ຂ່າວພາຍໃນກະຊວງ

ກອງປະຊຸມຝຶກອົບຮົມແມ່ຍິງກັບການຄຸ້ມຄອງນຳພາ

ກອງປະຊຸມຝຶກອົບຮົມ “ແມ່ຍິງກັບການຄຸ້ມຄອງນຳພາ” ໄດ້ຈັດຂື້ນໃນວັນທີ 16 ກັນຍາ 2020 ທີ່ສະຖາບັນຝຶກອົບຮົມ ຍທຂ, ໂດຍການເປັນປະທານຂອງທ່ານ ສີລິພອນ ອິນທິລາດ ຫົວໜ້າສະຖາບັນຝຶກອົບຮົມ ຍທຂ ແລະ ທ່ານ ນາງ ຈັນຖະໜອມ ສຸລີໂຍ ຮອງຫົວໜ້າຫ້ອງການ, ມີບັນດາກົມ, ກອງ, ​ຫ້ອງ​ການ, ສະຖາບັນ ພາກສ່ວນລະ 1 ທ່ານ ເຂົ້າຮ່ວມໃນການຝຶກອົບຮົມໃນຄັ້ງນີ້.

ວຽກງານສົ່ງເສີມຄວາມກ້າວໜ້າແມ່ຍິງ-ເດັກນ້ອຍ ແມ່ນວຽກງານໜື່ງທີ່ສຳຄັນ ແລະນອນໃນຍຸດທະສາດການພັດທະນາ ຕາມແນວທາງນະໂຍບາຍຂອງ ພັກ-ລັດຖະບານ ເຊິ່ງສະແດງອອກຢູ່ບ່ອນວ່າໄດ້ມີການແຕ່ງຕັ້ງຄະນະກຳມະການລະດັບຊາດກ່ຽວກັບວຽກງານດັ່ງກ່າວ, ໂດຍແມ່ນ ທ່ານ ປອ. ສອນໄຊ ສີພັນດອນ ຮອງນາຍົກລັດຖະມົນຕີ ເປັນປະທານ ແລະ ຊີ້ນຳໂດຍກົງ, ສະນັ້ນ, ຫົວຂໍ້ທີ່ຈະຈັດຝຶກອົບຮົມໃນຄັ້ງນີ້ ຖືວ່າເປັນບົດຮຽນທີ່ສຳຄັນຫຼາຍໃນການພັດທະນາແມ່ຍິງຂອງ ກະຊວງ ຍທຂ ໃຫ້ກາຍເປັນພະນັກງານຫຼັກແຫຼ່ງຄຸ່ມຄອງ-ນໍາພາໃນອານາຄົດ ຕາມແນວທາງນະໂຍບາຍຂອງລັດຖະບານ; ເນື້ອໃນຫົວຂໍຝຶກອົບຮົມໃນ​ຄັ້ງ​ນີ້​ປະ​ກອບ​ມີ: ຮັບຟັງການລາຍງານ ການຈັດຕັ້ງປະຕິບັດແຜນຍຸດທະສາດເພື່ອຄວາມກ້າວໜ້າຂອງແມ່ຍິງ ແລະ ເດັກ-ນ້ອຍ; ຮຽນຮູ້ທັກສະ ແລະ ຄຸນລັກສະນະການເປັນພະນັກງານນຳພາທີ່ດີ ແລະເນື້ອໃນອື່ນໆ ຕາມຫົວຂໍ້ທີ່ໄດ້ລະບຸໄວ້ໃນກອງປະຊຸມ; ແລະ ພິເສດ ຈະໄດ້ຮັບຟັງການບັນລະຍາຍກ່ຽວກັບ ການສ້າງຄວາມເຂັ້ມແຂງໃຫ້ແກ່ພະນັກງານເພດຍິງ ທີ່ຕິດພັນກັບການກຳນົດຕໍາແໜ່ງງານຈາກ ທ່ານ ສີພຸກ ວົງພັກດີ ອະດີດຮອງລັດຖະມົນຕີ ກະຊວງ ພາຍໃນ. ກອງປະຊຸມໃນຄັ້ງນີ້ຈະໄດ້ດຳເນີນໄປເປັນເວລາ 3 ວັນ ແຕ່ວັນທີ 16–18 ກັນຍາ 2020.

