ຂ່າວພາຍໃນກະຊວງ
ພິທີເປີດຊຸດຝຶກອົບຮົມທິດສະດີການເມືອງ ແລະ ການປົກຄອງ ຊຸດທີ 24 ຂອງກະຊວງ ໂຍທາທິການ ແລະ ຂົນສົ່ງ, ທີ່ ສະຖາບັນ ໂຍທາທິການ ແລະ ຂົນສົ່ງ
ກະຊວງໂຍທາທິການ ແລະ ຂົນສົ່ງ ໄດ້ໄຂຊຸດຝຶກອົບຮົມທິດສະດີການເມືອງ ແລະ ການປົກຄອງ ຊຸດທີ 24 ຂຶ້ນ ຢ່າງເປັນທາງການ ໃຫ້ແກ່ພະນັກງານຫຼັກແຫຼ່ງ ແລະ ພະນັກງານສະມາຊິກພັກ ໃຫ້ກັບບັນດາກົມກອງ, ສະຖາບັນ ແລະ ລັດວິສາຫະກິດ ອ້ອມຂ້າງກະຊວງ ໂຍທາທິການ ແລະ ຂົນສົ່ງ, ຫຼັກສູດຝຶກອົບຮົມດັ່ງກ່າວໄດ້ຈັດຂຶ້ນຢູ່ທີ່ ສະຖາບັນ ຍທຂ (ຫຼັກ 19).
ຊຸດຝຶກອົບຮົມດັ່ງກ່າວນີ້ ຈະໃຊ້ເວລາ 50 ວັນ ຫຼື 10 ອາທິດເຕັມ ຊຶ່ງຈະເລີ້ມແຕ່ ວັນທີ 26 ເດືອນ ກັນຍາ ຈົນໄປຮອດ ວັນທີ 01 ເດືອນ ທັນວາ 2022 ຈຶ່ງຈະສຳເລັດ. ໃນຊຸດຮຽນນີ້ ມີນັກສຳມະນາກອນເຂົ້າຮ່ວມທັງໝົດ 33 ສະຫາຍ, ຍິງ 09 ສະຫາຍ ຊື່ງມາຈາກ ບັນດາຫ້ອງການ, ກົມກອງ, ສະຖາບັນ ພະແນກ ຍທຂ ນະຄອນຫຼວງ ແລະ ລັດວິສາຫະກິດ ອ້ອມຂ້າງ ກະຊວງ ຍທຂ.
ໃນການຈັດຝຶກອົບຮົມຄັ້ງນີ້ ຄາດວ່າຈະມີ ອາຈານເຂົ້າຮ່ວມສິດສອນທັງໝົດ ຈຳນວນ 33 ສະຫາຍ, ຍີງ 10 ສະຫາຍ. ຊຶ່ງຄູອາຈານທັງໝົດ ແມ່ນມາຈາກສະຖາບັນການເມືອງ ແລະ ການປົກຄອງແຫ່ງຊາດ, ນອກຈາກນັ້ນ ກໍຍັງຈະມີ ຄະນະພັກ ຄະນະນໍາ ກະຊວງໂຍທາທິການ ແລະ ຂົນສົ່ງ, ກະຊວງ ປ້ອງກັນຊາດ, ປ້ອງກັນຄວາມສະຫງົບ ແລະ ບັນດາກົມອ້ອມຂ້າງ ກະຊວງ ຂອງ ກະຊວງ ຍທຂ ຂອງພວກເຮົາ ຈະໄດ້ໃຫ້ກຽດມາຂຶ້ນຫ້ອງໃນບາງຫົວຂໍ້ຕື່ມ ອັນຈະເຮັດໃຫ້ການຝຶກອົບຮົມໃນຄັ້ງນີ້ ມີເນື້ອໃນໜັກແໜ້ນຂື້ນຕື່ມ.
ຫຼັກສູດທິດສະດີການເມືອງ ແລະ ການປົກຄອງ ນີ້ປະກອບມີ 5 ພາກສ່ວນໃຫຍ່ ແລະ ມີບົດຮຽນທັງໝົດ ຢູ່ 39 ບົດ ເຊັ່ນ:
· ພາກວິຊາ ປັດສະຍາ, ມີ 8 ບົດ.
· ພາກວິຊາ ເສດຖະສາດການເມືອງ, ມີ 10 ບົດ.
· ພາກວິຊາ ລັດທິສັງຄົມນິຍົມ ວິທະຍາສາດ, ມີ 8 ບົດ.
· ພາກວິຊາ ບໍລິຫານສາດ, ມີ 8 ບົດ.
· ພາກວິຊາ ກໍ່ສ້າງພັກ, ມີ 5 ບົດ.
ການຝຶກອົບຮົມຄັ້ງນີ້ ຈະປະກອບມີຫຼາຍກິດຈະກຳເຊັ່ນ: ການຮ່ຳຮຽນທິດສະດີຢູ່ຫ້ອງຮຽນ, ການຄົ້ນຄວ້າລວມຫ້ອງ, ການຄົ້ນຄວ້າເປັນໜ່ວຍ, ການໄປທັດສະນະສຶກສາຢ້ຽມຢາມສະຖານທີ່ສຳຄັນຕ່າງໆ ເຊັ່ນ: ຫໍພິພິດຕະພັນຂອງອະດີດຜູ້ນຳ ແລະ ໄປຖອດຖອນບົດຮຽນນຳຫົວໜ່ວຍຜະລິດເປັນສິນຄ້າ ຫຼື ຫົວໜ່ວຍບໍລິການຕ່າງໆ, ການຂຽນບົດ ແລະ ຜ່ານບົດເປັນໜ່ວຍ ພ້ອມທັງການຮັບລາຍງານສ່ອງແສງ ແລະ ແກ້ໄຂຂໍຂ້ອງໃຈຕ່າງໆ.