍບາຍຂອງພັກເຮົາວາງອອກ.

 

 

ໂຄງການປັບປຸງ ແລະ ສ້ອມແປງທາງເລກ 13 ໃຕ້ມອບເຮືອໃຫ້ແກ່ຫ້ອງການ ຍທຂ ເມືອງ

    ໃນ​ອາ​ທິດ​​ທີຜ່ານ​ມາ ໂຄງ​ການ​ປັບ​ປຸງ ແລະ ສ້ອມ​ແປງ​ທາງ​ເລກ 13 ໃຕ້ໄດ້​ຈັດ​ພິ​ທີ​ມອບ​ເຮືອ ພ້ອມ​ດ້ວຍ​ອຸ​ປະ​ກອນ 12 ລຳ ໃຫ້​ແກ່​ຫ້ອງ​ການ ຍ​ທ​ຂ ເມືອງ ຈຳ​ນວນ 4 ເມືອງ ແລະ ບ້ານ​ທີ່​ຢູ່​ລຽບ​ຕາມ​ສາຍ​ທາງ​ເລກ 13ໃຕ້ ຈຳ​ນວນ 8 ບ້ານ ຄື: ຫ້ອງ​ການ ຍ​ທ​ຂ ເມືອງ​ທ່າ​ພະ​ບາດ,  ຫ້ອງ​ການ ຍ​ທ​ຂ ເມືອງປາກ​ຊັນ, ຫ້ອງ​ການ ຍ​ທ​ຂ ເມືອງປາກ​ກະ​ດິງ, ຫ້ອງ​ການ ຍ​ທ​ຂ ເມືອງຫີນ​ບູນ ແລະ ບັນ​ດາ​ອຳ​ນາດ​ການ​ປົກ​ຄອງ​ບ້ານ ປ່າ​ໄລ່, ນ້ຳ​ໂລ້, ໂພນ​ສະ​ຫວັນ, ສິ​ວິ​ໄລ, ຫາງ​ຊິງ​ສະ​ຫວ່າງ, ນາ​ເຄືອ, ຄຳ​ແກ້ວ ແລະ ໃໝ່​ນ້ຳ​ປະ​ກັນ; ຈຸດ​ປະ​ສົງ​ຂອງ​ໂຄງ​ການແມ່ນ​ເພື່ອ​ນຳ​ໃຊ້​ເຂົ້າ​ໃນ​ການ​ຕ້ານ​ໄພ​ນ້ຳ​ຖ້ວມ ແລະ ຍົກ​ຍ້າຍ​ລະ​ດັບ​ທາງ ເພື່ອ​ໃຫ້​ຕ້ານ​ທານ​ກັບ​ການ​ປ່ຽນ​ແປງ​ຈາກ​ດິນ​, ຟ້າ​, ອາ​ກາດ, ນຳ​ໃຊ້​ເຂົ້າ​ໃນ​ເວ​ລາ​ເກີດ​ເຫດ​ນ້ຳ​ຖ້ວມ​ສຸກ​ເສີນ ເພື່ອ​ຊ່ວຍ​ເຫຼືອ​ກັນ​ໃນ​ການ​ຍົກ​ຍ້າຍ​ປະ​ຊາ​ຊົນ, ຊັບ​ສິນ ແລະ ສິ່ງ​ຂອງອື່ນໆ. ໃນ​ການ​ຈັດ​ຊື້​ເຮືອ​ໃນ​ຄັ້ງ​ນີ້​ແມ່ນ​ໄດ້​ຮັບ​ການ​ສະ​ໜັບ​ສະ​ໜູນ​ຈາກ​ທະ​ນາ​ຄານ​ໂລກ(WB), ພາຍ​ໃຕ້​ໂຄງ​ການ​ຂະ​ແໜງ​ຂົວ​ທາງ​ໄລ​ຍະ 2 (LRSP2-AF).

Additional information