ຄະນະນຳກະຊວງໂຍທາທິການ ແລະ ຂົນສົ່ງເຂົ້າອວຍພອນທູດຫວຽດນາມ ປະຈຳ ສປປ ລາວ

    ໃນ​ຕອນ​ແລງ​ຂອງ​ວັນ​ທີ 2 ກັນຍາ​ 2020 ທີ່ ສະຖານ​ເອກ​ອັກ​ຄະ​ລັດ​ຖະ​ທູດ ແຫ່ງ ສສ ຫວຽດນາມ ປະ​ຈໍາ ສປປ ລາວ, ທ່ານ ບຸນຈັນ ສິນທະວົງ ລັດຖະມົນຕີກະຊວງ ຍທຂ ໄດ້​ນໍາ​ພາຄະ​ນະ ເຂົ້າອວຍພອນ ​ທ່ານ ຫ​ງວຽນ ບ໋າ ຮຸ່ງ ເອກ​ອັກ​ຄະ​ລັດ​ຖະ​ທູດ ແຫ່ງ  ສສ ຫວຽດນາມ ປະ​ຈໍາ ສປປ ລາວ, ເນື່ອງ​ໃນ​ໂອກາດວັນ​ສະຖາປະນາ ສສ ຫວຽດນາມ ຄົບ ຮອບ 75 ປີ (2/9/1945-2/9/2020)  ແລະ ວັນ​ການ​ທູດ ສສ ຫວຽດນາມ ຄົບຮອບ 75 ປີ(28/8/1945-28/8/2020).

    ໃນ​ໂອກາດ​ດັ່ງກ່າວ, ທ່ານ ບຸນຈັນ ສິນທະວົງ ລັດຖະມົນຕີກະຊວງ ຍທຂ ໄດ້​ຕາງໜ້າ​ໃຫ້​ຄະນະ​ພັກ, ຄະ​ນະ​ນໍາ ແລະ ພະນັກງານ​ກະຊວງ​ ຍທຂ ສະແດງ​ຄວາມ​ຊົມເຊີຍວັນ​ສະຖາປະນາ ສສ ຫວຽດນາມ ແລະ ວັນ​ການ​ທູດ ສສ ຫວຽດນາມ ຄົບຮອບ 75 ປີ ຢ່າງ​ສຸດ​ໃຈ. ພ້ອມ​ນັ້ນ, ທ່ານ ລັດຖະມົນຕີ ໄດ້​ສະແດງ​ຄວາມ​ຊົມເຊີຍ ຕໍ່​ຜົນ​ສໍາ​ເລັດ​ອັນ​ໃຫຍ່​ຫຼວງ​ໃນ​ຫຼາຍ​ດ້ານ​ຂອງ ສສ ຫວຽດນາມ ທີ່​ສາມາດ​ຍາດ​ມາ​ໄດ້​ໃນ​ຕະຫຼອດ 75 ປີ ຜ່ານ​ມາ ເຊັ່ນ: ເສດຖະກິດ​ຂະຫຍາຍຕົວ​ໄວ, ຊີວິດ​ການ​ເປັນ​ຢູ່​ຂອງ​ປະຊາຊົນ​ໄດ້​ຮັບ​ການ​ພັດທະນາ ແລະ ປັບປຸງ​ໃຫ້​ດີ​ຂຶ້ນ​ເປັນ​ກ້າວໆ. ນອກຈາກ​ນັ້ນ, ທ່ານ ລັດຖະມົນຕີ ຍັງ​ໄດ້​ສະແດງ​ຄວາມ​ຊົມເຊີຍ​ຕໍ່​ຜົນ​ສໍາ​ເລັດ​ທີ່​ຂະແໜງການ ຄົມມະນາຄົມ, ການຂະຫຍາຍຕົວທາງດ້ານເສດຖະກິດ, ເສັ້ນທາງຄົມມະນາຄົມ ທີ່ມີການລົງທືນຮ່ວມກັນ, ການຂົນສົ່ງສິນຄ້າລະຫວ່າງປະເທດ ແລະ ວຽກງານຮ່ວມມື ລະຫວ່າງສອງກະຊວງ ກະຊວງ ໂຍທາທິການ ແລະຈົນສົ່ງ ສປປ ລາວ ແລະ ກະຊວງ ຄົມມະນາຄົມ ສສ ຫວຽດນາມ ແລະ ການລົງທຶນຮ່ວມກັນ ລະຫວ່າງ 2 ປະເທດ ໃຫ້ນັບມື້ນັບສູງເດັ່ນຂື້ນໃນເວທີພາກພື້ນສາກົນ.

