ຍທຂ ເຊັນ (MOU) ກັບ ນວ ຮ່ວມມືວຽກງານຕິດພັນຂະແໜງ ຍທຂ

ພິທີເຊັນບົດບັນທຶກຄວາມເຂົ້າໃຈ (MOU) ວ່າດ້ວຍການຮ່ວມມືວຽກງານທີ່ຕິດພັນກັບຂະແໜງໂຍທາທິການ ແລະ ຂົນສົ່ງ ລະຫວ່າງ ກະຊວງໂຍທາທິການ ແລະ ຂົນສົ່ງ (ຍທຂ) ແລະ ອົງການປົກຄອງນະຄອນຫຼວງວຽງຈັນ (ນວ) ຈັດຂຶ້ນວັນທີ 23 ສິງຫານີ້ ທີ່ຫ້ອງວ່າການ ນວ ຮ່ວມລົງນາມໃນຄັ້ງນີ້, ລະຫວ່າງທ່ານ ເຫຼັກໄຫຼ ສີວິໄລ ລັດຖະມົນຕີ ກະຊວງ ຍທຂ ແລະ ທ່ານ ອາດສະພັງທອງ ສີພັນດອນ ເຈົ້າຄອງ ນວ, ມີບັນດາຮອງລັດຖະມົນຕີ, ຮອງເຈົ້າຄອງ, ຫົວໜ້າກົມ-ຮອງກົມ ຫົວໜ້າພະແນກ, ຮອງພະແນກ ແລະ ຂະແໜງການທີ່ກ່ຽວຂ້ອງສອງຝ່າຍເຂົ້າຮ່ວມ.

ຈຸດປະສົງການເຊັນບົດບັນທຶກໃນຄັ້ງນີ້, ເພື່ອເປັນການສືບຕໍ່ຈັດຕັ້ງຜັນຂະຫຍາຍມະຕິຂອງກົມການເມືອງສູນກາງພັກ ວ່າດ້ວຍການພັດທະນານະຄອນຫຼວງໃນໄລຍະໃໝ່, ມະຕິ 04/ກມສພ ວ່າດ້ວຍ ການສ້າງເສດຖະກິດເອກະລາດເປັນເຈົ້າຕົນເອງ (ສອຈ), ແຜນພັດທະນາເສດຖະກິດ-ສັງຄົມຂອງ ສປປ ລາວ ຕິດພັນກັບການຈັດຕັ້ງປະຕິບັດສອງວາລະແຫ່ງຊາດວ່າດ້ວຍການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ສ້າງຂຶ້ນເພື່ອກະຕຸກຊຸກຍູ້ວຽກງານໃນຂະແໜງ ຍທຂ ຢູ່ ນວ ຊຶ່ງເປັນເມືອງຫຼວງ ແລະ ເມືອງເອກຂອງ ສປປ ລາວ ໃຫ້ໄປຕາມທິດທາງພັດທະນາ ໃຫ້ເປັນນະຄອນໜ້າຢູ່ ໃຫ້ບັນລຸຕົວຊີ້ວັດ (6 ສ) ຂອງ ນວ.

