ໂຄງການບໍາບັດນໍ້າເປື້ອນ ນວ ຫຼາຍໜ້າວຽກມີຄວາມຄືບໜ້າ

      ໃນວັນທີ 23 ສິງຫາຜ່ານມາ, ທ່ານ ເຫຼັກໄຫຼ ສີວິໄລ ລັດຖະມົນຕີ ກະຊວງ ໂຍທາທິການ ແລະ ຂົນສົ່ງ (ຍທຂ) ພ້ອມຄະນະ ແລະ ອົງການປົກຄອງນະຄອນຫຼວງວຽງຈັນ (ນວ) ນໍາໂດຍທ່ານ ສິລິລາດ ທົງສິນທອງເພັງ ຮອງເຈົ້າຄອງ ນວ ລົງຢ້ຽມຢາມໂຄງການບໍາບັດນໍ້າເປື້ອນ ນວ ຢູ່ ບ້ານຂາມງອຍ ເມືອງໄຊເສດຖາ ໂດຍທ່ານ ກໍລະກັນ ເສນບຸດຕະລາດ ຫົວໜ້າໂຄງການບໍາບັດນໍ້າເປື້ອນ ນວ ພ້ອມດ້ວຍພະນັກງານກ່ຽວຂ້ອງຂອງໂຄງການໃຫ້ການຕ້ອນຮັບ.

         ໂອກາດນີ້, ທ່ານ ທິນນະກອນ ພິມມະວົງ ວິຊາການຂະແໜງທາງນໍ້າ ພະແນກໂຍທາທິການ ແລະ ຂົນສົ່ງ ນວ ຄະນະຈັດຕັ້ງປະຕິບັດໂຄງການບໍາບັດນໍ້າເປື້ອນ ນວ ໄດ້ລາຍງານຄວາມຄືບໜ້າໂຄງການວ່າ: ມາຮອດປັດຈຸບັນວຽກກໍ່ສ້າງລະບົບບໍາບັດນໍ້າເປື້ອນ ນວ ປະຕິບັດໄດ້ 89.57%, ການກໍ່ສ້າງໂຄງສ້າງອ່າງດັກຂີ້ເຫຍື້ອ ແລະ ກອງຊາຍ, ອ່າງບໍາບັດ, ອ່າງປັບຄວາມຂຸ້ນຂອງຕະກອນເບີ 1.2, ອ່າງແຍກຕະກອນ, ອ່າງຂ້າເຊື້ອດ້ວຍລັງສີຢູວີ, ອາຄານຕາກແຫ້ງຕະກອນເບີ 1.2 ແລະ ອາຄານຫ້ອງການ, ຫ້ອງທົດລອງ ມີຄວາມຄືບໜ້າ 86.53%; ກໍ່ສ້າງວາງທໍ່ແຮງດັນ ຂະໜາດທໍ່ 800 ມມ, ຈາກສະຖານີສູບສົ່ງນໍ້າເປື້ອນ (PS15) ເຖິງໂຮງງານບໍາບັດນໍ້າເປື້ອນ ບ້ານຂາມງອຍ ມີຄວາມຍາວ 3,060 ແມັດ, ສຳເລັດການຜະລິດທໍ່ 100% ແລະ ມີຄວາມຄືບໜ້າ 98.80%; ວຽກການກໍ່ສ້າງແລວສາຍທໍ່ ແລະ ສະຖານີສູບສົ່ງນໍ້າເປື້ອນ (PO3.2) ປະກອບມີໜ້າວຽກ: ການວາງທໍ່ AL01 ແມ່ນໄດ້ຕິດຕັ້ງທໍ່ຄໍລູເກດ 5,008 ແມັດ ແລະ 131 ແມນໂຮນ. ສໍາລັບແລວສາຍທໍ່ AL02 ເດືອນສິງຫານີ້ແມ່ນໄດ້ຕິດຕັ້ງທໍ່ຄໍລູເກດ 1,812 ແມັດ ແລະ 51 ແມນໂຮນ, ສ່ວນວຽກການວາງທໍ່ຂ້າມທາງແມ່ນໄດ້ສໍາເລັດແລ້ວ; ສໍາລັບແລວສາຍທໍ່ AL03 ໄດ້ຕິດຕັ້ງທໍ່ຄໍລູເກດ 2,084 ແມັດ ແລະ 63 ແມນໂຮນ ມີຄວາມຄືບໜ້າ 75.28%. ໃນນັ້ນ, ວຽກການກໍ່ສ້າງສະຖານີສູບສົ່ງນໍ້າເປື້ອນ ເຂດພື້ນທີ່ຮ່ອງແຊງ (PO3.3) ປະກອບມີໜ້າວຽກ: ກໍ່ສ້າງສະຖານີສູບສົ່ງນໍ້າເປື້ອນ ເລກທີ 16: ລວມມີຫ້ອງຄວບຄຸມການເຊື່ອຕໍ່ຈາກໄຟຟ້າລາວ, ລະບົບເຕັກໂນໂລຊີ, ແມນໂຮນ ແລະ ກົນຈັກຕ່າງໆ; ວຽກກໍ່ສ້າງຝາຍບ່ຽງນໍ້າ: ລວມມີວຽກດິນ, ວຽກໂຄງສ້າງ ແລະ ອື່ນໆ ທີ່ກ່ຽວຂ້ອງ ຊຶ່ງໄດ້ສໍາເລັດການກໍ່ສ້າງຮາກຖານເບຕົງ ແລະ ແມນໂຮນຮັບນໍ້າ, ສໍາເລັດວຽກຕອກແຜ່ນຝາກັນດິນ, ສໍາເລັດການເທເບຕົງກັນເປື້ອນ. ສໍາລັບສະຖານນີສູບສົ່ງນໍ້າເປື້ອນແມ່ນກຳລັງເທເບຕົງ ແລະ ແມນໂຮນຮັບນໍ້າ ມີຄວາມຄືບໜ້າ 59.43%. ຊຶ່ງມີມູນຄ່າການກໍ່ສ້າງທັງໝົດ 61,241,506.39 ໂດລາ ໂດຍແມ່ນບໍລິສັດ ຝ່າຍ ຮົງກາລີ ເປັນຜູ້ຮັບເໝົາກໍ່ສ້າງ.

