ທ່ານ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ພົບປະ ໂອລົມ ພະນັກງານ ຍທຂ ແຂວງອຸດົມໄຊ

ໃນໂອກາດລົງຕິດຕາມຊຸກຍູ້ວຽກງານ ຢູ່ແຂວງ ອຸດົມໄຊ ທ່ານ ເຫຼັກໄຫຼ ສີວິໄລ ລັດຖະມົນຕີກະຊວງ ໂຍທາທິການ ແລະ ຂົນສົ່ງ (ຍທຂ) ໄດ້ພົບປະໂອລົມ ພະນັກງານ ຍທຂ ແຂວງອຸດົມໄຊ ໃນວັນທີ 11 ສິງຫາ 2025 ທີ່ພະແນກ ຍທຂ ແຂວງ ອຸດົມໄຊ.

ໃນພິທີ ທ່ານ ຄໍາແສງ ອາລີ ຫົວໜ້າພະແນກ ຍທຂ ແຂວງ ອຸດົມໄຊ ໄດ້ກ່າວຕ້ອນຮັບ ແລະ ລາຍງານ ສະພາບການຈັດຕັ້ງ ຜົນຂະຫຍາຍ ມະຕິກອງປະຊຸມໃຫຍ່ ຄັ້ງທີ IX ຂອງອົງ ຄະນະພັກແຂວງ ອຸດົມໄຊ ແລະ ມະຕິ ກອງປະຊຸມໃຫຍ່ ຄັ້ງທີ III ຂອງຄະນະພັກຮາກຖານ ພະແນກ ຍທຂ ແຂວງ ອຸດົມໄຊ ໂດຍສັງເຂບ ຕະຫຼອດໄລຍະທີຜ່ານມາ ອັນພົ້ນເດ່ນແມ່ນໄດ້ນຳພາປັບປຸງກົງຈັກການຈັດຕັ້ງລັດ ຂັ້ນພະແນກ, ຂະແໜງການ, ຫ້ອງການ ຍທຂ ເມືອງ ແລະ ຂັ້ນວິຊາການຈາກ 08 ຂະແໜງ ແລະ 01 ກອງວິຊາການ ໂຮມເຂົ້າກັນເປັນ 06 ຂະແໜງ ແລະ 01 ກອງວິຊາການ; ເອົາໃຈໃສ່ໃນການປະຕິບັດແຜນງົບປະມານທັງພາຍໃນ ແລະ ຕ່າງປະເທດ ເຂົ້າໃນການພັດທະນາໂຄງລ່າງພື້ນຖານໄດ້ທັງໝົດ 218 ໂຄງການ, ມີມູນຄ່າການລົງທຶນທັງໝົດ 151,103,840,000 ກີບ, ເກັບລາຍຮັບເຂົ້າງົບປະມານໄດ້ 4,875,976,000 ກີບ ທຽບໃສ່ແຜນການປະຕິບັດໄດ້ 156.65%; ມາຮອດປະຈຸບັນໃນທົ່ວແຂວງອຸດົມໄຊ ມີເສັ້ນທາງທັງໝົດ 557 ເສັ້ນ, ມີລວງຍາວທັງໝົດ 3,505.58 ກມ; ທາງຫຼວງແຫ່ງຊາດ ຈຳນວນ 02 ເສັ້ນ ມີລວງຍາວ 326.5 ກມ, ທາງຫຼວງແຂວງ ຈໍານວນ 06 ເສັ້ນ, ມີລວງຍາວ 299.02 ກມ, ທາງຫຼວງເມືອງ ຈໍານວນ 19 ເສັ້ນ, ມີລວງຍາວ 636.43 ກມ; ທາງເທດສະບານ ຈໍານວນ 296 ເສັ້ນ, ມີລວງຍາວ 173.40 ກມ; ທາງຊົນນະບົດ ຈໍານວນ 127 ເສັ້ນ, ມີລວງຍາວ 1,181.41 ກມ ແລະ ທາງສະເພາະ ມີຈໍານວນ 126 ເສັ້ນ, ໃນນີ້ ທາງປູເບຕົງ 12.72 ກມ ເພີ່ມຂື້ນ 15.64%; ທາງປູອັດສະຟານ 136.20 ກມ ເພີ່ມຂື້ນ 1.57%; ທາງປູຢາງ 429.30 ກມ ເພີ່ມຂື້ນ 35.43%, ທາງປູແຮ່ 1,385.51 ກມ, ຫຼຸດລົງ 13.53%; ແລະ ທາງດິນແດງທໍາມະຊາດ 1,541.85 ກມ, ຫຼຸດລົງ 9.07%; ເຂົ້າເຖິງບ້ານ, ກຸ່ມບ້ານ ຈຳນວນ 464 ບ້ານ ເທົ່າກັບ 98.31% ໃນຈຳນວນບ້ານທັງໝົດ 472 ບ້ານ ທົ່ວແຂວງອຸດົມໄຊ, ບ້ານທີ່ບໍ່ທັນມີເສັ້ນທາງເຂົ້າເຖິງຍັງຈຳນວນ 08 ບ້ານ ຢູ່ເມືອງປາກແບງ ເທົ່າກັບ 1.69%. 