ກະຊວງ ຍທຂ ເຊື່ອມຊຶມມະຕິ 10 ສະໄໝທີ X ຂອງພັກ

    ກະຊວງ​ ໂຍທາທິການ ແລະ ຂົນສົ່ງ ໄດ້​ຈັດ​ກອງ​ປະຊຸມ​ເຜີຍແຜ່​ເຊື່ອມ​ຊຶມ​ມະຕິ​ກອງ​ປະຊຸມ​ຄົບ​ຄະນະ ຄັ້ງ​ທີ 10 ຂອງ​ຄະນະ​ບໍລິຫານ​ງານ​ສູນ​ກາງ​ພັກ   ສະໄໝ​ທີ X  ແລະ ມອບໃບຢັ້ງຢືນ ໜ່ວຍພັກ ປອດໄສ, ເຂັ້ມແຂງ, ໜັກແໜ້ນ ໃນ​ວັນ​ທີ 3 ກັນຍາ 2020, ພາຍ​ໃຕ້​ການ​ເປັນ​ປະທານ​ຂອງ ສະຫາຍ ປອ ບຸນຈັນ ສິນທະວົງ ກໍາ​ມະ​ການ​​ສູນ​ກາງ​ພັກ, ລັດຖະມົນຕີ ກະຊວງ​ ຍທຂ; ມີບັນດາສະຫາຍ ຄະນະປະຈຳພັກກະຊວງ, ກຳມະການພັກກະຊວງ, ບັນດາສະຫາຍ ເລຂາ, ຮອງເລຂາ ຂອງຄະນະພັກຮາກຖານ, ໜ່ວຍພັກຮາກຖານ, ຄະນະໜ່ວຍພັກ, ສະມາຊິກພັກ ແລະ ພະນັກງານຂັ້ນຫົວໜ້າພະແນກ ແລະ ຮອງພະແນກ ເຂົ້າຮ່ວມ.

    ຈຸດປະສົງກອງ​ປະຊຸມ​ຄັ້ງ​ນີ້, ເພື່ອ​ໃຫ້​ຄະ​ນະ​ນໍາ, ສະມາຊິກ​ພັກ, ພະນັກ​ງານ​-​ລັດຖະກອນ​ມີ​ຄວາມ​ຮັບ​ຮູ້​-​ເຂົ້າໃຈ, ກຳ​ແໜ້ນ,  ແລະ ມີ​ຄວາມ​ເປັນ​ເອກະ​ພາບ​ສູງ​ຕໍ່​ບັນ​ດາ​ເນື້ືອ​ໃນ​ສໍາ​ຄັນ​ຂອງ​ມະຕິ​ຕ່າງໆ​ຂອງ​ກົມ​ການເມືອງ​ສູນ​ກາງ​ພັກ ໃນ​ແຕ່​ລະ​ໄລຍະ ເພື່ອ​ຫັນ​ມະຕິ​ດັ່ງກ່າວ​ເປັນ​ທິດ​ທາງ, ວຽກ​ງານ ແລະ ເປັນ​ແຜນ ​ປະຕິບັດ​ງານ​ລະອຽດ​ຂອງ​ຄະນະ​ພັກກະຊວງ, ບັນດາຄະນະພັກຮາກຖານ ແລະ ​ໜ່ວຍ​ພັກຮາກຖານ, ຍົກ​ສູງ​ຄວາມ​ເປັນ​ເຈົ້າ​ການ ແລະ ຄວາມ​ສາມາດ​ໃນ​ການ​ນໍາ​ຂອງ​ວຽກ​ງານ​ຂອງ​ຕົນ.