ພ້ອມນີ້, ປະຕິບັດບັນດາໜ້າທີ່ຕົ້ນຕໍຂອງການພັດທະນາ ນວ ໂດຍສະເພາະດ້ານການພັດທະນາຕົວເມືອງ. ສໍາລັບຂອບເຂດຂອງການຮ່ວມມືທັງສອງຝ່າຍຕົກລົງເຫັນດີຮ່ວມມືກັນຄື: ວຽກຂົວທາງ: ກໍ່ສ້າງ ບູລະນະຮັກສາ ແລະ ສ້ອມແປງທາງພາຍໃນ ນວ, ວຽກເຄຫາ ແລະ ຜັງເມືອງ: ການປັບປຸງ ແລະ ພັດທະນາແຜນຜັງລວມ, ແຜນຜັງລະອຽດໃນແຕ່ລະໄລຍະຕາມເງື່ອນໄຂການຂະຫຍາຍຕົວທາງດ້ານເສດຖະກິດ-ສັງຄົມຂອງ ນວ, ວຽກຄຸ້ມຄອງ ແລະ ຈັດການສິ່ງເສດເຫຼືອ (ຂີ້ເຫຍື້ອ), ຄົ້ນຄວ້າປັບປຸງ ລະບົບລະບາຍນໍ້າພາຍໃນຕົວເມືອງ ທັງສະເພາະໜ້າ ແລະ ຍາວນານ, ວຽກປັບປຸງສິ່ງແວດລ້ອມຕົວເມືອງ; ວຽກຂົນສົ່ງ: ລະບົບການຂົນສົ່ງໂດຍສານໃນຕົວເມືອງ ແລະ ການຂົນສົ່ງສາທາລະນະ ລວມທັງການແກ້ໄຂບັນຫາລະບົບໄຟອຳນາດ ພາຍໃນຕົວເມືອງ ນວ, ວຽກງານໂລຊິດສະຕິກ ການຂົນສົ່ງສິນຄ້າ, ວຽກຄຸ້ມຄອງພາຫະນະ ແລະ ການຂັບຂີ່; ວຽກນ້ຳປະປາ ແລະ ບຳບັດນ້ຳເປື້ອນ: ຄົ້ນຄວ້າສ້າງແຜນແມ່ບົດຮ່ວມກັນໃນການພັດທະນາ ແລະ ສະໜອງນໍ້າປະປາໃຫ້ພຽງພໍກັບການຊົມໃຊ້ຂອງປະຊາຊົນ ກຳນົດເປັນທິດທາງໃນການແກ້ໄຂທັງສະເພາະໜ້າ ແລະ ຍາວນານ ຮ່ວມກັນຄົ້ນຄວ້າຮັກສາແຫຼ່ງນໍ້າດິບທີ່ມີ ເພື່ອໃຫ້ຍືນຍົງ ແລະ ສະຫງວນຕອນດິນໄວ້ເພື່ອຂະຫຍາຍລະບົບໂຮງງານນໍ້າປະປາໃນອະນາຄົດ, ຄົ້ນຄວ້າສ້າງລະບົບຄຸ້ມຄອງນໍ້າເປື້ອນໃນຕົວເມືອງໄປຄຽງຄູ່ກັບການສ້າງລະບົບລະບາຍນໍ້າໃນຕົວເມືອງ; ວຽກທາງນໍ້າ: ການປ້ອງກັນຕາຝັ່ງເຈື່ອນລຽບຕາມແມ່ນໍ້າຂອງ, ນໍ້າສາຂາ ແລະ ດອນ ລວມທັງການປ້ອງກັນນໍ້າ, ການແກ້ໄຂບັນຫາການຊຸດຄົ້ນຫີນແຮ່ຊາຍ ແລະ ບັນຫາທີ່ຕິດພັນກັບການຂຸດຄົ້ນແຮ່ຄຳຕົກຂ້ອນ ການແບ່ງຂັ້ນຄຸ້ມຄອງໃນການອອກອະນຸຍາດການດຳເນີນທຸລະກິດ ໃນຂະແໜງໂຍທາທິການ ແລະ ຂົນສົ່ງ, ວຽກງານສ້າງຂີດຄວາມສາມາດດ້ານບຸກຄະລະກອນ ໃຫ້ແກ່ຂະແໜງໂຍທາທິການ ແລະ ຂົນສົ່ງ ຢູ່ ນວ. ການຮ່ວມມືໃນຄັ້ງນີ້, ມີໄລຍະເວລາໃນການຈັດຕັ້ງປະຕິບັດ ເລີ່ມແຕ່ວັນທີ 23 ສິງຫາ 2025 ຫາ ວັນທີ 31 ມີນາ 2028.