ພົ້ນເດັ່ນທີສຸດ ແມ່ນເສັ້ນທາງເລກ 2 (2E-2W) ໄດ້ຮັບການຍົກລະດັບ ຕາມມາດຕະຖານທາງຫຼວງອາຊຽນ, ເຮັດໜ້າທີ່ໃນການເຊ່ືອມຈອດຕາໜ່າງເສັ້ນທາງກັບ ອະນຸພາກພື້ນ ເປັນຕົ້ນ: ລາຊາອະນາຈັກໄທ, ພາກເໜືອ ສສ.ຫວຽດນາມ, ພາກໃຕ້ ສປ.ຈີນ, ຊຸກຍູ້ການສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດໄດ້ ຈຳນວນ 02 ບ້ານ ຄື: ບ້ານຫຼັກ 32 ເມືອງໄຊ ແລະ ບ້ານສີບຸນເຮືອງ ເມືອງຮຸນ.
     ທົ່ວແຂວງອຸດົມໄຊ ມີແຜນຜັງລວມທັງໝົດ 07 ຕົວເມືອງ ກວມເອົາ 62 ບ້ານເທດສະບານ, ມີເນື້ອທີ່ໃນການສຳຫຼວດ-ອອກແບບ, ປັບປຸງ ແລະ ວາງແຜນ ຈຳນວນ 14,025.57 ເຮັກຕາ; ຈຸດສຸມ/ກຸ່ມບ້ານພັດທະນາ ທີ່ໄດ້ຮັບການສຳຫຼວດ-ອອກແບບ ແລະ ວາງແຜນຜັງລວມ ໄດ້ຈຳນວນ 07 ຈຸດສຸມ ເທົ່າກັບ 53.84% ໃນ 13 ຈຸດສຸມ/ກຸ່ມບ້ານທັງໝົດ ທີ່ໄດ້ຮັບຮອງເປັນຈຸດສຸມ/ກຸ່ມບ້ານພັດທະນາຂອງແຂວງ (ຕາມຂໍ້ຕົກລົງ ເລກທີ 277/ຈຂ.ອຊ ລົງວັນທີ 29 ມີນາ 2016); ອັນພົ້ນເດັ່ນ ແມ່ນການແກ້ໄຂໂຄງລ່າງພື້ນຖານດ້ານທີ່ຢູ່ອາໄສ ໃຫ້ແກ່ປະຊາຊົນທີ່ໄດ້ຮັບຜົນກະທົບຈາກໄພພິບັດ 03 ເມືອງ ຄື: ເມືອງຮູນ, ເມືອງຫຼາ ແລະ ເມືອງນາໝໍ້ ກວມເອົາ 06 ບ້ານ ທີ່ໄດ້ຮັບຜົນກະທົບຈາກໄພພິບັດທາງທຳມະຊາດ ໃນປີ 2017 ແລະ 2022; ໂຄງການຫຼຸດຜ່ອນຄວາມສ່ຽງໄພພິບັດນ້ຳຖ້ວມ ເທດສະບານເມືອງໄຊ ໄດ້ຮັບການຊຸກຍູ້ ແລະ ຈັດຕັ້ງປະຕິບັດ ມາຮອດປະຈຸບັນ ຄວາມຄືບໜ້າ 97%.

ໃນປະຈຸບັນມີເຮືອທັງໝົດຈຳນວນ 285 ລໍາ, ໃນນີ້ມີເຮືອບໍລິການຂົນສົ່ງສິນຄ້າ ຈໍານວນ 22 ລໍາ, ເຮືອບໍລິການຂົນສົ່ງໂດຍສານ ຈໍານວນ 142 ລໍາ ແລະ ເຮືອອື່ນໆ ຈໍໍານວນ 121 ລໍາ ທຽບໃສ່ ປີ 2021 ຫຼຸດລົງ 01 ລຳ ເທົ່າກັບ 0.54%; ມີທ່າເຮືອທັງໝົດ 25 ແຫ່ງ. ອອກອະນຸຍາດຫົວໜ່ວຍຂຸດຄົ້ນຫີນແຮ່, ຊາຍ ໄດ້ທັງໝົດ ຈຳນວນ 77 ເທື່ອຫົວໜ່ວຍ ໃນນີ້ ຂັ້ນເມືອງອະນຸຍາດໄດ້ 72 ຫົວໜ່ວຍ, ຂັ້ນແຂວງອະນຸຍາດໄດ້ 05 ຫົວໜ່ວຍ ປະຕິບັດໄດ້ 99.59% ຂອງແຜນການ.