    ໃຫ້​ກຽດ​ເຜີຍແຜ່ມະຕິກອງ​ປະຊຸມ​ຄົບ​ຄະນະ ຄັ້ງ​ທີ 10 ຂອງ​ຄະນະ​ບໍລິຫານ​ງານ​ສູນ​ກາງ​ພັກ ໂດຍສະຫາຍ ປອ ບຸນຈັນ ສິນທະວົງ ກໍາ​ມະ​ການ​ກົມ​ການເມືອງ​ສູນ​ກາງ​ພັກ, ລັດຖະມົນຕີ ກະຊວງ​ ຍທຂ; ໄດ້​ຍົກ​ໃຫ້​ເຫັນ​ກ່ຽວ​ກັບ​ການ​ຜັນ​ຂະຫຍາຍ ມະຕິ​ກອງ​ປະຊຸມ​ຄົບ​ຄະນະ​ບໍລິຫານ​ງານ​ພັກ​ສູນ​ກາງ​ພັກ ຄັ້ງ​ທີ 7, 8, 9 ສະໄໝ X ຕິດ​ພັນ​ກັບ​ຄວາມ​ຄືບ​ໜ້າການຈັດ​ຕັ້ງ​ປະຕິບັດ​ແຜນ​ພັດທະນາ​ເສດ​ຖະ​ກິດ​-​ສັງຄົມ, ງົບປະມານ, ເງິນຕາ ປະ​ຈໍາ​ໄຕ​ມາດ 1 ປີ 2020 ແລະ ທິດ​ທາງຕໍ່ໜ້າ; ຮ່າງລາຍງານການເມືອງ ຕໍ່ກອງປະຊຸມໃຫຍ່ ຄັ້ງທີ XI ຂອງພັກ; ຮ່າງແຜນພັດທະນາ​ເສດ​ຖະ​ກິດ​-​ສັງຄົມແຫ່ງຊາດ 5 ປີ ຄັ້ງທີ IX (2021-2025); ການປັບປຸງກົດລະບຽບຂອງພັກ ສະໄໝທີ X ແລະ ທິດປັບປຸງກົງຈັກລັດທະບານ; ຊຶ່ງຄະນະ​ບໍລິຫານ​ງານ​ສູນ​ກາງ​ພັກ ໄດ້​ຕີ​ລາຄາ​ສູງ​ຕໍ່​ກັບ​ການ​ຜັນ​ຂະຫຍາຍ ແລະ ຈັດ​ຕັ້ງ​ປະຕິບັດ ມະຕິ​ດັ່ງກ່າວ ຜ່ານ​ມາ​ພັກ ແລະ ລັດຖະບານ, ອົງການ​ປົກຄອງ​ແຕ່​ລະ​ຂັ້ນ ໄດ້​ເພີ່ມ​ທະວີ​ການ​ຊີ້​ນໍາ​ແກ້​ໄຂ​ຄວາມ​ຫຍຸ້ງຍາກ​ດ້ານ​ເສດຖະກິດ​ມະຫາ​ພາກ ກໍ​ຄື​ການຈັດຕັ້ງ​ປະຕິບັດ​ແຜນ​ພັດທະນາ​ເສດ​ຖະ​ກິດ​-​ສັງຄົມ, ແຜນ​ງົບ​ປະ​ມານ​-​ເງິນຕາ ແນໃສ່ສ້າງ​ຄວາມ​ໜັກ​ແໜ້ນ, ເຂັ້ມແຂງ ແລະ ເປັນ​ລະບົບໃຫ້​ແກ່​ພື້ນຖານ​ເສດຖະກິດ​ແຫ່ງ​ຊາດ.

