ຍທຂ ທາບທາມບຸກຄະລາກອນ ທີ່ຈະສະໝັກເລືອກຕັ້ງເຂົ້າໃນຄະນະບໍລິຫານງານພັກກະຊວງ ສະໄໝທີ VI (ຄັ້ງທີ I)

ໃນວັນທີ 14 ສິງຫາ 2025 ກະຊວງ ໂຍທາທິການ ແລະ ຂົນສົ່ງ (ຍທຂ) ໄດ້ຈັດກອງປະຊຸມທາບທາມບຸກຄະລາກອນ ທີ່ຈະອອກສະໝັກຮັບເລືອກຕັ້ງເຂົ້າໃນຄະນະບໍລິຫານງານພັກກະຊວງ ໂຍທາທິການ ແລະ ຂົນສົ່ງ ສະໄໝທີ VI (ຮອບທີ I) ຂຶ້ນ, ທີ່ສູນ ICTC. ໂດຍການເປັນປະທານຂອງສະຫາຍ ເຫຼັກໄຫຼ ສີວິໄລ ເລຂາຄະນະບໍລິຫານງານ ພັກ ກະຊວງ ຍທຂ, ລັດຖະມົນຕີກະຊວງ ຍທຂ, ມີບັນດາສະຫາຍ ຄະນະປະຈໍາພັກກະຊວງ, ກໍາມະການພັກກະຊວງ ຍທຂ, ຄະນະຮັບຜິດຊອບ ບຸກຄະລາກອນຂັ້ນສູນກາງ ແລະ ບັນດາຄະນະໜ່ວຍພັກຮາກຖານ ແລະ ບັນດສະມາຊິກພັກ ອ້ອມຂ້າງກະຊວງເຂົ້າຮ່ວມ.

ສະຫາຍ ເຫຼັກໄຫຼ ສີວິໄລ ເລຂາຄະນະບໍລິຫານງານ ພັກ ກະຊວງ ຍທຂ ກ່າວບາງຕອນວ່າ: ກອງປະຊຸມທາບທາມບຸກຄະລາກອນ ທີ່ຈະອອກສະໝັກຮັບເລືອກຕັ້ງ ເຂົ້າໃນຄະນະບໍລິຫານງານພັກກະຊວງ ໂຍທາທິການ ແລະ ຂົນສົ່ງ ສະໄໝທີ VI ຮອບທີ I ຂຶ້ນ, ຈຸດປະສົງແມ່ນ ເພື່ອດໍາເນີນການທາບທາມເປີດກ້ວາງ ເລືອກເຟັ້ນເອົາເປົ້າໝາຍບຸກຄະລາກອນ ຈະລົງສະໝັກເລືອກຕັ້ງເປັນຄະນະບໍລິຫານງານພັກກະຊວງ ໂຍທາທິການ ແລະ ຂົນສົ່ງ ຊຸດໃໝ່ ສະໄໝທີ VI ເຊິ່ງການທາບທາມຈະໄດ້ດໍາເນີນເປັນ 3 ຮອບ.

ການທາບທາມເລືອກເຟັ້ນເອົາບຸກຄະລາກອນເຂົ້າສະໝັກເປັນຄະນະພັກກະຊວງ ຂອງ ພວກເຮົາແມ່ນມີຄວາມສໍາຄັນຫຼາຍ ເນື່ອງຈາກຈະເປັນຄະນະຜູ້ສືບຕໍ່ນໍາພາກະຊວງພວກເຮົາໃນ 5 ປີຕໍ່ໜ້າ, ໝາຍຄວາມວ່າ: ສະຕາກໍາຂອງກະຊວງ, ຄວາມກ້າວໜ້າຂອງສະມາຊິກພັກ-ພະນັກງານ ຈະມີຄວາມກ້າວໜ້າ, ວຽກງານກະຊວງເຮົາມີຜົນສໍາເລັດໜ້ອຍ-ຫຼາຍຊ່ໍາໃດ, ຄວາມສາມັກຄີຈະດີຮ້າຍແນວໃດ, ປະກົດການຫຍໍ້ທໍ້ຈະຖືກແກ້ໄຂ ຫຼື ຈະເກີດປະກົດການຫຍໍ້ທໍ້ເພີ່ມຕື່ມ ແມ່ນຂຶ້ນກັບບຸກຄົນຄະນະພັກກະຊວງ ທີ່ບັນດາສະຫາຍ ຈະເລືອກເຟັ້ນຈາກຮອບທີ I ເປັນພື້ນຖານໃຫ້ແກ່ ຮອບທີ II, ຮອບທີ III ແລະ ກອງປະຊຸມໃຫຍ່ ຜູ້ແທນ ຄັ້ງທີ VI ຂອງອົງຄະນະພັກກະຊວງ.

ເພື່ອຮັບປະກັນໃຫ້ແກ່ການເລືອກເຟັ້ນເອົາບຸກຄະລາກອນ ເຂົ້າສະໝັກເປັນຄະນະບໍລິຫານງານພັກກະຊວງ ສະໄໝທີ VI ນັ້ນ, ຂ້າພະເຈົ້າຂໍຮຽກຮ້ອງມາຍັງບັນດາຮາກຖານທີ່ເຂົ້າຮ່ວມກອງປະຊຸມທາບທາມ ຮອບທີ I ນີ້ ໃຫ້ມີຄວາມຮັບຜິດຊອບທາງດ້ານການເມືອງສູງ, ຕັດສິນໃຈເລືອກເຟັ້ນເອົາບຸກຄະລາກອນ ທີ່ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຄວາມຮູ້ຄວາມສາມາດດ້ານວິຊາການໃດໜຶ່ງທີ່ແນ່ນອນ, ມີຄວາມຮັບຜິດຊອບສູງຕໍ່ໜ້າທີ່ວຽກງານທີ່ຖືກມອບໝາຍ, ເຄົາລົບນັບຖືຄໍາຄິດຄໍາເຫັນຂອງໝູ່ຄະນະ ແລະ ມະຫາຊົນ, ປະຕິບັດລະບອບແບບແຜນວິທີເຮັດວຽກ ແບບລວມສູນປະຊາທິປະໄຕຂອງພັກ, ຕົກລົງບັນຫາເປັນໝູ່ຄະນະປະຕິບັດລະບຽບການ ແລະ ກົດໝາຍເຂັ້ມງວດ ແລະ ຂໍໃຫ້ຫຼີກເວັ້ນແນວຄິດອັກຄະຕິສ່ວນຕົວຕໍ່ກັນ ເຊິ່ງຈະນໍາພາໄປສູ່ການສ້າງຜົນເສຍຫາຍໃຫ້ແກ່ບຸກຄະລາກອນທີ່ມີຄວາມຮູ້ຄວາມສາມາດ ເຮັດໃຫ້ຂາດໂອກາດເຂົ້າຮ່ວມເປັນຄະນະພັກກະຊວງພວກເຮົາ.