ທົ່ວແຂວງອຸດົມໄຊ ມີໂຮງງານຜະລິດນໍ້າປະປາ ທັງໝົດຈຳນວນ 10 ແຫ່ງ, ສາມາດຜະລິດນໍ້າປະປາໄດ້ 23,614,666 ແມັດກ້ອນ ທຽບໃສ່ແຜນປະຕິບັດໄດ້ 107%; ປະຊາຊົນທົ່ວແຂວງໄດ້ເຂົ້າເຖິງລະບົບບໍລິການນໍ້າປະປາແລ້ວ ເທົ່າກັບ 23% ແລະ ເຂົ້າເຖິງການບໍລິການດ້ານສຸຂາພິບານແລ້ວ 87.5%; ປະຊາກອນທີ່ດໍາລົງຊິວິດຢູ່ໃນຕົວເມືອງຈຳນວນ 81.2%, ກວມເອົາ 68 ບ້ານ, ມີ 16,543 ຄົວເຮືອນ ແລະ ປະຊາກອນທີ່ໄດ້ໃຊ້ວິດຖ່າຍແລ້ວມີຈຳນວນ 51,002 ຄົວເຮືອນ.

ໃນພິທີ ທ່ານ ເຫຼັກໄຫຼ ສີວິໄລ ລັດຖະມົນຕີກະຊວງ ຍທຂ ໄດ້ສະແດງຄວາມຊົມເຊີຍຜົນສໍາເລັດທີ່ ຄະນະພັກ, ຄະນະນໍາ ແລະ ພະນັກງານທົ່ວຂະແໜງການ ຍທຂ ໃນການຈັດຕັ້ງ ມະຕິກອງປະຊຸມໃຫຍ່ ຄັ້ງທີ IX ຂອງອົງ ຄະນະພັກແຂວງ ອຸດົມໄຊ ແລະ ມະຕິ ກອງປະຊຸມໃຫຍ່ ຄັ້ງທີ III ຂອງຄະນະພັກຮາກຖານ ພະແນກ ຍທຂ ແຂວງ ຄຽງຄູ່ກັບຜົນສໍາເລັດທີ່ ຍາດມາໄດ້ໃນໄລຍະຜ່ານມາ ອີງຕາມຄວາມຮຽກຮ້ອງຕ້ອງການຂອງວຽກງານໃນໄລຍະໃໝ່ ແຂວງອຸດົມໄຊ ເປັນແຂວງໃຈກາງຂອງພາກເໜືອ , ເປັນແຂວງທາງຜ່ານ ມີທ່າແຮງໃນການເຊື່ອມໂຍງເຊື່ອມຈອດ ມີທ່າແຮງໃນການພັດທະນາ ຂະແໜງອຸດສາຫະກໍາ, ພະລັງງານ , ກະສິກໍາ ແລະ ບໍລິການທ່ອງທ່ຽວ ເຊິ່ງວຽກງານ ຍທຂ ມີຄວາມສໍາຄັນຫຼາຍ ມີບົດບາດຊຸກຍູ້ ການພັດທະນາເສດຖະກິດສັງ-ຄົມ, ແຜນຈຸດສຸມເຮັດໜ້າທີ່ໃນການເຊ່ືອມຈອດຕາໜ່າງເສັ້ນທາງກັບ ອະນຸພາກພື້ນ. ເນັ້ນສະຫາຍ ຫົວໜ້າຂະແໜງ, ການນໍາ ຍທຂ ເມືອງ ຕະຫຼອດຮອດ ພະນັກງານວິຊາການ ເປັນເຈົ້າການ ເອົາໃຈໃສ່ ເຮັດວຽກງານແນວຄິດການເມືອງ, ຂະຫຍາຍສະມາຊິກພັກ - ພະນັກງານ, ສ້າງຄວາມສາມັກຄີ ເປັນເຈົ້າການ ສືບຕໍ່ນໍາພາ ໃນການຄຸ້ມຄອງເສັ້ນທາງ, ຄຸ້ມຄອງຈັດສັນແຜນຜັງຕົວເມືອງ ຄວາມເປັນລະບຽບຮຽບຮ້ອຍ ເຮັດສໍາເລັດໜ້າທີ່ວຽກງານ ທີ່ການຈັດຕັ້ງມອບໝາຍໃຫ້, ເປັນແບບຢ່າງນໍາໜ້າທີ່ດີໃຫ້ແກ່ມະຫາຊົນ. ໂນໂອກາດດັ່ງກ່າວ ທ່ານ ລັດຖະມົນຕີ ກໍ່ໄດ້ມອບ ຄອມໂນດບຸກ 2 ໜ່ວຍ ແລະ ເງິນສົດ 50 ລ້ານກີບ ໃຫ້ພະແນກ ຍທຂ ເພື່ອນໍາໃຊ້ເຂົ້າໃນ ວຽກງານຂະແໜງການຕື່ມອີກ.