    ໃນ​ຕອນ​ທ້າຍຂອງກອງປະຊຸມຄັ້ງນີ້ໄດ້ມີພິທີ ມອບໃບຢັ້ງຢືນຮັບຮອງເປັນ ໜ່ວຍພັກ ປອດໄສ, ເຂັ້ມແຂງ,     ໜັກແໜ້ນ ປີ 2019 ໃຫ້ບັນດາຮາກຖານພັກ, ໜ່ວຍພັກ, ໜ່ວຍພັກທີຂື້ນກັບຄະນະພັກຮາກຖານ ມີ 10 ຮາກຖານ ທີຍາດໄດ້ຜົນງານໃນການຈັດຕັ້ງຜັນຂະຫຍາຍ, ການນຳພາຊີ້ນຳ, ລະບອບແບບແຜນວິທີເຮັດວຽກ ຍົກ​ສູງ​ຄວາມ​ເປັນ​ເຈົ້າ​ການ ແລະ ຄວາມ​ສາມາດ​ໃນ​ການ​ນໍາ​ຂອງ​ວຽກ​ງານ​ຂອງ​ຕົນ.

ໃນ​ຕອນ​ທ້າຍຂອງກອງປະຊຸມຄັ້ງນີ້ໄດ້ມີພິທີ ມອບໃບຢັ້ງຢືນຮັບຮອງເປັນ ໜ່ວຍພັກ ປອດໄສ, ເຂັ້ມແຂງ,     ໜັກແໜ້ນ ປີ 2019 ໃຫ້ບັນດາຮາກຖານພັກ, ໜ່ວຍພັກ, ໜ່ວຍພັກທີຂື້ນກັບຄະນະພັກຮາກຖານ ມີ 10 ຮາກຖານ ທີຍາດໄດ້ຜົນງານໃນການຈັດຕັ້ງຜັນຂະຫຍາຍ, ການນຳພາຊີ້ນຳ, ລະບອບແບບແຜນວິທີເຮັດວຽກ ຍົກ​ສູງ​ຄວາມ​ເປັນ​ເຈົ້າ​ການ ແລະ ຄວາມ​ສາມາດ​ໃນ​ການ​ນໍາ​ຂອງ​ວຽກ​ງານ​ຂອງ​ຕົນ.

ກອງປະຊຸມເປີດກວ້າງປະກອບຄໍາເຫັນ ໃສ່ດໍາລັດວ່າດ້ວຍການປັບໃໝ ແລະ ມາດຕະການຕໍ່ຜູ້ລະເມີດກົດໝາຍ ແລະ ລະບຽບການກ່ຽວກັບ ການຈະລາຈອນທາງບົກ

    ກອງປະຊຸມເປີດກວ້າງ ເພື່ອປະກອບຄໍາເຫັນ ໃສ່ຮ່າງດໍາລັດ ວ່າດ້ວຍ ການປັບໃໝ ແລະ ມາດຕະການຕໍ່ຜູ້ລະເມີດ ກົດໝາຍ ແລະ ລະບຽບການກ່ຽວກັບ ການຈະລາຈອນທາງບົກ ແລະ ປະກອບຄໍາເຫັນໃສ່ ຂໍ້ຕົກລົງ ວ່າດ້ວຍການຈັດຕັ້ງ ແລະ ເຄື່ອນໄຫວ ຂອງເຈົ້າໜ້າທີ່ກວດກາ ການຂົນສົ່ງທາງບົກ ໄດ້ ຈັດຂື້ນໃນວັນທີ 2 ກັນຍາ 2020 ຢູ່ທີແຂວງສະຫວັນນະເຂດ, ໂດຍການເປັນປະທານຂອງ ທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງ ຍທຂ ແລະ  ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງໆ ສະຫວັນນະເຂດ, ໂດຍການເຂົ້າຮ່ວມມີຜູ້ຕາງໜ້າຈາກຫ້ອງວ່າການ ສໍານັກງານນາຍົກລັດຖະມົນຕີ, ກະຊວງຍຸດຕິທໍາ, ກະຊວງປ້ອງກັນຄວາມສະຫງົບ, ອົງການທຽບເທົ່າ, ຫ້ອງວ່າການແຂວງ, ບັນດາກົມ, ກອງ, ຫ້ອງການ, ພະແນກ ຍທຂ ແຂວງ ທົ່ວປະເທດ ແລະ ພາກສ່ວນ ອື່ນໆ ທີ່ກ່ຽວຂ້ອງເຂົ້າຮ່ວມ.