ທ່ານ ທິນນະກອນ ພິມມະວົງ ຍັງໃຫ້ຮູ້ຕື່ມວ່າ: ສໍາລັບວຽກນິຕິກໍາການຄຸ້ມຄອງລະບົບບໍາບັດນໍ້າເປື້ອນ ໄດ້ສໍາເລັດການສ້າງລະບຽບການທາງດ້ານເຕັກນິກ ແລະ ຂໍ້ກຳນົດ ເພືື່ອຄຸ້ມຄອງລະບົບບໍາບັດນໍ້າເປື້ອນ ສະບັບ (ຮ່າງ) ແລະ ໄດ້ໄປຮ່ວມທັດສະນະສຶກສາ ເພື່ອຖອດຖອນບົດຮຽນ, ລະບຽບການຄຸ້ມຄອງລະບົບບບັດນໍ້າເປື້ອນທີ່ ປະເທດ ສສ.ຫວຽດນາມ ປັດຈຸບັນກໍາລັງກະກຽມສັງລວມລາຍງານຄືນອົງການປົກຄອງ ນວ ເພື່ອກ້າວໄປສູ່ການສະເໜີຂໍຜ່ານສະພາປະຊາຊົນ ນວ. ນອກນັ້ນ, ຍັງໄດ້ກະກຽມດ້ານໂຄງຮ່າງການຈັດຕັ້ງ ແລະ ບຸກຄະລາກອນຄຸ້ມຄອງລະບົບບໍາບັດດັ່ງກ່າວ, ໄດ້ມີຄວາມເປັນເອກະພາບກັນໃນການແຕ່ງຕັ້ງຄະນະຄຸ້ມລະບົບບໍາບັດນໍ້າເປື້ອນ ໂດຍນໍາໃຊ້ຄະນະວິຊາການຈາກລັດວິສາຫະກິດ, ວິສະວະກໍາ ແລະ ສິ່ງແວດລ້ອມ ເປັນຫຼັກ ເພື່ອເຂົ້າໄປຝຶກອົບຮົມ, ຮຽນຮູ້ລະບົບແຕ່ຫົວທີ ແຕ່ໂຄງຮ່າງການຈັດ ຕັ້ງໃນການຄຸ້ມຄອງ ແມ່ນຈະໄດ້ໄປຂຶ້ນກັບລັດວິສາຫະກິດ ນໍ້າປະປາ ນວ ເພາະຕິດພັນຄ່າທໍານຽມນໍ້າເປື້ອນທີ່ ລັດວິສາຫະກິດ ນໍ້າປະປາ ນວ ຈະເປັນຜູ້ເກັບຕາມໃບບິນການຊົມໃຊ້ນໍ້າປະປາ; ກະກຽມບັນດາເອກະສານເຕັກນິກ, ຄູ່ມືການນໍາໃຊ້ ແລະ ຄຸ້ມຄອງລະບົບໂຮງງານນໍ້າເປື້ອນ, ລະບົບສາຍທໍ່ ແລະ ລະບົບປໍ້າສູບສົ່ງນໍ້າເປື້ອນ.

        ໃນໂອກາດນີ້, ທ່ານ ເຫຼັກໄຫຼ ສີວິໄລ ໄດ້ສະແດງຄວາມຊົມເຊີຍຕໍ່ການຈັດຕັ້ງປະຕິບັດ ທີ່ເຫັນວ່າຫຼາຍໜ້າວຽກມີຄວາມຄືບໜ້າ ແລະ ທ່ານ ໄດ້ມີຄໍາເຫັນຊີ້ນໍາຕໍ່ໂຄງການຕື່ມໃນການຈັດຕັ້ງປະຕິບັດໂຄງການ ແມ່ນບໍ່ໃຫ້ມີຄວາມລ່າຊ້າ ແລະ ເຊື່ອໝັ້ນວ່າການຈັດຕັ້ງປະຕິບັດໂຄງການນີ້ຈະມີຄຸນນະພາບທີ່ສຸດ ໃຫ້ພະຍາຍາມຫຼີກລ່ຽງບັນຫາສິ່ງທີ່ອຸດຕັນ, ກໍ່ໃຫ້ເກີດບັນຫາຜົນກະທົບຕໍ່ສິ່ງແວດລ້ອມ ແລະ ອື່ນໆ, ສືບຕໍ່ເອົາໃຈໃສ່ຈັດຕັ້ງປະຕິວັດແຜນພັດທະນາຂອງໂຄງການໃຫ້ໃຫ້ບັນລຸ ແລະ ມີຜົນສໍາເລັດຕາມຄາດໝາຍວາງໄວ້.