    ປະຈຸບັນ ວຽກງານການຂົນສົ່ງທາງບົກ ນັບມື້ມີການຂະຫຍາຍຕົວຢ່າງຕໍ່ເນື່ອງ ແຕ່ຍັງຂາດການຄຸ້ມຄອງທີ່ມີປະສິດທິຜົນ ລວມທັງວຽກງານການຈະລາຈອນທາງບົກ, ມາດຕະການຕໍ່ຜູ້ລະເມີດກົດໝາຍ ແລະ ລະບຽບການກ່ຽວກັບການຈະລາຈອນທາງບົກ. ຖ້າຫາກວຽກງານການຂົນສົ່ງ ແລະ ວຽກງານ ການຈະລາຈອນ ຂາດການຄຸ້ມຄອງຢ່າງເປັນລະບົບ ຈະເຮັດໃຫ້ລັດເສຍລາຍຮັບຢ່າງມະຫາສານ, ສະນັ້ນ ກະຊວງ ຍທຂ ຈຶ່ງມີຄວາມຈໍາເປັນຈະຕ້ອງໄດ້ ຄຸ້ມຄອງວຽກງານດັ່ງກ່າວ ເພື່ອໃຫ້ມີຄວາມສະດວກ, ປອດໄພ ແລະ ໂລ່ງລ່ຽນ.  ຕໍ່ບັນຫາດັ່ງກ່າວ ກະຊວງ ຍທຂ ຈຶ່ງມີຄວາມຈໍາເປັນ ຕ້ອງໄດ້ສ້າງ ແລະ ປັບປຸງນິຕິກໍາ ເພື່ອຮອງຮັບ ແລະ ເປັນບ່ອນອີງໃນການຄຸ້ມຄອງວຽກງານດັ່ງກ່າວ ໃຫ້ແທດເໝາະ ແລະ ສົມຄູ່ກັບສະພາບການ ຂະ ຫຍາຍຕົວທາງດ້ານເສດຖະກິດໃນປະຈຸບັນ.

    ດໍາລັດ ວ່າດ້ວຍການປັບໃໝ ແລະ ມາດຕະການຕໍ່ຜູ້ລະເມີດລະບຽບຈະລາຈອນ ສະບັບເລກທີ 188/ນຍ, ລົງວັນທີ 03/07/2007 ໄດ້ຈັດຕັ້ງປະຕິບັດມາເປັນເວລາເກືອບ 14 ປີ ຊຶ່ງນິຕິກໍາດັ່ງກ່າວໄດ້ເປັນເຄື່ອງມືທີ່ສໍາຄັນ ແລະ ເປັນບ່ອນອີງໃຫ້ແກ່ເຈົ້າໜ້າທີ່ ໃນການກວດກາ, ປັບໃໝ ແລະ ສຶກສາອົບຮົມ ຕໍ່ຜູ້ລະເມີດກົດໝາຍ ແລະ ລະບຽບການ ກ່ຽວກັບການຈະລາຈອນທາງບົກ, ເຮັດໃຫ້ວຽກງານດັ່ງກ່າວມີຄວາມເປັນລະບຽບຮຽບຮ້ອຍໃນລະດັບໜຶ່ງ,  ແຕ່ຍ້ອນ ທີ່ຜ່ານມາ ເສດຖະກິດຂອງ ສປປ ລາວ ມີບາດກ້າວຂະຫຍາຍຕົວໃນລະດັບດີພໍສົມຄວນ, ປະຊາຊົນມີລາຍຮັບເພີ່ມຂຶ້ນ, ຈໍານວນພາຫະນະທີ່ຂຶ້ນທະບຽນກໍໄດ້ເພີ່ມຂຶ້ນໃນແຕ່ລະປີປະມານ 14%,  ຜູ້ໃຊ້ລົດໃຊ້ຖະໜົນກໍເພີ່ມຂຶ້ນ.  ຄຽງຄູ່ກັບການເພີ່ມຂຶ້ນຂອງຍານພາຫະນະນັ້ນ ຜູ້ລະເມີດ ກົດໝາຍ ແລະ ລະບຽບການກ່ຽວກັບການຈະລາຈອນທາງບົກ ກໍເພີ່ມຂຶ້ນເຊັ່ນດຽວກັນ. ສະນັ້ນ ກະຊວງ ຍທຂ ຈຶ່ງມີຄວາມຈໍາເປັນ ຕ້ອງໄດ້ປັບປຸງ ດໍາລັດ ວ່າດ້ວຍ ການປັບ ໃໝ ແລະ ມາດຕະການຕໍ່ຜູ້ລະເມີດ ກົດໝາຍ ແລະ ລະບຽບການກ່ຽວກັບ ການຈະລາຈອນທາງບົກ ເພື່ອໃຫ້ສອດຄ່ອງກັບການຂະຫຍາຍຕົວ ທາງດ້ານເສດຖະກິດ ໃນປະຈຸບັນ, ສໍາລັບເຈົ້າໜ້າທີ່ກວດກາການຂົນສົ່ງທາງບົກ ຍັງບໍ່ທັນໄດ້ສ້າງຕັ້ງ ແລະ ບໍ່ທັນມີລະບຽບການໃດ ເພື່ອຄຸ້ມຄອງວຽກງານດັ່ງກ່າວ, ຮ່າງ ດໍາລັດ ວ່າດ້ວຍ ການປັບໃໝ ແລະ ມາດຕະການຕໍ່ຜູ້ລະເມີດ ກົດໝາຍ ແລະ ລະບຽບການກ່ຽວກັບ ການຈະລາຈອນທາງບົກ ສະບັບປັບປຸງ ແລະ ຂໍ້ຕົກລົງ ວ່າດ້ວຍການຈັດຕັ້ງ ແລະ ເຄື່ອນໄຫວ ຂອງເຈົ້າໜ້າທີ່ກວດກາ ການຂົນສົ່ງທາງບົກ ກະຊວງ ໂຍທາທິການ ແລະ ຂົນສົ່ງ ແມ່ນໄດ້ແຕ່ງຕັ້ງຄະນະຮັບຜິດຊອບຊີ້ນໍາ, ອະນຸກໍາມະການເນື້ອໃນ ແລະ ໄດ້ຮ່າງສໍາເລັດໂດຍພື້ນຖານ.  ມື້ນີ້ ກະຊວງ ຍທຂ ໄດ້ເຊື້ອເຊີນ ບັນດາທ່ານທັງໝົດ ເພື່ອເຂົ້າຮ່ວມກອງປະຊຸມເພື່ອ ປະກອບຄໍາຄິດຄໍາເຫັນ ໃສ່ຮ່າງດໍາລັດ ແລະ ຂໍ້ຕົກລົງດັ່ງກ່າວ ເພື່ອໃຫ້ ມີເນື້ອໃນລະອຽດ, ຄົບຖ້ວນ, ສົມເຫດສົມຜົນ ແລະ ເພື່ອໃຫ້ສອດຄ່ອງສະພາບການຂະຫຍາຍຕົວທາງດ້ານເສດຖະກິດໃນປະຈຸບັນ.  ຫຼັງຈາກນັ້ນ ກະຊວງ ຍທຂ ຈະໄດ້ນໍາເອົາຄໍາສະເໜີ ແລະ ຄໍາຄິດຄໍາເຫັນ ຈາກບັນດາທ່ານ ໄປພິຈາລະນາ ເພື່ອປັບປຸງໃຫ້ສົມບູນ ແລະ ຈະນໍາສະເໜີຂັ້ນເທິງ ພິຈາລະນາຮັບຮອງ.

Additional information